Coder

⭕ممكن اتعلم البرمجه بالتلفون🤔؟
قبل ما اجاوبك دايرك تعرف المصطلحات دي ع السريع كدا:

1️⃣ ال code editor:
يلا دا برنامج زي "محرر نصوص" او "نوته" يعني (تقدر تعمل ملف نصي وتكتب فيه كتابه).
لكن حقنا دا عندو ميزات بتساعدنا ك مبرمجين.......(عارفك بتكون شفتا صورت الهكر في الفلم داك...ولازم تكون انتبهتا على الكود المكتوب، بيكون فيه الوان مختلفه، بسسس).
يلا ال Code editor بعمل
#الالوان دي + #ترقيم السطور وغيرو من الميزات.
يعني فى النهايه محرر نصوص بميزات اضافيه، لكن ما بيقدر ينفذ الكود

2️⃣ ال compiler:
عرفنا انو ال "Code editor" بنكب بيه الكود،لكن عشان نشغل الكود دا ونشوف الناتج نحنا محتاجين ال "Compiler" عشان يحول الكود ل لغه الحاسوب.
(لو ما فاهم ارجع للبوست السابق في صفحتى Coder ، الرابط تحت👇)

3️⃣ ال IDE:
يلا عندك ال "IDE" او ال "Integrated Development Environment" او "بيئة التطوير المتكاملة"، دي بتعمل فيها كل الشغل، من الكتابه لحد تنفيذ الكود.
حاليا، والحمد لله،ممكن تتعلم البرمجه حتى ولو ما عندك لابتوب،ظهرت تطبيقات كتيره(IDEs) لمعظم لغات البرمجه.ولو التطبيقات ما نفعت معاك في مواقع في الويب تشغل الكود حقك اون لاين.

،عندك مثلا:

1️⃣ تطبيق pydroid:
لغه بايثون:
تطبيق ظابط وممتع جدا،بيشتغل اوف لاين،بيحتوى على مكتاب كتيييره زي ال numpy,pygame,scikitLearn....

2️⃣ تطبيق cxxdroid:
c&c++ IDE,لغة سي ولغه سي بلص بلص
برنامج بسيط وساهل، بيشتغل اوف لاين،بيدعم مكتبات زي SDL

3️⃣ تطبيق java N-IDE:
Java IDE,لغه الجافا
برنامج قوي ومميز، بيشتغل اوف لاين،ممكن تعمل بيه تطبيقات اندرويد عدييل

4️⃣تطبيق Kotlin compiler:
Kotlin IDE, لغه كوتلن
برنامج زابط شديد،عباره عن IDE معاه دروس،يعني تتعلم وتطبق عديل، بيشتغل اوف لاين برضو
5️⃣تطبيق code editor:
يلا دا عباره عن "Code Editor" (شرحنا معناها فوق)،ممكن تشغل بيه صفحات الويب يعني HTML & CSS & JavaScript بي localhost وهنا بيشنغل معاك اوف لاين عادي.
وما كدا بس،ممكن تشتغل بيه اي لغه برمجه (python,java,c,c++,c # ,kotlin, dart,.....) لكن محتاج ل نت.
6️⃣ تطبيق javascript editor:
JavaScript IDE, الجافا سكرب
ممكن تكتب بيهاكواد ال JS وتشغلها عادي.

:
1️⃣ تطبيق code editor:
دا نفس البرنامج الفوق،فيه خاصيه online compiler لمختلف لغات البرمجه

2️⃣ تطبيق sololearn:
دا موقع تعليمي (عندهم تطبيق اندرويد برضو)،عندهم برضو ميزه ال online compiler

3️⃣ مواقع الويب:
في النت في مواقع كتيره، تغطى مختلف لغات البرمجه عندك مثلا: Repl.it, Ideone, Codepad, JDoodle, OnlineGDB, Programiz, Codechef, JSFiddle, CodePen
يعني لو داير تتعلم كل الاحتياجات متوفره.

شاركنا في التعليقات اي تطبيق من ديل استخدمتو انت.

ما تنسو المتابعه والشير عشان تعم الفايده💫.

