Marwat students society of USTB

اب خاموشی نہیں، اپنے حقوق کے لیے آواز بلند کرنے کا وقت آ گیا ہے!

آئی ٹی سٹوڈنٹس یونین کے زیرِ اہتمام ایک اہم اجلاس منعقد کیا گیا تھا جس میں مختلف سوسائٹیز اور فیڈریشنز کے صدور صاحبان، نمائندگان اور بڑی تعداد میں طلبہ نے شرکت کی۔ اجلاس میں 2022-26 بی ایس کمپیوٹر سائنس بیچ کے طلبہ کو درپیش ڈی ایم سیز کے سنگین مسائل پر تفصیلی گفتگو کی گئی۔
طلبہ کو درپیش اہم مسائل درج ذیل ہیں:
• طلبہ کی ڈی ایم سیز بروقت جاری نہیں کی جا رہی تھیں۔
• چوتھے سمسٹر تک جاری ہونے والی بیشتر ڈی ایم سیز میں سنگین غلطیاں موجود تھیں۔ کسی طالب علم کے اصل نمبروں سے کم نمبر درج کیے گئے، کسی کے مضامین میں صفر (00) نمبر ظاہر کیے گئے، جبکہ متعدد ڈی ایم سیز میں مس پرنٹنگ اور دیگر تکنیکی خامیاں موجود تھیں۔
• ڈی ایم سیز یونیورسٹی کے اصل پیپر کے بجائے عام فوٹو کاپی پیپر پر پرنٹ کی گئیں، جن پر نہ یونیورسٹی کا لوگو موجود تھا اور نہ ہی سرکاری دستاویز جیسا معیار۔
• میڈیکل سٹوڈنٹس کے میتھ ون اور میتھ ٹو کے امتحانات تک نہیں لیے گئے۔
ان تمام مسائل کو ہم نے یونیورسٹی انتظامیہ کے سامنے رکھا اور مذاکرات کے ذریعے مسئلے کا حل تلاش کرنے کی کوشش کی۔ انتظامیہ نے ہمیں یقین دہانی کروائی کہ ایک ہفتے کے اندر اندر تمام مسائل حل کر دیے جائیں گے۔ مگر افسوس کہ ایک ہفتے کے بجائے آج تقریباً ڈیڑھ سے دو ماہ گزر چکے ہیں اور صورتحال میں کوئی نمایاں بہتری نہیں آئی۔
اس کے برعکس یہ مسائل تو جوں کے توں ہے اب مزید سنگین مسائل سامنے آ چکے ہیں۔
چوتھے سمسٹر کے ریپیٹر طلبہ میں سے بعض کی ڈی ایم سیز جاری ہو چکی ہیں جبکہ بعض کی ابھی تک جاری نہیں ہوئیں۔ جب متاثرہ طلبہ سیکریسی برانچ پہنچے تو انہیں بتایا گیا کہ جن طلبہ کی ڈی ایم سیز جاری نہیں ہوئیں وہ "ڈراپ آؤٹ" ہیں۔ بعد ازاں جب یہ مسئلہ متعلقہ اساتذہ کے سامنے رکھا گیا تو معلوم ہوا کہ چھٹے سمسٹر میں بھی تقریباً 30 سے 35 طلبہ کو ڈراپ آؤٹ ظاہر کیا جا رہا ہے، جس کی وجہ سے ان کی ایوارڈ لسٹ میں انٹری تک ممکن نہیں بن رہی۔ یہ صرف چند طلبہ کا مسئلہ نہیں بلکہ پورے کمپیوٹر سائنس ڈیپارٹمنٹ کے طلبہ کے مستقبل کا معاملہ ہے۔
ہم واضح کرنا چاہتے ہیں کہ ہم نے ہر ممکن طریقہ اختیار کیا، ہر دروازہ کھٹکھٹایا، متعلقہ دفاتر سے رابطے کیے اور مذاکرات کا راستہ اپنایا، مگر ہماری سنوائی نہیں ہوئی۔ اب طلبہ کے پاس اپنے حقوق کے لیے متحد ہو کر آواز بلند کرنے کے سوا کوئی راستہ باقی نہیں بچا۔
لہٰذا کمپیوٹر سائنس سٹوڈنٹس 22_2026 کی جانب سے آنے والے سوموار کو احتجاج (Strike) کا اعلان کیا جاتا ہے اور تب تک تعلیمی سرگرمیاں اور پیپرز وغیرہ نہیں لئے جائیں گے جب تک ہمارے مطالبات نہیں مانے جاتے۔ہم تمام طلبہ سے پرزور اپیل کرتے ہیں کہ وہ اس احتجاج میں بھرپور شرکت کریں اور ہمارے مسئلے کو صرف کمپیوٹر سائنس کے طلبہ کا مسئلہ نہ سمجھیں بلکہ اسے ہر طالب علم کے حق اور مستقبل کا مسئلہ سمجھیں۔ آج اگر ایک شعبے کے طلبہ کے ساتھ ناانصافی ہو رہی ہے تو کل یہی صورتحال کسی اور شعبے کے طلبہ کو بھی درپیش ہو سکتی ہے۔
مروت سٹوڈنٹس سوسائٹی کی جانب سے اس احتجاج کی بھر پور حمایت کا اعلان کیا جاتا ہے اور انشاءاللہ ہم ہر محاذ پر سٹوڈنٹس کے ساتھ رہینگے اور احتجاج میں بھرپور شرکت کریں گے۔

