28/05/2026
PANAWAGAN PARA SA BRIGADA ESKWELA 2026
Salcedo Elementary School
Magandang araw po sa ating lahat!
Sa ngalan ng pamunuan ng Salcedo Elementary School sa pangunguna ni Jennifer H. Francisco, Principal I, kami po ay taos-pusong nananawagan sa lahat ng magulang, alumni, barangay officials, pribadong indibidwal, stakeholders, at mga organisasyon na makiisa at makibahagi sa Brigada Eskwela 2026 na may temang: “Bayanihan sa Paaralan: Nagkakaisa para sa Kaayusan at Kaalaman. “
Ang Brigada Eskwela ay hindi lamang simpleng paghahanda ng paaralan bago magsimula ang klase. Ito ay isang makabuluhang programa ng Department of Education na nagpapakita ng bayanihan, pagkakaisa, at malasakit para sa kapakanan ng ating mga mag-aaral. Sa pamamagitan ng sama-samang pagtutulungan, masisiguro natin ang isang ligtas, malinis, maayos, at kaaya-ayang kapaligiran para sa pagkatuto ng ating mga kabataan.
Kami po ay humihingi ng inyong suporta sa anumang paraan—maaaring ito ay boluntaryong paggawa, donasyon ng pintura, kagamitan sa paglilinis, school supplies, construction materials, electric supplies, o simpleng paglalaan ng oras at lakas upang makatulong sa paglilinis at pagkukumpuni ng ating paaralan.
Naniniwala kami na ang edukasyon ay pananagutan ng buong komunidad. Sa bawat tulong na inyong maibibigay, malaking hakbang ito tungo sa mas magandang kinabukasan ng ating mga mag-aaral. Ang inyong kabutihang-loob ay magiging inspirasyon upang higit pang mapaunlad ang kalidad ng edukasyon sa ating paaralan.
Inaanyayahan po namin kayong makiisa sa Brigada Eskwela 2026 ng Salcedo Elementary School at maging bahagi ng makabuluhang adhikaing ito. Sama-sama nating ipakita ang diwa ng bayanihan at pagmamahal sa edukasyon.
Maraming salamat po at nawa’y pagpalain tayong lahat!
MAGBINULIGAY KITA PARA SA ATON KABATAAN!!!
