http://www.medical.mnums.edu.mn/

АШУҮИС-Анагаах Ухааны Сургууль, Botanic garden, Ulaanbaatar (2026)

22/09/2026

АШУҮИС-ийн Анагаах ухааны сургуулийн Эмнэлзүйн ур чадварын төвийн Робот мэс заслын сургалтын дэд төв нь дэвшилтэт технологид суурилсан сургалт, дадлагыг хөгжүүлж, ирээдүйн эмч, мэс засалчдын ур чадварыг дээшлүүлэх шинэ боломжийг бүрдүүлж байна.

Монгол Улсын Төрийн шагналт, Хүний гавьяат эмч С.Эрдэнэ робот мэс заслын технологийн хөгжил, ач холбогдол болон цаашдын боломжийн талаар танилцуулж байна.

22/09/2026

БОЛОВСРОЛЫН САЙД Л.ЭНХ-АМГАЛАН, ЭРҮҮЛ МЭНДИЙН САЙД Э.БАТШУГАР НАР АШУҮИС-ИЙН ЭМНЭЛЗҮЙН УР ЧАДВАРЫН ТӨВИЙН ҮЙЛ АЖИЛЛАГААТАЙ ТАНИЛЦЛАА

Боловсролын сайд Л.Энх-Амгалан, Эрүүл мэндийн сайд Э.Батшугар, Монгол Улсын Ерөнхийлөгчийн ахлах зөвлөх, АУ-ны доктор, профессор Н.Хүрэлбаатар болон холбогдох албаны төлөөлөл 2026 оны 9 дүгээр сарын 21-ний өдөр АШУҮИС-ийн Зүүн кампуст ажиллах үеэр Анагаах ухааны сургуулийн Эмнэлзүйн ур чадварын төвийн үйл ажиллагаатай танилцлаа.

Энэ үеэр төвийн сургалтын орчин, эмнэлзүйн ур чадвар эзэмшүүлэх сургалтын зохион байгуулалт, оюутан, суралцагчдын практик ур чадварыг хөгжүүлэхэд ашиглаж буй сургалтын арга зүй, тоног төхөөрөмж, симуляцид суурилсан сургалтын үйл ажиллагааг танилцуулав.

Эмнэлзүйн ур чадварын төв нь оюутан, суралцагчдад бодит эмнэлзүйн орчинд ажиллахаас өмнө мэргэжлийн ур чадвараа аюулгүй орчинд эзэмших, давтан дадлагажуулах, эмнэлзүйн шийдвэр гаргах болон багаар ажиллах чадварыг хөгжүүлэхэд чиглэсэн сургалтын орчныг бүрдүүлэн ажиллаж байна.

Эмнэлгийн мэргэжилтнийг бэлтгэхэд онолын мэдлэгээс гадна бодит нөхцөлд ажиллах практик ур чадвар, эмнэлзүйн шийдвэр гаргах болон багаар ажиллах чадварыг системтэй хөгжүүлэх нь чухал болохыг онцоллоо.

АШУҮИС нь сургалт, судалгаа, эмнэлзүйн тусламж үйлчилгээг уялдуулсан их сургуулийн эмнэлгийн тогтолцоог хөгжүүлэхийн зэрэгцээ ирээдүйн эмч, эмнэлгийн мэргэжилтнүүдийг орчин үеийн сургалтын орчинд чанартай бэлтгэхэд чиглэн ажиллаж байна.

