𝑯𝑼𝑵𝑰'𝑻 𝑷𝑨𝑵𝑼𝑳𝑨𝑻

18/09/2026

𝗔𝗡𝗛𝗦, 𝗡𝗮𝗴𝗯𝘂𝗸𝗹𝗼𝗱 𝘀𝗮 𝗣𝗮𝗻𝗮𝘁𝗮 𝗮𝘁 𝗣𝗮𝘀𝗮𝘀𝗮𝗹𝗮𝗺𝗮𝘁

AGUTAY, ROMBLON — Nagbuklod ang pamilya ng Agutay National High School (ANHS) sa isinagawang Thanksgiving Mass, Oath Taking Ceremony, 2nd General PTA Meeting, at Homeroom PTA Meeting ngayong hapon, Setyembre 18, 2026.

Nagsimula ang programa sa Thanksgiving Mass, na nagsilbing pasasalamat ng komunidad ng paaralan sa mga biyaya at gabay na patuloy na natatanggap.

Sinundan ito ng Oath Taking Ceremony para sa mga bagong halal na opisyal ng PTA, SSLG, at iba't ibang school organizations. Pinangunahan nina Sir Ken Nepomuceno at Ma’am Lelda Delmor ang panunumpa bilang mga inducting officers.

Samantala, isinagawa ang 2nd General PTA Meeting upang talakayin ang mahahalagang usapin at programa ng paaralan.

Sa huling bahagi, nagtipon ang mga magulang at g**o para sa Homeroom PTA Meeting, kung saan isinagawa rin ang releasing of report cards at pagbabahagi ng mahahalagang impormasyon tungkol sa pag-aaral ng mga mag-aaral.

Sa pamamagitan ng mga gawaing ito, muling pinagtibay ng ANHS ang kahalagahan ng pananampalataya, responsibilidad, at pagkakaisa sa paghubog ng isang mas matatag na komunidad ng paaralan.

🖋️ 𝑪𝒓𝒊𝒔 𝑱𝒆𝒓𝒐 𝑹𝒐𝒅𝒂𝒋𝒆
📷 Ezekiel Yen Garcia
Sir Shalom Mabunga
Sir Nolmer Rabino

06/09/2026

𝗔𝗴𝘂𝘁𝗮𝘆 𝗡𝗛𝗦, 𝗟𝘂𝗺𝗮𝗵𝗼𝗸 𝘀𝗮 𝗣𝗜𝗡𝗔𝗦𝗔𝗬𝗔𝗪 𝟮𝟬𝟮𝟲

Lumahok ang Agutay National High School (ANHS) sa PINASAYAW 2026, isa sa mga patimpalak ng Romblon Academic Contests for Excellence (RACE) 2026, na ginanap sa Looc National High School.

Kinatawan ng mga piling mag-aaral ang Agutay NHS sa kompetisyon, kung saan ipinakita nila ang kanilang talento sa pagsasayaw, disiplina, at pagtutulungan bilang isang pangkat.

Sa kabila ng hamon ng paghahanda, buong tapang na ipinamalas ng mga kalahok ang kanilang husay at dedikasyon sa entablado. Naging pagkakataon din ang kompetisyon upang magkaroon sila ng bagong karanasan at maipagmalaki ang kanilang paaralan.

Ang paglahok ng Agutay NHS sa PINASAYAW 2026 ay patunay ng patuloy na pagsuporta ng paaralan sa talento at kakayahan ng mga mag-aaral.

🖋️ Trisha Miles Romano| Associate Editor
📷 Sir Shalom Mabunga
Ezekiel Yen Garcia

31/08/2026

𝗔𝗴𝗡𝗮𝗛𝗶𝗦𝘁𝗮 𝗟𝗲𝗮𝗿𝗻𝗲𝗿𝘀, 𝗞𝗶𝗻𝗶𝗹𝗮𝗹𝗮 𝘀𝗮 𝟱𝘁𝗵 𝗜𝗻𝘀𝘁𝗮𝗯𝗿𝗶𝗴𝗵𝘁 𝗡𝗮𝘁𝗶𝗼𝗻𝗮𝗹 𝗟𝗶𝘁𝗲𝗿𝗮𝗿𝘆 𝗔𝘄𝗮𝗿𝗱𝘀

Walong Grade 12 learners mula sa Agutay National High School ang kinilala bilang awardees sa 5th Instabright National Literary Awards na ginanap noong Agosto 29, 2026, sa View Park Hotel, Tagaytay City.

