Зуунмод сумын Нэгдүгээр сургуулийн зөвлөл

СУРГУУЛИЙН ЗӨВЛӨЛ ХУРАЛДЛАА

Зуунмод сумын Ерөнхий боловсролын нэгдүгээр сургуулийн өөрийн удирдлага буюу сургуулийн зөвлөлийн хоёрдугаар хуралдаан 2026 оны 04 дүгээр сарын 21-ний өдөр хуралдаж, дараах асуудлыг хэлэлцлээ.

1. Сургуулийн 2026-2028 оны стратеги төлөвлөгөө танилцуулах тухай;
2. Боловсролын сургалтын байгууллага хөгжүүлэх сангийн үйл ажиллагааны журам танилцуулах тухай;
3. Сургуулийн 2025-2026 оны хичээлийн жилийн үйл ажиллагааны мэдээлэл сонсох тухай;
4. Сургуулийн зөвлөлийн 2025-2026 оны үйл ажиллагааны төлөвлөгөөний хэрэгжилт танилцуулах тухай тус тус хэлэлцэв.

Мөн Боловсролын сайдын 01 албан даалгавар гарсантай холбогдуулан сургуулиас гадуур төгсөлтийн баяр, үсэглэлийн баярын аливаа арга хэмжээг эцэг, эхийн зөвлөлөөс зохион байгуулахгүй байх, эцэг, эх, асран хамгаалагчдаас хууль бус төлбөр, хураамж авах, хандив цуглуулах зэргээр санхүүгийн дарамт, хүндрэл учруулахгүй байхаар шийдвэрлэлээ.

Түүнчлэн Боловсролын хяналтын улсын байцаагчийн зөвлөмжийн дагуу сургуулийн захиргаанаас төгсөлтийн баяр, үсэглэлийн баярыг 2025-2026 оны хичээлийн жилийн үйл ажиллагааг дүгнэн багш, суралцагч, эцэг эх, арсан хамгаалагч, харгалзан дэмжигч нарт тайлагнах, анги хамт олноо сурталчлах, шилдэг багш, сурагчдыг урамшуулах, алдаршуулах, хүүхэд нэг бүрийн оролцоог хангасан арга хэмжээ болгон зохион байгуулахаар тогтлоо.

Сургуулийн зөвлөл

2026.04.21

Зуунмод сумын Ерөнхий боловсролын Нэгдүгээр сургууль маань 150 ортой шинэ дотуур байртай болохоор боллоо.👏

ДОТУУР БАЙРНЫ АСУУДЛААР БОЛОВСРОЛЫН ЯАМНЫ ТӨСВИЙН САНАЛ АСУУЛГАД ИДЭВХТЭЙ ХАМРАГДАНА УУ!

Хүмүүн цогцолбор сургуулийн А, Б дотуур байрны барилга хуучирч, сурагч хүүхдүүдийн сурч боловсрох, эрүүл аюулгүй орчинд амьдрах эрх зөрчигдөж байгаа тул 150 ортой дотуур байрны барилга шинээр барих санхүүжилтийг 2026 оны улсын төсөвт тусган шийдвэрлэх нэн чухал байна.

Иймээс Боловсролын яамнаас 2025.08.05-ны өдрийн 17:30 цаг хүртэл явуулж буй санал асуулгад нийт багш, ажилчид, сурагч хүүхдүүд, эцэг, эх, асран хамгаалагчид, төгсөгчид Та бүхэн идэвхтэй хамрагдаж, дараах зааврын дагуу саналаа илгээнэ үү. /Нэг хүн хэдэн ч удаа саналаа илгээх боломжтой/

Санал асуулгын холбоос: https://docs.google.com/forms/d/e/1FAIpQLSc7uhw7d9EOzbrKROsVki3koldW2hJ1gyw9_zzMb1XliqiP1Q/viewform?fbclid=IwQ0xDSwL88btleHRuA2FlbQIxMAABHiaDaO6k5XOVa6nVS0Sb9ScN1h7CrzLX5GTXt8w7hCc8gFJ6GmEjtBhbXWIm_aem_QoGPZVWCGmx3vn9UimU35A

“ХӨГЖЛИЙН БЭРХШЭЭЛ БА ТЭГШ БАЙДАЛ” СУРГАЛТ ЗОХИОН БАЙГУУЛАГДЛАА

Хүмүүн цогцолбор сургуулийн зөвлөлөөс сургуулийн захиргаатай хамтран ёс зүйтэй албан хаагч аяны хүрээнд 120 багш, ажилтанд Буянжаргалын Болороогийн “Хөгжлийн бэрхшээл ба тэгш байдал” багц сургалтыг зохион байгууллаа.