15/09/2026

АШУҮИС-ийн Анагаах Ухааны Сургуульд Ясны эрдэс нягтын хэмжигч (Dual-energy X-ray Absorptiometry, DEXA) орчин үеийн төхөөрөмжийг хүлээлгэн өглөө.
Монос Групп, Монос Эмийн Үйлдвэр ийн зүгээс Анагаах Ухааны Шинжлэх Ухааны Их Сургуулийн (АШУҮИС) Анагаах ухааны сургуульд хоёр энергийн рентген шингээлтийн (Dual-energy X-ray Absorptiometry, DEXA) технологи бүхий ясны эрдэс нягт (Bone Mineral Density, BMD)-ыг хэмждэг багаж хандивлах ёслол зохион байгуулагдлаа.
DEXA арга нь ясны эрдсийн нягтралыг үнэлэх олон улсад хүлээн зөвшөөрөгдсөн алтан стандарт (gold standard) арга бөгөөд ясны сийрэгжилтийг оношлох, хугарлын эрсдэлийг үнэлэх, эмчилгээний үр дүнг хянахад ашиглагддаг. Цацрагийн ачаалал бага, хэмжилтийн алдаа багатай, дахин давтан хийх боломжтой нь энэ аргыг өргөн хэрэглэгддэг болгосон гол давуу тал юм.
Өмнөд Солонгосын OsteoSys компанийн үйлдвэрлэсэн тус багаж нь нурууны бүсэлхий хэсгийн L1–L4 нугалам, ташааны яс (дунд чөмөг, нийт ташааны хэсэг), шуу зэрэг байршилд ясны эрдсийн нягтралыг өндөр нарийвчлалтай хэмждэг. Мөн T-score, Z-score, BMD зэрэг олон улсын стандартын үзүүлэлт тооцоолох, ирээдүйн хугарлын эрсдэлийг үнэлэх FRAX функцтэй.
Энэхүү багаж нь АШУҮИС Анагаах Ухааны Сургуулийн оюутан, багш нарын практик сургалт, эрдэм шинжилгээний судалгааны ажилд өргөн ашиглагдах бөгөөд ирээдүйд эмнэлзүйн судалгааны чадавхийг нэмэгдүүлэхэд чухал ач холбогдолтой юм.

14/09/2026

БАТАЛГААЖУУЛАЛТ, МАГАДЛАН ИТГЭМЖЛЭЛИЙН ТАЛААР СУРГАЛТ ЗОХИОН БАЙГУУЛЛАА

АШУҮИС-ийн Анагаах ухааны сургуулийн “Эмнэлзүйн лабораторийн технологи” хөтөлбөрийн магадлан итгэмжлэлийн бэлтгэл ажлын хүрээнд хөтөлбөрийн чанарын баталгаажуулалт, магадлан итгэмжлэлийн үйл явцын талаарх сургалтыг зохион байгууллаа.

Сургалт 2026 оны 9 дүгээр сарын 11-ний өдөр АУС-ийн Blue hall-д амжилттай зохион байгуулагдав.
Сургалтыг Боловсролын магадлан итгэмжлэлийн үндэсний зөвлөлийн (БМҮЗ) мэргэжилтэн Ч.Дэлгэрцэцэг удирдан явуулж, хөтөлбөрийн чанарын баталгаажуулалтын тогтолцоо, магадлан итгэмжлэлийн шалгуур, шаардлага, үнэлгээний үйл явц болон хөтөлбөрийг магадлан итгэмжлэлд бэлтгэхэд анхаарах асуудлуудын талаар мэдээлэл, зөвлөгөө өглөө.

Сургалтад “Эмнэлзүйн лабораторийн технологи” хөтөлбөрт оролцогч тэнхимүүдийн багш, ажилтнуудаас гадна АУС-ийн багш нар болон АШУҮИС-ийн Сургалт, бодлого, зохицуулалт, чанарын газрын мэргэжилтнүүд оролцож, хөтөлбөрийн чанарыг тасралтгүй сайжруулах, магадлан итгэмжлэлийн бэлтгэл ажлыг үр дүнтэй зохион байгуулах талаар санал солилцлоо.

Энэхүү сургалт нь “Эмнэлзүйн лабораторийн технологи” хөтөлбөрийн чанарын баталгаажуулалтыг бэхжүүлэх, магадлан итгэмжлэлийн шалгуур, шаардлагыг хангах бэлтгэлийг сайжруулах, хөтөлбөрийн оролцогч талуудын ойлголт, оролцоог нэмэгдүүлэхэд чухал ач холбогдолтой боллоо.

