A&M For Educational Solutions

A&M For Educational Solutions نقدّم خدمات المنح، تجهيز الأوراق، كتابة البحوث الأكاديمية، تصميم السيرة الذاتية، استشارات أكاديمية

28/06/2025

مهم لطلاب الشهادة السودانية الدفعة الموجلة 2023

ابتداءً من اليوم وحتى يوم الأحد الموافق 6 يوليو، تتوفر لكم الخدمات التالية:

✅ سحب استمارة التقديم الإلكتروني للجامعات السودانية
✅ التقديم الإلكتروني للرغبات

📲 كل الخدمات متاحة أونلاين عبر رقم الواتساب:
📞 0919417683

25/06/2025

📌 أهم الموجهات الخاصة بالتقديم الإلكتروني للجامعات السودانية:

1. أول حاجة: اتصفح دليل التقديم كويس، واستخرج خياراتك بعد مشورة من ناس تثق فيهم، وراعي ظروف أسرتك، خصوصًا لو ناوي تقدم على جامعات أو كليات خاصة.
2. التقديم الأول بيفتح إن شاء الله يوم الجمعة، وده خاص فقط بطلبة الشهادة السودانية دفعة 2023، وما بشمل أي دفعة تانية.
3. أما طلاب الشهادات السابقة (من 2022 وفما دون):انتظروا تقديم شواغر الجامعات والكليات الخاصة والدبلوم الحكومي.
4. في التقديم الأول اللي ھيا القبول العام:
ممكن تخت كل رغباتك في جامعات حكومية.أو جزء حكومية وجزء خاصة.أو دبلومات.أو خلط بين التلاتة. القرار ليك وحسب التخصص اللي عندك فيھ رغبة سواء كان بكالوريوس او دبلوم سواء كان في جامعة حكوميةاو خاصة
5. في التقديم الثاني والثالث: لكن كل تقديم منفصل عن التاني.التقديم التاني ما بيبدأ إلا بعد إعلان نتيجة التقديم الأول.والتقديم التالت ما بيبدأ إلا بعد نتيجة التاني.
6. طريقة ترتيب الرغبات:
رتب خياراتك حسب الأولوية. الرغبة البتتمناها أكتر ختّها في الأول، ثم البعدها، وهكذا.
7. ما تستعجل في التقديم:
الطالب القدم أول يوم والطالب القدم خامس يوم، مافي فرق. لأنو التقديم مرحلة، والقبول بيجي في مرحلة تانية.
8. اتأكد من تفاصيل نتيجتك:
أي رسوب في أي مادة (حتى لو واحدة) بيمنعك من دراسة البكالوريوس، وبيخلوك تتوجه للدبلومات.
9. اعرف تخصصاتك المسموحة حسب مساقك:
طلاب الأحياء: ما بيدخلو كل الهندسات، عدا الهندسة الطبية، والباقي ممكن فقط في الدبلومات.
طلاب الأدبي: ما بيدخلو تقنية المعلومات أو نظم المعلومات، إلا في الجامعات الخاصة او دبلومات

10. تخصصات لكل مساق:
•طلاب علمي الأحياء: تخصصات طبية، صحية، زراعية، حيوانية... إلخ.
•طلاب علمي ھندسية وحاسوب : جميع تخصصات الهندسة
•طلاب العلمي ككل: تخصصات زي الحاسوب، الجيولوجيا، العلوم، التربية.
•طلاب الأدبي: مجالات مثل الاقتصاد، القانون، الإعلام...
•طلاب العلمي ممكن يقدموا في اي مجالات ادبية لكن العكس غير صحيح.
11. مطلوبات التقديم:
•رقم الجلوس.
•الرقم الجامعي (بيظهر بعد دفع رسوم التقديم للوزارة عبر التطبيقات او البنك).
•الدخول لموقع التقديم الإلكتروني واتباع الخطوات الخمس.

12. منو يقدم؟:
لو انت فاهم الخطوات كويس، قدم بنفسك. ولو ما واثق، خلى زول متمكن يقدم ليك.(ممكن تتواصلو معانا للتقديم)

🔴 وأخيرًا، رسالة للأسر الكريمة:
ما تجبروا أولادكم على تخصصات ما ميالين ليها، ساعدوهم بالتوجيه والتوضيح، لكن خلو القرار الأخير ليهم، لأنو هم البقرو، وهم البمشوا في المشوار.

