01/09/2026
СУРГУУЛИЙН СЭТГЭЛ ЗҮЙЧИЙН ЗӨВЛӨГӨӨ
👪Эрхэм эцэг эхчүүд ээ! Хичээлийн шинэ жил эхлэх дөхөж буй энэ өдрүүдэд хүүхдээ хичээлийн хэрэгсэл, дүрэмт хувцсаар хангахаас гадна сэтгэл зүй болон өдөр тутмын хэмнэлийг нь бэлтгэх нь хамгийн чухал байдаг. Хүүхдээ шинэ хичээлийн жилд түгшүүргүй, эрч хүчтэй дасан зохицоход нь туслах 5 чухал сэдвийг хүргэж байна.
1. НОЙРНЫ ХЭМНЭЛИЙГ ААЖМААР УРАГШЛУУЛАХ💤
Зуны амралтаар оройтож унтаж, оройтож сэрдэг байсан хэмнэлийг 9 сарын 1-нд гэнэт өөрчлөх нь хүүхдэд асар том стресс болдог. Иймд өдөр бүр 10–20 минутаар унтах болон сэрэх цагийг бага багаар урагшлуулаарай. (Жишээ нь: 00:00 цагт унтдаг бол Даваа—23:50, Мягмар—23:40 гэх мэтээр шилжүүлснээр 2 долоо хоногийн дараа 21:30 гэхэд амархан унтаж сурна).
2. СУРГУУЛЬД АНХЛАН ЭЛСЭГЧ ХҮҮХДЭЭ БҮТЭН НЭРТЭЙ НЬ НӨХӨРЛҮҮЛЭЭРЭЙ👨👩👧👦❤
Гэртээ өхөөрдсөн эсвэл товчилсон нэрээрээ дуудуулж дассан хүүхдийг ангид нь бүтэн нэрээр нь дуудахад өөрийг нь дуудаж байгааг анзаарахгүй байх тохиолдол гардаг. Аав, ээж, ах, эгчдээ "Миний хүү/охин", "Анука", "Төөгөө" гэж дуудуулж дассан хүүхдийн хувьд тэдгээр нэрс нь аюулгүй, хайрлуулж буй дулаан мэдрэмж дагуулж байдаг. Харин сургуулийн босго алхаж, ангидаа суухтай зэрэгцэн энэ танил орчин гэнэт өөрчлөгддөг. Бүтэн нэрээр нь дуудах үед хүүхэд өөрийг нь дуудаж байгааг сайн ойлгохгүй, хариулахгүй өнгөрч болно. Учир нь түүний тархи зөвхөн өхөөрдөж дууддаг гэрийн нэрэндээ л хариу үйлдэл үзүүлж дассан байдаг. Сургуульд орохоос нь өмнө гэртээ тоглоом тоглох байдлаар бүтэн нэрээр нь дуудаж, тодорхой хариулж сурахад нь бага багаар дасгаарай. Хэрэв хүүхэд гэрийн нэрэндээ маш их дассан бол багшид нь урьдчилан хэлж өгснөөр дасан зохицох шилжилтийн үеийг зөөллөнө.
3. ДЭЛГЭЦИЙН ХЭРЭГЛЭЭГ БУУРУУЛЖ, ОРОЙН АМГАЛАН ОРЧИН БҮРДҮҮЛЭХ📵😴
Унтахаас багадаа 1 цагийн өмнө утсаа хурааж, зурагт болон дэлгэц харахгүй байх нь тархийг амраахад тусална. Дэлгэцээс цацрах хөх гэрэл нь тархинд 'одоо өдөр байна' гэх хуурмаг дохио өгч, амралтын гормон мелатониныг саатуулдаг.Тиймээс орой бүр дэлгэцийн гэрлийг унтрааж, амгалан орчныг бүрдүүлээрэй. Унтахын өмнө хүүхэдтэйгээ ном сөхөн суух, өдрийн сонин сайхнаа зөөлөн ярилцах эсвэл хамтдаа хөнгөн сунгалт хийх нь тэдний тархийг амрааж, сэтгэл зүйд нь аюулгүй, нөмөртэй мэдрэмжийг бэлэглэдэг.
4. ХИЧЭЭЛИЙН БЭЛТГЭЛД ХҮҮХДИЙГ ОРОЛЦУУЛАХ🎒
Хичээлийн хэрэгсэл, дүрэмт хувцсаа бэлдэх үйл явцад хүүхдийг идэвхтэй оролцуулах нь сургуульдаа дасан зохицох том хөшүүрэг болдог. Ээж, аав нь хүүхэддээ өөрийнхөө таалагдсан цүнхийг шууд аваад өгчихвөл хүүхдэд эхэндээ "Аав ээжийн авч өгсөн цүнх" шиг л санагдана. Харин бичгийн хэрэгслийг хүүхдээр өөрөөр нь сонголт хийлгэн авсан тохиолдолд хүүхэд "Би өөрөө сонгож авсан шүү!" гэх эзэнжүүлэх мэдрэмжийг авдаг. Ингэж сонгосон дэвтэр, харандаагаа хүүхэд гамнах, цүнхэндээ нандигнан хийх хариуцлагатай байдал нь байгалийн жамаар бий болдог.
5. СЭТГЭЛ ЗҮЙН БАТАЛГААЖУУЛАЛТ БА ХАРИЛЦАА❤✨
Хичээл эхлэх дөхөхөөр зарим хүүхэд шинэ багш, найз нөхөд, хичээлийн ачааллаас эмээж, дотоод түгшүүртэй болдог. Зарим эцэг эхчүүд маань хүүхдээ "Удахгүй хичээл орлоо, одоо тоглохоо боль" гэж тушаах байдал их ажиглагддаг. Энэ нь хүүхдэд айдас, сандрал түгшүүрийг ихээр мэдрүүлэх гээд байдаг. Харин үүний оронд илүү "Сургуульдаа явахад юу нь хамгийн гоё санагдаж байна?", "Сэтгэл санаа нь ямар байна?" гэж асуун ярилцан сургууль бол зөвхөн даалгавар хийдэг газар биш, шинэ зүйл танин мэдэх, найзуудтайгаа нөхөрлөх гоё орчин гэдгийг сануулах нь дасан зохицох байдалд нэн чухал.
✅Дасан зохицол гэдэг бол цаг хугацааны асуудал биш, харин бидний хүүхдэдээ бэлэглэж буй сэтгэл зүйн аюулгүй байдал, халуун дулаан нөмрийн үр дүн юм. Ирээдүйн эзэд болох бяцхан сурагчиддаа болон тэдний хамгийн том ар тал болсон эцэг эхчүүддээ хичээлийн шинэ жилийн бэлтгэлд нь өндөр амжилт хүсье! 🎒✨
