قوم امشي أقرا - نيالا

مبرووك لكل الطلاب التم قبولهم في الجامعات وتمنياتنا ليكم بالتفوق💙✨، فما مهم أنك تكون في جامعه سوبرانو أخر حلاوه
إنما أنت خليك سوبرانو ومكنه 😎أكاديميآ ،ثقافيآ وفي أي شي تاني وطور من نفسك وفيد وأستفيد من الحواليك💙✨

أكيد نفسكم تعرفوا المشغلينها ليكم بالبوستات ومحركين الصفحات 💙🔥

السلام عليكم إن شاء الله كلكم بتقروا كويس؟🤔
ما عارفة فجأة لقيت نفسي وصلت مرحلة إنّ ينزل تعريف لي هنا😂💙،قصتي مع قوم بدت كالآتي:-
معروف إنّ الفضول مسيطر علي ودائمًا بستكشف حاجات جديدة،في يوم أثناء ما بقلب في التيليجرام لقيت رابط إنضمام لمؤسسة قوم ووقتها ما كنت عارفة قوم دي أصلاً شنو وقناة قوم امشي أقرا قاعدة ضمن آلاف القنوات اللي ما بفتحها أصلاً إلّا في حالة قاطعة موضوع 😂
مليت الفورم من غير أيّ توقعات لو حأكون معاهم أو لا وما حاولت أعرف تفاصيل أكتر عن قوم،بعد فترة لقيت رسالة إنّ تم قبولي كسفير لجامعة الرباط،عيوني وقتها عملو قلوب قلوب 😂💙 وانخرطت سريع في الناس.
من سفير بديت أكتب حاجات تحفيزية صغيرة وكانت بتنزل في الصفحات وتاني بقيت ماسكة حساب الفيسبوك شوية شوية لحدي ما استلمت كل حسابات قوم امشي أقرا،تاني دخلت في أجواء الإعلام وبقيت كل مرة بمسك شي لحدي ما وصلت لكونّي مدير إعلامي ودي أكبر مسؤولية قابلتني في حياتي للآن؛فربنا يقدرني وأكون قدر المسؤولية 🙌🏻💙
قوم عبارة عن كُلّ المجتمع السوداني وقريباً حتوصل العالمية وده بجهودنا وجهودكم 🙏🏻💙
_إسراء إبراهيم
_١٩سنة
_طالبة طب وتقانة أسنان،جامعة الرباط الوطني،المستوى الثاني
_كاتبة محتوى
_مسؤول إعلامي في عدد من المنظمات
_ناشطة في العمل التطوعي.

أنت كبرلوم الإجازه ما حتكون ليك ذي أجازات الثانوي وكده ، فأحسن طريقه في أنك تكسب زمنك وتطور نفسك أنو تقرأ أيوا تقرا ، منتظر شنو ولا منتظر منو مع الجامعات البقت الدراسه لسنه الواحده فيها بالميت كده سنتين 😂، يلا أنت بقيت طالب باحث بعد كده فعليك أنو تفتش وتقرا الحاجات الما عارفها ، فتوفر المراجع والصور وحتي الفيديوهات لمعرفه والعلم ومدي التواصل المعرفي المتاح حاليآ ، يحسود عليهم ألكساندر فلمنج والرازي وابن سينا والله

الcreativity في التعليم الإلكتروني أنو يكون معاك زميل الدراسه أو رفيق الكتمه

فنوع في الأساليب وخطط ونفذ وعدل
and be positive
be positive
be positive

الجو دا جو شنو ؟


🗡️🗡️ دا جو قرايه بس😎

قال الامام الشافعي
شَكَوْتُ إلَى وَكِيعٍ سُوءَ حِفْظِي - فَأرْشَدَنِي إلَى تَرْكِ المعَاصي
وَأخْبَرَنِي بأَنَّ العِلْمَ نُورٌ -ونورُ الله لا يهدى لعاصي

جمعه طيبه ومباركه💙

جدول محاضرات قوم امشي أقرا رجع ليكم من جديد 🔥🔥🔥
كل الكورسات مجاناً وعلى موقع قوم امشي أقرا
اظبط المنبه ⏰ علي وقت المحاضرة ولمن يجي زمن المحاضره ح ننشر رابط اضغط عليهو وبس تلقى نفسك جوه المحاضرة.
ما عندك عذر، تعليمك لحدّ عندك
منشنو ناسكم وانشروها في كل مكان

موضوع اللغة الإنجليزيه المؤرق😔 أي برلوم داخل علي كلية طب أو أي مجال متعلق بالطب ، الليله حنحسمو🗡️ ويا كاتب التاريخ لا تغلق الصفحات🔥،،، غمض عيونك لمدة دقيقه وأنسي أي شئ أتقال ليك او اي خطه مجهزها مسبقآ ، ولو أنت برلوم عامل فيها متمكن من الإنجليزي برضو البوست دا ليك 🙃
فلو قالولك انك لو عابر في الإنجليزي الطب دا حيكون ليك لعب عيال توتو يبقي دي كذبة أبريل وأغسطس ويناير وباقي شهور السنه😏
أهم شئ أنك تهتم بالمصطلحات وبعد كل محاضره تكتبهم في أخر الدفتر ولمن ترجع جهز أقلامك حقت الرصاص✏️✏️ وأبدأ أحفظهم علي ظهر قلب ، وركز في المحاضره كويس عشان بعدين تقدر تقرأ الشيت اللي غالبآ هو نفس الماده البيعرضها الدكتور في البوربوينت ، فشرحو البلعربي حيساعدك كتير ولو سجلت المحاضره ريكورد بكون معاك كويس ، لأنك كل ما تكرر القرايه في الشئ الدرسوك ليهو اول بأول ما حتلاقي أي صعوبه بعدين ،،،،،
أحذر من انك تترجم المحتوي او الكورس بقوقل او أي تطبيق لأنو التطبيق البترجم ليك دا ما دكتور ولا فاهم تخصصك دا شنو فالترجمه حتكون ليك شترا 🤣 ذي لمن تسمع يقول ليك شيف فلان دا أشتر في الرقيص 🤣🤣
طبعآ الكلام دا بيقودنا طوالي لترجمه الدسيسه أي بتلقي كتب بالعربي فدي بتكون أترجمت من الإنجليزي لعربي لكن بواسطه بروفيسور أو دكتور متخصص في المجال فبيظبط الكلمات علي واحده ونص ، بالملي😎،
فحاول أقرأ الكتب دي قرايه سريعه وأعمل نقاط وأفهم المواضيع ماشه كيف ، فدا حيساعدك مع كمية المصطلحات الحافظها أنك تتحسن بسرعه جدآ وتلاقي نفسك بإمكانك تشرح لو سألوك بكل سهوله،، ،
بالنسبة لمراجع ما ضروري أنك تشتري مراجع حاول تابع دروسك بالتزامن مع المحتوي المقدم في اليوتيوب عن نفس الكورس أول بأول ، لأنو اليوتيوبر دا بقوم بجمع الجمل الساهله من المراجع ويدرسها فحتي لو كان في جمل صعبه برضو حتكون أستفدتا وفهمت الماده ، فلمن تستمر كده لحدي ما تصل لمستوي التاني أو التالت حتلقي نفسك بقيت عابر ، فالتغير يبدأ بخطوه وخطوه خطوه حتصل 🔥

سفراء جامعة نيالا💙