مروت سٹوڈنٹس سوسائٹی یونیورسٹی آف سائنس اینڈ ٹیکنالوجی بنوں کی طرف سے سب مسلمانوں کو عیدالاضحٰی مبارک،

لکی مروت میں ایف ایس سی کے طالبعلم عبدالرزاق ولد محمد یعقوب ساکن کوٹ کشمیر کو گذشتہ روز دن ایک بجے زم زم پلازہ سرائے نورنگ سے نامعلوم مسلح نقاب پوش افراد نے اغواء کرلیا۔ اہلِ خانہ کے مطابق سفید رنگ کی فیلڈر گاڑی نمبر 8437 میں سوار تین مسلح افراد، جو کلاشنکوف سے لیس تھے، عبدالرزاق کو زبردستی اپنے ساتھ لے گئے۔

اہلِ خانہ کا کہنا ہے کہ عبدالرزاق نہ کسی قسم کے جرم میں ملوث ہے، نہ مفرور ہے اور نہ ہی کسی شرپسند یا دہشتگرد تنظیم سے اس کا کوئی تعلق ہے۔ وہ ایک معصوم طالبعلم ہے، البتہ خاندان کی پرانی دشمنی ضرور موجود ہے۔ اس افسوسناک واقعے کے بعد پورا خاندان شدید کرب اور ذہنی اذیت میں مبتلا ہے۔ مغوی کی والدہ اپنے بیٹے کے اغواء کی خبر سن کر بےہوش ہوگئیں اور تاحال انتہائی تشویشناک حالت میں ہیں۔

ہم اعلیٰ حکام، ضلعی انتظامیہ اور قانون نافذ کرنے والے اداروں سے پُرزور مطالبہ کرتے ہیں کہ اس واقعے کی فوری اور شفاف انکوائری کی جائے، مغوی عبدالرزاق کی بحفاظت بازیابی کے لیے ہنگامی بنیادوں پر مؤثر اقدامات اٹھائے جائیں، اور ملوث عناصر کو قانون کے کٹہرے میں لایا جائے۔ ایک ماں کی فریاد، ایک خاندان کا درد اور ایک طالبعلم کی زندگی فوری توجہ کی منتظر ہے۔

آج نورنگ بازار میں ہونے والا دھماکہ صرف ایک حملہ نہیں بلکہ انسانیت کے سینے پر ایک اور گہرا زخم ہے۔ اس افسوسناک واقعے میں سرکاری اہلکاروں کے ساتھ ساتھ معصوم خواتین اور بچے بھی شہید ہوئے، جن کی چیخیں، آہیں اور اداس چہرے پورے علاقے کو سوگوار کر گئے ہیں۔ آخر کب تک ہمارے بازار، گلیاں اور گھر بارود کی بو سے لرزتے رہیں گے؟ آخر کب تک مائیں اپنے بچوں کی لاشیں اٹھاتی رہیں گی؟ یہ دھماکے صرف چند خاندانوں سے ان کی خوشیاں نہیں چھینتے بلکہ پوری قوم کے دل زخمی کر دیتے ہیں۔ امن صرف بیانات دینے سے نہیں آتا، بلکہ ریاستی اداروں، حکومت اور معاشرے سب کو اپنی ذمہ داریاں پوری کرنا ہوتی ہیں۔ عوام کی جان و مال کا تحفظ حکومت اور قانون نافذ کرنے والے اداروں کی اولین ذمہ داری ہے۔ اگر آج بھی ہمارے لوگ بازاروں میں محفوظ نہیں تو یہ سوال اٹھانا ہر شہری کا حق ہے کہ آخر امن کیوں قائم نہیں ہو پا رہا؟ کب تک بے گناہ لوگ دہشتگردی کی بھینٹ چڑھتے رہیں گے؟
ہم دہشتگردی کے اس بزدلانہ واقعے کی شدید الفاظ میں مذمت کرتے ہیں اور مطالبہ کرتے ہیں کہ ذمہ دار عناصر کو فوری طور پر گرفتار کرکے نشانِ عبرت بنایا جائے تاکہ آئندہ کوئی ماں اپنے بچوں کی جدائی کا غم نہ سہے۔ مروت سٹوڈنٹس سوسائٹی بنوں یونیورسٹی اس مشکل گھڑی میں متاثرہ خاندانوں کے ساتھ کھڑی ہے اور ان کے غم میں برابر کی شریک ہے۔
اللہ تعالیٰ تمام شہداء کی مغفرت فرمائے، ان کے درجات بلند کرے، زخمیوں کو جلد صحتِ کاملہ عطا فرمائے اور لواحقین کو یہ ناقابلِ برداشت صدمہ برداشت کرنے کی ہمت دے۔ آمین۔