Relihiyon ng pagpapayuhan - Deenasiha

𝟭𝟬 𝗠𝗮𝗵𝗮𝗵𝗮𝗹𝗮𝗴𝗮𝗻𝗴 𝗚𝗮𝘄𝗮𝗶𝗻 𝘀𝗮 𝗛𝘂𝗹𝗶𝗻𝗴 𝗦𝗮𝗺𝗽𝘂𝗻𝗴 𝗔𝗿𝗮𝘄 𝗻𝗴 𝗥𝗮𝗺𝗮𝗱𝗮𝗻 𝗮𝘁 𝗮𝗻𝗴 𝗞𝗮𝗹𝗮𝗴𝗮𝘆𝗮𝗻 𝗻𝗴 𝗺𝗴𝗮 𝗦𝗮𝗹𝗮𝗳 𝘀𝗮 𝗺𝗴𝗮 𝗮𝗿𝗮𝘄 𝗻𝗮
𝗜𝘁𝗼.

Ang huling sampung araw ng buwan ng Ramadan ay may mga natatanging katangian at dakilang kabanalan. Sa mga araw na ito makikita ang halimbawa ng Propeta ﷺ at ng mga matutuwid na naunang salinlahi (السلف الصالح) sa kanilang pagsamba at pagsisikap sa kabutihan. Narito ang sampung mahahalagang gawain na maaaring magsilbing gabay sa mga sumasamba at naghahangad ng kaluguran ng Allah.

1. Pagtindig sa Gabi at Pagbubuhay ng Gabi sa Pagsamba القيام وإحياء الليل

Isinalaysay ni ‘Ā’ishah (رضي الله عنها):
«كان النبي ﷺ إذا دخل العشر الأواخر أحيا الليل»

“Kapag dumating ang huling sampung gabi ng Ramadan, binubuhay ng Propeta ﷺ ang gabi sa pagsamba.”

May mga Salaf na nagsasagawa ng pagdarasal sa halos buong gabi o sa kabuuan nito sa ilang pagkakataon.

Sinabi rin ni ابن تيمية:
"قيام بعض الليالي كلها مما جاءت به السنة".
“Ang pagtindig sa buong gabi sa ilang gabi ay kabilang sa mga bagay na pinahintulutan at dumating sa Sunnah.”

2. Paggising sa Pamilya para sa Pagsamba إيقاظ الأهل والعيال للعبادة

Sinabi ni ‘Ā’ishah (رضي الله عنها):
«وكان يوقظ أهله»

“At ginigising niya ang kanyang pamilya.”

Sinabi ni ابن رجب رحمه الله:
"ولم يكن النبي صلى الله عليه وسلم إذا بقي من رمضان عشرة أيام يدع أحداً من أهله يطيق القيام إلا أقامه".

“Kapagsampung araw na lamang ang natitira sa Ramadan; Ang Propeta ﷺ ay hindi nag-iiwan ng sinuman sa kanyang pamilya na may kakayahang magdasal sa gabi maliban na kanya itong ginigising.”

Mula kay علي بن أبي طالب رضي الله عنه:
كان رسول الله ﷺ يوقظ أهله في العشر الأواخر من رمضان، وكل صغير وكبير يطيق الصلاة.

“Ang Sugo ng Allah ﷺ ay ginising ang kanyang pamilya sa huling sampung gabi ng Ramadan, maging bata man o matanda na may kakayahang magdasal.”

Hadith tungkol sa paggising ng mag-asawa
قال رسول الله ﷺ:
«رحم الله رجلاً قام من الليل فصلى وأيقظ امرأته، فإن أبت نضح في وجهها الماء، رحم الله امرأة قامت من الليل فصلت وأيقظت زوجها، فإن أبى نضحت في وجهه الماء»

Sinabi ng Sugo ng Allah ﷺ:
“Kaawaan nawa ng Allah ang isang lalaki na bumangon sa gabi upang magdasal at ginising ang kanyang asawa. Kung siya ay tumanggi, bahagya niyang winiwisikan ng tubig ang mukha nito. At kaawaan nawa ng Allah ang isang babae na bumangon sa gabi upang magdasal at ginising ang kanyang asawa; kung siya ay tumanggi, winiwisikan niya ng tubig ang mukha nito.”

3. Masidhing Pagsisikap sa Pagsamba الجد والاجتهاد في العبادة

Sinabi ni ‘Ā’ishah (رضي الله عنها):
«كان رسول الله ﷺ يجتهد في العشر الأواخر ما لا يجتهد في غيره»
(رواه مسلم)

“Ang Sugo ng Allah ﷺ ay nagsisikap sa huling sampung araw ng Ramadan nang higit kaysa sa kanyang pagsisikap sa ibang panahon.”

4. Pagsasabuhay ng Sunnah ng I‘tikāf اغتنام سنة الاعتكاف

Isinalaysay ni ‘Ā’ishah (رضي الله عنها):
«كان النبي ﷺ يعتكف العشر الأواخر من رمضان حتى توفاه الله، ثم اعتكف أزواجه من بعده»
(متفق عليه)

“Ang Propeta ﷺ ay nagsasagawa ng I‘tikāf sa huling sampung araw ng Ramadan hanggang sa siya ay pumanaw, at pagkatapos niya ay ipinagpatuloy ito ng kanyang mga asawa.”
Ang I‘tikāf ay ang pananatili sa masjid na may layuning magpakasipag sa pagsamba at paglayo sa mga pagka-abala ng mundo.

5. Paghahanap sa Laylatul Qadr تحري ليلة القدر

Sinabi ng Propeta ﷺ:
«تحرّوا ليلة القدر في الوتر من العشر الأواخر من رمضان»

“Hanapin ninyo ang Laylatul Qadr sa mga gabing may bilang na kakaiba (odd nights) sa huling sampung araw ng Ramadan.”

Sinabi ng Allah:
﴿لَيْلَةُ الْقَدْرِ خَيْرٌ مِنْ أَلْفِ شَهْرٍ﴾

“Ang Gabi ng Qadr ay higit na mabuti kaysa sa isang libong buwan.”
(Surah Al-Qadr: 3)

Dua sa Laylatul Qadr
Sinabi ni ‘Ā’ishah (رضي الله عنها):
يا رسول الله أرأيت إن وافقت ليلة القدر ما أقول فيها؟
قال:
«قولي: اللهم إنك عفو تحب العفو فاعف عني»
“O Sugo ng Allah, kung aking maabutan ang Laylatul Qadr, ano ang aking sasabihin?”
Sumagot ang Propeta ﷺ:

“Sabihin mo:
Allahumma innaka ‘afuwwun tuhibbul ‘afwa fa’fu ‘anni.

