26/12/2023
شہر سُلطان دا تعارف
شہرسلطان ہک قدیمی شہر ہے ۔ ایں گالہ دا اندازہ ایتھوں کر لاسگدوں جوشہرسلطان دی بنیاد حضرت شیخ سلطان احمد قتال نے 915ھ بمطابق 1494ء اچ موضع خان پور بھانی اچ رکھی، کیوں جو اُنہیں دے والد صاحب مخدوم سید غیاث الدین دے تصرف اچ اِیہو علاقہ ہا۔ انہیں ول شیخ سلطان کوں تبلیغ واسطے ایں علاقہ تے معمور کیتا،935ھ اچ شیخ سلطان احمد قتال صاحب (خان احمد لنگاہ) دی استدعا تے شجاع آباد (جلال پور ) گئے پئے،اَتے اے علاقہ آپڑیں پُتر حضرت علم الدین المعروف(حضرت عالم پیر بخاری )دے حوالے کر ڈِتا. اُں ویہلے برصغیر پاک و ہند تے مغل شہنشاہ جہانگیر دی علمداری ہئی،
اُں ویہلے عالم پیر بخاری ایں علاقہ اچ تبلیغ کیتی،تے1002ھ بمطابق 1581ء اچ دائمی اجل کوں لبیک آکھیا، آپ دے ڈو پُتر شیخ عمر تے شیخ الدین آپ دے موجودہ مزار اچ مدفون ہن۔
1187ھ بمطابق 1766ء اچ دریائے سندھ نے ایکوں آپڑیں لپییٹ اچ گھن گِھدھا،جیندے نشانات موجودہ شہر بستی سَمے والا تیں مِلدن، ایں وجہ توں شہرسلطان 1187ھ بمطابق 1766ء اچ دریائے چناب دے کنارے مغربی آباد تھیا۔ ایں شہر دا ناں شیخ سلطان احمد قتال دے ناں توں پیر سلطان دا شہر مشہور تھیا۔ حضرت عالم پیر بخاری دی خانقاہ شریف موجودہ شہر اچ 1324ھ کوں دیوان محمد غوث دے ہتھوں پایہِ تکمیل کوں پہنچی۔ آپ دی مزار توں ہزاراں افراد آپ دے وسیلہ توں اللہ دے فضل نال جھولیاں بھریندن۔ اے تسکین قلب و جان دا سلسلہ اج تَیں جاری ہے۔ہک محاورا ایں علاقے دے پیر صاحب توں منصوب ہے جو (عالم پیر بخاری بھَنی کریندا ساری) اج تیں جاری و ساری ہے۔
میں اہداں جو شہر سُلطان کوں سلطانیں دا شہر آکھانڑں بَجا رہسی جو ایتھوں دے واسی سلطان دِلیں دے مالک ہن۔۔۔۔۔۔
اللہ سائیں میڈے مَن بھانڑیں شہر کوں دن دُگنی رات چُگنی ترقی ڈیوے(آمین)
