مركز لانتيرن للتدريب هو مركز متخصص في تدريب وتطوير الشباب وفي مختلف المجالات بالإضافة لتدريب رواد الأعمال وأصحاب المشاريع الناشئة.
11/06/2026
ليه الأفكار العبقرية البتنجح خارج السودان، بتفشل أول ما تنزل أرض الواقع في السودان ؟!!
في فخ كدا معظمنا كشباب بنقع فيه لما نفكر نفتح مشروع .. بنمشي قوقل، أو بنعاين لـ "تريند" ناجح جداً في مصر، الخليج، أو وسائل التواصل، وبنجي نطبقه عندنا نسخة طبق الأصل.
والنتيجة؟ الفكرة بتصدمنا بإنها بتفشل، ليه؟ 😐
لأننا بننسى نسأل أهم أسئلة لنجاح أي بزنس في بيئتنا .. الأسئلة الما بتلقاها في كتب ريادة الأعمال، زي:
✓ وضع الكهرباء والطاقة شنو؟
✓ المواصلات وسلاسل الإمداد ح تمشي كيف؟
✓ والأهم، عادات الناس الشرائية هنا في ظروفنا الحالية، ماشة وين؟
⭕ بالتالي البزنس الحقيقي ما إنك تجيب فكرة "رهيبة" وتتعقد من قلة رأس المال والبيئة الصعبة .. البزنس هو إنك "تحل مشكلة واقعية قدام عينك بما يناسب ناسك وظروفهم".
عشان كدا، نصيحة "لانتيرن" ليك:
اقفل قوقل و ChatGPT شوية، وانزل الشارع .. عاين للناس بتعاني من شنو في يومها؟ وابحث عن الحاجة الممكن تسهل حياتهم في الظرف الحالي.
لما تلقا المشكلة دي وتصنع ليها حل بسيط ومباشر، هنا إنت بدأت مشروعك صح، وبأقل رأس مال ممكن .. لأنك ببساطة بتبيع ليهم "الحل" العايزينه فعلاً.
حالياً لو عايز تبدأ مشروع أكتر حاجة موقفاك شنو:
- فهم السوق
- رأس المال
- عدم الخبرة
- عدم وجود مشروع مناسب
أكتب لينا إجابتك في التعليقات 💙
#التدريب
10/06/2026
كيف طفل سوداني قدر يختصر مفاهيم بزنس بتدرّس بآلاف الدولارات ؟!! (يستحق نتعرف عليه) !!
الطفل الفي الصورة دا، في مؤتمر الشباب السوداني بوِلاية كسلا، قدر يوصل فكرة إنه الوعي ما عنده أي علاقة بالعمر من خلال الكلام القاله عن ريادة الأعمال والبزنس.
ودي أهم 3 حاجات ركز عليها (معلومة، نصيحة، وحل مشكلة):
⭕ أهم معلومة
لو عندك رأس مال كبير، وعندك 5 أفكار مشاريع ونفسك تظبطها كلها مع بعض .. إياك تعمل كدا، الفهم الأساسي للبيزنس إنك تكسب ما تخسر.
لو نفذت الـ 5 أفكار دي في نفس الوقت، ممكن تنجح فكرة واحدة بس، والأربعة الباقين يخسروا، والـ 4 الخسروا ديل، حياكلوا أرباح الفكرة الناجحة ويخسروك قروشك كلها.
⭕ نصيحته القوية للشباب:
ابدأ شوية شوية، فكرة فكرة، ولما تنجح وتثبت، ضيف عليها البعدها .. (وده بالظبط مفهوم التركيز الاستراتيجي).
⭕ كيف قدر يحل مشكلة حقيقية ويطبق الكلام دا؟
حوّل كتاب الأدب الإنجليزي الـ(literature) لقصص مصورة ومجلات عشان الطلاب يفهموها بالنظر وما ينسوها تاني.
الخلاصة اللي بنطلع بيها كشباب:
معظمنا حالياً بيعاني من مشكلة "التشتت الرقمي والمهني" .. تلقى الواحد فينا 10 مهارات ويفتح مشروع في نفس الوقت .. في النهاية النتيجة زيرو.