O Allah, Ikaw ay Mapagpatawad at minamahal Mo ang pagpapatawad, kaya patawarin Mo ako.”

6. الإكثار من قراءة القرآن والدعاء

Pagpaparami ng Pagbasa ng Qur’an at Du‘ā
Ang Propeta ﷺ ay nagdarasal sa gabi ng Ramadan at nagbabasa ng Qur’an nang may pagninilay.

Kapag siya ay dumadaan sa talatang may awa, siya ay humihiling ng awa; at kapag dumaraan sa talatang may kaparusahan, siya ay humihingi ng kanlungan sa Allah.

Sinabi ni سفيان الثوري:
"الدعاء في تلك الليلة أحب إليّ من الصلاة".

“Ang pagsasagawa ng du‘ā sa gabing iyon ay mas minamahal ko kaysa sa pagdarasal.”

Ang ibig niyang sabihin ay kung ang pagdarasal ay walang maraming du‘ā, mas mabuti ang maraming panalangin sa Allah.

7. Pagligo sa pagitan ng Maghrib at ‘Ishā الاغتسال بين العشاءين

May ilang Salaf na naliligo sa pagitan ng Maghrib at ‘Ishā upang maging masigla sa pagsamba.

Sinabi ni ابن جرير:
"كانوا يستحبون أن يغتسلوا كل ليلة من ليالي العشر الأواخر".

“Inirerekomenda ng mga naunang iskolar na maligo sa bawat gabi ng huling sampung araw.”

Si النخعي ay naliligo gabi-gabi sa huling sampung araw.

Si أيوب السختياني ay naliligo sa gabi ng ika-23 at ika-24 at nagsusuot ng bagong damit bilang paghahanda sa Laylatul Qadr.

8. Pagpaparami ng Istighfār (Paghingi ng Kapatawaran) الإكثار من الاستغفار

قال النبي ﷺ:
«اللهم إنك عفو تحب العفو فاعف عني»

“O Allah, Ikaw ay Mapagpatawad at minamahal Mo ang pagpapatawad, kaya patawarin Mo ako.”

Ang العفو ay isa sa mga pangalan ni Allah, na nangangahulugang Siya ang lubos na nagpapatawad at nagbubura ng kasalanan ng Kanyang mga alipin.

9. Pag-aalala sa Pagtanggap ng mga Gawain الاهتمام بقبول الأعمال

Sinabi ni علي رضي الله عنه:
"كونوا لقبول العمل أشد اهتماماً منكم بالعمل".

“Mas maging masigasig kayo sa pagtanggap ng gawain kaysa sa mismong paggawa nito.”

Sinabi ng Allah:
﴿إِنَّمَا يَتَقَبَّلُ اللَّهُ مِنَ الْمُتَّقِينَ﴾

“Tinatanggap lamang ng Allah ang mga gawain mula sa mga may takot sa Kanya.”
(Surah Al-Mā’idah: 27)

10. Paglalabas ng Zakātul Fiṭr إخراج زكاة الفطر

Ang Zakātul Fiṭr ay:
• paglilinis sa pag-aayuno
• pagkain para sa mga mahihirap

Batay sa hadith ni ابن عمر رضي الله عنهما:
"كانوا يعطونها قبل الفطر بيوم أو يومين".

“Ibinibigay nila ito isang araw o dalawang araw bago ang ‘Eid.”

Buod ng hatol ng mga iskolar:
• Pinahihintulutang ibigay ito bago ang ‘Eid ng isa o dalawang araw.
• Ang ilan sa mga kontemporaryong iskolar ay pinahihintulutang ibigay ito sa huling sampung araw kung kinakailangan upang maipamahagi sa mga mahihirap.

اللهم إنك عفو تحب العفو فاعف عنا،
Allahumma innaka ‘afuwwun tuhibbul ‘afwa fa’fu ‘anni.

واهدنا لما اختلف فيه من الحق بإذنك، إنك تهدي من تشاء إلى صراط مستقيم.
O Allah, Ikaw ay Mapagpatawad at minamahal Mo ang pagpapatawad, kaya patawarin Mo kami. Patnubayan Mo kami sa katotohanan sa mga bagay na pinagtatalunan ng mga tao sa pamamagitan ng Iyong pahintulot. Katotohanang Ikaw ang gumagabay sa sinumang Iyong nais tungo sa tuwid na landas.

Relihiyon ng pagpapayuhan - Deenasiha



𝗺𝗮𝗴𝗶𝗻𝗴 𝗯𝗮𝗵𝗮𝗴𝗶 𝗻𝗴 𝗸𝗮𝗯𝘂𝘁𝗶𝗵𝗮𝗻
𝗲-𝐋𝐢𝐤𝐞,𝐅𝐨𝐥𝐥𝐨𝐰 & 𝐒𝐡𝐚𝐫𝐞 𝐨𝐮𝐫 𝐩𝐚𝐠𝐞...
https://www.facebook.com/deenasiha/

𝗔𝗻𝗴 𝗜‘𝘁𝗶𝗸𝗮𝗳 (𝗣𝗮𝗻𝗮𝗻𝗮𝘁𝗶𝗹𝗶 𝘀𝗮 𝗠𝗮𝘀𝗷𝗶𝗱 𝗽𝗮𝗿𝗮 𝘀𝗮 𝗣𝗮𝗴𝘀𝗮𝗺𝗯𝗮)

الحمد لله وحده، والصلاة والسلام على من لا نبي بعده، نبينا محمدٍ وعلى آله وصحبه ومن اهتدى بهداه إلى يوم الدين، وبعد:

1️⃣ Ang I‘tikaf ay Isang Dakilang Pagsamba

Tunay na ang I‘tikaf ay kabilang sa mga pagsamba na ginagawa ng Propeta ﷺ sa buwan ng Ramadan.
Kaya magsikap kang magsagawa ng i‘tikaf kahit sa maikling panahon lamang.

Ang I‘tikaf ay nangangahulugan ng pananatili sa masjid upang sumamba sa Allah.

2️⃣ Ang Pinakamainam na I‘tikaf

Ang pinakamainam na i‘tikaf ay ang pagsasagawa nito sa huling sampung araw ng Ramadan.

