17/08/2026
السلام علیکم ورحمۃ اللہ وبرکاتہ!
محترم اسلافینز!
مؤرخہ 14 اگست 2026ء (بروز جمعۃ المبارک) بوقتِ شام 7:00 بجے، سیٹیمینٹ ہوٹل (غواڑی بازار) میں اسلاف بلتستان کا ایک اہم، بابرکت اور بارآور اجلاس منعقد ہوا۔ اس نشست کی صدارت بانیِ اسلاف محترم جناب فرمان سراج صاحب نے فرمائی، جبکہ سابق صدر اسلاف بلتستان محترم جناب آصف حسین کریسی صاحب نے اپنی خصوصی شرکت اور مدبرانہ گراں قدر آراء سے اس بیٹھک کو افادیت اور مقصدیت سے ہمکنار کیا۔
اجلاس کے اہم فیصلے و مندرجات:
اعترافِ تساہل اور تجدیدِ عزم: گزشتہ چند سالوں کے دوران اسلاف بلتستان کے جمود اور غیر فعال رہنے پر گہری تشویش کا اظہار کیا گیا۔ موجودہ کابینہ نے اپنی سابقہ عدم توجہی اور تساہل پسندی پر معذرت کا اظہار کرتے ہوئے آئندہ صمیمِ قلب، تجدیدِ نیت اور کامل یکسوئی کے ساتھ تنظیمی کاوشیں جاری رکھنے کا اعادہ کیا۔
آل بلتستان کابینہ کی تشکیل: سینئر قیادت کی سرپرستی اور بصیرت کی زیرِ نگرانی جلد از جلد ایک جامع اور متحرک "آل بلتستان کابینہ" تشکیل دی جائے گی تاکہ رفاہی و تعلیمی امور کو منظم کیا جا سکے۔
ترویجِ تعلیم و ہم نصابی سرگرمیاں: بلتستان بھر کے تمام تعلیمی اداروں میں فکری سیمینارز، ہم نصابی و تربیت ساز سرگرمیوں اور علمی مسابقات (کوئز مقابلے) کے باقاعدہ انعقاد پر اتفاقِ رائے ہوا۔
وظائف ٹیسٹ کی تیاری: جاریہ سال ہی سے بلتستان کے ان تمام ہونہار طلباء کو، جو ملک بھر کے معتبر تعلیمی اداروں میں اسکالرشپ (وظائف) کے اہل ہیں، ٹیسٹس کی مکمل اور موثر تیاری کروائی جائے گی۔
عصری مہارتوں (ڈیجیٹل سکلز) کا فراہمی: جدید دور کے بدلتے ہوئے رجحانات کو مدِنظر رکھتے ہوئے فیصلہ کیا گیا کہ ڈیجیٹل فنون کی طرف مائل اور روایتی تعلیم سے عدم رغبت رکھنے والے نوجوانوں کی صلاحیتوں کو نکھارنے کے لیے ایک جامع فنی و ڈیجیٹل پلیٹ فارم مہیا کیا جائے گا۔
کابینہ لاہور کی تنظیمِ نو: تنظیم کے دائرہ کار کو وسعت دینے کی غرض سے لاہور کابینہ کی بھی نئے سرے سے تنظیمِ نو کی جائے گی۔
آئندہ نشست کا اعلان: تمام تر امور کی تفصیلی تدوین اور کابینہ کی حتمی تشکیل کے لیے 23 اگست 2026ء (بروز اتوار) کو ایک اور کلیدی اجلاس منعقد کرنے کا فیصلہ کیا گیا ہے۔
تمام اراکین و وابستگان سے التماس ہے کہ اسلاف بلتستان کے اس علمی، رفاہی اور فلاحی سفر کو ثمر بار بنانے کے لیے اپنا بھرپور تعاون پیش کریں۔