07/05/2026
هل مرة سألت روحك: ليه في ناس الفرص بتمشي ليهم برجليها… وناس تانية بتجري وراها سنين ؟ 🤔✨
ولقيت واحدة من أكبر الإجابات في كلمة بسيطة شديد: "السمعة" ✨
في الماركتنغ في حاجة اسمها Word of Mouth (WOM) ؛ ببساطة يعني الناس تتكلم عنك، ترشّحك، وتشكر تجربتها معاك، لا مابس كدا كمان تنصح غيرها بيك.
وصدقني، دي من أقوى أنواع التسويق؛ لأنو الناس بتصدق الناس أكتر من أي إعلان مدفوع 👀
ممكن شركة تصرف ملايين على الإعلانات، لكن زبون واحد رااااضي يقول: "والله الجماعة ديل ممتازين"… يجيب ليهم زباين أكتر من حملة كاملة👌 وممكن زبون واحد متضايق يكسّر صورة كاملة ويغتس حجرهم 🤦♀️
وده بخليني أقول حاجة مهمة هنا: إنو في البراند الشخصي، إنت ذاتك منتج .
أيوة نعم ، إنت في رقبتك منتج بمعنى إنو الناس بتكوّن عنك صورة:
إنت ملتزم ولا لا؟
كلمتك واحدة ولا بتتلوّن؟
وجودك بريح ولا بيوتر؟
شغلك بتعملو بإتقان ولا بتكلفتو ساكت؟
انطبااع وصورة ذهنيه كااااملة ( عندها صوت وطريقة تعامل وكل شي).
سمعتك الطيبة هي الإعلان الحقيقي البمشي قدامك قبل ما تدخل أي مكان ✨ وهي البتخلي الناس تجيك، ترشّحك، تثق فيك، وتفتح ليك أبواب إنت ذاتك ما حصل فكرت فيها 🥇
عشان كدا، لما يجي يوم وتلقى نفسك قدام خيارين:
مؤسسة سمعتها مرورقة ، ومكان تاني سمعته أقل وقروشو اكتر أمشي مع السمعة السمحة ولا تترتد
ليه؟ لأنو إنت ما بس حتشتغل هناك ، إنت حترتبط بيهم باسمهم، بثقافتهم، بطريقتهم، وبصورتهم قدام الناس. شئت أم أبيت، البيئة بتأثر، وإنت ود بيئتك 👌😉
حتتعلم منهم، حتتشكل منهم، وحيتكتب اسمك جنب اسمهم. ولو المكان مرتب من جوة، محترم، عندو قيم ، إنت ذاتك حتكبر فيه صاح وحتتطور وتتعلم منو🫰
فاسأل نفسك دايماً:
أنا داير مرتب بس؟ ولا داير مسار محترم واسم قوي وأثر جميل ؟
لأنو في النهاية ؛ السمعة السمحة ما بس بتبيع المنتج، هي البتصنع المستقبل كله 🎖️
وصباح الخير جداً جداً 🐉✨
|
#تطوير
