27/08/2026
2026–2027 ОНЫ ХИЧЭЭЛИЙН ЖИЛ:
ХҮҮХЭД БҮРИЙН САЙН САЙХАН БАЙДЛЫН ТӨЛӨӨ
Эрхэм хүндэт эцэг эх, асран хамгаалагчид аа,
184-р сургууль 2026–2027 оны хичээлийн жилийг хүүхдийн сурлагын амжилтаас гадна хөгжил, хамгаалал, сэтгэл зүйн сайн сайхан байдал, нийгэмшихүй, аюулгүй орчныг цогцоор нь дэмжих шинэ зорилго, шинэ ажлуудтайгаар угтаж байна.
Өнгөрсөн хичээлийн жилийн судалгаа, ажиглалт, бодит хэрэгцээндээ тулгуурлан бид нэг чухал үзэл санааг үйл ажиллагааныхаа үндэс болгож байна.
Бүх гэр бүлийн нөхцөл ижил байх боломжгүй. Харин сургууль хүүхэд бүрийн хувьд аюулгүй, хүндлэгддэг, сонсогддог, хөгжих боломжтой, суралцахдаа аз жаргалтай орчин байж чадна.
Тиймээс энэ хичээлийн жилд Хүүхэд хөгжил, хамгааллын алба болон сургуулийн нийт хамт олон “Сурагчдын сайн сайхан байдлыг дэмжих цогц хөтөлбөр”-ийг хэрэгжүүлж, хүүхэд бүрийг зөвхөн хичээл сурлагаар нь бус бие бялдар, сэтгэл зүй, харилцаа, нийгэмшихүй, оролцоо, аюулгүй байдал, өөрийгөө таних ба удирдах чадварынх нь хувьд дэмжин ажиллана.
Энэ ажлын хүрээнд бид сургууль–багш–сурагч–гэр бүлийн ойлголт, хандлага, оролцоог нэг чиглэлд нэгтгэх дараах бүтээлүүдийг боловсрууллаа.
📘 “184-р сургуулийн анги удирдсан багшийн дүр төрх, үйл ажиллагаанд заавал дагаж мөрдөх дүрэм”
Хүүхэдтэй хүндэтгэлтэй харилцах, сонсох, дэмжих, ялгаварлахгүй байх, асуудлыг шийтгэлээр бус хөгжлийн арга зүйгээр шийдвэрлэх багшийн нийтлэг зарчим, үйл ажиллагааны чиглэлийг тодорхойлно.
📗 “184-р сургуулийн сурагчдын чиглүүлэг гарын авлага”
Сурагч өөрийгөө таних, сэтгэл хөдлөлөө удирдах, бусадтай зөв харилцах, аюулгүй байдлаа хамгаалах, тусламж хүсэх, хариуцлагатай сонголт хийхэд чиглүүлнэ.
📙 “184-р сургуулийн эцэг эх, асран хамгаалагчдын чиглүүлэг гарын авлага”
Хүүхдийн нас, хөгжлийн онцлогийг ойлгох, хүүхдээ сонсох, дэмжих, сургуультай зөв түншлэх, тулгамдсан асуудлыг хамтран шийдвэрлэхэд гэр бүлд бодит чиглүүлэг өгнө.
Эдгээр нь зүгээр нэг гарын авлага, дүрэм биш. Харин хүүхдийн эргэн тойрон дахь насанд хүрэгчид нэг ойлголттой, нэг зарчимтай, нэг зорилгын төлөө ажиллах суурь болно.
2026–2027 онд бид хүүхдэд зориулсан олон ажил зохион байгуулснаараа бус, хүүхэд сургуульдаа ирэхдээ аюулгүй мэдрэмжтэй байна уу, түүнийг сонсох хүн байна уу, ангидаа харьяалагдаж байна уу, өөрийгөө үнэ цэнтэй гэж мэдэрч байна уу, хөгжих боломж нь нэмэгдэж байна уу гэдгээр ажлынхаа үр дүнг харахыг зорьж байна.
Хүүхдийн сайн сайхан байдал бол зөвхөн гэр бүлийн ч, зөвхөн сургуулийн ч үүрэг биш.
Харин хүүхдийн төлөө нэг ойлголт, нэг хандлагаар хамтран ажиллах бидний ХАМТЫН ХАРИУЦЛАГА юм.
💚 184-р сургууль хүүхэд бүрийг сонсдог, хамгаалдаг, хөгжлийг нь дэмждэг сургууль байхын төлөө бид баг хамт олноороо судалж, боловсруулж, тасралтгүй сайжруулалт хийж байна ТА БҮХНИЙ ДЭМЖЛЭГ ХАМГИЙН ЧУХАЛ НЬ ШҮҮ
Хүндэтгэсэн:
Хүүхэд хөгжил хамгааллын баг