Ayon sa hadith ni Aisha bint Abi Bakr (رضي الله عنها), asawa ng Propeta ﷺ:

(كَانَ النَّبِيُّ ﷺ يَعْتَكِفُ الْعَشْرَ الْأَوَاخِرَ مِنْ رَمَضَانَ حَتَّى تَوَفَّاهُ اللَّهُ، ثُمَّ اعْتَكَفَ أَزْوَاجُهُ مِنْ بَعْدِهِ)
رواه البخاري

“Ang Propeta ﷺ ay nagsasagawa ng i‘tikaf sa huling sampung araw ng Ramadan hanggang sa siya ay kunin ng Allah (mamatay). Pagkatapos niya, ang kanyang mga asawa ay nagsagawa rin ng i‘tikaf.” (Al-Bukhari)

3️⃣ Kung Hindi Naisagawa sa Ramadan

Kung ang isang Muslim ay hindi nakapagsagawa ng i‘tikaf sa huling sampung araw ng Ramadan, maaari niyang gawin ito sa loob ng sampung araw sa buwan ng Shawwal.

Ayon sa hadith:

(أَرَادَ أَنْ يَعْتَكِفَ فَلَمَّا انْصَرَفَ إِلَى الْمَكَانِ الَّذِي أَرَادَ أَنْ يَعْتَكِفَ إِذَا أَخْبِيَةٌ خِبَاءُ عَائِشَةَ وَخِبَاءُ حَفْصَةَ وَخِبَاءُ زَيْنَبَ فَقَالَ أَالْبِرَّ تَقُولُونَ بِهِنَّ ثُمَّ انْصَرَفَ فَلَمْ يَعْتَكِفْ حَتَّى اعْتَكَفَ عَشْرًا مِنْ شَوَّالٍ)
رواه البخاري

“At nais ng Propeta ﷺ na magsagawa ng i‘tikaf, ngunit nang pumunta siya sa lugar na kanyang pag-i‘tikafan ay nakita niya ang mga tolda nina Aisha, Hafsah at Zaynab. Sinabi niya: ‘Kabutihan ba ang inyong nais sa pamamagitan nito?’ Pagkatapos ay umalis siya at hindi nagsagawa ng i‘tikaf sa Ramadan, hanggang sa siya ay nagsagawa ng i‘tikaf ng sampung araw sa Shawwal.” (Al-Bukhari)

Sa ibang salaysay:

(فَلَمْ يَعْتَكِفْ فِي رَمَضَانَ حَتَّى اعْتَكَفَ فِي آخِرِ الْعَشْرِ مِنْ شَوَّالٍ)
رواه البخاري

At sa salaysay ni Muslim:

(حَتَّى اعْتَكَفَ فِي الْعَشْرِ الْأَوَّلِ مِنْ شَوَّالٍ)

4️⃣ Kainaman ng I'tikaf sa mga may Katandaan

Kung ang isang Muslim ay nakaramdam na siya ay tumatanda na at maaaring malapit na ang kanyang kamatayan (ang Allah ang higit na nakaaalam), maaari siyang magsagawa ng i‘tikaf ng dalawampung araw. Sapagkat sinabi sa hadith:

(كَانَ النَّبِيُّ ﷺ يَعْتَكِفُ فِي كُلِّ رَمَضَانٍ عَشْرَةَ أَيَّامٍ، فَلَمَّا كَانَ الْعَامُ الَّذِي قُبِضَ فِيهِ اعْتَكَفَ عِشْرِينَ يَوْمًا)
رواه البخاري

“Ang Propeta ﷺ ay nagsasagawa ng i‘tikaf ng sampung araw sa bawat Ramadan; ngunit sa taon na siya ay pumanaw, nagsagawa siya ng i‘tikaf ng dalawampung araw.” (Al-Bukhari)

5️⃣ Hindi Kinakailangan ang Pag-aayuno para sa I‘tikaf

Hindi kinakailangan ang pag-aayuno upang maging wasto ang i‘tikaf. Sapagkat si Umar ibn al-Khattab (رضي الله عنه) ay nagsagawa ng i‘tikaf ng isang gabi sa Masjid al-Haram bilang pagtupad sa kanyang panata, at ito ay isinalaysay sa Al-Bukhari.

At ang gabi ay hindi panahon ng pag-aayuno. Gayundin, ang Propeta ﷺ ay nagsagawa ng i‘tikaf ng sampung araw sa Shawwal. (Al-Bukhari)

6️⃣ Walang Itinakdang Haba ng Panahon

Walang partikular na haba ng panahon para sa i‘tikaf. Maaari itong maging mahaba o maikli.

Hindi dapat lumabas ang nag-i‘tikaf maliban sa mga bagay na kinakailangan tulad ng pagkain, pagpunta sa palikuran, at iba pang katulad nito.

Sinabi ni Aisha bint Abi Bakr (رضي الله عنها):

(كَانَ رَسُولُ اللَّهِ ﷺ إِذَا اعْتَكَفَ يُدْنِي إِلَيَّ رَأْسَهُ فَأُرَجِّلُهُ، وَكَانَ لَا يَدْخُلُ الْبَيْتَ إِلَّا لِحَاجَةِ الْإِنْسَانِ)
رواه أبو داود (صحيح)

“Kapag ang Sugo ng Allah ﷺ ay nasa i‘tikaf, inilalapit niya sa akin ang kanyang ulo upang ayusin ko ang kanyang buhok, at hindi siya pumapasok sa bahay maliban sa pangangailangan ng tao.” (Abu Dawud – Sahih)

Hindi rin niya maaaring gawing kondisyon ang paglabas kung kailan niya gusto. Ngunit pinahihintulutang gawing kondisyon ang paglabas para sa isang pagsamba na hindi obligado tulad ng pagdalaw sa may sakit o pagdalo sa libing, basta’t hindi nito kukunin ang karamihan ng oras ng i‘tikaf.

7️⃣ Ang I‘tikaf ay Ginagawa Lamang sa Masjid

Ang i‘tikaf ay hindi wasto maliban sa masjid.

Sinabi ng Allah:

{وَأَنْتُمْ عَاكِفُونَ فِي الْمَسَاجِدِ}
“Habang kayo ay nasa i‘tikaf sa mga masjid.” (Al-Baqarah: 187)

Kung ang isang Muslim ay nagnanais magsagawa ng i‘tikaf, mainam na pumasok siya sa kanyang lugar ng i‘tikaf pagkatapos ng Fajr.

