Uswa-E-Hasana School

تعلیم کا اصل مقصد اور ہماری ذمہ داری
موجودہ دور میں والدین اپنے بچوں کی بہترین تعلیم و تربیت کے لیے فکرمند نظر آتے ہیں۔ ہر ماں باپ کی خواہش ہوتی ہے کہ اس کا بچہ اعلیٰ تعلیم حاصل کرے، کامیاب انسان بنے اور معاشرے میں عزت و مقام پائے۔ اسی مقصد کے لیے لوگ ایسے سکول تلاش کرتے ہیں جہاں جدید سہولیات میسر ہوں، خوبصورت عمارتیں ہوں، ائرکنڈیشنڈ کلاس روم ہوں، جدید سمعی و بصری آلات ہوں اور بین الاقوامی نصاب پڑھایا جاتا ہو۔ بلاشبہ یہ تمام چیزیں اہم ہیں، مگر سوال یہ ہے کہ کیا صرف یہی کامیاب تعلیم کی علامت ہیں؟
حقیقت یہ ہے کہ تعلیم کا مقصد صرف اچھا ڈاکٹر، انجینئر، افسر یا کاروباری انسان بنانا نہیں بلکہ ایک اچھا انسان اور بہترین مسلمان بنانا بھی ہے۔ اگر تعلیم انسان کے کردار، اخلاق اور دین کو سنوار نہ سکے تو وہ ادھوری تعلیم ہے۔ آج دنیا ترقی یافتہ ہونے کے باوجود بے سکونی، بے حیائی، ظلم، نفرت اور اخلاقی تباہی کا شکار ہے، کیونکہ علم تو بڑھ گیا مگر کردار کمزور ہوگیا۔
والدین کو چاہیے کہ بچوں کے لیے سکول کا انتخاب کرتے وقت صرف ظاہری چمک دمک نہ دیکھیں بلکہ یہ بھی دیکھیں کہ وہاں بچوں کو ادب، احترام، سچائی، دیانت داری اور انسانیت کا درس دیا جاتا ہے یا نہیں۔ کیا وہاں نماز، قرآن، اسلامی اقدار اور سیرتِ نبوی ﷺ سے محبت پیدا کی جاتی ہے؟ کیا وہاں بچوں کی صرف ذہنی نشوونما ہوتی ہے یا روحانی و اخلاقی تربیت بھی کی جاتی ہے؟
اسلام نے تعلیم کے ساتھ تربیت کو بہت اہم قرار دیا ہے۔ رسول اللہ ﷺ پوری انسانیت کے سب سے بڑے معلم اور مربی تھے۔ آپ ﷺ نے صرف علم نہیں دیا بلکہ ایسا کردار عطا کیا جس نے دنیا بدل دی۔ صحابۂ کرامؓ علم کے ساتھ اخلاق، خوفِ خدا، محبتِ رسول ﷺ اور انسانیت کا نمونہ بنے۔
علامہ اقبالؒ نے اسی حقیقت کی طرف اشارہ کرتے ہوئے فرمایا:
“شکایت ہے مجھے یارب خداوندانِ مکتب سے
سبق شاہیں بچوں کو دے رہے ہیں خاکبازی کا”
اقبالؒ چاہتے تھے کہ مسلمانوں کے بچے شاہین کی طرح بلند حوصلہ، باکردار، خوددار اور دینی غیرت رکھنے والے ہوں، مگر افسوس کہ آج کی تعلیم انہیں صرف دنیا کی دوڑ میں لگا رہی ہے۔
ضرورت اس بات کی ہے کہ ہم اپنے بچوں کو ایسی تعلیم دلوائیں جو دنیا اور آخرت دونوں میں کامیابی کا ذریعہ بنے۔ جدید علوم ضرور حاصل کریں، مگر دین، اخلاق اور کردار کو ہرگز نظرانداز نہ کریں۔ کیونکہ ایک تعلیم یافتہ مگر بے کردار انسان معاشرے کے لیے نقصان دہ ہوسکتا ہے، جبکہ ایک بااخلاق اور نیک انسان پوری قوم کی اصلاح کا ذریعہ بنتا ہے۔

ڈاکٹر محمد فیصل آزاد