Notes By Waqar

دوست مایوس نہ ہو
سلسلے بنتے بگڑتے ہی رہے ہیں اکثر

تیری پلکوں پہ یہ اشکوں کے ستارے کیسے
تجھ کو غم ہے تری محبوب تجھے مل نہ سکی

اور جو زیست تراشی تھی ترے خوابوں نے
جب پڑی چوٹ حقائق کی تو وہ ٹوٹ گئی

تجھ کو معلوم ہے میں نے بھی محبت کی تھی
اور انجام محبت بھی ہے معلوم تجھے

تجھ سے پہلے بھی بجھے ہیں یہاں لاکھوں ہی چراغ
تیری ناکامی نئی بات نہیں دوست میرے

کس نے پائی ہے غم زیست کی تلخی سے نجات
چار و ناچار یہ زہراب سبھی پیتے ہیں

جاں لٹا دینے کے فرسودہ فسانوں پہ نہ جا
کون مرتا ہے محبت میں سبھی جیتے ہیں

وقت ہر زخم کو ہر غم کو مٹا دیتا ہے
وقت کے ساتھ یہ صدمہ بھی گزر جائے گا

اور یہ باتیں جو دہرائی ہیں میں نے اس وقت
تو بھی اک روز انہی باتوں کو دہرائے گا

دوست مایوس نہ ہو!
سلسلے بنتے بگڑتے ہی رہے ہیں اکثر

مے خانوں کی رونق ہیں کبھی خانقہوں کی
اپنا لی ہوس والوں نے جو رسم چلی ہے

دلدارئ واعظ کو ہمیں باقی ہیں ورنہ
اب شہر میں ہر رند خرابات ولی ہے

ذرّو!
اپنے سوزِدروں سے چمکو اور خورشید بنو
قطرو!
اپنے عزمِ جواں سے پھیلو اور طوفاں بنو
ذرّو! قطرو!
ایک نئے مضمون کی اب تمہید بنو
ذرّو! قطرو!
ایک نئی محفل کا اب سامان بنو
ذرّہ — مردہ خاک نہیں ہے، اس میں اب کچھ اور بھی ہے
علم نے اب یہ فاش کیا ہے
ذرّہ قوت کا پیکر ہے
دنیا نے اب جان لیا لے
ذرٗہ طاقت کا مظہر ہے
ایک جہاں میں شور بپا ہے
برق کا ذرّے میں عنصر ہے
ذرّہ — مردہ خاک نہیں ہے، اس میں اب کچھ اور بھی ہے
محض فسردہ خاک نہیں ہے، اس میں اب کچھ اور بھی ہے
قطرہ — ظاہر میں بیرنگ ہے، باطن میں بے آب نہیں
قطرہ، جب چاہے گردوں پر
بادل بن کر چھا سکتا ہے
ننھا سا پانی کا یہ پیکر
طوفاں بن کر آسکتا ہے
ادلہ بن جائے تو اکثر
بنیادوں کو ڈھاسکتا ہے
قطرہ — ظاہر میں بیرنگ ہے، باطن میں بے آب نہیں
ہاں یہ فقط ایک قطرہ ہے، جینے کو اگر بیتاب نہیں
ناگا ساکی پر جو گرا تھا، وہ کیا تھا؟ — اک ذرّہ تھا!
آج طوفاں اک "خطرہ" ہے، کل یہ فقط اک قطرہ تھا!
بیسودوکمزور نہ جانو
اپنی ہستی کو پہچانو
ذرّہ!
اپنے سوزِدروں سے چمکو اور خورشید بنو
قطرو!
اپنے عزمِ جواں سے پھیلو اور طوفاں بنو
ذرّو! قطرو!
ایک نئے مضمون کی اب تمہید بنو
ذرّو! قطرو!
ایک نئی محفل کا اب سامان بنو

قرض نگاہ یار ادا کر چکے ہیں ہم
سب کچھ نثار راہ وفا کر چکے ہیں ہم

کچھ امتحان دست جفا کر چکے ہیں ہم
کچھ ان کی دسترس کا پتا کر چکے ہیں ہم

اب احتیاط کی کوئی صورت نہیں رہی
قاتل سے رسم و راہ سوا کر چکے ہیں ہم

دیکھیں ہے کون کون ضرورت نہیں رہی
کوئے ستم میں سب کو خفا کر چکے ہیں ہم

اب اپنا اختیار ہے چاہے جہاں چلیں
رہبر سے اپنی راہ جدا کر چکے ہیں ہم

ان کی نظر میں کیا کریں پھیکا ہے اب بھی رنگ
جتنا لہو تھا صرف قبا کر چکے ہیں ہم

کچھ اپنے دل کی خو کا بھی شکرانہ چاہیے
سو بار ان کی خو کا گلا کر چکے ہیں ہم

Coming Soon

Why chasing more will destroy our peace ✌️