14/09/2026

“БАЯНГОЛ МЕД” ХХК АУС-ИЙН ЭМНЭЛЗҮЙН ЛАБОРАТОРИД MINDRAY EU-5600PRO АВТОМАТ АНАЛИЗАТОР ХАНДИВЛАЛАА

АШУҮИС-ийн Анагаах ухааны сургуулийн сургалт, судалгаа, эмнэлзүйн лабораторийн шинжилгээний чадавхыг сайжруулах, оюутан, резидент эмч нарын мэдлэг, ур чадварыг хөгжүүлэхэд бодит хувь нэмэр оруулах зорилгоор “Баянгол Мед” ХХК нийгмийн хариуцлагын хүрээнд Mindray үйлдвэрийн EU-5600Pro загварын автомат анализаторыг АУС-ийн Эмнэлзүйн лабораторийн тэнхимд хандивлалаа. Тоног төхөөрөмжийг гардуулах үйл ажиллагаанд “Баянгол Мед” ХХК-ийн Гүйцэтгэх захирал С.Хөхий, Борлуулалтын дарга Э.Алтансүх, АШУҮИС-ийн Анагаах ухааны сургуулийн захирал Я.Энхтөр болон Эмнэлзүйн лабораторийн тэнхимийн багш нар оролцлоо.
Энэхүү үнэ цэнтэй дэмжлэг нь АШУҮИС-ийн оюутан, резидент эмч, багш, судлаачдад, эмнэлзүйн лабораторийн оношилгооны технологийг практикт эзэмших боломжийг нэмэгдүүлж, сургалт-судалгаа-эмнэлзүйн тусламж үйлчилгээг уялдуулан хөгжүүлэхэд чухал хувь нэмэр оруулж байна.
АШУҮИС-ийн Анагаах ухааны сургуулийн нийт багш, ажилтан, оюутан, резидент эмч нарын нэрийн өмнөөс “Баянгол Мед” ХХК-ийн удирдлага, хамт олонд эрүүл мэндийн салбарын хөгжил, эмч мэргэжилтний сургалт, судалгааг дэмжин, нийгмийн хариуцлагаа хэрэгжүүлж буйд чин сэтгэлийн талархал илэрхийлье.

14/09/2026

АШУҮИС-ийн АУС-ийн Радиологийн тэнхим, Хөхний дүрс оношилгооны нийгэмлэгтэй хамтран “Хөхний эмгэгүүдийн оношилгоо эмчилгээ” сэдэвт үндэсний хэмжээний Хөхний форумыг энэ чиглэлээр ажилладаг ЭМЯ, ХСҮТ, Монголын Радиологийн нийгэмлэг, Хөхний Хавдрын эсрэг үндэсний нийгэмлэг, Хөхний хавдар судлаач эмч нарын нийгэмлэг, Хөхний технологичдын нийгэмлэг зэрэг төрийн болон төрийн бус байгууллагуудын оролцоотойгоор 7 дахь удаагаа АШУҮИС-ийн Зүүн кампус, АУС дээр амжилттай зохион байгууллаа. Форумд Япон, Солонгос улсын Хөхний чиглэлээр ажилладаг эрдэмтэн профессор, эмч нар уригдан “Hands on Training” буюу Гардан Үйлдлийн Эмнэлзүйн сургалтыг хамтран зохион байгуулахаас гадна хөх судлалын салбарын орчин үеийн дэвшилтэт онол, практик, технологитой холбоотой сонирхолтой лекц, илтгэл тавин, манай улсын клиникийн төв эмнэлгүүд, нийслэлийн 9 дүүрэг, 21 аймгийн нэгдсэн эмнэлгийн дүрс оношилгоо, эмэгтэйчүүд, мэс засал, хавдар, ерөнхий мэргэжил зэрэг олон мэргэжлийн эмч нар оролцон, хөхний эмгэгийн оношилгоо, эмчилгээ, хяналт, урьдчилан сэргийлэлтийн асуудлуудын талаар лекц, илтгэл, хэлэлцүүлэг, эмнэлзүйн ховор тохиолдлуудыг танилцуулж, салбарын хүрээнд тулгамдаж буй асуудлууд, өнөөгийн байдал, ирээдүйн чиг хандлага, хөгжил дэвшлийн талаар хэлэлцсэн.

