27/09/2026
میری ایک بہت اچھی دوست تھیں، ہم ساتھ کام کرتے تھے۔۔ وہ اکثر اپنے شوہر اور سسرال والوں کی شکایت کرتی تھیں۔۔ ان کے شوہر کا رویہ ان کے ساتھ اچھا نہیں تھا۔۔
پھر کچھ عرصے بعد ان کی علیحدگی ہوگئی، انہوں نے بہت تکلیف اٹھائی۔۔ معاملہ کورٹ تک جانے کی نوبت آگئی تھی۔۔ ہر روز وہ ایک نئی پریشانی میں ہوتی تھیں۔۔ یہاں تک کہ کئی مہینے گزر گئے۔۔ اسی دوران میری نوکری کہیں اور ہوگئی۔۔ میں وقتاً فوقتاً ان کی خیریت پوچھتی رہی۔۔ پھر ایک دن ان کا میسج آیا۔۔
کہنے لگیں۔۔ وردہ میری صلح ہوگئی۔۔
میں نے کہا کیسے۔۔؟
مجھے یقین ہی نہیں آیا۔۔ تب میری اپنی شادی نہیں ہوئی تھی، اور میں سوچتی تھی کہ اتنا کچھ ہونے کے بعد کیا میاں بیوی واپس مل سکتے ہیں؟
اس نے کہا، پتہ نہیں کیسے ۔۔ وہ گھر آیا اس نے معافی مانگی، اور کہا کہ وہ بدل جائے گا، اس نے یہ بھی کہا کہ سسرال کی وجہ سے جو مسائل تھے ان کو ختم کرنے کے لئے وہ گھر بھی الگ کردے گا، لیکن اب بیوی بچوں کے حق میں کوئی زیادتی نہیں کرے گا۔۔
مجھے بہت خوشی ہوئی۔۔ کیونکہ وہ اچھی عورت تھی، اس کے بچے بہت پیارے تھے۔۔ اس بات کو دس بارہ سال ہوگئے۔۔ لیکن وہ اپنے شوہر کے ساتھ بہت خوش ہے۔۔ بلکل مطمئن۔۔ الحمداللہ
اس ڈارمے کے آخری قسط بھی بلکل ایسی ہی تھی۔۔فیری ٹیل!
جہاں آخر میں سب ٹھیک ہوجاتا ہے۔۔ لوگ اس کو قبول نہیں کررہے ۔۔ کہہ رہے ہیں کہ ایسا نہیں ہوتا
کیا شادی شدہ زندگی میں یا اس تعلق میں غلطی کے بعد معافی کی کوئی گنجائش نہیں نکلتی۔۔ کیا ہم کبھی کبھی بیوی اور شوہر کو صرف انسان سمجھتے ہوئے اس کی غلطیوں پر مارجن نہیں دے سکتے۔۔
بہت سے لوگوں کا اعتراض ہے کہ جو بھی رد عمل تابش کا دکھایا گیا ہے وہ کہیں نہیں ہوتا، مانا کہ نہیں ہوتا ہوگا۔۔ لیکن کیا یہ ناممکن ہے کہ ایسا ہوجائے؟
کیا ایک فیصد بھی امید نہیں کہ انسان ساتھ گزارا اچھا وقت یاد رکھے۔
ایک دوسرے کی محبت، اچھائیاں، قربانیاں یاد کرکے اس کی غلطیاں بھول جائے۔۔
یا ہوسکتا ہے کہ یہ بینا کی قربانیوں کا ہی اجر ہو!
اگر یہ ہوسکتا ہے تو کیوں نہ ایک بار پھر اس فیری ٹیل کو جی لیں ❤️ اگر ایک فیصد بھی امید ہو تو کوشش کرلینی چاہئے۔۔
سنسکرت کا ایک شعر ہے۔۔ بچپن میں ایک ڈرامے میں سنا تھا۔۔اس کے معنی یہ تھے کہ
“دھاگہ ایک بار ٹوٹ جائے تو جڑ سکتا ہے، لیکن گرہ پڑ جاتی ہے۔۔ “
شاید کچھ تعلق گرہ کے ساتھ بھی چلائے جاسکتے ہیں، جہاں دھاگے کے دونوں ٹکڑے دوبارہ جڑنا چاہتے ہوں۔۔
اللہ ہمیشہ مخلص لوگوں کی محبت محفوظ رکھیں۔۔ آمین 🌹