Ang mga mag-aaral na sina Zaijan M. Moral, Elvin James Mindoro, Hanze Joyce Reta, Shella Marie Role, Ezekiel Yen Garcia, Adrianne Gale Pamposa, Christine Joy Ramo, at Randelle Jay Fajilan ay nabigyang-pugay para sa kanilang mga isinumiteng literary works na nagpakita ng kanilang pagkamalikhain at husay sa pagsulat.

Pinangunahan at ginabayan sila ng kanilang mga g**o na sina Ma’am Jessa Rabida, Ma’am Juliet Epecto, Ma’am Danica Rodaje, Ma’am Kristy Salac, at Ma’am Ryna Rose Regala.

Ipinagmamalaki ng Agutay National High School ang tagumpay ng walong learners na patuloy na nagpapakita ng talento at pagmamahal sa panitikan.

31/08/2026

𝗜𝘀𝗮𝗻𝗴 𝗧𝘂𝗹𝗮, 𝗜𝘀𝗮𝗻𝗴 𝗧𝗶𝗻𝗶𝗴: 𝗭𝗮𝗶𝗷𝗮𝗻 𝗠𝗼𝗿𝗮𝗹 𝗮𝘁 𝗮𝗻𝗴 𝗠𝗮𝗸𝗮𝘀𝗮𝘆𝘀𝗮𝘆𝗮𝗻𝗴 𝗣𝗮𝗴𝗸𝗶𝗹𝗮𝗹𝗮 𝘀𝗮 𝗔𝗴𝘂𝘁𝗮𝘆 𝗛𝗶𝗴𝗵

Minsan, hindi kailangan ng malaking entablado upang mapansin ang isang tinig. Kailangan lamang nito ng pagkakataong marinig.

Para kay Zaijan M. Moral, isang Grade 12 learner ng Agutay National High School, ang pagkakataong iyon ay dumating sa pamamagitan ng panitikan. Sa bawat salitang isinulat niya, nabuo ang isang akdang hindi lamang nagkuwento, kundi naghatid din ng mensaheng sapat upang makilala sa pambansang antas.

Noong Agosto 29, 2026, sa View Park Hotel, Tagaytay City, ginanap ang 5th Instabright National Literary Awards—isang okasyong nagtipon ng mga kabataang manunulat at mga natatanging akdang pampanitikan mula sa iba't ibang lugar.

Sa naturang kompetisyon, nakamit ni Zaijan ang Top 2 sa Top 3 Most Inspirational Poems of the Year – English Category para sa kanyang obra na “When Laws Forget Their Promise.”

Sa likod ng pagkilalang ito ay isang akdang naglalaman ng makabuluhang mensahe. Sa pamamagitan ng panulat, naipahayag ni Zaijan ang isang ideyang higit pa sa karaniwang mga salita—isang paalala tungkol sa mga pangakong dapat panindigan at mga prinsipyong hindi dapat kalimutan.

Ngunit ang kanyang tagumpay ay hindi lamang tungkol sa isang titulo.

Sa loob ng tatlong taon ng pakikilahok ng Agutay National High School sa Instabright National Literary Awards, ngayon lamang nakamit ng paaralan ang isang parangal na ganito kataas. Dahil dito, naging makasaysayan ang pagkilala kay Zaijan hindi lamang bilang isang batang manunulat, kundi bilang learner na nagdala sa pangalan ng Agutay National High School sa pambansang larangan ng panitikan.

Ang kanyang kuwento ay nagpapaalala na ang talento ay maaaring matagpuan saanman. Hindi nito kailangang manggaling sa isang partikular na lugar upang magkaroon ng malaking epekto. Sa tamang pagkakataon, ang isang simpleng ideya ay maaaring maging isang makapangyarihang mensahe, at ang isang estudyante ay maaaring maging kinatawan ng husay ng isang buong paaralan.

Sa pagkakataong ito, isang tula ang nagsilbing tulay.

Mula sa pahina patungo sa pambansang entablado, ang mga salita ni Zaijan ay naging bahagi ng isang milestone na tiyak na maaalala ng Agutay National High School.

Isang tula. Isang tinig. Isang makasaysayang unang pagkilala.

At sa bawat salitang kanyang isusulat sa mga susunod pang pahina, dala niya hindi lamang ang kanyang sariling pangalan, kundi ang inspirasyong ang kabataan ay may kakayahang magsalita, lumikha, at mag-iwan ng marka sa mundo ng panitikan.