🔴رسالة للطلاب :
التخصص البتختارو اليوم، حتعيش معاه من 3 إلى 5 سنين أو أكتر...
فـ اختار المجال البتحس إنك بتحبو وبتقدر تواصل فيهو،
اختار حسب ميولك وقدراتك، وإن شاء الله حتبدع وتتميز.

أبنائنا وبناتنا طلاب الشهادة السودانية – الدفعة المؤجّلة،زي ما عوّدناكم في كل سنة، وقربت مرحلة التقديم الإلكتروني للجامع...
24/06/2025

أبنائنا وبناتنا طلاب الشهادة السودانية – الدفعة المؤجّلة،

زي ما عوّدناكم في كل سنة، وقربت مرحلة التقديم الإلكتروني للجامعات السودانية، قررنا نرجع ليكم بمحاضرة توعوية ، عشان نساعدكم تقدموا بطريقة صحيحة، وتختاروا رغبات تناسب ميولكم.

إنتو اجتهدتوا ونجحتوا رغم الظروف الصعبة والمحنة الكبيرة المَرّت بيها البلد، واللي منعت بعض زملاءكم في ولايات ما كانت آمنة من إنهم يمتحنوا.

ونحن عارفين تعبكم ما كان ساهل، وعشان كدا ما بنخليكم في أهم مرحلة، وهي التقديم الإلكتروني، واللي بتعتبر الوسيط بينكم وبين الجامعة.

عشان كدا، نظمنا ليكم محاضرة توعوية مهمة، حنتكلم فيها عن كل الأسئلة البتدور في بالكم، وحنشرح كل الحاجات بصورة مبسطة وسلسة عشان تفهموها كويس وتتفادوا الأخطاء الشائعة في التقديم.

وكل دا مبني على خبرتنا الطويلة في التقديم الإلكتروني على مدى سنين.

خليكم جاهزين، وكونوا في الموعد.
⏰الزمان: الاربعاء ٢٥ يونيو ٢٠٢٥م الساعة الثامنة مساءا
المكان: اونلاين على قناة التلغرام
رابط القناة:
https://t.me/Eshraqa_edu_sd

22/06/2025

إلى طلاب الشهادة السودانية – الدفعة المؤجّلة 2023:

أخيرًا نزلت دلائل التقديم الإلكتروني للجامعات السودانية في موقع الإدارة العامة للقبول والتقويم وتوثيق الشهادات.
ومتوقع التقديم يبدأ خلال الأيام الجاية إن شاء الله، فخليكم جاهزين.

أهم الملاحظات بعد ما راجعنا الدلائل:

🔸 الجامعات:
الجامعات الحكومية زي ما هي، في كليات خاصة اتحوّلت لجامعات. وأضافوا كمان بعض الكليات الخاصة الجديدة.

🔸 التخصصات:
ما في برامج جديدة؛ كنا متوقعين يضيفوا تخصصات حديثة خاصة في الحاسوب والذكاء الاصطناعي، لكن دا ما حصل.

🔸 الرسوم الدراسية للجامعات والكليات الخاصة :
في زيادة واضحة في الرسوم مقارنة بالسنة الفاتت.
أعلى رسوم للبرامج الدراسية هي: الطبية والهندسية ، بعدهم الحاسوب ، في التخصصات الأدبية، العلوم الإدارية هي الأعلى تكلفة.

🔸 نِسَب القبول للجامعات الحكومية:
اعتمدوا نسب قبول سنة 2022 للتقديم.
لكن بسبب الفروقات الكبيرة في عدد الناجحين السنة دي مقارنة بالسنوات الماضية، ممكن تكون فرص القبول أكبر في الجامعات الحكومية.

🔸 الدبلومات:
ما في برامج دبلوم جديدة في معظم الجامعات. والرسوم زادت بشكل كبير مقارنة بالسنة الفاتت.

📥 الدلائل متاحة حاليا في موقع الإدارة العامة للقبول والتقويم وتوثيق الشھادات بتقدر تشوفها أونلاين أو تنزّلها PDF.

✅ ننصح الطلاب:
قبل ما تبدأ التقديم، اقعد واقرأ الدلائل كويس.
قارن بين الكليات والتخصصات وشوف الأنسب ليك من حيث الميول والفرص والمصاريف.
بعد دا رتب رغباتك بعناية... عشان لما يفتح التقديم تكون جاهز 100%.

