11/03/2026
Абэ Кобо "Элсний хүүхэн" романыг унших шалтгаан...
Тосгоны удирдлагууд мэдээж тосгоны иргэдийг элсэн нүхэнд нь элс зөөлгөж амьдруулсан хэвээр, улсаас авдаг тэтгэмжийг өөрсдийн эрх ашиг болгож, хааяа нэг хоол хүнс, тамхи тариа өгч, санааг нь амраагаад л. Яг л манай монголын нийгэм харагдсан даа.
Эрх мэдэлгүй, эрх чөлөөгөө эдлэх эрхгүй болох нь ямар аймшигтай, бачимдмаар вэ гэдгийг тосгоны иргэдээс биш гаднаас ирээд тосгоны удирдагчдын урхинд унаж, эрхэнд нь орсон багш залуу, түүнээс ч өмнө ирээд золгүйгээр амиа алдсан хүмүүсийн үхлээс харж болно.
Багш залуу амьд үлдсэн шалтгааныг би харахдаа, тэр золгүй гэрийн эзэгтэйтэй үлдэх шийдвэр гаргаснаар тосгоны удирдагчдын эрхшээлд үлдэж байгаагаас харж болно.
Хүн гэдэг эрх чөлөөгүй болбол эхэндээ амь тэмцдэг. Эрх мэдэлтнүүдийн эрхшээлээс гарч чадахгүйгээ мэдэхээр зүгээр л орших нэгэн болж болдгийг харж болно.
07/04/2025
Абэ Кобо
"Элсний хүүхэн" роман (төрсөн сэтгэгдэл)
Японы хөдөө нутгийн нэгэн сургуулийн багш залуу шавж судлах дуртай бөгөөд зохиолын эхлэл хэсэгт Испани ялааг хайхаар говь, цөл рүү явж байлаа. Эзгүй зэлүүд элсэн цөлд өнөөх ялаагаа хайж явсаар тэнгист тулаад, цааш явахдаа нэгэн өвгөнтэй таарна.
Цөл газар хаанаас, юун өвгөн гараад ирэв? гэх асуулт ургаж, өөрөөсөө асуусаар цааш уншив.
Мэдээж зохиол болгонд үйл явдал өрнөх шалтгаан хэрэгтэй шүү дээ.
Өвгөн түүнийг тосгонд ирэх төрийн хүнтэй андуурчээ. Гэтэл төд удалгүй биш гэдгийг нь мэдмэгц өөрийн өгөөшөө болгохоор шийджээ.
Зүгээр нэг цөл газар байж энэ залуу юуны учир өгөөш болох билээ?
Залууг нэгэн элсэн нүхэн дунд байх байшин руу олсон шатаар буулгаад, айлын эзэн эмэгтэйд хүлээлгэж өгөөд явав.
Дөнгөж ирсэн залуу энэ бүхнийг юун л их анзаарав гэж. Тэр гэрийн эзэн бүсгүй болон тосгоныхны учир мэдэгдэхгүй яриа, үйлдлүүдээс залуу ямар ч сэжиг авалгүй хоносон ч тэр шөнөөс хойш өвгөний оруулсан элсэн нүхэнд олсон шатаар бууж ирсэн шигээ тэр чигтээ хадагдах юм чинээ хэрхэн бодож амжих билээ дээ.
Итгэл найдвар тээн нүхнээс гарахыг олон удаа оролдоно. Тэр болгонд гэрийн эзэн бүсгүйг төдий чинээ зовооно.
Гэтэл яагаад энэ бусармаг аймшигт хэрэгтэй энэ бүсгүй эвлэрчихсэн амьдарч байгаа юм бол?
