غیر مسلم شعرا کی نعت گوئی

پیش کردہ:- فقیر عبدالرشید قادری

مہر لال سونی. ضیا فتحپوری
پیش کردہ:- گدائے شاہ جیلاں

جگایا تو نے اقوام عرب کو خواب غفلت سے
کیا آزاد عقل و ہوش کو دام جہالت سے
منظم کر دیا تو نے سب اجزائے پریشاں کو
سکھایا بیٹھنا مل جل کے آپس میں محبت سے
اگر تیرے اصولوں پر رہے قائم تری امت
کوئ امت نہیں بڑھ کر جہاں میں تیری امت سے

کرشن بہاری، نور لکھنوی
پیش کردہ:- گدائے شاہ جیلاں

دیر سے نور چلا اور حرم تک پہنچا
سلسلہ میرے گناہوں کا کرم تک پہنچا
تیری معراج محمد، تو ہے قریب معبود
میری معراج کہ میں تیرے قدم تک پہنچا

ہمدم گوری پرشاد
پیش کردہ:- گدائے شاہ جیلاں

شوق پابوسی لئے چل تو مدینے مجھ کو
زہے قسمت کہ بلایا ہے نبی نے مجھ کو
واپسی دم ہے مجھے ذکر نبی کرنے دو
دوستو موت کے آتے ہیں پسینے مجھ کو

گرسرن لال ادیب لکھنوی
پیش کردہ:- گدائے شاہ جیلاں

قلم کو جب شرف حاصل ہوا نعت پیمبر کا
بنا ہر لفظ اک تعویذ، خوف روز محشر کا
خدا معلوم ہے بھی یا نہیں میرے مقدر کا
تری چشم کرم سے چاہتا ہوں جام کوثر کا

پنڈت آنند موہن، گلزار دہلوی
پیش کردہ:- گدائے شاہ جیلاں

آنکھوں میں بس رہا ہے سراپا رسول کا
دل پر ہوا ہے نقش وہ نقشہ رسول کا
دار فنا کو عظمت باقی عطا ہوئ
لاریب اس جہان میں آنا رسول کا

رگھو پتی سہائے فراق گورکھپوری
پیش کردہ:- گدائے شاہ جیلاں

انوار بے شمار معدود نہیں
رحمت کی شاہراہ مسدود نہیں
معلوم ہے تم کو محمد کا مقام
وہ آیت اسلام میں محدود نہیں

اندر سروپ دت 'نادان'
پیش کردہ:- گدائے شاہ جیلاں

نہ ہم دنیا نہ عقبی مانگتے ہیں
فقط تیرا سہارا مانگتے ہیں
ہمارے نام لکھ دے سرفرازی
ترے قدموں کا صدقہ مانگتے ہیں

پنڈت امر ناتھ ساحر
پیش کردہ:- گدائے شاہ جیلاں

مرا قلب مطلع نور ہے کہ حرم میں جلوہء یار ہے
دل و دیدہ محو نظارہ ہیں کہ نہ گرد ہے نہ غبار ہے
ترے جلووں کا تری رحمتوں کا حساب ہے نہ شمار ہے
کہ صفات کون و مکان کی تری ذات دار و مدار ہے

سردار پنچھی
پیش کردہ:- گدائے شاہ جیلاں

غم آئیں تو آنے دو ہم ڈرتے نہیں غم سے
لو ہم نے لگائ ہے سرکار دوعالم سے
پرواز خیالوں نے، پھر دل نے نظر پائ
کیا کیا نہ ملا ہمکو اس حسن مجسم سے

ڈاکٹر دیا نند سکسینہ
پیش کردہ:- گدائے شاہ جیلاں

جہاں میں کتنے رسول آئے مگر نہ آیا عظیم تم سا
فہیم تم سا، علیم تم سا، نعیم تم سا، حکیم تم سا
ہزار ڈھونڈا تمام دیکھا کسی نے لیکن کہیں نہ پایا
حسین تم سا، امین تم سا، مبین تم سا، وسیم تم سا