📆 التقديم قرب... شدوا حيلكم وربنا يوفقكم 🙌

اذا في اي اسئلة ارسلوا في التعليقات وحنجاوب عليھا

📢 إعلان مهم لطلاب الشهادة السودانية – دفعة 2023 المؤجلةبنبشركم إنو دلائل القبول نزلت في موقع الإدارة العامة للقبول والتق...
21/06/2025

📢 إعلان مهم لطلاب الشهادة السودانية – دفعة 2023 المؤجلة

بنبشركم إنو دلائل القبول نزلت في موقع الإدارة العامة للقبول والتقويم وتوثيق الشهادات، وبتوفيق الله، متوقعين التقديم الإلكتروني للجامعات يفتح خلال الأيام الجاية.

🔹 الدلائل المتوفرة في قناتنا على التلغرام:

📘 دليل نسب القبول للجامعات الحكومية – بكالوريوس
💰 دليل الرسوم للجامعات والكليات الخاصة والأهلية – بكالوريوس
📗 دليل رسوم الدبلومات – للجامعات الحكومية والخاصة

📥 عشان تنزلوا الدلائل، أدخلوا على قناة التليغرام من الرابط ده: 🔗 https://t.me/Eshraqa_edu_sd

📌 تابعونا، قريب جدًا حننزل ليكم شرح مفصل عن خطوات التقديم والإجراءات.

📞 عندكم أي سؤال أو دايرين استشارة أكاديمية بخصوص التقديم؟
راسلونا في صفحة الفيس أو واتسابنا على الأرقام دي:
📱 +249919417683
📱 +211980840028

نتمنى ليكم كل التوفيق والنجاح يا أبطال 🌟

التقديم للجامعات السودانية لطلاب الشهادة السودانية 2023 المؤجلة حتبدا بتين؟أول حاجة:لحدي الآن، وزارة التعليم العالي والب...
31/05/2025

التقديم للجامعات السودانية لطلاب الشهادة السودانية 2023 المؤجلة حتبدا بتين؟

أول حاجة:
لحدي الآن، وزارة التعليم العالي والبحث العلمي ما أعلنت عن موعد التقديم بالضبط لكن ذكرت انها حتعلن عن موعد التقديم عقب عيد الاضحى.
تاني حاجة:
زي ما متعودين في السنين الفاتت، التقديم عندو خمس مراحل رئيسية، ودي هي:

1. التقديم العام:
في المرحلة دي، الطالب بقدر يقدّم للجامعات الحكومية أو الخاصة، سواء كان دبلوم أو بكالوريوس.
كمان بيكون في تقديم ولائي، ودا خاص بالطلاب الامتحنو امتحان الشهادة في الولايات (يعني ما الخرطوم)، ودا خاص بس بالشهادات الجديدة.
قبل بداية التقديم، إدارة القبول بتنزل الأدلة التالية:
●دليل نسب القبول للجامعات السودانية.
●دليل الرسوم للجامعات والكليات الخاصة (بكالوريوس).
●دليل رسوم الدبلومات للجامعات الحكومية والخاصة.
2. التقديم لمنح الجامعات والكليات الخاصة:
▪الفرصة دي متاحة لطلاب الشهادات الجديدة بس.
(السنتين الفاتو فتحوا فرصة التقديم للمنح، لكن السنة دي ما معروف حيفتحوا ولا لأ).
3. التقديم للقبول الخاص في الجامعات الحكومية وأبناء العاملين:
▪المرحلة دي فيها تقديم للجامعات الحكومية وفق دليل خاص بالرسوم.
▪الطالب ممكن يقدّم لتخصص أعلى من نسبتو بزيادة لحدي 10 درجات كحد أقصى، لكن القبول بيكون تنافسي.
4. التقديم لشواغر الجامعات الخاصة والحكومية (دبلوم فقط):
المرحلة دي بتشمل:
▪طلاب الشهادة الجديدة.
▪طلاب الشهادات السابقة.
▪وبيستخدموا في الدور دا نفس دليل الرسوم بتاع الدور الأول.
5. التقديم لشواغر الجامعات الحكومية (بكالوريوس):
يتاح فقط للطلاب الذين لم يُقدّموا في الدور الأول إطلاقًا.
أما من قدّموا سابقًا سواء تم قبولهم أو لا، ما بقدروا يقدّموا في الدور دا.
بينزل دليل خاص بيورّي الشواغر الموجودة في كل كلية.