Энэхүү сургалтыг зохион байгуулахад туслалцаа үзүүлсэн Дэлхийн зөн-Төв ОНХХ болон аймгийн Хүүхэд, гэр бүлийн хөгжил, хамгааллын газарт талархал илэрхийлье.👏👏

Дашрамд дурдахад Хүмүүн цогцолбор сургуулийн хэмжээнд одоогоор 7 хөгжлийн бэрхшээлтэй хүүхэд суралцаж байгаа юм. Сургуулийн зөвлөлөөс нийт сурагч хүүхдүүдэд ээлтэй сургалтын орчин нөхцөлийг бүрдүүлэхийн төлөө анхаарч ажиллаж байна.

Сургуулийн зөвлөл
2025.04.08

СУРГУУЛИЙН ЗӨВЛӨЛ ХУРАЛДЛАА

Хүмүүн цогцолбор сургуулийн өөрийн удирдлага буюу сургуулийн зөвлөлийн Хоёрдугаар хуралдаан 2025 оны 03 дугаар сарын 26-ны өдөр хичээлийн Б байранд хуралдаж, дараах асуудлуудыг хэлэлцлээ.

1. Сургуулийн зөвлөлийн 2024-2025 оны хичээлийн жилийн үйл ажиллагааны төлөвлөгөөг танилцуулах тухай
2. Хичээлийн А, Б, В байрны Эцэг, эхийн зөвлөлийн үйл ажиллагааны мэдээлэл
3. Сургуулийн асуудлаар цаг үеийн мэдээлэл
4. Хичээлийн "Б" байрны нөхцөл байдалтай танилцах
5. Бусад

Хуралдаанаар төлөвлөгөөнд тусгагдсан үйл ажиллагааг цаг хугацаанд нь үр дүнтэй хэрэгжүүлэх, сургуулийн Шинэ дотуур байрны асуудлаар улсын төсөвт санал өгүүлэх ажлыг сургуулийн хэмжээнд өргөжүүлэн зохион байгуулахаар шийдвэрлэлээ.

Сургуулийн зөвлөл

ДОТУУР БАЙРНЫ НӨХЦӨЛ БАЙДАЛ БА ТӨСВИЙН САНАЛ

Хүмүүн цогцолбор сургууль нь 2024-2025 оны хичээлийн жилд нийт 131 багш, 69 ажилчид, 3572 суралцагсадтай хичээл сургалтын үйл ажиллагаа явуулж буй аймгийн хэмжээний хамгийн том сургууль юм. Тус сургуулийн 2 дотуур байранд Төв аймгийн Баян, Баянцагаан, Баян-Өнжүүл, Баянжаргалан, Архуст, Баяндэлгэр, Сэргэлэн, Мөнгөнморьт, Баянцогт, Сүмбэр зэрэг 10 сумын харьяат 153 хүүхэд тогтмол амьдарч байна.

Энэ хичээлийн жилд нийт 164 хүүхэд дотуур байранд хамрагдах хүсэлт гаргасан боловч одоогоор 153 хүүхэд амьдарч байгаа буюу 11 хүүхэд хамрагдаж чадаагүй байна.

А, Б дотуур байрын барилгын насжилт хуучирч, эрүүл ахуйн шаардлага хангахааргүй болж, сурагч хүүхдүүдийн сурч боловсрох, эрүүл аюулгүй орчинд амьдрах эрх зөрчигдөж байгаа тул 150 ортой дотуур байрын барилга шинээр барих санхүүжилтийг улсын төсөвт тусгах нэн шаардлагатай байна.

Мөн хөдөө, орон нутгаас ирж суралцагсдын жил бүр өсөж, дотуур байранд хамрагдах хүсэлтэй хүүхдийн тоо нэмэгдэж байгаа тул цаашид шинээр дотуур байр барих хэрэгцээ, шаардлага тулгарч байна. Аймаг, орон нутгаас 2024 онд 150 ортой дотуур байрны барилгын зураг, төсвийг хийлгэсэн бөгөөд бэлэн газар, зураг төсөвтэй хөрөнгө оруулалтын ажил юм.