Ayon sa hadith ni Aisha bint Abi Bakr (رضي الله عنها):

(كَانَ رَسُولُ اللَّهِ ﷺ إِذَا أَرَادَ أَنْ يَعْتَكِفَ صَلَّى الْفَجْرَ ثُمَّ دَخَلَ مُعْتَكَفَهُ)
رواه مسلم

“Kapag nais ng Sugo ng Allah ﷺ na magsagawa ng i‘tikaf, siya ay nagdarasal muna ng Fajr at pagkatapos ay pumapasok sa kanyang lugar ng i‘tikaf.” (Muslim)

8️⃣ Mga Ipinagbabawal sa I‘tikaf

Ipinagbabawal sa nag-i‘tikaf ang pakikipagtalik at anumang uri ng pakikipaglapit na may pagnanasa sa pagitan ng lalaki at babae. Sinabi ng Allah:

{وَلَا تُبَاشِرُوهُنَّ وَأَنْتُمْ عَاكِفُونَ فِي الْمَسَاجِدِ}

“At huwag ninyo silang lapitan (sa pakikipagtalik) habang kayo ay nasa i‘tikaf sa mga masjid.” (Al-Baqarah: 187)

Dapat gamitin ng nag-i‘tikaf ang kanyang oras sa mga pagsamba tulad ng pagdarasal (sa mga oras na pinahihintulutan), pagbabasa ng Qur’an, paggunita sa Allah, at iba pang gawain na maglalapit sa kanya sa Allah.
Huwag niyang sayangin ang oras sa mga walang pakinabang.

9️⃣ Pinahihintulutan ang Pagbisita

Pinahihintulutan ang pamilya ng nag-i‘tikaf na bumisita sa kanya, gayundin ang ibang tao, at maaari siyang makipag-usap sa kanila kung hindi nito sasayangin ang oras ng kanyang i‘tikaf.

Ayon sa hadith ni Safiyyah bint Huyayy (رضي الله عنها):

(كَانَ رَسُولُ اللَّهِ ﷺ مُعْتَكِفًا فَأَتَيْتُهُ أَزُورُهُ لَيْلًا فَحَدَّثْتُهُ ثُمَّ قُمْتُ فَانْقَلَبْتُ فَقَامَ مَعِي لِيَقْلِبَنِي)
رواه البخاري

“Ang Sugo ng Allah ﷺ ay nasa i‘tikaf, at pinuntahan ko siya upang dalawin sa gabi. Nakipag-usap ako sa kanya, pagkatapos ay umalis ako, at siya ay tumayo upang ihatid ako.” (Al-Bukhari)

📌 Pangwakas na Paalala :

Kung hindi mo kayang magsagawa ng i‘tikaf sa buong huling sampung araw ng Ramadan o sa mahabang panahon, sikapin mong magsagawa nito kahit sa maikling panahon lamang kahit isang oras, dalawang oras, o habang ikaw ay nasa masjid.

Gamitin ang panahong iyon sa pagdarasal, pagbabasa ng Qur’an, paggunita sa Allah, at paghingi ng kapatawaran.

Sinabi ng Allah:

{فَاتَّقُوا اللَّهَ مَا اسْتَطَعْتُمْ}

“Kaya matakot kayo sa Allah ayon sa inyong makakaya.” (At-Taghabun: 16)

Nawa’y gawin tayo ng Allah na kabilang sa mga nagmamahal sa pagsamba, tanggapin ang ating mga gawain, patawarin ang ating mga kasalanan, at pagpalain tayo sa natitirang mga gabi ng Ramadan.

وَاللَّهُ الْمُوَفِّقُ، وَصَلَّى اللَّهُ عَلَى نَبِيِّنَا مُحَمَّدٍ وَعَلَى آلِهِ وَصَحْبِهِ أَجْمَعِينَ

Relihiyon ng pagpapayuhan - Deenasiha



𝗺𝗮𝗴𝗶𝗻𝗴 𝗯𝗮𝗵𝗮𝗴𝗶 𝗻𝗴 𝗸𝗮𝗯𝘂𝘁𝗶𝗵𝗮𝗻
𝗲-𝐋𝐢𝐤𝐞,𝐅𝐨𝐥𝐥𝐨𝐰 & 𝐒𝐡𝐚𝐫𝐞 𝐨𝐮𝐫 𝐩𝐚𝐠𝐞...
https://www.facebook.com/deenasiha/

𝗔𝗻𝗴 𝗣𝗶𝗻𝗮𝗸𝗮𝗺𝗮𝗶𝗻𝗮𝗺 𝗻𝗮 𝗺𝗴𝗮 𝗚𝗮𝗯𝗶 𝗻𝗴 𝗧𝗮𝗼𝗻

tunay na napakadakilang pagpapala na ikaw ay umabot sa 𝐡𝐮𝐥𝐢𝐧𝐠 𝐬𝐚𝐦𝐩𝐮𝐧𝐠 𝐠𝐚𝐛𝐢 𝐧𝐠 𝐑𝐚𝐦𝐚𝐝𝐚𝐧, na puno ng kabutihan at napakalaking biyaya. Kaya nararapat na gawin ang mga sumusunod:

1️⃣ Magsikap nang Higit sa mga Huling Sampung Gabi

Magsikap sa mga gabing ito nang higit kaysa sa iyong pagsisikap sa ibang mga gabi sa pamamagitan ng mga mabubuting gawa.

Ayon sa hadith ni Aisha bint Abi Bakr (رضي الله عنها):

(كَانَ رَسُولُ اللَّهِ ﷺ يَجْتَهِدُ فِي الْعَشْرِ الْأَوَاخِرِ مَا لَا يَجْتَهِدُ فِي غَيْرِهِ)
رواه مسلم

“Ang Sugo ng Allah ﷺ ay nagsisikap sa huling sampung gabi nang higit kaysa sa kanyang pagsisikap sa ibang mga gabi.” (Muslim)

2️⃣ Maglaan ng Oras sa Pagsamba

Magsikap sa mga gabing ito at ilaan ang iyong sarili sa pagsamba tulad ng pagdarasal, pagbabasa ng Qur’an, paggunita sa Allah, pagbibigay ng kawanggawa, at iba pang mabubuting gawain. At iwasan ang mga walang kabuluhan bagay upang lubos na makapagtuon sa pagsamba.

Ayon sa hadith ni Aisha bint Abi Bakr (رضي الله عنها):

(كَانَ النَّبِيُّ ﷺ إِذَا دَخَلَ الْعَشْرُ شَدَّ مِئْزَرَهُ وَأَحْيَا لَيْلَهُ وَأَيْقَظَ أَهْلَهُ)
رواه الشيخان

“Kapag dumating ang huling sampung gabi, hinihigpitan niya ang kanyang kasuotan (bilang tanda ng pagsisikap), ginugugol niya ang gabi sa pagsamba, at ginigising niya ang kanyang pamilya.” (Al-Bukhari at Muslim)

3️⃣ Buhayin ang mga Gabi sa Pagsamba

Buhayin ang mga gabing ito sa pamamagitan ng pagdarasal, pag-alaala sa Allah, at pagbabasa ng Qur’an, sapagkat ito ang ginawa ng Propeta ﷺ.