أدلة وزارة التعليم العالي:
الوزارة حتنزل الأدلة الرسمية بصيغة pdf في موقع الادارة العامة للقبول في الايام القليلة المقبلة.
الدليل عبارة عن كتيب كبير مقسم على فصول كل فصل بيتناول جزئية معينة والفصول دي هيا:
●دليل نسب القبول للجامعات الحكومية.
●دليل الرسوم للجامعات والكليات الخاصة (بكالوريوس).
●دليل رسوم الدبلومات (الحكومية والخاصة).
●دليل رسوم القبول الخاص للجامعات الحكومية.
●دليل بأسماء الجامعات الحكومية ورموزها.
●دليل بأسماء الجامعات والكليات الخاصة ورموزها.
●دليل تفاصيل الجامعات الحكومية.
●دليل تفاصيل الجامعات الخاصة.
●دليل الشروط العامة المؤهلة للقبول.
●دليل المواد المؤهلة للقبول في التخصصات المختلفة.

رابط صفحة وزارة التعليم العالي والبحث العلمي:
https://www.facebook.com/www.MOHE.GOV.SD






لو لسه محتار التخصص ده علمي ولا أدبي؟ ولو علمي، هو لأحياء ولا هندسي ولا حاسوب؟ المنشور ده ليك.قبل ما تقدموا للجامعات، مه...
26/05/2025

لو لسه محتار التخصص ده علمي ولا أدبي؟ ولو علمي، هو لأحياء ولا هندسي ولا حاسوب؟ المنشور ده ليك.

قبل ما تقدموا للجامعات، مهم جدًا تعرفوا إنو في تخصصات كتيرة، ونوع المساق والمادة الإختيارية بيحددو التخصصات الممكن تقدموا ليها. تعالو نعرفكم بالمساقات المختلفة وتخصصاتهم، فكل مساق بيؤهل الطالب أنو يختار التخصصات حسب لوائح ونظم وزارة التعليم العالي.

• الشهادة السودانية (المساق الأكاديمي): ودي فيها مساقين، علمي وأدبي.
• الشهادة السودانية الفنية: ودي فيها التجاري، الصناعي، الزراعي، النسوي.
• شهادة القرآن الكريم والدراسات الإسلامية.

أولاً: تخصصات طلاب المساق العلمي (أحياء بس)
الطلبة القرو أحياء هم بس البيدخلوا المجالات الطبية والصحية والزراعية والحيوانية والبيئية اللي هيا: الطب، الصيدلة، طب الأسنان، المختبرات، الأشعة، التمريض، القبالة، التخدير، والعلاج الطبيعي، وكمان الإنتاج الحيواني، الطب البيطري، الصحة العامة، علوم البحار، علم النفس (الصحي، السريري، الجنائي)، الزراعة، الغابات، الموارد الطبيعية، العلوم البيئية (تقانة البيئة)، البصريات، التغذية، وطب العيون.

ثانياً: تخصصات طلاب العلمي (حاسوب وهندسية)
الطلبة القرو هندسية أو حاسوب بيقدروا يدخلوا كل تخصصات الهندسة، زي الهندسة المدنية، الكهربائية، الميكانيكية، وهندسات تانية.

ثالثاً: تخصصات مشتركة بين طلاب العلمي (أحياء، هندسية، حاسوب)
في تخصصات مشتركة ممكن كل طلاب المساق العلمي يقدموا ليها، زي الهندسة الطبية، علوم الحاسوب، تقانة المعلومات، العلوم الرياضية، قسم الرياضيات، المختبرات العلمية، الفيزياء، الإحصاء، العلوم التطبيقية، علوم الأرض، الذكاء الإصطناعي، تكنولوجيا المعلومات، أمن المعلومات، التربية العلمي، التربية التقنية، التخطيط الحضري، هندسة المعرفة، البكالوريوس التكنولوجي، الحماية المدنية، وعلوم الكوارث.