حالياً سؤال:
شاركنا رأيك ومن وجهة نظرك شايف شايف أكبر سبب لفشل المشاريع في السودان شنو؟
#التدريب
09/06/2026
هل ممكن ترفض نعمة أداك ليها ربنا ؟! 😳
لأنه أكبر حاجة معطلاك حالياً، هي أعدل حاجة ربنا وزعها بالتساوي بين البشر
فأيا كان وضعك، أكيد نفسك تطور نفسك، تبني مصدر دخل، وتخفف الضغط المالي .. بس حُجتك الدائمة ما عندي وقت .. وربنا أدانا كلنا غني وفقير ناجح وفاشل نفس ال24.
طيب لو سألتك بتقضي كم ساعة في التلفون؟ وكم ساعة بتضيع منك ؟ كتير.. صح؟
بالتالي مشكلتك ما في الزمن .. مشكلتك في "إدارة وقتك".
⭕ في الحرب العالمية الثانية، النازيين كانوا حيحكموا الكوكب ويستعبدوا البشرية، بس أمريكا سبقتهم وصنعت السلاح الحسم الحرب لأنها أدارت وقت مشروعها بالثانية وعزلت العلماء عن أي مشتتات.
فخليك متذكر التاريخ اتغير بالدقة، وأنت مستقبلك وحياتك المادية حيتغيروا لو أدرت الـ 24 ساعة حقتك صح.
حالياً شاركنا في التعليقات:
شنو أكتر "مُشتت" حاسس إنه سارق وقتك ومأخرك عن أهدافك ؟
ولو قادر تدير وقتك صح اكتب "الحمد لله" 💙
#التدريب
09/06/2026
هل في فرص شغل بجد داخل السودان في الظروف دي .. ولا نحن بنصبر في نفسنا ؟!!
السؤال دا بنسمعه كل يوم من الشباب ..
والإجابة نعم في فرص وفي قطاعات شغالة ومحتاجة ناس، بس المشكلة إننا بنفتش في المكان الغلط وبالطريقة القديمة.
⭕ فلو إنت قاعد في السودان ومحبط، دي أكتر 3 مجالات (الطلب عليها زايد جداً حالياً) وممكن تبدأ فيها:
✓ إدارة وتأمين صفحات البزنس والمحلات:
بعد الحرب مئات المحلات والتجار ( المطاعم، الصيدليات، محلات الملبوسات) نقلوا شغلهم لولايات تانية أو خارج البلد، وأصحاب الشغل ما عندهم وقت يديروا صفحاتهم على الفيسبوك والواتساب .. بالتالي المجال دا مطلوب شديد محلياً لأنه بيجيب للتاجر زبائن في مكانه الجديد.
✓ صناعة المحتوى التسويقي وكتابة الإعلانات:
أي براند سوداني شغال حالياً، محتاج يكتب إعلانات تقنع الزبون يشتري منه هو بالذات وسط الغلاء .. فالشركات بتبحث عن زول بيعرف "يكتب بوست بيبيع".
✓ الدعم الفني والمبيعات عن بُعد:
شركات التوصيل، التطبيقات، والمراكز الطبية الشغالة حالياً، كلها محتاجة شباب يردوا على المكالمات والرسائل من بيوتهم لتسهيل الطلبات.
الخلاصة:
التاجر أو صاحب الشغل مستعد يدفع ليك لو أقنعته بإنك حتساعده يظهر في السوق، يدير زبائنه، أو يزيد مبيعاته.
فسؤال ليك
أنت من ياتو ولاية حالياً؟
وشنو أكتر نوع بتاع محلات أو بزنس شايفه فاتح وشغال ومتحرك حولك ؟
#التدريب
08/06/2026
سمعت بالطيارة الجديدة الممكن تسافر بيها من غير طيار ؟!!
الطيارة دي بتخليك تمشي أي دولة في العالم، وتشتغل هناك، من غير ما تدفع حق التذكرة حتى😳
أكيد حتقول لينا (دا كلام تنمية بشرية ساي)😏
بس دقيقة .. في ناس حولك (وبنعرفهم شخصياً) قدروا يصلوا لمرتبات اتعدت المليار جنيه شهرياً من الإنترنت وبس، وهم قاعدين في بيوتهم.
