Cyatangiye muri Nzeli 1989 gitangirana n’ishuri ry’incuke ricumbikiwe mu mazu y’ababikira biturutse ku cyifuzo cy’ababyeyi bo mu mujyi wa Butare. Icyo cyifuzo cyakiriwe neza kuko cyari gihuye n’inshingano ababikira basigiwe n’uwashinze umuryango wabo Umuhire Elena Guerra akaba ari we wifujwe ko akibera umurinzi. Muri Nzeli 1991, hatangijwe imirimo yo kubaka ibyumba b
y’amashuri.naho muri Nzeli 1992 abanyeshuri bari bacumbikiwe mu mazu y’Ababikira bimurirwa mu nyubako nshya. Ishuri ryatashywe ku mugagaro ku itariki ya 18/09/1993 rifite ubushobozi bwo kwakira abanyeshuri 268, icyumba kijyamo abanyeshuri 32. Mu gihe cya Jenoside yakorewe abatutsi mu 1994, ishuri ryahagaritse imirimo yaryo, ryongera gukingura imiryango ku itariki ya 06/02/1995. Uko abana bagendaga bagana umwaka wa gatandatu w’amashuri abanza ni nako ababyeyi bakomeje kwifuza ko hajyaho n’amashuri yisumbuye. Mu mwaka wa 2000 ikigo cyubatse amashuri yiyongera ku yari ahari, hanyuma muri Nzeli 2001 hatangizwa icyiciro cy’ubumenyi rusange. Muri 2011 hatangijwe icyiciro cya kabiri cy’amashuri yisumbuye mu ishami ry’Imibare, Ubugenge n’Ikoranaguhanga (Mathematics, Physics and Computer Science - MPC). Mu 2014 ikigo cya Centre Scolaire Elena Guerra gifite abanyeshuri 495 bari mu byiciro 3: Abanyeshuri 60 mu cyiciro cy’incuke, 225 mu cyiciro cy’amashuri abanza na 210 mu cyiciro cy’amashuri yisumbuye. Kuva Centre Scolaire Elena Guerra ishinzwe imaze kwakira abanyeshuri 3049 mu mashuri y’incuke n’abanza n’abanyeshuri 1384 mu mashuri yisumbuye. Abarangije umwaka wa gatandatu w’amashuri abanza ni 920, abo mu cyiciro rusange ni 392 , naho mu mwaka wa 6 w’ayisumbuye ni 9.
