06/09/2026
سلانوالی میں یومِ دفاعِ پاکستان بھرپور جوش و جذبے سے منایا جارہا ہے--
ملک بھر کی طرح سلانوالی میں بھی یومِ دفاعِ پاکستان قومی جوش و جذبے اور ملی یکجہتی کے ساتھ منایا جا رہا ہے۔
اس سلسلہ میں اسسٹنٹ کمشنر سلانوالی چوہدری محمد اکمل کی سربراہی میں یومِ دفاع کی پروقار تقریب اور ریلی کا انعقاد کیا گیا، جس میں سرکاری اداروں کے افسران و اہلکاروں سمیت سیاسی، سماجی شخصیات، معززینِ علاقہ اور شہریوں نے بھرپور شرکت کی۔
اسسٹنٹ کمشنر سلانوالی چوہدری محمد اکمل نے اپنے خطاب میں کہا کہ یومِ دفاع پاکستان ہماری قومی تاریخ کا اہم دن ہے۔ یہ دن ہمیں اپنے شہداء کی قربانیوں کو یاد کرنے اور ملک و قوم کی خدمت کے عزم کو مزید مضبوط کرنے کا پیغام دیتا ہے۔
انہوں نے کہا کہ وطنِ عزیز کی ترقی اور استحکام کے لیے ہر شہری کو اپنی ذمہ داریاں ایمانداری سے ادا کرنی چاہئیں۔
بعد ازاں یومِ دفاع کے حوالے سے ریلی بھی نکالی گئی، جس میں شرکاء نے قومی پرچم لہراتے ہوئے پاکستان سے محبت اور پاک فوج سے اظہارِ یکجہتی کا اظہار کیا۔ ریلی کے شرکاء نے شہر کے مختلف راستوں سے گزر کر شہریوں کو قومی یکجہتی، حب الوطنی اور وطن کے دفاع کے عزم کا پیغام دیا۔
تقریب کے اختتام پر شہداء پاکستان کے لیے فاتحہ خوانی اور ملکی سلامتی و استحکام کے لیے خصوصی دعا کی گئی۔
شرکاء کا کہنا تھا کہ پاکستان کی آزادی، خودمختاری اور سلامتی کے لیے دی جانے والی قربانیاں قوم کے لیے ہمیشہ مشعلِ راہ رہیں گی۔
