25/05/2017
د ملي مشر، د پښتونخوا ملي ګوند مرستیال، لوی لېکوال او مورخ ارواښاد عبدالرحیم خان مندوخیل فاتحه
دپښتونخوا د ملي عوامي ګوند مرستیال ارواښاد عبدالرحیم مندوخیل فاتحه ، نن چهارشنبې د۱۳۹۶ لمریزکال د غبرګولي په درېمه نېټه د سرحدونو او قبایلو چارو وزارت لخوا واخیستل شوه.
د فاتحې په یادو مراسمو کې د سرحدونو او قبایلو چارووزارت سرپرست ښاغلي څېړنوال عبدالغفور لېوال، د جمهوري ریاست او اجرائیه ریاست سلاکارانو، د ولسي جرګې او مشرانو جرګې یو شمېر غړو، دوزارت معینانو، سلا کارانو، ریسانو او کار کوونکو سر بېره ګڼوملي، علمي، ادبي او فرهنګي شخصیتونو ، قومي مشرانو، لوړپوړو دولتي چارواکو، سیاستوالو، د مدني ټولنې غړیو، د ملي فکر خاوندانو، ځوانانو او دارواښاد عبدالرحیم مندوخیل مینه والو ګډون کړی و،چې د عظیم الشان قران د مبارکو ایتونو په تلاوت سره یې د لوی الله(ج) له سپیڅلي دربار څخه ارواښاد ته د بخښنې او فردوس جنت ، د لوی افغانستان د پښتونخوا شریفو خلکو، د پښتونخوملي ګوند مشر تابه او غړیو، دارواښاد کورنۍ او عزیزانو ته یې د جمیل صبر غوښتنه وکړه، دارواښاد مړینه یې سیاسي او فرهنګي ضایعه اود ټولو افغانانو شریک غم وګڼلو.
د سرحدونو او قبایلو چارو وزارت سرپرست ښاغلي څېړنوال عبدالغفور لېوال، چې له رسنیو سره یې دارواښاد مندوخیل د ژوند، مبارزو،سیاسي او فرهنګي هڅو په اړه خبرې کولې وویل: ارواښاد د سهیلي پښتونخوا پیاوړی لیکوال او سیاستپوه و، د عمر ډېرې برخه یې د لوی افغانستان دافغانانو د خپلواکۍ او پر مختګ لپاره په مبارزه کې تېره کړه ،د خان شهید عبدالصمد خان اڅکزي سره یې اوږه په اوږه مبارزه پر مخ بوتله او د هغه له شهادت وروسته یې هم خپلې مبارزې ته دوام ورکړ.د یو سیاسي مشر تر څنګ پیاوړی لېکوال او د پښتو لیک دود عامونکی و، چې د خپلې مبارزې په لارکې ستونزې وګاللې، هیله یې دا وه، چې ولس یې خپل برخلیک ته ورسیږي.
ښاغلي لېوال همداراز دارواښاد په لیکلو اثارو کې د(افغانستان او انګرېزي ښکېلاک) (دافغان او افغانستان) نومونه یاد کړل، چې له هره پلوه له ارزښته ډک او بې جوړې دي.
یاده دې وي،چې ارواښاد د۱۳۹۶ لمریز کال د غویي د میاشتې په ۲۹مه نېټه دورپیښې ناروغۍ له کبله ځان حق ته وسپارلو.
