21/05/2026
انتظامیہ یونیورسٹی آف چکوال اور مسلم سٹوڈنٹس آرگنائزیشن کے مابین مذاکرات
یونیورسٹی آف چکوال کے شعبہ انٹرنیشنل ریلیشنز کے زیر اہتمام منعقدہ اسٹریٹجک کانفرنس میں اسرائیلی پرچم لہرانے کے معاملے پر جاری شدید تشویش کے تناظر میں آج طلبہ حقوق کی مؤثر آواز مسلم سٹوڈنٹس آرگنائزیشن (ایم ایس او) کے وفد نے ناظم ایم ایس او شمالی پنجاب برادر شرجیل احسن کی قیادت میں وائس چانسلر یونیورسٹی آف چکوال سے تفصیلی ملاقات کی۔
وفد میں ناظم ایم ایس او چکوال احسان مجید، معروف سماجی شخصیت و ممبر ضلعی امن کمیٹی کیپٹن غلام شبیر سمیت دیگر ذمہ داران شریک تھے۔
ملاقات کے دوران صیہونی پرچم کے واقعے اور اس کے نتیجے میں پیدا ہونے والی تشویشناک صورتحال پر تفصیلی گفتگو کی گئی۔ وفد نے یونیورسٹی انتظامیہ کو طلبہ اور عوامی حلقوں میں پائے جانے والے شدید تحفظات سے آگاہ کیا اور مطالبہ کیا کہ اس معاملے میں ملوث عناصر کو بے نقاب کرکے ان کے خلاف سخت کارروائی عمل میں لائی جائے۔
وائس چانسلر ڈاکٹر فرخ ارسلان صدیقی نے وفد کو یقین دہانی کروائی کہ معاملے کی شفاف تحقیقات کے لیے فوری طور پر انکوائری کمیٹی تشکیل دے دی گئی ہے، جسے مکمل اختیارات دیے گئے ہیں۔ انکوائری بورڈ 48 گھنٹوں میں اپنی تفصیلی رپورٹ پیش کرے گا اور ذمہ دار کرداروں کو منظرعام پر لایا جائے گا۔
مزید برآں وائس چانسلر نے اس عزم کا اظہار کیا کہ آئندہ ایسے افسوسناک واقعات کی روک تھام کے لیے فوری اور مؤثر اقدامات کیے جائیں گے۔ اس موقع پر یونیورسٹی کی جانب سے فلسطین کانفرنس کے انعقاد کا بھی اعلان کیا گیا تاکہ طلبہ میں فلسطین اور قبلۂ اول کی اہمیت و حساسیت کو اجاگر کیا جا سکے۔
ملاقات میں طلبہ کو درپیش دیگر مسائل بھی زیر بحث آئے، جن پر انتظامیہ نے مثبت پیش رفت کی یقین دہانی کروائی۔
وائس چانسلر نے اس واقعے پر گہرے دکھ اور تشویش کا اظہار کرتے ہوئے کہا کہ:
“ہم خود بھی اس معاملے پر انتہائی رنجیدہ اور فکرمند ہیں، ان شاء اللہ جلد آپ اس کے عملی نتائج دیکھیں گے، اور اس حوالے سے کسی قسم کی مزید کوتاہی برداشت نہیں کی جائے گی۔”
بعد ازاں ایم ایس او وفد نے رجسٹرار یونیورسٹی سے بھی علیحدہ ملاقات کی، جس میں مذکورہ معاملے سمیت دیگر امور پر تفصیلی تبادلہ خیال کیا گیا اور ذمہ دار عناصر کو کیفر کردار تک پہنچانے کے عزم کا اعادہ کیا گیا۔
ان ملاقاتوں کے بعد ایم ایس او کی جانب سے یونیورسٹی آف چکوال کے مرکزی گیٹ پر پریس کانفرنس منعقد کی گئی، جسے مذاکرات کی مثبت پیش رفت کے باعث مختصر رکھتے ہوئے اس امید کا اظہار کیا گیا کہ یونیورسٹی انتظامیہ جلد تمام معاملات کو منطقی انجام تک پہنچائے گی۔
پریس کانفرنس میں یونیورسٹی کے طلبہ کی بڑی تعداد نے شرکت کی۔
18/01/2026
04/10/2025
24/09/2025
07/05/2025