АУС-ийн Радиологийн тэнхим нь 2023 оноос дотооддоо анх удаа “Хөхний радиологич” мэргэшлээр мэргэжилтэн бэлдэж эхэлсэнээс хойш үндэсний хэмжээнд 20 гаруй мэргэшсэн эмч бэлтгээд байгаа билээ. Форумын үеэр Хөхний радиологич эмч мэргэжлээр мэргэшин суралцсан 6 дахь төгсөлтийн эмч нар дипломоо гардан авлаа. Түүнчлэн форум зохион байгуулагчидын зүгээс форумын өмнөх өдөр ЭМЯ, засгийн газраас хэрэгжүүлж буй хөхний хавдрын скрининг хөтөлбөртэй уялдуулан хөхний технологич нарын сургалт, эмч нарт зориулсан хөхний эмнэлзүйн үзлэг, хэт авиа, маммографи, хэт авиан хяналтанд эд эсийн шинжилгээ авах өртөөчилсөн гардан сургалтуудыг АШУҮИС-ийн Монгол-Япон эмнэлгийн Радиологийн төвийн эмч, багш нар, МХДОН-ийн мэргэшсэн эмч нарын багийн хамтаар АУС-ын Эмнэлзүйн ур чадварын төвд амжилттай зохион байгууллаа.
Хөхний үндэсний VII форум нь Мо
нгол оронд хөхний оношилгоо, эмчилгээ болон урьдчилан сэргийлэх эрт илрүүлгийн тогтолцоо эрчимтэй хөгжиж байгаатай холбоотой улсын хэмжээнд хөхний нарийн мэргэжлийн эмч, эмнэлгийн ажилтныг бэлтгэх, хөхний эмгэгийн олон улсын стандарт, эмнэл зүйн удирдамжийг нэвтрүүлэх, нутагшуулах, хөхний чиглэлээр ажилладаг эмч, эмнэлгийн мэргэжилтнүүдийн хамтран ажиллах, харилцан туршлага солилцох, хөгжих боломжийг олгоход үнэтэй хувь нэмэр оруулсан, ач холбогдол өндөртэй сайхан үйл ажиллагаа болж өндөрлөлөө.

07/09/2026

Хоол боловсруулах эрхтэн тогтолцооны эмгэгийн үеийн яаралтай тусламж болон амь тэнэсэн үеийн гэмтлийн менежмент сэдэвт сургалт болов.

2026 оны 9 дүгээр сарын 5-ны өдөр АШУҮИС-ийн Анагаах ухааны сургуулийн Хоол боловсруулах эрхтэн судлалын тэнхим, Монгол-Японы эмнэлгийн Дурангийн тасаг, Азийн эмч нарын холбоо (AMDA) нь Сэлэнгэ аймгийн нэгдсэн эмнэлэг, Хил хамгаалах ерөнхий газрын эрүүл мэндийн хэлтэстэй хамтран хил хамгаалах байгууллагын хилийн цэргийн эмнэлэг болон Сэлэнгэ аймгийн нэгдсэн эмнэлгийн, эмнэлгийн нийт 50 орчим ажилчдад “Хоол боловсруулах эрхтэн тогтолцооны эмгэгийн үеийн яаралтай тусламж болон амь тэнэсэн үеийн гэмтлийн менежмент” сэдэвт онол, дадлага хосолсон гардан сургалтыг амжилттай зохион байгууллаа.

Сургалтын үеэр ХБЭСТ-ийн багш нар эмнэлзүйд зонхилон тохиолддог Хоол боловсруулах эрхтэн тогтолцооны эмгэгийн үеийн яаралтай тусламжийн сэдвүүдээр сургалт хийж, нийт оролцогчидтой нээлттэй хэлэлцүүлэг өрнүүлсөн бол AMDA байгууллагын зочин профессор Такүши Сато “Амь тэнэсэн үеийн гэмтлийн менежмент” сэдвээр сургалтын явуулахын сацуу гардан сургалтыг 20 эмчид хийлээ.

07/09/2026

АШУҮИС, АУС, ХБЭС-ын тэнхим, МЯЭ-ийн Дурангийн тасаг, Азийн эмч нарын холбоотой (AMDA) хамтран “Улаан хоолой, ходоодны варикозын менежмент” сэдэвт сургалт явагдаж, дурангийн EISL ажилбарын ажлын байран дахь гардан сургалт хийлээ.

2026 оны 9 дүгээр сарын 1–2-ны өдрүүдэд АШУҮИС-ийн Анагаах ухааны сургуулийн Хоол боловсруулах эрхтэн судлалын тэнхим, Монгол-Японы эмнэлгийн Дурангийн тасаг, Азийн эмч нарын холбоотой (AMDA) хамтран “Улаан хоолой, ходоодны варикозын менежмент” сэдэвт онол, дадлага хосолсон гардан сургалтыг амжилттай зохион байгууллаа. Тус сургалт нь улсын болон хувийн хэвшлийн эмнэлгүүдэд ажиллаж буй Хоол боловсруулах эрхтэн судлалын болон хоол боловсруулах замын дурангийн эмч нарын улаан хоолой, ходоодны варикозын оношилгоо, эрсдэлийн үнэлгээ, дурангийн эмчилгээний талаарх орчин үеийн мэдлэгийг шинэчилж, практик ур чадварыг дээшлүүлэх зорилготой байв. Сургалтад УБ-хотын II ба III шатлалын, Аймгийн нэгдсэн эмнэлгийн Гастроэнтерологи дурангийн нийт 15 эмч хамрагдсан бөгөөд Японы Кокура Мемориал эмнэлгийн Гастроэнтерологи, дурангийн эмч, Анагаах ухааны доктор, АШУҮИС-ийн зочин профессор Ясүюки Ширай зочин багшаар оролцов.

