LaSci - Kabataang Pangarap ni Rizal

𝐎𝐛𝐫𝐚 𝐌𝐚𝐞𝐬𝐭𝐫𝐚 𝐧𝐠 𝐁𝐚𝐢𝐭𝐚𝐧𝐠 𝟖: 𝐅𝐥𝐨𝐫𝐚𝐧𝐭𝐞 𝐚𝐭 𝐋𝐚𝐮𝐫𝐚

Ipinakita ng mga mag-aaral ng Baitang 8 ang kanilang husay sa pagganap sa dula batay sa akdang Florante at Laura. Sa kanilang pagtatanghal, naipakita ang mahahalagang tema ng pag-ibig, katapatan, at pakikipaglaban para sa katarungan. Ang kanilang makukulay na kasuotan at maingat na paghahanda sa mga props ay lalong nagbigay-buhay sa bawat tagpo ng kuwento. Ang matagumpay na pagtatanghal na ito ay naisakatuparan sa ilalim ng paggabay ni 𝗚𝗻𝗴. 𝗖𝗿𝘆𝘀𝘁𝗮𝗹 𝗝𝗼𝘆 𝗧. 𝗣𝗮𝗿𝗮𝗴𝗼, na nagbigay ng patnubay at suporta sa mga mag-aaral sa kanilang paghahanda.

Nawa'y ipagpatuloy ng bawat isa ang pagmamahal sa sining ng malayang pagpapahayag!

𝗣𝗮𝗱𝗮𝘆𝗼𝗻, 𝗟𝗮𝗦𝗰𝗶𝗮𝗻𝘀!

𝐎𝐛𝐫𝐚 𝐌𝐚𝐞𝐬𝐭𝐫𝐚 𝐧𝐠 𝐁𝐚𝐢𝐭𝐚𝐧𝐠 𝟗: 𝐍𝐨𝐥𝐢 𝐌𝐞 𝐓𝐚𝐧𝐠𝐞𝐫𝐞

Sa pagtatanghal ng mga mag-aaral sa Baitang 9, muling nabigyang-buhay ang makasaysayang nobelang Noli Me Tangere, na naglalantad ng mga suliranin at realidad ng lipunan noong panahon ng kolonyalismo. Sa pamamagitan ng kanilang pagganap, naipakita ang mahahalagang aral tungkol sa katarungan, pagmamahal sa bayan, at pagnanais ng pagbabago. Ang kanilang maayos na costume at props ay nagbigay ng lalim at buhay sa bawat eksena ng dula. Ang proyektong ito ay naisakatuparan sa patnubay ni 𝗕𝗯. 𝗔𝗺𝗮𝗻𝗱𝗮 𝗗𝗲𝗻-𝗗𝗲𝗻 𝗖. 𝗔𝘂𝘀𝘁𝗲𝗿𝗼, na gumabay sa mga mag-aaral sa kanilang malikhaing pagtatanghal.

Nawa'y ipagpatuloy ng bawat isa ang pagmamahal sa sining ng malayang pagpapahayag.

𝗣𝗮𝗱𝗮𝘆𝗼𝗻, 𝗟𝗮𝗦𝗰𝗶𝗮𝗻𝘀!

𝐎𝐛𝐫𝐚 𝐌𝐚𝐞𝐬𝐭𝐫𝐚 𝐧𝐠 𝐁𝐚𝐢𝐭𝐚𝐧𝐠 𝟏𝟎: 𝐄𝐥 𝐅𝐢𝐥𝐢𝐛𝐮𝐬𝐭𝐞𝐫𝐢𝐬𝐦𝐨

Matagumpay namang naipakita ng mga mag-aaral ng Baitang 10 ang kanilang dula batay sa nobelang El Filibusterismo, ang karugtong ng Noli Me Tangere na nagpapakita ng mas matinding paghahangad ng pagbabago sa lipunan. Sa kanilang pagtatanghal, malinaw na naipahayag ang mga mensahe ng akda tungkol sa paghihimagsik, katarungan, at pagmamahal sa bayan. Ang paggamit ng makukulay at maayos na kasuotan at props ay nakatulong upang maging mas makatotohanan at makabuluhan ang bawat tagpo. Ang gawaing ito ay naisakatuparan sa ilalim ng paggabay ni 𝗚. 𝗠𝗮𝗿𝘃𝗶𝗻 𝗖𝗮𝗯𝗿𝗲𝗿𝗮, na sumuporta sa mga mag-aaral sa kanilang paghahanda at pagtatanghal.

Nawa'y ipagpatuloy ng bawat isa ang pagmamahal sa sining ng malayang pagpapahayag.

𝗣𝗮𝗱𝗮𝘆𝗼𝗻, 𝗟𝗮𝗦𝗰𝗶𝗮𝗻𝘀!