4️⃣ Gisingin ang Iyong Pamilya

Gisingin ang iyong asawa, ina, at mga kapamilya upang sumamba sa Allah sa mga gabing ito. Paalalahanan sila na samantalahin ang mga gabing ito ng Ramadan.

5️⃣ Magsagawa ng I‘tikaf kung Kaya

Kung kaya mo, magsagawa ng i‘tikaf sa mga gabing ito kahit kaunting bahagi lamang nito sa pamamagitan ng pananatili sa masjid upang magtuon sa pagsamba sa Allah tulad ng pagdarasal, paggunita sa Allah, at pagbabasa ng Qur’an.

6️⃣ Bigyan ng Malaking Halaga ang mga Gabing Ito

Bigyan ng napakalaking pagpapahalaga ang mga gabing ito dahil kabilang sa mga ito ang Laylatul-Qadr, na isa sa mga natatanging biyaya ng mga huling sampung gabi. Huwag sayangin ang oras, sapagkat ang mga gabing ito ay napakahalaga.

7️⃣ Mag-ingat sa Pag-aaksaya ng Oras

Mag-ingat na huwag sayangin ang mga gabing ito sa mga walang kabuluhang bagay. At mag-ingat ang kababaihan na gugulin ang mga gabing ito sa mga gawaing pangmakamundo lamang tulad ng pag-aayos ng mga kasangkapan sa bahay, pagbili ng mga damit, o paglalakad sa mga pamilihan.

Mas mabuting ihanda ang mga pangangailangan sa bahay bago pa dumating ang huling sampung gabi upang makapagtuon ka at ang iyong pamilya sa pagsamba sa Allah.

8️⃣ Ang Pinakamahalagang Pagsamba sa mga Gabing Ito

Alamin na ang isa sa pinakamahalagang pagsamba sa mga gabing ito ay ang pagdarasal sa gabi (Qiyam al-Layl). Kaya magsikap sa pagdarasal nang may mahabang pagtayo, pagyuko, at pagpapatirapa.

Sinabi ng Propeta ﷺ:

(أَفْضَلُ الصَّلَاةِ طُولُ الْقُنُوتِ)
رواه مسلم

“Ang pinakamainam na pagdarasal ay yaong mahaba ang pagtayo (sa pagbigkas ng Qur’an).” (Muslim)

9️⃣ Magsikap nang Higit Pa

Magsikap sa mga gabing ito nang higit kaysa sa ibang mga gabi ng buwan. Paghusayan ang pagsamba at magpursigi sa paggawa ng kabutihan.

Sa Musnad ni Ahmad, ayon kay Aisha bint Abi Bakr (رضي الله عنها):

(كَانَ رَسُولُ اللَّهِ ﷺ يَخْلِطُ الْعِشْرِينَ بِصَلَاةٍ وَنَوْمٍ فَإِذَا كَانَ الْعَشْرُ شَمَّرَ وَشَدَّ الْمِئْزَرَ)

“Ang Sugo ng Allah ﷺ ay pinaghahalo ang unang dalawampung gabi ng Ramadan ng pagdarasal at pagtulog; ngunit kapag dumating ang huling sampung gabi, siya ay lalong nagsisikap at naghahanda sa pagsamba.”

📌 Pangwakas na Paalala :

Ang mga huling sampung gabi ng Ramadan ay kabilang sa pinakamahalagang gabi sa buong taon. Sa mga gabing ito matatagpuan ang Laylatul-Qadr, na higit na mabuti kaysa sa isang libong buwan. Kaya ang sinumang mapagkalooban ng pagsamba sa gabing ito ay tunay na pinagpala ng Allah.

Huwag mong sayangin ang mga gabing ito sa kapabayaan, pagkaabala sa mga walang kabuluhang bagay, o labis na pagtuon sa mga gawain ng mundo. Samantalahin mo ang bawat sandali sa pagdarasal, pagbabasa ng Qur’an, paghingi ng kapatawaran, at taimtim na panalangin.

Maaaring ito na ang huling Ramadan na ating maaabot. Kaya hilingin natin sa Allah na tanggapin ang ating mga pagsamba, patawarin ang ating mga kasalanan, at gawin tayong kabilang sa mga pinalaya Niya mula sa Impiyerno.

وَاللَّهُ الْمُوَفِّقُ، وَصَلَّى اللَّهُ عَلَى نَبِيِّنَا مُحَمَّدٍ وَعَلَى آلِهِ وَصَحْبِهِ أَجْمَعِينَ.

Relihiyon ng pagpapayuhan - Deenasiha



𝗺𝗮𝗴𝗶𝗻𝗴 𝗯𝗮𝗵𝗮𝗴𝗶 𝗻𝗴 𝗸𝗮𝗯𝘂𝘁𝗶𝗵𝗮𝗻
𝗲-𝐋𝐢𝐤𝐞,𝐅𝐨𝐥𝐥𝐨𝐰 & 𝐒𝐡𝐚𝐫𝐞 𝐨𝐮𝐫 𝐩𝐚𝐠𝐞...
https://www.facebook.com/deenasiha/

𝗔𝗻𝗴 𝗚𝗮𝗯𝗶 𝗻𝗴 𝗔𝗹-𝗤𝗮𝗱𝗿 (𝗟𝗮𝘆𝗹𝗮𝘁𝘂𝗹-𝗤𝗮𝗱𝗿)

tunay na sa huling sampung gabi ng buwan ng Ramadan ay naroroon ang Laylatul-Qadr (Gabi ng Kapasyahan o Dakilang Gabi).

Ang gabing ito ay may napakalaking kahalagahan at dakilang gantimpala. Kabilang sa mga kabutihan nito ay ang mga sumusunod:

1️⃣ Ito ay Isang Pinagpalang Gabi

Sinabi ng Allah (Kataas-taasan Siya):

{إِنَّا أَنْزَلْنَاهُ فِي لَيْلَةٍ مُبَارَكَةٍ إِنَّا كُنَّا مُنْذِرِينَ * فِيهَا يُفْرَقُ كُلُّ أَمْرٍ حَكِيمٍ * أَمْرًا مِنْ عِنْدِنَا إِنَّا كُنَّا مُرْسِلِينَ} [الدخان: 3-5]

“Tunay na Aming ibinaba ito sa isang pinagpalang gabi. Tunay na Kami ay nagbibigay babala. Sa gabing iyon ay itinatakda ang bawat matalinong pinagpasyahan ukol sa mga pangyayari o bagay isang utos mula sa Amin. Tunay na Kami ay nagpapadala (ng mga sugo).”