🏆 ZAIJAN MORAL CLAIMS TOP 2: A HISTORIC FIRST FOR AGUTAY!

A remarkable milestone for Agutay National High School!

Congratulations to 𝐙𝐚𝐢𝐣𝐚𝐧 𝐌. 𝐌𝐨𝐫𝐚𝐥, a Grade 12 learner of Agutay National High School, for being named Top 2 among the Top 3 Most Inspirational Poems of the Year – English Category at the 5th Instabright National Literary Awards, held on August 29, 2026, at View Park Hotel, Tagaytay City.

His award-winning literary work, “When Laws Forget Their Promise,” stood out among the submitted works and earned national recognition for its meaningful message and literary expression. ✍️📖

This recognition is especially significant for Agutay National High School as it marks the first-ever award of this level for the school after three years of participating in the Instabright National Literary Awards.

Zaijan’s achievement is a proud reminder that talent and creativity can shine wherever they come from. From the small community of Agutay, his words have reached a much wider audience—and brought pride to our school community.

Congratulations, Zaijan! Your achievement is not only your own but a milestone for the entire AgNaHiSta family. May you continue to write with purpose, courage, and passion. 💙✍️

From Agutay to the national stage—one poem, one voice, one remarkable achievement.





Basta taga-Agutay High, DISIPLINADONG TUNAY!

Agutay National High School
Your School. Your Home. Your Future.

20/08/2026

𝗔𝗴𝘂𝘁𝗮𝘆 𝗡𝗛𝗦, 𝗡𝗮𝗸𝗶𝗶𝘀𝗮 𝘀𝗮 𝗣𝗮𝗴𝗱𝗶𝗿𝗶𝘄𝗮𝗻𝗴 𝗻𝗴 𝗕𝘂𝘄𝗮𝗻 𝗻𝗴 𝗪𝗶𝗸𝗮 𝟮𝟬𝟮𝟲

AGUTAY, MAGDIWANG, ROMBLON — Nakiisa ang Agutay National High School sa pagdiriwang ng Buwan ng Wika 2026 sa pamamagitan ng iba’t ibang gawaing pangwika na isinagawa ng mga g**o sa Filipino sa kanilang mga klase.

Kabilang sa mga gawain ang paglikha ng poster, kartung pang-editoryal, Himig Wika, talakayan sa awit, at kilos-senyas na pagbati. Layunin ng mga gawaing ito na mabigyan ang mga mag-aaral ng pagkakataong maipakita ang kanilang pagkamalikhain at kakayahan sa paggamit ng Wikang Filipino.

Nakatulong din ang mga aktibidad sa paglinang ng kritikal na pag-iisip, pagpapahayag, at pagpapahalaga ng mga mag-aaral sa wika. Sa pamamagitan ng sining, musika, at makabagong teknolohiya, naipakita ang iba’t ibang paraan ng paggamit ng Filipino sa pagkatuto at komunikasyon.

Ang pagdiriwang ngayong taon ay nakasentro sa temang “Wikang Filipino at Artipisyal na Intelihensiya (AI): Kasangkapan sa Pananaliksik at Tulay sa Yaman ng Impormasyon.” Binigyang-diin nito ang mahalagang papel ng Wikang Filipino at AI bilang mga kasangkapan sa pagkuha, paggamit, at pagpapalawak ng kaalaman.

Sa pamamagitan ng mga gawaing ito, patuloy na hinihikayat ang mga mag-aaral na gamitin at pahalagahan ang Wikang Filipino bilang bahagi ng kanilang pagkatuto at pang-araw-araw na pakikipagkomunikasyon.

🖋 :Chloe Mutia | Contributor
📷: Teachers and Learners

15/08/2026

𝗦𝗞 𝗔𝗴𝘂𝘁𝗮𝘆 𝗡𝗮𝗴𝗸𝗮𝗹𝗼𝗼𝗯 𝗻𝗴 𝗕𝗮𝘀𝘂𝗿𝗮𝗵𝗮𝗻 𝗮𝘁 𝗧𝗿𝗮𝘀𝗵 𝗕𝗮𝗴𝘀 𝘀𝗮 𝗔𝗴𝘂𝘁𝗮𝘆 𝗡𝗛𝗦

MAGDIWANG, ROMBLON — Nagkaloob ang Sangguniang Kabataan (SK) ng Agutay, sa pangunguna ni SK Chairman Menk Ken Robiso, ng dalawang malalaking basurahan at mga trash bag sa Agutay National High School ngayong Agosto 15, 2026.

