10/08/2026
Isang taos-pusong pasasalamat sa PDNA Team (Office of the Civil Defense XII) at sa Lokal na Pamahalaan ng Malapatan sa pangunguna ni Mayor Salway "Jun" Sumbo, Jr. at ng ating MDRRM Office!
Malaking tulong ang isinagawang Post-Disaster Needs Assessment (PDNA) upang matiyak ang kaligtasan ng ating mga mag-aaral at mga g**o. Dahil sa inyong masusing pagtataya at malasakit, masisig**o natin ang pagkakaroon ng isang ligtas, matatag, at maaasahang learning environment para sa ating komunidad.
Magtulungan tayo para sa mas ligtas na kinabukasan ng bawat T***nian!
***nIPS
𝗣𝗗𝗡𝗔 𝗧𝗘𝗔𝗠 𝗡𝗔𝗚𝗕𝗜𝗚𝗔𝗬 𝗡𝗚 𝗣𝗔𝗨𝗡𝗔𝗡𝗚 𝗙𝗘𝗘𝗗𝗕𝗔𝗖𝗞 𝗠𝗔𝗧𝗔𝗣𝗢𝗦 𝗔𝗡𝗚 𝗧𝗔𝗧𝗟𝗢𝗡𝗚 𝗔𝗥𝗔𝗪 𝗡𝗔 𝗙𝗜𝗘𝗟𝗗 𝗩𝗔𝗟𝗜𝗗𝗔𝗧𝗜𝗢𝗡 𝗔𝗦𝗦𝗘𝗦𝗦𝗠𝗘𝗡𝗧 𝗦𝗔 𝗠𝗔𝗟𝗔𝗣𝗔𝗧𝗔𝗡
MALAPATAN, Sarangani—Nagbigay ng paunang feedback ang Post-Disaster Needs Assessment (PDNA) Team sa Lokal na Pamahalaan ng Malapatan matapos ang tatlong (3) araw na isinagawang field validation at post-disaster assessment upang maipresenta ang kanilang mga paunang natuklasan at mapatunayan ang aktuwal na lawak ng mga pinsalang dulot ng malakas na lindol na tumama sa bayan.
Isinagawa ang field validation na hinati sa tatlong grupo nga pinangungunahan nila Jorie Mae Balmediano - CDO III, Sheila Marginado Hallig - CDO III at Jay Salmorin- CDO I sa pamamagitan ng apat (4) na pangunahing sektor—Infrastructure, Productive, Social, at Cross-Cutting Sector—na nagsagawa ng masusing pagsusuri sa lawak ng pinsala sa mga apektadong barangay at pagtukoy sa mga pangunahing pangangailangan ng mga komunidad.
Sa isinagawang feedbacking session, ibinahagi ng PDNA Team ang kanilang mga paunang obserbasyon, nakalap na datos, at mga rekomendasyon na magsisilbing batayan sa pagbuo ng komprehensibong Post-Disaster Needs Assessment (PDNA) Report. Ang naturang ulat ang magsisilbing pangunahing gabay sa pagbalangkas ng mga pangmaikli, panggitna, at pangmatagalang programa at proyekto para sa rehabilitasyon, pagbangon, at pangmatagalang pagpapaunlad ng bayan.
Nagpahayag naman ng pasasalamat si Mayor Salway “Jun” Sumbo, Jr. sa PDNA Team na pinangungunahan ng Office of the Civil Defense XII dahil sa kanilang dedikasyon sa pagsasagawa ng masusing assessment sa labindalawang (12) pinakamalubhang naapektuhang barangay. Ayon sa alkalde, mahalaga ang mga datos na kanilang nakalap sa pagtukoy ng mga prayoridad na interbensyon at sa pagpapatibay ng mga plano sa rehabilitasyon upang matiyak ang mas mabilis at epektibong pagbangon ng mga apektadong residente.
Ipinaliwanag din ng PDNA Team na ang magiging resulta ng assessment ay magsisilbing mahalagang batayan sa pagpaplano ng mas ligtas, mas matatag, at mas matibay na muling pagtatayo ng mga imprastruktura at iba pang pasilidad alinsunod sa umiiral na building standards at disaster-resilient principles. Layunin nitong mabawasan ang panganib at mapataas ang katatagan ng komunidad laban sa mga sakunang maaaring maranasan sa hinaharap.
Inaasahan ding mapabibilis ng naturang assessment ang pagpapatupad ng mga prayoridad na interbensyon at mga proyektong pangrehabilitasyon, kabilang ang pagpapatibay ng mga imprastruktura, pagpapanumbalik ng mga kabuhayan, pagpapalawak ng mga serbisyong panlipunan, at pagpapalakas ng kahandaan ng mga komunidad sa harap ng mga sakuna.
Ang naturang gawain ay bahagi ng patuloy na pagtutulungan ng Lokal na Pamahalaan ng Malapatan at ng mga katuwang na ahensya ng pamahalaan upang matiyak na ang rehabilitasyon at pagbangon ng bayan matapos ang lindol ay magiging maayos, sistematiko, nakabatay sa datos, at tumutugon sa aktuwal na pangangailangan ng mga apektadong residente.
Dumalo rin sa nasabing aktibidad sina Municipal Councilor at Chairperson ng Committee on Disaster Preparedness and Climate Change Hon. Brandy Palarion; MDRRM Officer at Incident Commander Bonbon Quiño; Municipal Engineer Reque Diodina kasama ang mga kawani ng Municipal Engineering Office; MENR Officer Engr. Joey Palma Coliao; at Municipal Agriculturist Engr. Mirasol Saludes. (Malapatan Information Office)