2️⃣ Ito ay Gabi ng Karangalan at Kadakilaan

Ito ay isang marangal at dakilang gabi. Sinabi ng Allah:

{إِنَّا أَنْزَلْنَاهُ فِي لَيْلَةِ الْقَدْرِ} [القدر: 1]

“Tunay na Aming ibinaba ito sa Gabi ng Al-Qadr.”

Sa gabing ito itinatakda ng Allah ang mga pangyayari na magaganap sa loob ng isang taon ayon sa Kanyang matalinong pagpapasya.

3️⃣ Mas Mabuti Ito kaysa sa Isang Libong Buwan

Sinabi ng Allah:

{لَيْلَةُ الْقَدْرِ خَيْرٌ مِنْ أَلْفِ شَهْرٍ} [القدر: 3]

“Ang Gabi ng Al-Qadr ay higit na mabuti kaysa sa isang libong buwan.”

Ibig sabihin, ang pagsamba sa gabing ito ay higit na mabuti kaysa sa pagsamba sa loob ng mahigit walumpu’t tatlong taon.

4️⃣ Bumababâ ang mga Anghel at si Jibril

Sinabi ng Allah:

{تَنَزَّلُ الْمَلَائِكَةُ وَالرُّوحُ فِيهَا} [القدر: 4]

“Bumababa ang mga anghel at ang Ruh (si Jibril) sa gabing iyon.”

Sila ay bumababa sa lupa na may dalang pagpapala, kabutihan, at awa mula sa Allah.

5️⃣ Ito ay Gabi ng Kapayapaan para sa mga Mananampalataya

Sinabi ng Allah:

{سَلامٌ هِيَ حَتَّى مَطْلَعِ الْفَجْرِ} [القدر: 5]

“Ito ay kapayapaan hanggang sa pagsikat ng bukang-liwayway.”

Ito ay gabi ng kapayapaan para sa mga mananampalataya dahil sa dami ng kapatawaran at pagpapalaya mula sa Impiyerno.

6️⃣ Ang Sinumang Magdasal sa Ramadan ay Mapapatawad

Sinabi ng Propeta ﷺ:

(مَنْ قَامَ رَمَضَانَ إِيمَانًا وَاحْتِسَابًا غُفِرَ لَهُ مَا تَقَدَّمَ مِنْ ذَنْبِهِ)
رواه الشيخان

“Sinumang tumindig (sa pagsamba) sa Ramadan nang may pananampalataya at pag-aasam sa gantimpala ay patatawarin ang kanyang mga nagdaang kasalanan.”

Ang sinumang magsagawa ng pagsamba sa gabing ito nang may pananampalataya at naghahangad ng gantimpala mula sa Allah ay makakamit ang dakilang biyayang ito kahit hindi niya malaman kung aling gabi ito.

7️⃣ Ito ay Matatagpuan sa Huling Sampung Gabi ng Ramadan

Sinabi ng Propeta ﷺ:

(تَحَرَّوْا لَيْلَةَ الْقَدْرِ فِي الْوِتْرِ مِنْ الْعَشْرِ الْأَوَاخِرِ مِنْ رَمَضَانَ)
رواه البخاري

“Hanapin ninyo ang Laylatul-Qadr sa mga gabing may bilang na kakaiba (odd nights) sa huling sampung gabi ng Ramadan.”

8️⃣ Kung Hindi Makayanan ang Lahat ng Sampung Gabi

Sinabi ng Propeta ﷺ:

(الْتَمِسُوهَا فِي الْعَشْرِ الْأَوَاخِرِ ... فَلَا يُغْلَبَنَّ عَلَى السَّبْعِ الْبَوَاقِي)
رواه مسلم

“Hanapin ninyo ito sa huling sampung gabi… ngunit kung ang isa sa inyo ay nanghina o hindi nakaya, huwag niyang pabayaan ang natitirang pitong gabi.”

9️⃣ Mas Pagsikapan ang Huling Pitong Gabi

Sinabi ng Propeta ﷺ:

(أَرَى رُؤْيَاكُمْ قَدْ تَوَاطَأَتْ فِي السَّبْعِ الْأَوَاخِرِ فَمَنْ كَانَ مُتَحَرِّيهَا فَلْيَتَحَرَّهَا فِي السَّبْعِ الْأَوَاخِرِ)
رواه الشيخان

“Nakikita kong ang inyong mga panaginip ay nagkakatugma tungkol sa huling pitong gabi; kaya sinumang naghahanap nito ay hanapin ito sa huling pitong gabi.”

🔟 Hanapin Ito sa Mga Gabi ng 25, 27, at 29

Sinabi ng Propeta ﷺ:

(الْتَمِسُوهَا فِي الْعَشْرِ الْأَوَاخِرِ مِنْ رَمَضَانَ ... فِي تَاسِعَةٍ تَبْقَى فِي سَابِعَةٍ تَبْقَى فِي خَامِسَةٍ تَبْقَى)
رواه البخاري

“Hanapin ninyo ito sa huling sampung gabi ng Ramadan: kapag siyam na gabi ang natitira, pitong gabi ang natitira, o limang gabi ang natitira.”

11️⃣ Ang Pinakamalapit na Gabi ay ang Gabi ng Ika-27

Sinabi ng kasamahan ng Propeta na si Ubayy ibn Ka'b (رضي الله عنه):

(وَاللَّهِ إِنِّي لَأَعْلَمُ أَيُّ لَيْلَةٍ هِيَ ... هِيَ لَيْلَةُ صَبِيحَةِ سَبْعٍ وَعِشْرِينَ)
رواه مسلم

“Sumpa man sa Allah, tunay na alam ko kung anong gabi iyon ito ay ang gabi bago ang ika-27.”

12️⃣ Ang Pinakamainam na Du‘a sa Gabing Ito

Tinatanong ni Aisha bint Abi Bakr (رضي الله عنها) ang Propeta ﷺ:

(أَرَأَيْتَ إِنْ عَلِمْتُ أَيُّ لَيْلَةٍ لَيْلَةُ الْقَدْرِ مَا أَقُولُ فِيهَا؟ قَالَ: قُولِي اللَّهُمَّ إِنَّكَ عُفُوٌّ كَرِيمٌ تُحِبُّ الْعَفْوَ فَاعْفُ عَنِّي)
رواه الترمذي وابن ماجه (صحيح)

“O Sugo ng Allah, kung malaman ko kung aling gabi ang Laylatul-Qadr, ano ang sasabihin ko?”
Sinabi niya:

اللهم إنك عفو كريم تحب العفو فاعف عني

“O Allah, Ikaw ay Mapagpatawad at Mapagbigay, mahal Mo ang pagpapatawad, kaya patawarin Mo ako.”