رابعاً: تخصصات طلاب المساق الأدبي (والعلمي كمان ممكن يقدم ليها)
طلبة الأدبي يقدروا يدخلوا كليات زي الآداب، الجغرافيا، الإقتصاد، العلوم الإدارية، التربية الأدبي، الشريعة والقانون، العلوم الإسلامية والعربية، دراسات المجتمع، التنمية الريفية، تنمية المرأة، علوم السكان، إدارة المعرفة، إدارة المنظمات، علوم الإتصال، الإعلام، رياض الأطفال، علم النفس، أصول الدين، التربية الرياضية، التربية الأساس، الفنون الجميلة، التربية الفنية، الموسيقى والدراما، التصميم الفني، السياحة والفندقة، الوسائط المتعددة، كلية القرآن الكريم، ونظم المعلومات (لكن فقط في التعليم الأهلي والخاص). كمان عندهم فرص في نظم المعلومات المحاسبية، نظم المعلومات الإدارية، نظم المعلومات المكتبية، نظم المعلومات الجغرافية، التصميم الداخلي، الطباعة، إدارة الطيران، وإدارة الحركة الجوية.

ً
• في تخصصات بتقدم ليها مباشرة، وتخصصات تانية بتقدم ليها باسم الكلية وتتوزعوا فيها بعدين (يعني فيها تشعيب).
• ما كل التخصصات متاحة في كل الجامعات، في تخصصات نادرة زي الذكاء الإصطناعي وطب العيون ومقارنة الأديان.
• الطالب العلمي لو امتحن فنون، ما بيقدر يدخل كل تخصصات العلمي، بس عندو فرصة في هندسة العمارة.
• طلاب الأدبي ما بيقدروا يقدموا لتخصصات الحاسوب في الجامعات الحكومية، إلا لو كانت نظم معلومات إدارية أو محاسبية أو مصرفية، لكن ممكن يقدموا في الجامعات الخاصة أو دبلوم.
• القيود عشان تختار التخصص بتتغير في الدبلوم، فممكن طالب الأدبي يقرأ تقنية معلومات في دبلوم، أو طالب أحياء يقرأ هندسة في دبلوم، يعني الفرصة مفتوحة في الدبلوم لتخصصات م ممكن تدرسها في البكلاريوس.
• الطلبة الحرفيين ما بيقدروا يدخلوا الجامعة مباشرة، لازم يدرسوا برنامج تأهيلي أول.
• سياسات القبول أحياناً بتتغير، زي إلغاء التشعيب مثلاً، ودي بتصدر من وزارة التعليم العالي.

ختاماً، نصيحة مننا ليك:
قبل ما تختار تخصصك، أقعد راجع واتأكد إنو التخصص البتتمناه واللي رغبتك فيه مناسب للمساق القريتو، عشان تتفادى أي مشكلة في القبول وتضمن تمشي في طريقك وانت مرتاح






محتار تقدم دبلوم ولا بكالوريوس؟إلى طلابنا، طلاب الشهادة السودانية دفعة التحدي 2023 المقبلين على التقديم للجامعات:درجة ال...
25/05/2025

محتار تقدم دبلوم ولا بكالوريوس؟

إلى طلابنا، طلاب الشهادة السودانية دفعة التحدي 2023 المقبلين على التقديم للجامعات:

درجة الدبلوم ودرجة البكالوريوس – الفرق والمميزات

في السودان، الجامعات والكليات (سواء كانت حكومية أو خاصة) بتقدم نوعين رئيسيين من البرامج للطلاب الحاصلين على الشهادة الثانوية والدايرين يواصلوا تعليمهم الجامعي، وهما: برنامج البكالوريوس وبرنامج الدبلوم. في السطور الجاية، ح نشرح ليكم الفرق بين الاثنين ومميزات كل واحد، عشان تختاروا الأنسب ليكم حسب نتيجتكم وميولكم

1. برنامج البكالوريوس / بكالوريوس الشرف
• شروط القبول: النجاح في كل المواد السبعة في الشهادة.
• مدة الدراسة: من 4 إلى 5 سنوات، حسب التخصص والكلية والجامعة.
• المميزات:
بتيح ليك تخصص أعمق في المجال الأكاديمي.
بتقدر تكمّل دراسات عليا (ماجستير ودكتوراه) بعد التخرج مباشرة.
مناسب للناس العايزين يمشوا في مسارات أكاديمية أو مهنية متقدمة.

2. برنامج الدبلوم
• شروط القبول: النجاح في 5 مواد على الأقل.
• مدة الدراسة: من سنتين إلى 3 سنوات (في الغالب 3 سنوات).
• المميزات:
بتيح ليك تدخل سوق العمل بسرعة.
ممكن تكمّل لاحقًا لدرجة البكالوريوس عن طريق برامج "التجسير" أو "التصعيد" بشروط معينة.
فيهو تخصصات عملية ممكن تكون غير متاحة في برنامج البكالوريوس لبعض المسارات (علمي أو أدبي).

