21/09/2026
عَنْ عَبْدِ اللَّهِ ، قَالَ:" كَانَ أَوَّلُ مَنْ أَظْهَرَ إِِسْلامَهُ سَبْعَةً: رَسُولُ اللَّهِ صَلَّى اللَّهُ عَلَيْهِ وَسَلَّمَ، وَأَبُو بَكْرٍ، وَعَمَّارٌ، وَأُمُّهُ سُمَيَّةُ، وَصُهَيْبٌ، وَبِلالٌ، وَالْمِقْدَادُ، فَأَمَّا رَسُولُ اللَّهِ صَلَّى اللَّهُ عَلَيْهِ وَسَلَّمَ، فَمَنَعَهُ اللَّهُ بِعَمِّهِ أَبِي طَالِبٍ، وَأَمَّا أَبُو بَكْرٍ، فَمَنَعَهُ اللَّهُ بِقَوْمِهِ، وَأَمَّا سَائِرُهُمْ فَأَخَذَهُمُ الْمُشْرِكُونَ وَأُلْبِسُوا أَدْرَاعَ الْحَدِيدِ وَصَهَرُوهُمْ فِي الشَّمْسِ، فَمَا مِنْهُمْ أَحَدٌ إِِلا وَآتَاهُمْ عَلَى مَا أَرَادُوا، إِِلا بِلالٌ، فَإِِنَّهُ هَانَتْ عَلَيْهِ نَفْسُهُ فِي اللَّهِ، وَهَانَ عَلَى قَوْمِهِ، فَأَخَذُوهُ، فَأَعْطَوْهُ الْوِلْدَانَ، فَجَعَلُوا يَطُوفُونَ بِهِ فِي شِعَابِ مَكَّةَ وَهُوَ يَقُولُ: أَحَدٌ أَحَدٌ" .
سیدنا عبداللہ رضی اللہ عنہ بیان کرتے ہیں: سب سے پہلے سات افراد نے اسلام کا اظہار کیا: نبی اکرم صلی اللہ علیہ وسلم ، سیدنا ابوبکر رضی اللہ عنہ، سیدنا عمار رضی اللہ عنہ، ان کی والدہ سیدہ سمیہ رضی اللہ عنہا، سیدنا صہیب رضی اللہ عنہ، سیدنا بلال رضی اللہ عنہ اور سیدنا مقداد رضی اللہ عنہ۔ جہاں تک نبی اکرم صلی اللہ علیہ وسلم کا تعلق ہے، تو اللہ تعالیٰ نے آپ کے چچا جناب ابوطالب کی وجہ سے آپ کو (کفار مکہ کے) شر سے محفوظ رکھا، جہاں تک سیدنا ابوبکر رضی اللہ عنہ کا تعلق ہے، تو اللہ تعالیٰ نے ان کی قوم کی وجہ سے انہیں محفوظ رکھا، لیکن جہاں تک باقی لوگوں کا تعلق ہے، تو مشرکین نے انہیں پکڑ لیا، انہیں لوہے کی زرہیں پہنائی گئیں اور انہیں سورج کی گرمی میں چھوڑ دیا گیا۔ ان لوگوں میں سے ہر ایک نے وہ کیا جو وہ لوگ چاہتے تھے، صرف سیدنا بلال رضی اللہ عنہ کا معاملہ مختلف تھا کیونکہ اللہ کی راہ میں انہوں نے اپنی ذات کو بے حیثیت کر دیا تھا اور اپنی قوم کے لیے اپنی ذات کو بے حیثیت کر دیا تھا۔ ان لوگوں نے انہیں پکڑا اور بچوں کے سپرد کر دیا، تو مکہ کی گھاٹیوں میں وہ بچے ان کے اردگرد چکر لگاتے تھے اور سیدنا بلال رضی اللہ عنہ یہ کہتے تھے: «أَحَدٌ، أَحَدٌ» ”(اللہ) ایک ہے (اللہ) ایک ہے“۔ اسنادہ صحیح۔ ابن حبان حدیث 7083