Layunin ng ipinagkaloob na kagamitan na makatulong sa pagpapanatili ng kalinisan at kaayusan sa loob ng paaralan, lalo na sa wastong pagtatapon at pamamahala ng basura.

Ayon sa YES-O ng Agutay NHS, malaking tulong ang mga bagong basurahan at trash bag sa patuloy nitong pagsusulong ng mga gawaing pangkalikasan sa paaralan. Hinihikayat din ang mga mag-aaral na gamitin nang wasto ang mga basurahan at panatilihin ang kalinisan ng kanilang kapaligiran.

Ang pagkilos ng SK Agutay ay nagpapakita rin ng pakikiisa ng kabataan sa mga programang naglalayong mapanatiling malinis at maayos ang paaralan at komunidad.

Patuloy namang nananawagan ang YES-O sa mga AgNaHiSta na makiisa sa pangangalaga ng kapaligiran sa pamamagitan ng wastong pagtatapon ng basura at pagiging responsable sa paggamit ng mga pasilidad ng paaralan.

Kabataan para sa kalikasan, sama-sama para sa mas malinis na AgNaHiSta.

🖋️𝑻𝒓𝒊𝒔𝒉𝒂 𝑴𝒊𝒍𝒆𝒔 𝑹𝒐𝒎𝒂𝒏𝒐| Associate Editor

15/08/2026

𝗘𝗻𝗴𝗿. 𝗔𝗻𝗴𝗲𝗹𝗼 𝗥𝗲𝘆𝗲𝘀, 𝗡𝗮𝗴𝗸𝗮𝗹𝗼𝗼𝗯 𝗻𝗴 𝗙𝗶𝗹𝗲 𝗕𝗼𝘅𝗲𝘀 𝘀𝗮 𝗔𝗴𝘂𝘁𝗮𝘆 𝗡𝗛𝗦

MAGDIWANG, ROMBLON — Nagkaloob si Engr. Angelo C. Reyes ng mga set ng file boxes para sa iba’t ibang club at organisasyon ng Agutay National High School.

Layunin ng donasyon na matulungan ang mga student officer sa maayos na pag-iingat at pagsasaayos ng mahahalagang dokumento at talaan ng kanilang mga organisasyon.

Ayon sa paaralan, makatutulong ang mga file boxes upang maging mas organisado at sistematiko ang pamamahala ng mga dokumento ng bawat club at organisasyon.

Nagpaabot naman ng pasasalamat ang Agutay National High School kay Engr. Reyes sa kanyang suporta at malasakit sa mga mag-aaral at sa buong komunidad ng paaralan.

Ang naturang donasyon ay patunay ng patuloy na pagtutulungan ng paaralan at mga stakeholder para sa kapakanan at pag-unlad ng mga mag-aaral.

🖋️𝑱𝒂𝒉𝒂𝒓𝒂𝒉 𝑳𝒂𝒛𝒐

03/08/2026

𝗔𝗴𝘂𝘁𝗮𝘆 𝗡𝗛𝗦, 𝗡𝗮𝗴-𝘂𝘄𝗶 𝗻𝗴 𝗠𝗮𝗿𝗮𝗺𝗶𝗻𝗴 𝗣𝗮𝗿𝗮𝗻𝗴𝗮𝗹 𝘀𝗮 𝗗𝗥𝗔𝗖𝗘 𝟮𝟬𝟮𝟲

Muling pinatunayan ng Agutay National High School (ANHS) ang husay at kahusayan ng mga mag-aaral matapos mag-uwi ng maraming parangal sa iba't ibang kompetisyon ng District-Level Academic Contests for Excellence (DRACE) 2026.

Nanguna ang ANHS sa pamamagitan ng pagkamit ng kampeonato sa ilang kategorya. Si Michaella A. Ribot, sa gabay ni Noriel M. Ribot, ay itinanghal na Champion sa Column Writing–Filipino. Si Ezekiel Yen R. Garcia, sa ilalim ng paggabay ni Nolmer Rabino, ay nagkamit ng Champion sa Photojournalism–Filipino. Nasungkit din ni Justine Relox, sa gabay ni Lovelyn M. Martir, ang Champion sa Editorial Cartooning–Filipino.