Иймд сургуулийн нийт багш, ажилчид, эцэг, эх, асран хамгаалагчид Та бүхнийг доорх зааврын дагуу Сангийн яамны "Төсвийн хөрөнгө оруулалт" апп -аар саналаа илгээхийг уриалж байна.

#ЦаасаарБишЦахимаар

Сургуулийн зөвлөл
2025.03.24

ТӨСӨВТ САНАЛАА ИЛГЭЭНЭ ҮҮ!

Хүмүүн цогцолбор сургуулийн А, Б дотуур байрын барилгын насжилт хуучирч, эрүүл ахуйн шаардлага хангахааргүй болж, сурагч хүүхдүүдийн сурч боловсрох, эрүүл аюулгүй орчинд амьдрах эрх зөрчигдөж байгаа тул улсын төсвийн хөрөнгө оруулалтаар 150 ортой дотуур байрын барилга шинээр барих нэн шаардлагатай байна.

Иймд сургуулийн нийт багш, ажилчид, эцэг, эх, асран хамгаалагчид Та бүхнийг доорх зааврын дагуу Сангийн яамны "Төсвийн хөрөнгө оруулалт" апп -аар саналаа илгээхийг уриалж байна.

#ЦаасаарБишЦахимаар

Сургуулийн зөвлөл
2025.03.19

ТӨЛӨВЛӨГӨӨНД САНАЛ АВАХ ТУХАЙ

Хүмүүн цогцолбор сургуулийн зөвлөлийн 2024-2025 оны хичээлийн жилийн үйл ажиллагааны төлөвлөгөөний төслийг зөвлөлийн анхдугаар хуралдаанаар хэлэлцсэнээр орууллаа.

Багш, ажилчид, эцэг, эх, асран хамгаалагчид Та бүхэн төлөвлөгөөний төсөлтэй танилцан саналаа бичиж үлдээнэ үү. Баярлалаа

Сургуулийн зөвлөл

СУРГУУЛИЙН ЗӨВЛӨЛ ШИНЭЭР БАЙГУУЛАГДЛАА

Боловсролын ерөнхий хуульд заасны дагуу сургуулийн өөрийн удирдлага буюу Сургуулийн зөвлөлийн анхдугаар хуралдаан хуралдлаа.

Хуралдаанаар Хүмүүн цогцолбор сургуулийн үйл ажиллагааны талаар сургуулийн ерөнхий захирал Б.Аминдаваа багшийн мэдээллийг сонсож, БШУ-ын сайдын 2024 оны A/158 тушаалаар баталсан "Ерөнхий боловсролын сургуулийн зөвлөлийн үйл ажиллагааны нийтлэг журам"-д нийцүүлэн сургуулийн зөвлөлийг багш, төгсөгчид, эцэг, эхийн төлөөллөөр бүрдүүлэн шинээр байгуулж, баталлаа. ✅

📌Зөвлөлийн даргаар: Г.Тэмүүжин /Зуунмод сумын ИТХ-ын төлөөлөгч/
📌Нарийн бичгийн даргаар: Б.Жавзандулам /Хүмүүн цогцолбор сургуулийн Сургалтын менежер/
📌Зөвлөлийн гишүүнээр:
- Н.Цанлигсүрэн /Зуунмод сумын ЗДТГ-ын Санхүү албаны дарга/
- Ц.Энхтуяа /Аймгийн Боловсролын газрын мэргэжилтэн/
- Т.Гүрбазар /АНЭ-ийн орлогч дарга/
- Д.Баасандорж /Аймгийн ИТХ-ын ажлын албаны мэргэжилтэн/
- Н.Мөнх-Эрдэнэ /Дэлхийн зөн-Төв ОНХХ-ийн зохицуулагч/
- Д.Пүрэвдаваа /Ахлах сургуулийн ЭЭЗ-ийн дарга/
- Б.Баярсайхан /Дунд сургуулийн ЭЭЗ-ийн дарга/
- Г.Азжаргал /Бага сургуулийн ЭЭЗ-ийн дарга/
- Г.Улаанаа /Хүмүүн цогцолбор сургуулийн Биологийн багш/ гэсэн 11 хүний бүрэлдэхүүнтэй байгуулагдлаа.