13️⃣ Mga Palatandaan ng Laylatul-Qadr

Sinabi ni Ubayy ibn Ka'b (رضي الله عنه):

(وَأَمَارَتُهَا أَنْ تَطْلُعَ الشَّمْسُ فِي صَبِيحَةِ يَوْمِهَا بَيْضَاءَ لَا شُعَاعَ لَهَا)
رواه مسلم

“Ang palatandaan nito ay ang pagsikat ng araw kinabukasan na maputi at walang matinding sinag.”

At sa salaysay ni Abu Dawud:

(تُصْبِحُ الشَّمْسُ صَبِيحَةَ تِلْكَ اللَّيْلَةِ مِثْلَ الطَّسْتِ لَيْسَ لَهَا شُعَاعٌ حَتَّى تَرْتَفِعَ)

“Ang araw sa umaga pagkatapos ng gabing iyon ay parang isang pinggan walang sinag hanggang sa ito ay tumaas.”

📌 Pangwakas na Paalala :

Ang Laylatul-Qadr ay isang napakalaking pagkakataon na maaaring dumating lamang isang beses sa isang taon. Ang sinumang mapagkalooban ng pagsamba sa gabing ito ay para bang nakapagsamba nang higit sa isang libong buwan.

Kaya huwag nating sayangin ang huling sampung gabi ng Ramadan. Punuin natin ang mga ito ng pagdarasal, pagbabasa ng Qur’an, paghingi ng kapatawaran, paggunita sa Allah, at taimtim na panalangin. Maaaring ito na ang Ramadan na huli nating maaabot sa ating buhay.

Hilingin natin sa Allah na ipagkaloob sa atin ang pag-abot sa Laylatul-Qadr, tanggapin ang ating mga pagsamba, patawarin ang ating mga kasalanan, at gawin tayong kabilang sa mga pinalaya Niya mula sa Impiyerno.

وَاللَّهُ الْمُوَفِّقُ، وَصَلَّى اللَّهُ عَلَى نَبِيِّنَا مُحَمَّدٍ وَعَلَى آلِهِ وَصَحْبِهِ أَجْمَعِينَ.

Relihiyon ng pagpapayuhan - Deenasiha



𝗺𝗮𝗴𝗶𝗻𝗴 𝗯𝗮𝗵𝗮𝗴𝗶 𝗻𝗴 𝗸𝗮𝗯𝘂𝘁𝗶𝗵𝗮𝗻
𝗲-𝐋𝐢𝐤𝐞,𝐅𝐨𝐥𝐥𝐨𝐰 & 𝐒𝐡𝐚𝐫𝐞 𝐨𝐮𝐫 𝐩𝐚𝐠𝐞...
https://www.facebook.com/deenasiha/

𝗣𝗔𝗡𝗚𝗔𝗟𝗔𝗚𝗔𝗔𝗡 𝗡𝗔𝗧𝗜𝗡 𝗔𝗡𝗚 𝗔𝗧𝗜𝗡𝗚 𝗣𝗔𝗚-𝗔𝗔𝗬𝗨𝗡𝗢!

Tunay na ang pag-aayuno kabilang na rito ang pag-aayuno sa buwan ng Ramadan ay maselan at naaapektuhan ng mga gawa at salita ng nag-aayuno. Kaya ikaw, O Muslim, ay dapat magbigay ng lubos at masusing pangangalaga sa iyong pag-aayuno upang ito ay maging katanggap-tanggap sa Allah, ang Kataas-taasan,
at upang makamtan mo ang bunga ng tunay na pagkatakot sa Kanya (taqwā), sa pamamagitan ng mga sumusunod:

1️⃣ Pangalagaan Ang Iyong Pag-Aayuno Laban Sa Kasinungalingan At Lahat Ng Maling Pananalita

Ingatan mo ang iyong pag-aayuno laban sa salitang-zūr (kasalanan sa pananalita gaya ng pagsisinungaling, panlilibak at iba pang ipinagbabawal na salita).

Huwag kang magsalita ng anumang salita hangga’t hindi mo ito nauunawaan at natitiyak na ito ay tama.
Kung ito ay mabuti at wasto, saka mo lamang sabihin.

Ngunit kung ito ay ipinagbabawal, iwasan mo ito. Tandaan mong kapag nagsalita ka ng masama, maaaring mawala ang gantimpala ng iyong pag-aayuno at wala kang mapala rito kundi gutom at uhaw.

Sinabi ng Propeta ﷺ:
(رُبَّ صَائِمٍ لَيْسَ لَهُ مِنْ صِيَامِهِ إِلَّا الْجُوعُ وَرُبَّ قَائِمٍ لَيْسَ لَهُ مِنْ قِيَامِهِ إِلَّا السَّههَرُ)
رواه أحمد وابن ماجه (صحيح)

At sa isang salaysay ni At-Tabarānī:
(رُبَّ صَائِمٍ حَظُّهُ مِنْ صِيَامِهِ الْجُوعُ وَالْعَطَشُ وَرُبَّ قَائِمٍ حَظُّهُ مِنْ قِيَامِهِ السَّهَرُ)
(صحيح)

“Ilan sa mga nag-aayuno ay wala silang napapala sa kanilang pag-aayuno kundi gutom at uhaw, at ilan sa mga tumitindig sa pagdarasal ay wala silang napapala kundi pagpupuyat.”

2️⃣ Pangalagaan Ang Iyong Pag-Aayuno Laban Sa Mga Ipinagbabawal Na Gawain.

Ingatan mo ang iyong pag-aayuno laban sa mga gawaing-zūr (mga ipinagbabawal na gawain). Suriin mo ang iyong sarili sa mga gawa ng iyong mga bahagi ng katawan: ang iyong mga paa, kamay, pagkain, inumin, kasuotan, gamot, trabaho, at lahat ng ipinagkatiwala sa iyo maging ang mga karapatan ng Allah, ng kapwa tao, at ng iyong sarili na nararapat tuparin.

Gawin mo ang lahat ng ipinag-utos ng Allah at iwanan ang lahat ng Kanyang ipinagbawal.
Alamin mong kung hindi mo iiwan ang kasinungalingan at ang paggawa nito, wala kang mapapala sa iyong pag-aayuno kundi gutom at uhaw.

