Dil-e-Nadaan

میں خود سے دور بہت دور جا بسوں گا کہیں
یہ طے تو کر ہی چکا ہوں بہانہ چاہتا ہوں
برونِ ذات کسی سے نہیں ہے خوف مجھے
میں اپنے آپ کو خود سے بچانا چاہتا ہوں

میں کیا کہوں کہ مجھے صبر کیوں نہیں آتا
میں کیا کروں کہ تجھے دیکھنے کی عادت ہے
وصال میں‌ بھی وہی ہے فراق کا عالم
کہ اسکو نیند مجھے رتجگے کی عادت ہے

ہمارے پاؤں پہلے ہی تھکن سے شل پڑے تھے
ابھی ٹھہرے نہیں ٹھیک سے اور چل پڑے تھے
ہمارا نام ہی شامل نہیں تھا مشورے میں
ہمارے پاس ورنہ مسئلوں کے حل پڑے تھے

‏ہر ایک شخص ترازو اُٹھائے پھرتا ہے
‏کسی نے ماننا تھوڑی ہے فیصلہ میرا
‏تُو حل کرے نہ کرے بس یہی بہت ہے مجھے
‏تیری سمجھ میں تو آیا ہے مسئلہ میرا

نظامِ دل میں کہیں بے دلی رُکی ہوئی ہے
ہنسی سجائی گئی ہے خوشی رُکی ہوئی ہے
بھرا ہے وقت نے ہر زخم فائدے سے مگر
مرے وجود میں تیری کمی رُکی ہوئی ہے

میں جو اداسی کو جھٹک واپس پلٹ آتی ہوں
میری ہنسی کا کچھ سبب تو تیری باتیں ہیں !
آؤ یہ سوچ کر اک تصویر ساتھ بنوا لیتے ہیں
وقت گزر جائے تو باقی فقط یادیں ہیں

ہم اپنے آپ کو کچھ بھی نہیں سمجھتے ہیں
سو اپنا غم بھی ترے غم کے بعد دیکھیں گے
جا چکا کوئی ؟ یا جانے لگا ہے ؟ یا کچھ اور ؟
جو بھی ہے ! چھوڑ ! مُحرَم کے بعد دیکھیں گے

سب رفتگاں کو بھولنے آئے ہمارے پاس
ہم سے کسی کو پہلی محبت نہیں ہوئی۔۔

یوں ہی ایک تہمت ہے، دشمنوں سے ملتے ہیں
دِل کو زخم زیادہ تر، دوستوں سے ملتے ہیں!
پہلے شوق رکھتے تھے قربتیں بڑھانے کے
اب تو جس سے ملتے ہیں فاصلوں سے ملتے ہیں

کس طرح تجھ سے کہیں کتنا بھلا لگتا ہے
تجھ کو دیکھیں ترے دیدار میں گم ہو جائیں
ہم ترے شوق میں یوں خود کو گنوا بیٹھے ہیں
جیسے بچے کسی تہوار میں گم ہو جائیں

ضروری ہے یہی اب تو شکستِ فاش سے پہلے
سسکتی ناتواں خود، راجدھانی ختم کر دوں میں
گلے سے طوقِ ہستی اب اتاروں سامنے تیرے
تیرا احسان، تیری مہربانی ختم کر دوں میں