في 2026 بالذات، المفاهيم اتغيرت .. والجواز الحقيقي اليوم هو مهارتك
- الجواز العادي بيخليك تدخل دول تانية بجسدك.
- الجواز الرقمي (مهارتك): بيخليك تسافر لشركات الخليج .. أمريكا .. أو أوروبا بـ "عقلك"، تقدم خدماتك وتستلم قروشك بالعملة الصعبة وأنت في مكانك.
فلو عندك مهارة قوية في كتابة المحتوى والتسويق الرقمي .. التصميم والمونتاج .. البرمجة أو إدارة الصفحات،
أنت كدا عندك "تذكرة سفر مفتوحة" لأي سوق عمل في العالم.
الخلاصة:
الوضع ضاغط؟ صعب تسافر؟
الموبايل والإنترنت الشايلهم في إيدك ديل هُم طيارتك الخاصة .. فأستثمر فيهم.
سؤالنا ليك
- شنو المهارة الشايف إنها ممكن تكون جوازاك الرقمي؟
- ولا لسة ما اتعلمت؟
-
#التدريب
07/06/2026
ليه أنت كشاب بقيت حاسس إنك ما حتنجح إلا لو سافرت برا السودان؟!!
مهما كان مجالك أو شغفك، بنسبة 90% أنت خاتي "الفيزا والاغتراب" هو الخيار الأول والوحيد في بالك .. والوضع دا ما جاء من فراغ، بل ناتج من 3 أسباب حقيقية كلنا عايشينها:
✓ ضياع قيمة المجهود والعملة: ممكن تتعب وتشتغل سنة كاملة، وفي النهاية تضخم واحد يطير المرتب قبل ما ينزل، وتلقى نفسك عاجز تبني، تتزوج، أو تستقر.
✓ الضغط الاجتماعي وصورة "المغترب البطل" .. دائما بنلقا المجتمع رسخ في بالنا إنه النجاح مربوط بالريال والدولار، وإنو القاعد في البلد دا "مضيع زمنه"، والتصفيق دايماً بيمشي للمسافر👏
✓ غياب العدالة في الفرص
إحساسك بإنه الوظائف الكويسة بقت معتمدة على الواسطة والمعارف أكتر من كفاءتك وتعبك في القراية.
بس سؤالنا ليك:
هل فعلاً الحل الوحيد عشان تستلم عملة صعبة وتأمن مستقبلك هو إنك تفقد أهلك وتتبهدل في الغربة؟
وهل بتعرف زول من محيطك قدر يحقق إنجاز وهو جوة السودان؟
#التدريب
05/06/2026
آيا كان وضعك أكيد بيهمك تعمل مصدر دخل
بس لو قلنا ليك مهما بذلت وقدمت سنين ما حتحقق الحاجة دي ما لم تعرف نوع عقيلتك ؟!!
وعشان تعرف محتاجين إجابة واحدة بس، الإجابة دي بناءً عليها حتقدر تعمل مصدر دخل .. وما بس كدا .. حتقدر تحدد وضعك الحالي و بعد كم سنة (فقير، متوسط دخل، غني).
أختار إجابة واحدة فقط وحنرسل ليك نوع العقلية المالية القاعدة تتحكم في قراراتك، والسبب في أنك ما بتقدم مهما عملت.
احفظ البوست عندك عشان تقارن الإجابات وابقا اشكرنا في اليوم المبارك دا. 🚶♂️
#التدريب
04/06/2026
محيطك وعائلتك أول سبب للفقر الإنت فيه 😑
بس قبل تزعل أو تستغرب جاوب ..
الفقر هو شنو؟ هل هو بس عدم وجود المال؟
والمال ذاته بالنسبة ليك شنو؟
لأن في حاجتين لو ما غيرتهم وضعك المادي غالباً حيظل زي ما هو:
- التعود .. لو أنت متعود تشوف الصرف بطريقة معينة حتعيد نفس النمط بدون ما تحس.