Sinabi ng Propeta ﷺ:
(مَنْ لَمْ يَدَعْ قَوْلَ الزُّورِ وَالْعَمَلَ بِهِ فَلَيْسَ لِلَّهِ حَاجَةٌ فِي أَنْ يَيَدَعَ طَعَامَهُ وَشَرَابَهُ)
رواه البخاري

“Sinuman ang hindi tumigil sa pagsasalita ng kasinungalingan at sa paggawa nito, walang pangangailangan ang Allah na siya ay tumigil sa kanyang pagkain at pag-inom.”

3️⃣ Iwasan Ang Walang Kabuluhang Pananalita At Malaswang Salita (الرفث)

Iwasan mo ang mga walang kabuluhang salita at malaswang pananalita habang ikaw ay nag-aayuno.
Iwasan mo ang anumang bagay na maaaring magpasiklab ng pagnanasa na magdadala sa nag-aayuno sa pagsira ng kanyang obligadong pag-aayuno o magpapahina sa gantimpala nito. Ito ang tinatawag na الرفث.

Alamin mong ang pag-aayuno ay hindi lamang pag-iwas sa pagkain at inumin, kundi pag-iwas sa lahat ng ipinagbabawal at sa anumang nagiging daan patungo rito.

Sinabi ng Propeta ﷺ:
(ليس الصيام من الأكل والشرب إنما الصيام من اللغو والرفث ... الحديث)
رواه الحاكم وقال: هذا حديث صحيح على شرط مسلم ولم يخرجاه (صحيح)

“Ang pag-aayuno ay hindi lamang pag-iwas sa pagkain at pag-inom, kundi ito ay pag-iwas sa walang kabuluhang salita at malaswang pananalita…”

4️⃣ Iwasan Ang Kamangmangan At Masamang Pag-Uugali Habang Nag-Aayuno

Habang ikaw ay nag-aayuno, huwag kang maging magaspang o marahas sa sinuman maging sa tao o hayop.
Huwag kang magalit sa iyong mga anak, asawa, empleyado, o kaninuman.

Iwasan mo rin ang pakikipag-usap sa iyong asawa sa paraang maaaring humantong sa paglabas ng likido (imdhā’) o iba pang bagay na nagpapahina sa gantimpala ng pag-aayuno.

Maaaring ang kamangmangan at malaswang asal ay mag-alis ng gantimpala ng iyong pag-aayuno kaya mag-ingat!

Sinabi ng Propeta ﷺ:
(إِذَا كَانَ أَحَدُكُمْ صَائِمًا فَلَا يَرْفُثْ وَلَا يَجْهَلْ)
رواه البخاري

“Kapag ang isa sa inyo ay nag-aayuno, huwag siyang magsalita ng malaswa at huwag maging mangmang (magaspang).”

5️⃣ Iwasan Ang Sigawan, Alitan, At Kaguluhan

Kapag ikaw ay nag-aayuno, pangalagaan mo ang gantimpala nito. Iwasan ang sigawan, pagtatalo, at kaguluhan.
Maging mahinahon at payapa ang kalooban.
Kung mayroon kang alitan na kailangan mong ipaglaban kahit ito ay tama, ipagpaliban mo muna hanggang matapos ang iyong pag-aayuno.

Sinabi ng Propeta ﷺ:
(وَإِذَا كَانَ يَوْمُ صَوْمِ أَحَدِكُمْ فَلَا يَرْفُثْ وَلَا يَصْخَبْ)
رواه البخاري

“At kapag araw ng pag-aayuno ng isa sa inyo, huwag siyang magsalita ng malaswa at huwag sumigaw.”

6️⃣ Kung Ikaw Ay Ininsulto O Inaway, Sabihin: “Ako Ay Nag-Aayuno”

Maging masigasig sa pangangalaga ng iyong pag-aayuno sa pagiging wasto nito at sa ganap na gantimpala nito.

Kung ikaw ay ininsulto, minura, o inaway, huwag kang gumanti. Sabihin mo lamang:
“إني صائم، إني صائم” "tunay na ako ay nag-aayuno, ako ay nag-aayuno"

Sinabi ng Propeta ﷺ:
(وَإِنْ امْرُؤٌ قَاتَلَهُ أَوْ شَاتَمَهُ فَلْيَقُلْ إِنِّي صَائِمٌ إِنِّي صَائِمٌ)
رواه الشيخان

“At kung may isang taong makipaglaban sa kanya o siya’y alipustain, sabihin niya: ‘Ako ay nag-aayuno, ako ay nag-aayuno.’”

At sa isang salaysay ni Al-Bukhārī:
(فَإِنْ سَابَّهُ أَحَدٌ أَوْ قَاتَلَهُ فَلْيَقُلْ إِنِّي امْرُؤٌ صَائِمٌ)

“Kung siya ay alipustain o hamunin ng pakikipaglaban ng sinuman, sabihin niya: ‘Ako ay isang taong nag-aayuno.’”

📌 Pangwakas na Paalala:

Mag-ingat ka sa iyong pag-aayuno! Ingatan mo ito laban sa anumang makasisira, makapagpapahina, o makaaapekto sa gantimpala nito. Maging matalino, mahinahon, at may dangal.

Maging mapagpatawad sa iyong mga karapatan at lumayo sa bawat ipinagbabawal na salita at gawa, pati na rin sa anumang may pagdududa.

Tandaan: ang tunay na layunin ng pag-aayuno ay hindi lamang ang pag-iwas sa pagkain at inumin, kundi ang paglinis ng puso, pagdidisiplina ng sarili, at paglapit sa Allah sa pamamagitan ng pagsunod at pag-iwas sa kasalanan.

Nawa’y Tanggapin Ng Allah Ang Ating Pag-Aayuno, Patawarin Ang Ating Mga Pagkukulang, At Gawin Tayong Kabilang Sa Mga Nagtagumpay Sa Buwan Ng Ramadan.

وَاللَّهُ الْمُوَفِّقُ، وَصَلَّى اللَّهُ عَلَى نَبِيِّنَا مُحَمَّدٍ وَعَلَى آلِهِ وَصَحْبِهِ أَجْمَعِينَ.

Relihiyon ng pagpapayuhan - Deenasiha



𝗺𝗮𝗴𝗶𝗻𝗴 𝗯𝗮𝗵𝗮𝗴𝗶 𝗻𝗴 𝗸𝗮𝗯𝘂𝘁𝗶𝗵𝗮𝗻
𝗲-𝐋𝐢𝐤𝐞,𝐅𝐨𝐥𝐥𝐨𝐰 & 𝐒𝐡𝐚𝐫𝐞 𝐨𝐮𝐫 𝐩𝐚𝐠𝐞...
https://www.facebook.com/deenasiha/