22/11/2023
ANFANI DA MUHIMMANCIN
KARATUN AL-QUR'AN
KAKA DA JIKA
Wani Dattijo ya kasance yana yawaita karatun Ƙur'ani.
Jikansa sai ya ce, menene amfanin yawan karatun da kake yi amma baka haddacewa?
Kakan sai ya ɗauki kwando ya ba shi, ya ce jeka ka ciko mini shi da ruwa.
Ya ce, har abada ba zai cika ba, don ruwa ba zai zauna a cikin kwando ba.
Kakan ya ce, jeka dai ka gwada. Ya yi na farko, y ce babu fa'ida, domin ba zai cika ba.
Kakan ya ce, ka ƙara yi kamar sau 5 mu gani ko za a dace. Bayan y sake gwadawa Jikan ya ce, ba zai yiwu ba fa.
Kakan ya ce, kalli kwandon da kyau ka gani, me ya faru da shi?
Bayan dogon nazari ya ce, da akwai dauɗa da ƙura da yawa a jikinsa amma yanzu ya fita fes!
Ya ce, wannan shi ne abin da Ƙur'ani yake yiwa zuciyarmu. Duniya cike take da ƙura da dauɗa da kuma ƙazanta. Karanta Ƙur'ani shi ne yake wanke Zuciya ko da kuwa baka haddace ba.
Kar ka yadda ka ɗauki rashin hadda a matsayin uzurin da zai hanaka karatun Ƙur'ani, wannan shi ne abin da Sheɗan yake so don ya halakar da kai.