ختامًا:
شوف نتيجتك كويس، لأنو القبول في أي من البرنامجين بيعتمد على عدد المواد الناجح فيها. النجاح في مادة الرياضيات مهم جدًا، لأنه شرط أساسي للقبول في كتير من تخصصات الدبلوم، سواء كنت من المساق الأدبي أو العلمي. فخلي بالك من النقطة دي.












مؤسسات التعليم العالي في السودانهل أنت طالب شهادة سودانية وبتجهّز نفسك للمرحلة الجاية؟قدامك خيارات كتيرة، لكن كيف تختار ...
23/05/2025

مؤسسات التعليم العالي في السودان

هل أنت طالب شهادة سودانية وبتجهّز نفسك للمرحلة الجاية؟
قدامك خيارات كتيرة، لكن كيف تختار الصح؟
المنشور دا ح يساعدك تتعرف على أنواع الجامعات والكليات في السودان، الفرق بينها، رسومها، وفرص القبول فيها – عشان تبدأ مشوارك الجامعي بثقة!

1. الجامعات الحكومية 🏛️
في السودان حوالي 37 جامعة حكومية، منتشرة في الخرطوم وكل الولايات.
أمثلة: جامعة الخرطوم-جامعة النيلين-جامعة بحري
شنو المميز فيها؟
✅ القبول العام: برسوم منخفضة ومناسبة
💰 القبول الخاص: برسوم أعلى
⚖️ 50% من المقاعد للعام، و50% للخاص
📍 الجامعات الولائية بتخصص نص المقاعد لأبناء الولاية

لو داير تعليم جيد بتكلفة مناسبة، الجامعات الحكومية خيار ممتاز

2. الجامعات الأهلية والخاصة 🏫:
عددها حوالي 25 جامعة، أغلبها في العاصمة، وبعضها في الولايات.
منها:
جامعة المغتربين-جامعة الأحفاد للبنات-الجامعة الوطنية
مميزاتها:
💸 رسومها مرتفعة
🎯 لكن فيها تخصصات حديثة وبرامج مميزة.
مناسبة للطلاب الباحثين عن تجربة تعليم مختلفة ومركزة

3. الكليات الأهلية والخاصة:
أكثر من 100 كلية، منتشرة خاصة في الخرطوم وبعض الولايات. زي:
•كلية شرق النيل - كلية عزة للبنات - كلية الإمام الهادي
الميزة؟
💵 رسومها أقل من الجامعات الخاصة
📥 قبولها أسرع وأسهل

📝
🌐 نظام التقديم:
كل الجامعات والكليات - الحكومية، الخاصة، والأهلية - بتقدم إلكتروني عبر بوابة موحدة بإشراف وزارة التعليم العالي.
🗺️ الانتشار الجغرافي:
الجامعات الحكومية منتشرة في كل ولايات السودان
أما الخاصة والأهلية فغالبيتها في الخرطوم والمدن الكبيرة
✅ الاعتماد المحلي:
أي جامعة أو كلية موجودة في دليل القبول = شهادتها معتمدة
❌ الما موجودة = شهادتها غير معترف بها وما بتتوثق
🌍 الاعتماد الخارجي:
بعض البرامج في الجامعات الحكومية والخاصة حاصلة على اعتماد خارجي، وبعضها ما تم اعتمادها.
🎓 المنح والإعفاءات:
•الجامعات الحكومية بتقدم تخفيضات لفئات محددة
•في سنتي 2021 و2022، الوزارة قدمت منح جزئية في الجامعات والكليات الخاصة
(لكن لسه ما معروف إذا السنة دي ح تتوفر تاني)

كليات اتحولت لجامعات مؤخراً! ⬆️
لو بتسأل عن التطوير الأكاديمي، دي بعض الكليات اللي تمت ترقيتها رسميًا إلى جامعات:
•أكاديمية العلوم الصحية → جامعة العلوم الصحية
•كلية النصر التقنية → جامعة النصر
•كلية الخرطوم التطبيقية → جامعة العلوم والدراسات التطبيقية
•كلية الشرق بكسلا → جامعة الشرق للعلوم والتكنولوجيا

في التعليقات مرفق قوائم جميع الجامعات الحكومية والخاصة بالسودان
تابع المنشورات الجاية عشان تعرف تفاصيل البرامج الدراسية، التخصصات المحددة لكل مساق، ادوار التقديم الإلكتروني!

