26/09/2021
Балаҕан ыйын 1-20 күннэригэр Сахабыт сирин маанылаах - Кэбээйи улууһугар дьикти кэрэ айылҕалаах Сэбээн күөл бөһүөлэгэр "Анҥамта" - "Саҥа сүүрээн" диэн проект олохтоох нэһилиэнньэ уонна Дорҕоон Дохсун көҕүлээһининэн тэрилиннэ. Бырайыак түс киһитинэн Томпоттон төрүттээх Петр Дмитриевич Неустроев - Уулдан, олоҕун табаҕа, сылгыга анаабыт уонна эбээн омугун духовнай, материальнай культуратын тыыннаахтыы илдьэ сылдьар, өйүттэн сэһэнньит, хоһоонньут, ырыаһыт, мындыр уус, имииһит, иистэнньэҥ - айылҕаттан ураты дьоҕурдаах ытык кырдьаҕас буолла.
Орто сүһүөх уолаттара: Лукин Никита, Бурцев Антон, Кривошапкин
Егор, Наумов Сайан, Эскэн, Бурцев Чингиз, Степанов Кирил,
Петр Дмитриевичтыын бырайыак кэмигэр сыарҕа оҥоруутун кистэлэҥнэрин биллилэр, үөрэннилэр, эбээн омугун былыргы үгэстэрин, сэһэннэрин, номох буолбут дьонун туһунан сиһилии , иһиттилэр. Ону таһынан ыччат, уонна оҕолор көмөлөрүнэн кырдьаҕастар дьиэлэрин сылытыы "ханапаакы", сабараанньа, даҥ буорун эбии үлэтэ ыытылынна.
Петр Дмитриевич олоҕун аргыһа 90-нус хаарын үктээбит 11 оҕолоох "мать героиня" Розалия Федоровна билигин да
төрүт дьарыгын имиини, тигиини ыһыктыбакка утумнаахтык дьарыгыра сылдьар бэйэтин холобурунан хотугу хоһуун дьахтар үрдүк албан аатын сүгэр дии саныыбын. Бырайыак кэмигэр "Далдаке" минньигэс аһынан маанылаата. Кинилэр дьиэ кэргэн ыстаадаттан бөһүөлэккэ киирбиттэрэ хор аҕыйах сыл буолбут.
Сэбээн күөл курдук төрүт тылын культуратын тыыннаахтыы илдьэ сылдьар нэһилиэк аан дойдуга да тарбахха баттанара буолуо. Хотугу халлаан анныгар олорор омуктар - таба, сыарҕа көлөлөөх үйэлэри уҥуордаан баран, балысханнаах аныгы үйэ очуругар оҕустарбаттарын курдук, уйаҥ куттаах түҥ былыргы омук тыла сүппэтин туһугар, туора туран биэрбэккэ! Өссө да сыарҕа тыаһа сыыгыныы турарыгар, таба ахсаана элбии турарын туһугар, эҥинэ дьикти, айылҕа хомуһуна күүстээх - эбээн тыла, таас хайа сирэйигэр болбукта курдук үүнэн чэчирээн, кэм кэрдиитин кытары тэҥҥэ эрчимнээхтик үктэнэригэр, "түөн" да саҕа кыра көмө сириэдийэн тахсан улахан өҥө буолуо этэ...
"Драгоценности севера это не АЛМАЗЫ и не ЗОЛОТО, это - ЛЮДИ несущие быт, родной язык и культуру предков, сквозь медные бури и отравленный туман - не вечной суеты.