Мөн хуралдаанаар Сургуулийн зөвлөлийн 2024-2025 оны хичээлийн жилийн үйл ажиллагааны төлөвлөгөөг хэлэлцэн, сургалтын орчин нөхцөлийг сайжруулах, багш, сурагчдын хөгжлийг дэмжих, сургалтын чанарыг ахиулах, сурагчдын эрүүл, аюулгүй орчин суралцах нөхцөлийг бүрдүүлэх, эцэг, эх, асран хамгаалагчдын оролцоог нэмэгдүүлэх чиглэлээр олон талт үйл ажиллагааг зохион байгуулахаар тус тус шийдвэрлэлээ.💯

Хүмүүн Цогцолбор сургууль
Хүмүүн Цогцолбор Сургуулийн зөвлөл
Хүмүүн ЦБС Эцэг, эхийн зөвлөл

2025.01.28

Засгийн газрын өнөөдрийн ээлжит бус хуралдаанаар ерөнхий боловсролын сургуулийн үдийн хоолны түүхий эдийн зардлыг 1000 төгрөгөөр нэмэгдүүлж 2500 төгрөг, ерөнхий боловсролын сургууль, мэргэжлийн болон техникийн боловсролын сургалтын байгууллагын дотуур байранд амьдрах хүүхдийн хоолны түүхий эдийн зардлыг 2000 төгрөгөөр нэмэгдүүлж 6000-6300 төгрөг болгон тогтоолоо.

Энэ хичээлийн жилд ерөнхий боловсролын сургуулийн үдийн хоолны үйлчилгээнд 343,289 сурагч хамрагдаж, дотуур байранд 38,871 хүүхэд амьдарч байна.

Боловсролын яамнаас Японы олон улсын байгууллага ЖАЙКА-тай хамтран хийсэн судалгаанаас хүүхдийн сүү, сүүн бүтээгдэхүүний хэрэглээ 3-4 дахин, кальцийн хэмжээ 2.5 дахин бага, ясны нягт бага, Д амин дэмийн дутал 80 хувь гэсэн дүн гарсан нь хүүхдийн хоолны илчлэг, шим тэжээлийг нэмэгдүүлж, шим тэжээлийн тэнцвэрт байдлыг хангах шаардлагатайг харуулж байна.

Иймд энэ онд цэцэрлэгийн хүүхдийн хоолны түүхий эдийн зардлыг 1000 төгрөгөөр нэмэгдүүлсэн. 2025 оны улсын төсөвт үдийн хоол, дотуур байранд амьдарч буй хүүхдийн хоолны зардлыг нэмж, 221 тэрбум төгрөг зарцуулахаар тусгалаа. Ингэснээр хүүхдийн хоол хүнсээр авбал зохих илчлэг, шим тэжээлийн хэмжээ, хоолны орц, найрлага сайжирч, олон нэр төрлийн хүнс хэрэглэх боломжтой болно.

СУРГУУЛИЙН ЗӨВЛӨЛИЙН ТАЛААРХ ХУУЛЬ, ЭРХ ЗҮЙН МЭДЭЭЛЭЛ

📌БОЛОВСРОЛЫН ЕРӨНХИЙ ХУУЛЬ

34 дүгээр зүйл.Боловсролын сургалтын байгууллагын өөрийн удирдлага
34.2.Энэ хуулийн 34.1-д зааснаас бусад ерөнхий боловсролын сургууль, цэцэрлэгийн өөрийн удирдлага нь сургууль, цэцэрлэгийн зөвлөл байна.

📌СУРГУУЛИЙН ӨМНӨХ БОЛОН ЕРӨНХИЙ БОЛОВСРОЛЫН ТУХАЙ ХУУЛЬ

23 дугаар зүйл.Цэцэрлэг, ерөнхий боловсролын сургуулийн өөрийн удирдлага

23.1.Цэцэрлэг, ерөнхий боловсролын сургуулийн өөрийн удирдлагыг Боловсролын ерөнхий хуулийн 34.2-т заасан зөвлөл хэрэгжүүлнэ.