Сургалтын эхний өдөр: Монгол-Японы эмнэлгийн Дурангийн тасагт эмнэлзүйн гардан дадлага зохион байгуулж, дурангаар тарилгын хатуурлын эмчилгээ хийх арга болон цианоакрилат эдийн цавуу ашиглан ходоодны варикозыг эмчлэх аргачлалыг бодит эмнэлзүйн тохиолдлуудад үзүүлэв. Зочин профессор Ясүюки Ширай тохиолдол бүрийн эмнэлзүйн онцлог, эмчилгээний заалт, аргыг сонгох үндэслэл, ажилбарын өмнөх бэлтгэл, техникийн гүйцэтгэл, хүндрэлээс урьдчилан сэргийлэх болон ажилбарын дараах хяналтын талаар дэлгэрэнгүй тайлбарлаж, оролцогч эмч нарт мэргэжил, арга зүйн зөвлөгөө өглөө.

Сургалтын хоёр дахь өдөр: Монгол-Японы эмнэлгийн Дурангийн тасагт эмнэлзүйн ажилбарууд үргэлжилж, үдээс хойш АШУҮИС-ийн Анагаах ухааны сургуулийн Дурангийн сургалтын төвд онолын болон загвар дээрх дадлага сургалт зохион байгуулав. Онолын сургалтын хүрээнд профессор Ясүюки Ширай “Үүдэн венийн даралт ихсэлтийн гемодинамик ба дүрс оношилгооны үнэлгээ”, “Улаан хоолой, ходоодны варикозын дурангийн эмчилгээний зарчим” сэдвээр лекц уншив.

Онолын сургалтын дараа дурангийн сургалтын загвар ашиглан гардан дадлага явуулж, оролцогч эмч нар шаардлагатай багаж, хэрэгслийг зөв сонгох, бэлтгэх, варикозын байрлал, хэмжээнээс хамааран эмчилгээний цэгийг тодорхойлох, тарилгын эмчилгээг техникийн зөв дарааллаар гүйцэтгэх, цианоакрилат эдийн цавуутай аюулгүй ажиллах, ажилбарын үеийн хүндрэлээс урьдчилан сэргийлэх ур чадварт суралцав. Оролцогчид зочин багшийн шууд удирдлага, зөвлөгөөний дор дадлага хийж, эмнэлзүйн практикт тулгардаг асуудлуудаар санал солилцон, асуулт хариултын хэлэлцүүлэг өрнүүлсэн нь сургалтын үр өгөөжийг нэмэгдүүлэв.

Улаан хоолой, ходоодны варикозын цус алдалт нь яаралтай тусламж шаарддаг, амь насанд аюултай хүндрэл тул дурангийн эмчээс нарийн мэргэжлийн мэдлэг, техникийн өндөр ур чадвар шаарддаг. Энэхүү сургалт нь онолын мэдлэгийг бодит эмнэлзүйн ажилбар болон загвар дээрх дадлагатай хослуулж, Япон улсын туршлагатай мэргэжилтнээс шууд суралцах боломж олгосноороо онцгой ач холбогдолтой боллоо. Түүнчлэн улсын болон хувийн хэвшлийн байгууллагуудын эмч нарыг хамруулснаар улаан хоолой, ходоодны варикозын оношилгоо, эмчилгээний орчин үеийн арга барилыг эмнэлзүйн практикт нэвтрүүлэх, тусламж үйлчилгээний чанар, аюулгүй байдлыг сайжруулах, цаашдын мэргэжлийн хамтын ажиллагааг өргөжүүлэхэд чухал хувь нэмэр оруулсан үр дүнтэй сургалт болов.

АШУҮИС-Анагаах Ухааны Сургууль

22/09/2026

22/09/2026

15/09/2026

14/09/2026

14/09/2026

14/09/2026

07/09/2026

07/09/2026

Address

Telephone

Website

Alerts

Contact The School

Shortcuts

Share

Category

Listing takedown request