- طريقة التفكير .. لو الناس الحواليك شايفين المال حاجة سيئة أو مستحيلة، الفكرة دي بتتزرع فيك بالتدريج.
ودي 3 اشياء بتورثك الفقر بدون ما تنتبه:
1- التلقين الشفهي
زي ما بتتعلم في المدرسة بالكلام برضو بتتعلم العادات المالية بالكلام.
العادات دي من نوع (المال للبخلاء، القروض بتفرق الأهل، الأغنياء ما مرتاحين) 🙄
2- التقليد
تلقا عمك فاتح مشروع، خالك دخل مجال، جارك عمل حاجة .. تقوم تقلدهم قبل تعرف هل دا مناسب ليك ولا لا.
3- الأحداث والمواقف
موقف واحد ممكن يخليك تكره المال طول عمرك
أو يخليك تجري وراه بصورة مبالغ فيها.
الخلاصة:
ما حتبقا غني وتزود دخلك ما لم تغير عاداتك وتفكيرك.
حالياً سؤال:
أنت في رأيك المال شنو؟
وهل بتتفق مع إنه الفقر بيتورث ولا لا؟
#التدريب
03/06/2026
لو أنت عارف الخطوة الجاية في حياتك اعمل سكرول
أما لو كل يوم بتسمع عن البرمجة، التجارة، التسويق، صناعة المحتوى، العمل الحر ومحتار تبدأ من وين، فجاوب على الأسئلة دي:
1️⃣ عندك كم ساعة فاضية في الأسبوع؟
ما الساعات البتتمنى تكون فاضية .. الساعات الموجودة فعلاً.
2️⃣ شنو الموارد المتوفرة عندك حالياً؟
موبايل؟
لابتوب؟
إنترنت؟
لغة إنجليزية؟
رأس مال؟
3️⃣ المهارات البتعرف تعملها حالياً شنو؟
حتى لو شايفها عادية.
لأنه دخلك ورزقك ممكن يجيك من حاجة موجودة عندك من زمان.
4️⃣ داير دخل سريع ولا داير تبني حاجة تكبر مع الزمن؟
لأن الطريقين مختلفين تماماً وطريقة الوصول كذلك.
5️⃣ شوف أقرب شخص ليك في الظروف والإمكانيات.
بدأ من وين؟
ووصل لوين؟
بعد ما تجاوب على الأسئلة دي، حتكتشف إنه في خيارات كتيرة حتطلع برا القائمة.
وحتبقا قدامك فرص أقل .. لكن أوضح.
الخلاصة:
بدل تضيع سنة كاملة تفتش عن المجال المثالي،
ابدأ بمجال جيييد.
لأنه سنة من التنفيذ بتعلمك أكتر من سنة من التفكير (أحفظ البوست عندك عشان تقيم وضعك)
حالياً لو سألناك سؤال بسيط:
عندك كم ساعة فاضية ؟
وشنو المورد المتوفر عندك ؟
#التدريب
03/06/2026
التوفير أغلى قرار ممكن تاخده مستغرب ؟!!
في شخص قضى 3 أيام كاملة يفتش في موبايل رخيص ..
فتح فيديوهات، قارن الأسعار سأل ولف على كل المحلات، وفي النهاية نجح ووفر مبلغ من المال 50 جنيه.
فهل المشكلة في المبلغ الوفرة؟؟
لا مشكلته إنه خلال الـ3 أيام دي كان مركز على توفير المال أكثر من تركيزه على قيمة وقته.
وده الفرق بين طريقتين في التفكير:
شخص بيسأل"كم حأوفر ؟"
وشخص بيسأل "كم ساعة حأخسر؟"
لأنه المال لو ضاع ممكن يرجع، لكن الساعة البتمشي ما بترجع.
بالتالي حتجي بعد سنوات تلاحظ فرق الوقت وحتلقا نفسك خسرت بسبب التوفير.
فالسؤال:
لو قيمت ساعة واحدة من يومك بمبلغ مالي، حتساوي كم عندك ؟
Be the first to know and let us send you an email when لانتيرن للتدريب - Lantern Training posts news and promotions. Your email address will not be used for any other purpose, and you can unsubscribe at any time.