23.2.Зөвлөл нь цэцэрлэг, сургуулийн сургалт, үйл ажиллагаа, суралцагчийн хөгжилд дэмжлэг үзүүлэх зорилготой ба дараах үндсэн чиг үүргийг хэрэгжүүлнэ:
23.2.1.цэцэрлэг, ерөнхий боловсролын сургууль хөгжүүлэх төлөвлөгөө боловсруулах, хэрэгжүүлэх явцад санал, дүгнэлт гаргах;
23.2.2.суралцагчийн хөгжил, төлөвшлийг дэмжих, сурлагын хоцрогдол үүсэхээс сэргийлэх, сургалтын аюулгүй орчин бүрдүүлэхэд дэмжлэг үзүүлэх үйл ажиллагааг энэ хуулийн 18.8-д заасан зөвлөлтэй хамтран зохион байгуулах;
23.2.3.суралцагчийн санаачилсан нийгэм хүмүүнлэгийн сайн дурын үйл ажиллагааг дэмжих, хамтран зохион байгуулах;
23.2.4.суралцагч, багш, цэцэрлэг, ерөнхий боловсролын сургуулийн хамт олонтой хамтран ажиллах;
23.2.5.цэцэрлэг, ерөнхий боловсролын сургууль, дотуур байрны орчинд аливаа дарамт, ялгаварлан гадуурхалт, хүчирхийлэл, үе тэнгийн дээрэлхэлтээс сэргийлэх, хүүхэд хамгааллын хөтөлбөр, төлөвлөгөөний хэрэгжилтийн явц, тайланг хэлэлцэх;
23.2.6.Боловсролын ерөнхий хуулийн 40.3-т заасан гэрээнд тусгах саналыг цэцэрлэгийн эрхлэгч, ерөнхий боловсролын сургуулийн захиралд хүргүүлэх, гэрээний хэрэгжилтийг хэлэлцэх;
23.2.7.цэцэрлэг, ерөнхий боловсролын сургуулийн санхүүжилт, хөрөнгө оруулалт, төсвийн төлөвлөлтөд хэрэгжүүлэх арга хэмжээ, төслийг эрэмбэлэх, шийдвэрлүүлэх, санал өгөх;
23.2.8.цэцэрлэг, ерөнхий боловсролын сургуулийн санхүүгийн тайланд хийсэн аудитын дүгнэлттэй танилцах.

23.3.Зөвлөлийг цэцэрлэг, ерөнхий боловсролын сургуулийн дундын хэлбэрээр байгуулж болно.

23.4.Зөвлөлийн дарга, гишүүд шударга, хариуцлагатай, ёс зүйтэй ажиллана.

23.5.Зөвлөл нь хичээлийн жилд хоёроос доошгүй удаа үйл ажиллагааны болон санхүүгийн тайланг цэцэрлэг, ерөнхий боловсролын сургуулийн багш, ажилтан, эцэг, эх, асран хамгаалагч, харгалзан дэмжигчид танилцуулна.

24 дүгээр зүйл.Зөвлөлийн төлөөлөл, бүрэн эрхийн хугацаа

24.1.Цэцэрлэг, ерөнхий боловсролын сургуулийн зөвлөл нь үүсгэн байгуулагч, багш, ажилтан, суралцагч, эцэг, эх, асран хамгаалагч, харгалзан дэмжигч болон төгсөгч зэрэг бусад сонирхлын бүлгийн төлөөллөөс бүрдсэн долоогоос арван нэгэн хүний бүрэлдэхүүнтэй байна.

24.2.Зөвлөлийн бүрэлдэхүүн дэх үүсгэн байгуулагчийн төлөөлөл нь нийт гишүүдийн 51 хувиас доошгүй байна.

24.3.Зөвлөлийн бүрэлдэхүүний төлөөлөл тус бүрийг хамт олны хурлаас нээлттэйгээр нэр дэвшүүлж, 3-5 жилийн хугацаагаар сонгоно.

24.4.Цэцэрлэгийн эрхлэгч, ерөнхий боловсролын сургуулийн захирал нь зөвлөлийг үйл ажиллагаа явуулах нөхцөл, боломжоор хангана.

24.5.Зөвлөл нь сургалтын байгууллагын болон санхүүгийн, цэцэрлэг, ерөнхий боловсролын сургуулийн удирдлагын үйл ажиллагааны тайланг хэлэлцэж, дүгнэлтийг эрх бүхий этгээдэд хүргүүлнэ.

24.6.Зөвлөлийн үйл ажиллагаа явуулахад шаардлагатай зардлыг байгууллагын болон бусад эх үүсвэрээс санхүүжүүлнэ.

24.7.Зөвлөл нь өөрийн үйл ажиллагааны дүрмийг баталж мөрдөнө.

24.8.Зөвлөлийн бүрэлдэхүүнд цэцэрлэгийн эрхлэгч, сургуулийн захирал орохыг хориглоно.