✅المرة الفاتت اتكلمنا عن اخيار لغه البرمجه المناسبه(الرابط تحت👇).....

⭕طيب، اها، انا اخترتا اللغه المناسبه، اتعلم كيف؟ ومن وين؟

* الليله ح اتكلم عن (بعض) المصادر المشهورة:
👈يوتيوب: الصراحه، ك زول جديد، بنصحك ب يوتيوب بشده،يعني، معظم الناس بتتعلم من يوتيوب،اليوتيوب دا كنز،بتلقى شروحات بالعربي او الانجليزي او اي لغه انتا دايرها.
👈الكتب: لو بتحب تقرا(مناسبه ل الناس الما بيكون عندهم نت كتير...يعني لحد ما توفق اوضاعك)، ممكن تبحث عن اسم اللغه + pdf في المتصفح، او تبحث عن ال documention...
👈مواقع: في مواقع تعلميه كتيره، زي sololearn,coursera,edx,freeCodCamp,w3schools وغيرها الكتير.
👈الكورسات المدفوعه:(دي ما انصحك تقرب ليها،لانو ممكن تلقى نفس الكورسات مجان اذا حاجات بسيطه وكدا)،يلا عندك coursera,google,microsoft وغيرها برضو في .

دي بعض المصادر المشهور،يعني لسه في غيرها مصادر كتييره،ممكن تبحث و ح تلقى المناسب ليك ان شاء الله

شاركنا في التعليقات من وين بديت تتعلم اول مره

لو وصلتا هنا ما تنسى تعمل متابعه وشير....

اتعلم ياتو لغه برمجه؟😩

دايما الناس بتسال السوال دا، ابدا من وين؟ابدا كيف؟اتعلم اي لغه؟

والله الصراحه،الجواب دا بتحددو انت.اول شي لازم تسال نفسك:انا داير اعمل شنو ب لغه البرمجه اساسا؟
-داير اعمل العاب 🎮
-داير اعمل تطبيقات اندرويد
-داير اكون هكر😎
-داير اعمل مواقع ويب
وغيرها الكتير

بعد داك بتشوف المجال ال انت دايرو شغال ب ياتو لغه برمجه، وبتقرا لغات البرمجه حقتو،لانو مجال من مجال الموضوع مختلف.

طيب، لو زول قال انا ما عارف داير اعمل شنو. ح اختار كيف؟

طيب هنا الموضوع صعب شويه، ممكن تشوف اشهر لغات البرمجه زي python او javascript.

مثلا عندك ال python دي شغاله في معظم المجالات تقريبا(تطبيقات، ويب،امن سبراني،ذكاء صناعي،...) وهي لغه ساهله وبسيطه جدا، ممكن تتعلمها،

او لو بتحب تتعلم وتكتشف اكتر عن الحاسوب وكيف بيشتغل ممكن تتعلم لغه زي c++، لغه قويه، وسريعه تستخدم في(انظمه التشغيل، الالعاب،التطبيقات)،وهي معقده شويه، لكن التعقيد دا بيكشف ليك حاجات كتيره مخفيه عن الناس.

نصيحه:لو انت زول داير تشتغل، حاول تختار مجال واضح قبل ما تبدا، عشان ما تضيع زمنك.واهم شي، انك تختار مجال واضح وتركز فيه،وتصبر وتطبق، غير كدا انت بتضيع في زمنك بس.

لو عندك اي اضافه او سوال اكتب لى في الكومنتات.

+ادخل التعليقات عشان تشوف بتقي البوست

دورة حياة الكود(من الكتابة، لحد تشغيل البرنامج):

دورة حياة الكود بتختلف من لغه ل لغه تانية، بتبدا من الكتابه، لحد ما نصل ل مرحله تشغيل البرنامج(بعدها برضو في حاجات). المضوع مختلف من لغه ل التانيه، عشان كدا انا ح احاول اذكر C وC++ وJava وPython وC # وKotlin ....(بشي من الايجاز).