🎉 Maligayang Kaarawan sa ating Tagasuri, 𝐁𝐫𝐲𝐥𝐥𝐞 𝐉𝐚𝐯𝐢𝐞𝐫! 🎉

Nawa’y punuin ng kulay ng ligaya at makabuluhang tagumpay ang bagong taon ng iyong buhay. Taos-puso ang aming pasasalamat sa iyong dedikasyon at husay sa paglilingkod bilang Tagasuri. Patuloy ka nawang maging inspirasyon sa bawat isa.

✨ Mabuhay ka, Brylle! 🎂🌟

Ngayong ika-25 ng Pebrero, ginugunita natin ang ika-40 anibersaryo ng EDSA People Power Revolution—isang natatanging pag-aalsa ng mamamayang Pilipino na nagpatunay na ang tunay na lakas ng bansa ay nagmumula sa pagkakaisa at paninindigan ng bayan. Sa kahabaan ng Epifanio de los Santos Avenue, ipinamalas ng milyun-milyong Pilipino ang tapang na tumindig laban sa pang-aabuso ng kapangyarihan.

Ang EDSA Revolution ay nagbunsod ng pagbagsak ng diktadurya at muling pagbabalik ng demokratikong pamahalaan sa Pilipinas matapos ang halos dalawang dekada ng batas militar at awtoritaryanismo. Sa pamamagitan ng mapayapang pagkilos, gaya ng panalangin, pagkakaisa, at malasakit sa kapwa, naitala ang EDSA bilang isa sa mga pinakamatagumpay na rebolusyon sa kasaysayan ng mundo.

Apat na dekada na ang lumipas, ngunit nananatili pa ring mahalaga ang diwa ng EDSA Revolution sa kasalukuyang henerasyon. Isa itong paalala na ang kalayaan at demokrasya ay hindi basta ibinibigay, kundi ipinaglalaban at pinangangalagaan. Nawa’y magsilbi itong inspirasyon sa atin na manatiling mapanuri, makabayan, at aktibong makilahok sa patuloy na paghubog ng ating bansa.

𝗛𝗶𝗺𝗶𝗴 𝗮𝘁 𝗣𝗮𝗴-𝗶𝗯𝗶𝗴 𝗘𝗻𝘁𝗿𝘆 #2

Minamahal,

Maraming daan ang tinahak bago ako huminto sandali at huminga. Hindi lahat ng lakad ay sigurado, hindi lahat ng hakbang ay buo ang loob. May mga panahong ang kailangan ay magpatuloy kahit hindi malinaw kung saan patungo, dala ang mga pangarap na minsan ay mas mabigat kaysa sa lakas na natitira.

May mga isinakripisyo sa paglalakbay, oras, katahimikan, at ilang bahagi ng sarili. Natuto akong magtiis, natutong maghintay, at natutong ipagpatuloy ang paglalakad kahit pagod na. Sa dami ng daang nadaanan, may mga sandaling akala ko mali ang direksiyon, na baka naligaw lang ako sa paghahangad na makarating.

Pero sa huli, doon ako huminto.

Hindi dahil tapos na ang paglalakbay, kundi dahil may natagpuan. Sa gitna ng lahat ng liko at paglayo, doon ko naunawaan na ang lahat pala ng ito ay may patutunguhan. Hindi man tuwid ang dinaan, hindi man madali ang bawat hakbang, malinaw ngayon kung bakit kinailangan ang lahat ng iyon.

Sa dami ng daang nilakbay, sa’yo lang din pala ako pauuwi.

At kung muling maglakbay, kung muling mapagod, alam ko na ngayon kung saan ako patutungo, hindi dahil madali, kundi dahil tama.

-Mga Akda ni Lukas

𝗛𝗶𝗺𝗶𝗴 𝗮𝘁 𝗣𝗮𝗴-𝗶𝗯𝗶𝗴 𝗘𝗻𝘁𝗿𝘆 #𝟭

Dumating ka sa buhay ko nang hindi ko inaasahan, parang ordinaryong araw lang na akala ko alam ko na ang takbo, pero biglang may liko palang hindi ko nakita. Dati isa ka lang estudyante na nadaanan ko sa hallways, sa labas, sa mga sandaling walang pangalan at walang kahulugan, tapos ngayon ikaw na pala yung dahilan kung bakit natututo akong maghintay at mangarap kahit may takot na nadarama.

Sinong mag-aakala na yung simpleng sulyap ay hahantong sa pag-aalaga, sa pagkapit, sa pagmamahal na tahimik pero malalim, yung tipong dahan-dahan kang binabago nang hindi ka tinatanong kung handa ka na ba talaga. Minahal kita nang sobra, hindi dahil perpekto ka, kundi dahil totoo ka, at doon ako natuto kung paano maging totoo rin sa sarili ko.

Masaya, oo, sobra, yung klaseng saya na gumagaan ang dibdib kahit pagod na sa mundo, yung pagmamahal na parang tahanan kapag pagala-gala ang isip. Pero kasabay ng saya, may bigat ding sumasabay, hindi sumisigaw pero ramdam, parang alon na paulit-ulit bumabalik kahit pilit mong iwasan ang sakit.

