19/08/2026
وزیراعلیٰ پنجاب مریم نواز شریف، صوبائی وزیرِ تعلیم رانا سکندر حیات اور پارلیمانی سیکرٹری براے ہائر ایجوکیشن سردار اجمل خان چانڈیہ کے تعلیمی وژن کے تحت گورنمنٹ گریجویٹ کالج مظفرگڑھ میں طلبہ کا شاندار ڈیجیٹل اقدام
مظفرگڑھ: وزیراعلیٰ پنجاب محترمہ مریم نواز شریف کے تعلیمی وژن، صوبائی وزیرِ تعلیم رانا سکندر حیات کی تعلیمی پالیسیوں اور پارلیمانی سیکرٹری برائے ہائر ایجوکیشن پنجاب سردار اجمل خان چانڈیہ کی حوصلہ افزائی کے تحت گورنمنٹ گریجویٹ کالج مظفرگڑھ میں طلبہ کی تخلیقی، تحقیقی اور عملی سرگرمیوں کا سلسلہ جاری ہے۔ پرنسپل پروفیسر ڈاکٹر اشرف حسین کی قیادت میں کالج میں طلبہ کو جدید ٹیکنالوجی اور عملی تعلیم کے ذریعے اپنی صلاحیتیں اجاگر کرنے کے بھرپور مواقع فراہم کیے جا رہے ہیں۔
اسی سلسلے میں طلبہ نے جدید ٹیکنالوجی اور اپنی تخلیقی صلاحیتوں کو بروئے کار لاتے ہوئے تیار کردہ کالج مینجمنٹ سسٹم (College Management System) کی جامع پریزینٹیشن اور عملی ڈیمو پیش کیا۔
اس موقع پر وائس پرنسپل پروفیسر ڈاکٹر رحمت اللہ، پروفیسر ظفر حسین چانڈیہ اور لیکچرر محمد ندیم نے طلبہ کی پریزینٹیشن کا مشاہدہ کیا اور سسٹم کے مختلف ماڈیولز، خصوصیات اور عملی افادیت کا جائزہ لیا۔
طلبہ کی جانب سے تیار کردہ کالج مینجمنٹ سسٹم میں ایڈمشن، ایڈمشن سکروٹنی، ایڈمشن اپروول، فیس چالان، طلبہ کا ریکارڈ، حاضری، کلاس ورک، اسائنمنٹس، گریڈنگ، رزلٹس، آن لائن لیکچرز، آن لائن کوئزز اور لرننگ مینجمنٹ سسٹم (LMS) سمیت متعدد اہم ماڈیولز شامل کیے گئے ہیں۔
سسٹم میں اساتذہ سے متعلق مختلف انتظامی امور، تعلیمی سرگرمیوں کی نگرانی، رپورٹس اور پرنسپل ڈیش بورڈ بھی شامل ہے، جس کے ذریعے کالج کے مختلف تدریسی و انتظامی معاملات کو ایک مرکزی ڈیجیٹل پلیٹ فارم پر مربوط کرنے کی کوشش کی گئی ہے۔
وائس پرنسپل پروفیسر ڈاکٹر رحمت اللہ نے طلبہ کی کاوش کو سراہتے ہوئے کہا کہ موجودہ دور میں تعلیمی اداروں کے تدریسی و انتظامی امور کو جدید ٹیکنالوجی سے ہم آہنگ کرنا وقت کی اہم ضرورت ہے۔ انہوں نے طلبہ کی محنت، تخلیقی سوچ اور عملی صلاحیتوں کو قابلِ تحسین قرار دیتے ہوئے انہیں سسٹم کو مزید بہتر بنانے اور اس میں جدید فیچرز شامل کرنے کی ترغیب دی۔
پروفیسر ظفر حسین چانڈیہ نے طلبہ کی پریزینٹیشن اور عملی ڈیمو کو سراہتے ہوئے ان کی تکنیکی مہارت، تخلیقی سوچ، ٹیم ورک اور مسئلہ حل کرنے کی صلاحیتوں کی تعریف کی۔ انہوں نے کہا کہ طلبہ کی جانب سے حقیقی ادارہ جاتی ضروریات کو سمجھ کر ان کے لیے سافٹ ویئر حل تیار کرنا ایک قابلِ تحسین سرگرمی ہے۔
لیکچرر محمد ندیم نے بھی طلبہ کی کاوش کو سراہتے ہوئے کہا کہ کمپیوٹر سائنس کے طلبہ کے لیے ضروری ہے کہ وہ اپنے نظری علم کو عملی منصوبوں میں استعمال کریں۔ انہوں نے کالج مینجمنٹ سسٹم کو طلبہ کے لیے سیکھنے، تجربہ کرنے اور حقیقی مسائل کے جدید ٹیکنالوجی پر مبنی حل تلاش کرنے کی جانب ایک مثبت قدم قرار دیا۔
پارلیمانی سیکرٹری برائے ہائر ایجوکیشن پنجاب سردار اجمل خان چانڈیہ کی جانب سے طلبہ کی تخلیقی اور عملی صلاحیتوں کی حوصلہ افزائی قابلِ تحسین ہے۔ تعلیمی اداروں میں ایسے جدید منصوبوں کی پذیرائی نوجوانوں کو مزید آگے بڑھنے، نئے آئیڈیاز پر کام کرنے اور اپنی صلاحیتوں کو عملی منصوبوں میں ڈھالنے کا حوصلہ فراہم کرتی ہے۔
پرنسپل پروفیسر ڈاکٹر اشرف حسین کی قیادت میں گورنمنٹ گریجویٹ کالج مظفرگڑھ میں جدید تعلیم، ٹیکنالوجی، تحقیق اور تخلیقی سرگرمیوں کے فروغ پر خصوصی توجہ دی جا رہی ہے۔ کالج مینجمنٹ سسٹم کی تیاری اور اس کا عملی مظاہرہ اسی تعلیمی و تخلیقی ماحول کی ایک نمایاں مثال ہے۔
کالج انتظامیہ کے مطابق ایسے عملی منصوبے طلبہ کی تکنیکی صلاحیتوں کو نکھارنے کے ساتھ ساتھ انہیں جدید دور کے تقاضوں اور مستقبل کے پیشہ ورانہ میدان کے لیے تیار کرنے میں اہم کردار ادا کرتے ہیں۔
گورنمنٹ گریجویٹ کالج مظفرگڑھ کے طلبہ کا یہ اقدام اس امر کا عملی ثبوت ہے کہ نوجوان نسل میں جدید ٹیکنالوجی کو سمجھنے، حقیقی مسائل کی نشاندہی کرنے اور ان کے لیے مؤثر ڈیجیٹل سلوشنز تیار کرنے کی بھرپور صلاحیت موجود ہے۔ کالج انتظامیہ نے طلبہ کی اس شاندار کاوش کو سراہتے ہوئے مستقبل میں بھی ایسے جدید، تخلیقی اور عملی منصوبوں کے فروغ کے عزم کا اظہار کیا۔
Higher Education Department-HED PunjabRana Sikandar HayatMuhammad Ajmal ChandiaHED South PunjabDeputy Director Colleges District Muzaffar Garh DC MUZAFFARGARH_OfficialRana Arif JavedMaryam Nawaz SharifDPI Colleges, Punjab, Lahore