Muling ipinagtanggol ng ANHS ang titulo sa Pinasayaw, kung saan itinanghal na Champion ang koponang binubuo nina Shiena M. Latagan, John Alex R. Rom, Derick F. Rapal, Dexter F. Rapal, Mae Jane R. Mendez, Danica A. Roda, Marcon Bilan, Sandra Yuri R. Dacara, Lyden Faith R. Orbe, Isaiah Rhed L. Calida, Kim E. Mendezabal, Ashley Joy Roblo, Maradhen R. Ruga, at Matt Robiso, sa pangunguna ng kanilang coach na si Jollien Kate M. Mindoro.

Samantala, nagkamit ng 2nd Place sa Radio Broadcasting–English sina Zaijan M. Moral, Hanze Joy R. Reta, Shella Marie R. Role, Kim E. Mendezabal, Isaiah Rhed L. Calida, James Patrick G. Estrera, at Ruina Yexha M. Tamayo, sa gabay ni Kristy M. Salac.

Nagwagi rin ng 2nd Place si Erika Joy R. Realo sa Science and Technology Writing–Filipino sa ilalim ni Jessa R. Rabida. Sa Feature Writing–Filipino, nakamit ni Menchu Tamayo ang 2nd Place sa gabay ni Danica Rodaje. Samantala, ang pangkat nina Shan Carah Madia, Christian D. Magro, at Dianne Arriola, sa pangunguna ni Joerey M. Mabunga, ay nagkamit ng 2nd Place sa Dokyukwento.

Sa mga nagtamo ng 3rd Place, kabilang sina Christine Joy B. Ramo sa Mind Olympiad (Coach: Kristy M. Salac), Von Gabriel Macato sa Sports Writing–English (Coach: Juliet A. Epecto), Franchezka R. Gutoman sa Column Writing–English (Coach: Noriel M. Ribot), Ruina Yexha M. Tamayo sa Feature Writing–English (Coach: Danica Rodaje), Rizza Mazo sa News Writing–Filipino (Coach: Joerey M. Mabunga), Lance Jay Magro sa Precision Parking (Coach: Jessa R. Rabida), at Jose Anthony Rojas sa Nano Sumo (Coach: Rey R. Orbe).

Ipinamalas din ng iba pang kalahok ang kanilang kakayahan sa iba't ibang larangan, na nagbigay ng karangalan at inspirasyon sa buong komunidad ng paaralan.

Bunga ng sama-samang pagsisikap ng mga mag-aaral, coach, trainer, at ng administrasyon ng paaralan, muling naitaas ng Agutay National High School ang bandila ng kahusayan sa DRACE 2026 at napatunayang isa ito sa mga nangungunang paaralan sa distrito.

🖋️𝑻𝒓𝒊𝒔𝒉𝒂 𝑴𝒊𝒍𝒆𝒔 𝑹𝒐𝒎𝒂𝒏𝒐
📷 𝑬𝒛𝒆𝒌𝒊𝒆𝒍 𝒀𝒆𝒏 𝑮𝒂𝒓𝒄𝒊𝒂
𝑴𝒔. 𝑹𝒚𝒏𝒂 𝑹𝒐𝒔𝒆 𝑴𝒂𝒏𝒂𝒈𝒐

01/08/2026

𝗔𝗴𝘂𝘁𝗮𝘆 𝗡𝗛𝗦, 𝗠𝘂𝗹𝗶𝗻𝗴 𝗡𝗮𝗴𝗸𝗮𝗺𝗽𝗲𝗼𝗻 𝘀𝗮 𝗣𝗶𝗻𝗮𝘀𝗮𝘆𝗮𝘄

Muling pinatunayan ng Agutay National High School (ANHS) ang husay nito sa larangan ng sayaw matapos matagumpay na maipagtanggol ang kampeonato sa Pinasayaw ngayong Agosto 1, 2026. Matatandaang noong nakaraang taon ay itinanghal na kampeon ang paaralan sa pagtatanghal ng "Bayle sa Kalye," at ngayong taon ay muli nitong napanatili ang titulo sa parehong kompetisyon.

Sa pamamagitan ng makulay na koreograpiya, sabayang galaw, at kahanga-hangang pagtatanghal na sumasalamin sa mayamang kulturang Pilipino, namayani ang delegasyon ng ANHS laban sa iba pang mga kalahok. Ang kanilang pagganap ay naging bunga ng ilang buwang masusing pagsasanay, disiplina, at pagtutulungan ng buong koponan.