Napapatanong tuloy ako sa sarili ko kung dahil ba sayo ko lang naranasan yung ganitong lalim ng saya at ganitong tindi ng pagmamahal, o dahil ba natuto lang talaga akong magmahal nang walang reserba, walang takas, walang atrasan.

Ngunit ngayon, tapos na ang ating pahina. Alam kong masakit, alam kong pareho tayong nasasaktan, at kahit pilitin kong intindihin, may mga bagay talagang hindi na maibabalik sa dati. Hindi dahil kulang, hindi dahil mali, kundi dahil may mga kwentong kailangang huminto kahit mahal pa. Pero mananatili ang pahinang ’to. Tahimik, totoo, at puno ng alaala. Ang pahinang paulit-ulit kong babalikan, hindi para masaktan, kundi para alalahanin na minsan, may dumating sa buhay ko nang hindi ko inaasahan, at minahal ko siya nang buong-buo.

Gusto ko lang sabihin na lagi kang maging masaya, yung klaseng saya na hindi mo kailangang ipaglaban o ipaliwanag kanino man, yung saya na payapa at sapat. Susuportahan kita kahit sa malayo, kahit hindi na ako bahagi ng araw-araw mong kwento, kahit iba na ang kasabay mong mangarap at tumawa. Pipiliin ko pa ring ipagdasal ang kapayapaan mo, pipiliin ang ikabubuti mo kaysa sa pagkapit ko, pipiliin ang pagbitaw kahit masakit.

At kahit wala na ako sa tabi mo, kahit wala na akong karapatang humawak, magtanong, o manatili, huwag na huwag mong kakalimutan na may nagmamahal sayo nang buong-buo, nang walang kondisyon, at walang pagsisisi. Nandito ka pa rin lagi, sa puso ko, sa mga alaala na hindi ko kailangang burahin, sa pagmamahal na kahit tapos na ang kwento, mananatiling totoo.

Paalam, prinsesa ko 💞
-snsn

𝗡𝗮𝗿𝗮𝗻𝗮𝘀𝗮𝗻 𝗺𝗼 𝗻𝗮 𝗯𝗮𝗻𝗴 𝗺𝗮𝗴𝗺𝗮𝗵𝗮𝗹 𝗮𝘁 𝗺𝗮𝗿𝗮𝗺𝗱𝗮𝗺𝗮𝗻 𝗮𝗻𝗴 𝗸𝗮𝗸𝗮𝗶𝗯𝗮𝗻𝗴 𝗸𝗶𝗹𝗶𝗴 𝗻𝗮 𝗵𝗶𝗻𝗱𝗶 𝗺𝗼 𝗺𝗮𝗶𝗹𝗮𝗿𝗮𝘄𝗮𝗻 𝘀𝗮 𝘀𝗮𝗹𝗶𝘁𝗮?

Ngayon ang pagkakataon mong ibahagi ang mga sandaling nagbigay-buhay sa iyong damdamin, ang mga pusong unang nahulog, mga lihim na paghanga at mga alaala na paulit-ulit mong binabalikan sa isip.

Sa Himig at Pag-ibig, inaanyayahan ka naming magsumite ng iyong kwento ng pag-ibig, kung saan binibigyang halaga ang bawat karanasan at emosyon na nag-hubog sa iyong pagtingin sa pagmamahal.

I-scan lamang ang QR code o pindutin ang link ng Google Form, punan ang mga kinakailangang detalye, at i-upload ang iyong salaysay.

✒️ https://forms.gle/oX6bm3dW8wmZkzqk9

Ang iyong kwento ay maaaring magbigay inspirasyon, mag-bigay ng closure, o mag-bukas ng bagong pag-asa para sa iba. 🤎🤍

𝗛𝗶𝗻𝗴𝗮. 𝗛𝗶𝗻𝗮𝗵𝗼𝗻. 𝗣𝗮𝗴-𝗮𝘀𝗮. 🫂❤️

Ang Salitanglaw ay proyekto ng Kabataang Pangarap ni RIzal ngunit ngayong Buwan ng Pag-ibig, ito’y alay din sa bawat pusong handang magmahal, magpatawad, at magbahagi ng pag-ibig. 🌹

𝙻𝚒𝚗𝚐𝚐𝚞𝚑𝚊𝚗𝚐 𝚜𝚊𝚕𝚒𝚝𝚊 #12: 𝙿𝚒𝚗𝚝𝚒𝚐

𝗠𝗔𝗥𝗔𝗠𝗜𝗡𝗚 𝗦𝗔𝗟𝗔𝗠𝗔𝗧 𝗣𝗢! 🤎🤍

Isang malaking salamat sa lahat ng nakilahok sa 𝗣𝗔𝗚𝗟𝗔𝗨𝗠 𝟮𝟬𝟮𝟲 ng Samahang Kabataang Pangarap Ni Rizal. Nawa ay bauunin ng bawat isa ang masasayang alaalang nabuo noong nagdaang Hobby Day!

Oh siya, pa'no? Sa susunod ulit ha?
Padayon, LaScians!