* المرحلة الأولى: كتابة الكود
يلا قبل ما تكتب اسي شي، انت بكون عندك فكره،يلا تاني على حسب الفكره ال انت داير تعملها او المشروع حقك، والنتيجه شنو(تطبيق اندرويد، اي او اس،او ويندوز، او موقع ويب) ح تختار اللغه المناسبه

* المرحلة الثانية: الترجمة (C وC++ وJava وC # وKotlin)
من هنا تاني الشغل كلو تبع ال IDE(يعني كلو برامج)، يلا عندنا نوع معين من اللغات بنعمل ليه ترجمه،
زي C وC++ وJava وC # وKotlin.
يلا ناتج الترجمه (COMPILATION) بيختلف حسب اللغة برضو عندك مثلا:

* C وC++:
الناتج في النهايه (كود الآلة)،وبنعمل الترجمه باستخدام برامج مترجه زي GCC أو Clang.

* Java:
النتيجه النهائيه ( bytecode ). وبنشغل(التنفيذ) الكود الناتج ب Java Virtual Machine (JVM).

* C #:
نتيجه الترجمن هي Intermediate Language (IL) ال بيتم تنفيذه ب( .NET Common Language Runtime (CLR)).
* Kotlin:
النتيجه في الحاله دي ( bytecode ) يتم تنفيذه ب ال JVM.

** المرحلة الثانية: التفسير او (interpreting)
الخطوه دي ل لغات زي ال بايثون، اسمها (اللغات المفسرة)، في حاله النوع دا، الكود بيشتغل سطر ورا سطر(يعني لو عندك خطا في السطر رقم ١٠٠ البرنامج بيشتغل لحد السطر رقم ٩٩ عادي).في حاله بايثون ما (ترجمه) زي اللغات الفوق، لكن في برنامج بيشغل الكود سطر سطر اسمو (المفسر او interpreter)

** المرحلة الثالثة: الربط او (linking)
دا ل لغات ال (C وC++)

بالنسبة للغات زي ال C و ال C++، بيحصل ربط ل الملفات(لانو بيكون في مكاتب، عندك ملفات خارجيه، والكود زاتو مرات بيكون مقسم لكم ملف وكدا) ، بعد الربط بيكون عندنا ملف واحد و جاهز للتشغيل(للتنفيذ).

* المرحلة الرابعة: التعبئه او ال (packaging)
دي لغات ال Java و ال Kotlin، بتعمل تعبئه او (packaging) ل ال bytecode المترجم في المرحله رقم ٢،
الناتج بكون ملف JAR اختصار (java ARchive) بعد داك التفيذ باستخدام ال JVM.

* المرحلة الخامسة والسادسة:
١- التحميل: يتحمل في الرام.
٢- التشغيل او التنفيذ

* تاني ما في حاجه الا المراجعات الدوريه والتطوير

اكتب في التعليقات لو عندك اي اضافه، او تعديل، او تعليق

لغات البرمجة!
من العنوان يعني هي ما لغة واحده🤨؟؟ لكن لشنو🙂؟وشنو الفرق🤔؟ وانا اتعلم ياتو لغة منهم🥲؟؟
اول شي،اي في لغات كتييره، وفي فروقات بينهم.القصه كلها بدت ب انو اول لغة اتعملت كانت صعبه شديد،في قامو طوروها وعملو لغه تانيه ابسط منها،وكدا، لحد ما بقا عندنا لغات عالية المستوى زي c++, java,python وغيرو...
تابع الكومنتات عشان تعرف زياده عن لغات البرمجة

ماهي البرمجة؟؟

طبعا نحنا كلنا بنعرف الحاسوب (الكمبيوتر) ، وعارفين انو الحاسوب مكون من اجزاء (المعالج، اجهزة الادخال والاخراج.....).لكن الاجهزه دي بتشتغل كيف؟؟....كيف المعالج بيعرف انو انا داير منو شنو؟....وكيف الطابعه بتعرف الملف ال انا داير اطبعو من بين كل الملفات؟ وكيف وكيف!

الاجهزه دي كلها عشان تشتغل محتاجه ل اوامر (توجيهات)، والبرمجه هي الطريقه البنكتب بيها الاوامر دي.

السلام عليكم!
انا مبرمج وداير اشارك خبرتي وتجاربي الشخصية، عسى ان تفيد ليها زول.

Hello there!
I am a programmer who wants to share his knowldge and experience with public.