Mahalaga rin ang naging papel ng kanilang mga coach na sina Ma'am Jolien Kate Mindoro, Sir Rhafie M. Mabunga, at Ma'am Ryna Rose Manago, gayundin ng kanilang trainer na si Marz Rovira, na walang sawang gumabay at nagbahagi ng kanilang kaalaman upang maihanda ang mga mag-aaral para sa kompetisyon.

Nagpaabot naman ng taos-pusong pasasalamat ang mga mananayaw sa kanilang mga coach, trainer, at sa School Head ng Agutay National High School na si Sir Andrew C. Reyes sa patuloy na suporta, paggabay, at paniniwala sa kanilang kakayahan. Ayon sa mga mag-aaral, malaking bahagi ng kanilang tagumpay ang inspirasyon at suporta na kanilang natanggap mula sa pamunuan ng paaralan at sa kanilang mga tagapagsanay.

Sa panibagong kampeonatong ito, muling pinatunayan ng Agutay National High School ang kahusayan ng mga mag-aaral nito sa larangan ng sining at kultura. Higit pa sa tropeo, ipinakita ng kanilang tagumpay ang kahalagahan ng pagtutulungan, disiplina, at pagmamalaki sa kulturang Pilipino—mga pagpapahalagang patuloy na isinusulong ng paaralan.

🖋️𝒁𝒂𝒊𝒋𝒂𝒏 𝑴𝒐𝒓𝒂𝒍
📷 𝑬𝒛𝒆𝒌𝒊𝒆𝒍 𝒀𝒆𝒏 𝑹. 𝑮𝒂𝒓𝒄𝒊𝒂

25/07/2026

𝗔𝗴𝘂𝘁𝗮𝘆 𝗡𝗛𝗦 𝗚𝗿𝗮𝗱𝗲 𝟭𝟮 𝗦𝘁𝘂𝗱𝗲𝗻𝘁𝘀 𝗟𝘂𝗺𝗮𝗵𝗼𝗸 𝘀𝗮 𝗣𝗿𝗼𝗷𝗲𝗰𝘁 𝗞𝗮𝘀𝗶𝗺𝗮𝗻𝘄𝗮 𝟮𝟬𝟮𝟲

Agutay, Magdiwang, Romblon — Lumahok ang 18 Grade 12 na mag-aaral ng Agutay National High School (ANHS) sa Project Kasimanwa 2026 ngayong Hulyo 25, 2026. Layunin ng programa na tulungan ang mga mag-aaral sa kanilang paghahanda para sa college entrance examinations at scholarship examinations sa pamamagitan ng libreng review at mock examination.
Isinagawa ang programa sa pamamagitan ng Google Meet, habang ang pangunahing venue ay sa San Agustin, Romblon. Sa kabila ng online na setup, naging aktibo ang pakikilahok ng mga mag-aaral sa review session at mock examination, na naging makabuluhan at puno ng bagong kaalaman.

Nagpapasalamat ang Agutay National High School kay Ms. Princess Mae Ballera sa kanyang boluntaryong oras at paggabay sa mga mag-aaral sa buong programa. Nagpapasalamat din ang mga mag-aaral sa mga lecturer ng Project Kasimanwa 2026 sa kanilang pagbabahagi ng kaalaman at mahahalagang estratehiya na nakatulong sa kanilang paghahanda para sa kolehiyo.

Lubos ding nagpapasalamat ang mga mag-aaral kina Mr. Jiro Reyen Romano at Mr. Robert Simon Rosas sa pagbibigay ng pagkakataon sa Agutay National High School na maging bahagi ng Project Kasimanwa 2026.

Pinasasalamatan din ng mga mag-aaral si Sir Andrew C. Reyes, School Head ng Agutay National High School, gayundin sina Ma'am Kristy Salac at Ma'am Juliet Epecto, mga tagapayo ng Grade 12, sa kanilang suporta, paggabay, at paghikayat sa mga mag-aaral na lumahok sa nasabing programa.

Sa pamamagitan ng Project Kasimanwa 2026, mas naging handa at mas naging kumpiyansa ang mga kalahok sa pagharap sa mga pagsusulit para sa kolehiyo, na magsisilbing mahalagang hakbang sa kanilang pag-abot sa mas mataas na antas ng edukasyon.

🖋️𝑩𝒂𝒃𝒚 𝑱𝒂𝒏𝒆 𝑹𝒐𝒃𝒍𝒐
📷 Ezekiel Yen Garcia
Ms. Princess Mae Ballera
Ms. Kristy Salac
Ms. Juliet Epecto