04/05/2025
Fassarar Littafin:
"MEN ARE FROM MARS, WOMEN ARE FROM VENUS, na John Gray. A taƙaice.
Daga Idris Badamasi Idris ✍🏼
Rubutu na biyu.
MANUFAR LITTAFIN:
Don taimakawa ma'aurata ko masoya su fahimci juna sosai.
Don rage saɓani da fahimtar juna bisa banbancin ɗabi'ar da Maza da Mata ba su fahimci juna a kai ba.
Don inganta soyayya, zaman lafiya, da yarda tsakanin Maza da Mata.
SAƘO NA MUSAMMAN DAGA LITTAFIN:
Domin zama lafiya da fahimtar juna tsakanin Maza da Mata; Ba sai an canza mace ta zama namiji ba, ko kuma an canza namiji ya zama mace ba, A'a. Sai dai kawai kowa ya fahimci ɗan uwansa a haka, a yadda yake, sai ya mu'amalance shi cikin hikima da sanin ya kamata, Shikenan.
GABATARWA:
A cikin wannan littafi, marubucin "John Gray" ya bayyana wata muhimmiyar fahimta ce cewa: Maza da Mata suna da banbanci sosai, kamar dai ka ce sun fito ne daga wasu duniyoyi biyu mabanbanta, Maza daga Mars, Mata kuma daga Venus.
Saɓani tsakanin Namiji da Mace ba yana nufin cewa ɗaya yana kan kuskure bane ɗaya kuma yana kan daidai ba, A'a. Yana nuna cewa kowannensu yana da halayensa ne, buƙatunsa, ɗabi'unsa, yadda yake kallon al'amura, da hanyar tunaninsa ne ta daban.
Wannan banbanci da ke tsakanin Maza da Mata shi ne tushen rashin fahimtar juna a tsakanin Ma'aurata. Amma da zarar kowa ya fahimci inda ɗan uwansa ya fito da kuma inda ya dosa, da halayensa, da ɗabi'unsa; to sai a zauna lafiya.
Littafin yana koya mana yadda za mu fahimci juna, girmama juna, da mu'amala da juna cikin hikima, maimakon mu yi ta saɓani da ganin laifin juna.
Za mu Ci gaba In sha Allah.
