Tarbiah Academy

کیا پایا؟ سوچیں
کیا کھویا؟ چھوڑیں

ثقلین عباس اعوان
ٹرینر، تربیہ کنسلٹنٹ، فیملی ریلیشن شپ مینٹور

25 دسمبر 2025
وقت: صبح 6:20

2025 شروع ہونے کو ہے۔ کوشش کیجیے کہ اگلے سات دنوں میں روزانہ کچھ وقت خود کو دیں،
جس میں آپ کے ساتھ صرف ڈائری اور پین ہوں۔
تنہائی ہو،
آبادی سے دور نکل کر کسی ایسی جگہ بیٹھیں جہاں آپ کو ڈسٹرب کرنے والا کوئی نہ ہو،
یہاں تک کہ موبائل بھی ساتھ نہ رکھیں،
بہتر یہ ہے کہ وقت دیکھنے کے لیے گھڑی رکھیں وہ بھی نہ ہو تو زیادہ بہتر ،
تاکہ آپ کی سوچوں اور ارادوں کے درمیان کسی قسم کی کوئی مداخلت نہ ہو۔
اب سوال یہ ہے کہ اس تنہائی میں کرنا کیا ہے ؟
دو کام کرنے ہیں
ایک: 2024 میں کیا پایا؟
دو: 2025 میں کیا پانا ہے ؟
بس صرف یہ دو کام کرنے ہیں ۔
کیا کھویا ؟ اس کو اس بار چھٹی دیں یا دفنا دیں۔ نہیں تو اس کا حلوہ بنا دیں۔
کھویا کو سوچتے سوچتے ہم عموماً ناامیدی اور پریشانی میں چلے جاتے ہیں ۔
کیونکہ ہمارے ہاں کہاوت جو یوں معروف ہے کہ کچھ پانے کے لیے کچھ کھونا پڑتا ہے ۔
حالانکہ اسے یوں ہونا چاہیے کہ
کچھ پانے کے لیے کچھ کرنا پڑتا ہے ۔
تو ہم نے یہ سوچنا ہے کہ 2024 میں کیا پاپا اور کیسے پایا۔
اور 2025 میں کیا پانا ہے اور اس کے لیے مجھے کیا کرنا پڑے گا ۔
ہوتا یہ ہے کہ جب ہم کیا کھویا کو سوچتے ہیں
تو ہم ساتھ میں چاہتے نہ چاہتے اس پریشانی میں بھی کھو جاتے ہیں کہ
کیوں کھویا،
وہ غلطی کیوں ہوئی،
غلطی نہ ہوتی تو جو کھویا وہ آج میرے پاس ہوتا،
فلاں کی وجہ سے کھویا،
پھر اس فلاں کو کوسنا شروع،
یوں ہمارا بہت سارا وقت بے مقصد سوچ و فکر میں ضائع ہو جاتا ہے،
جس کے بعد تعمیری سوچ پروان چڑھنے کی بجائے رک جاتی ہے،
منفی سوچیں اس کی جگہ لے لیتی ہیں
اور یوں اگلے سال کو نئے عزم کے ساتھ گزارنے کی خواہش لے کر بیٹھا ناامیدی میں چلا جاتا ہے۔
وہ بھول ہی جاتا ہے کہ میں کیوں سب کچھ چھوڑ کر یہاں تنہائی میں آیا تھا۔
اس لیے اس سال کے اختتام پر کیا کھویا کو دودھ کا کھویا بنا کر اس کا حلوہ بنا ڈالیے اور کھا جائیے تاکہ وہ آپ کو کھانے کاٹنے کو نہ دوڑے۔