#السودان

الطلاب المنتظرين التقديم الإلكتروني للجامعات السودانية، لازم تعرفوا الحاجات دي قبل ما يبدأ التقديم!مع اقتراب موعد التقدي...
21/05/2025

الطلاب المنتظرين التقديم الإلكتروني للجامعات السودانية، لازم تعرفوا الحاجات دي قبل ما يبدأ التقديم!

مع اقتراب موعد التقديم الإلكتروني، في معلومات مهمة لازم تكون واضحة ليكم، عشان تختاروا التخصص والجامعة المناسبة بطريقة صحيحة.
وبحكم خبرتنا الطويلة في مجال التقديم الإلكتروني، حبّينا نشارك معاكم أهم النقاط الأساسية:

1. الفرق بين الجامعات الحكومية، والجامعات الخاصة، والجامعات الأهلية
2. الدبلوم والبكالوريوس: الفرق بينهما، الشروط، والفرص المتاحة لكل واحد
3. التخصصات المتوفرة في برامج البكالوريوس والدبلوم
4. خطوات التقديم الإلكتروني، ودور كل جهة في العملية
5. أخطاء شائعة لازم تتجنبوها أثناء التقديم

تابعونا في المنشورات الجاية، حنشرح كل نقطة بالتفصيل عشان نساعدكم تختاروا صح وتبدأوا مشواركم الجامعي بثقة.


بعد إعلان نتيجة الشهادة السودانية...بيبدأ مشوار جديد ومهم لكل طالب خلّص المرحلة الثانوية وداخل على الجامعة!المرحلة دي مف...
19/05/2025

بعد إعلان نتيجة الشهادة السودانية...
بيبدأ مشوار جديد ومهم لكل طالب خلّص المرحلة الثانوية وداخل على الجامعة!

المرحلة دي مفصلية، فيها قرارات بتحدد شكل مستقبلك، ولازم تتفكر فيها كويس.
الطالب بيكون محتار بين كذا خيار، وكل خيار فيهو أبعاد تتعلق بالطالب، وبأسرته، وبالظروف الاقتصادية والاجتماعية.

من الخيارات اللي حيتخذها الطالب بعد النتيجة :
1. إعادة السنة:
بعض الطلاب بيرجعوا يعيدوا بسبب الرسوب أو لضعف النسبة.
القرار دا بيساعد الأسر البتعتمد على القبول العام في الجامعات الحكومية وبتلقى صعوبة في دفع رسوم الجامعات الخاصة.
2. الانتظار للتقديم للجامعات السودانية:
سواء كانت جامعات حكومية أو خاصة.
حنشرح ليكم بالتفصيل في منشورات جاية:
•أنواع الجامعات في السودان
•الفرق بين البكالوريوس والدبلوم
•التخصصات حسب المساق
•ادوار التقديم الإلكتروني
•الاخطاء الشائعة في التقديم
3. التقديم للمنح الدراسية:
لو جبت نسبة عالية، في فرص لمنح داخل وخارج السودان (كاملة أو جزئية).
حنوريكم في منشورات جاية عن شروطها ومميزاتها
4. الدراسة بالخارج على النفقة الخاصة:
لو عندكم قدرة مادية، في دول كتيرة ممكن تقدم فيها بشهادتك السودانية.
لكن لازم تعرف الشروط، وتختار الدولة المناسبة من حيث الجودة والتكلفة.

وختاماً...
المرحلة الجاية ما سهلة، لكن إنت ما وحدك.
خُد وقتك، اسأل، استشير، واختار الطريق البناسبك.
ما في طريق واحد للنجاح، لكن في طريق مناسب ليك إنت.

تابعونا في المنشورات الجاية، وشاركوا البوست مع أصحابكم، يمكن تساعدوا زول محتار!

رابط صفحة الفيس بوك:
https://www.facebook.com/profile.php?id=61575980963786
رابط قناة التلغرام:
https://t.me/Eshraqa_edu_sd
رابط قناة الواتساب:
https://whatsapp.com/channel/0029VbAu6KIHltYBzzZA3d0k

for educational solutions



Address

السودان
Atbara
1111

Website

Alerts

Be the first to know and let us send you an email when A&M For Educational Solutions posts news and promotions. Your email address will not be used for any other purpose, and you can unsubscribe at any time.

Shortcuts

Share

Category