21/03/2025
“ရှေ့ရေးလဲပျောက်သလို ဖြစ်နေပြီး တကယ်ပဲ စိတ်ဓာတ်ကျနေပါပြီ၊ ကုန်ကျစရိတ်ကိုလဲ
ချင့်ချိန် ထည့်တွက်နေရလို့ လက်ထဲတစ်ခုခုရှိသွားအောင် ပြည်တွင်းကျောင်း/ပြည်ပနဲ့ပူးပေါင်းထားတဲ့ပြည်တွင်းကျောင်းမှာသာ အမြန်တက်လိုက်ချင်တော့တယ် အမ ရေ” လို့ ရင်ဖွင့်လာတဲ့ မောင်/ညီမငယ်များအတွက်…
(ကျမ ရဲ့ အတွေ့အကြုံနဲ့ ရှိထားတဲ့ ဗဟုသုတအရ သိထားသမျှ ဖြေကြားထားခြင်းသာ ဖြစ်ပါတယ်. လိုအပ်မှုရှိပါက ဖြည့်တွေးနားလည်ပေးနိုင်ပါရန် ဦးစွာမေတ္တာရပ်ခံအပ်ပါတယ်ရှင်.)
ဘွဲ့/ဒီပလိုမာ/စာတီဖီကိတ်တစ်ခုခုရဖို့ လိုအပ်တဲ့အချက် ပြင်ဆင်ရမယ့်အချက်တွေ အများကြီးထဲမှာမှ အရင်ဆုံး သတိပြုစေချင်တာက တက်ရောက်မယ့်ကျောင်းကို အလျင်အမြန် မရွေးချယ်မိဖို့ မဆုံးဖြတ်မိစေဖို့က ပထမဦးဆုံးလိုအပ်ချက်ပါပဲ. ခေတ်စကားနဲ့ပြောရရင် ဂျင်းမိတာမျိုး ဖြစ်မှာစိုးပါတယ်. အခုခေတ်အခြေအနေရဲ့ ပညာရေးလိုအပ်မှုကို အခြေပြုလို့ ပေါ်ပေါက်လာတဲ့ ပြည်တွင်းက ကျောင်းမျိုးစုံဆိုတာ မရေမတွက်နိုင်အောင်ဖြစ်တော့ ဂျင်းမိနိုင်ခြေကလဲ အရမ်းများလာတာကြောင့်ပါ.
ပြည်တွင်းကျောင်းကနေပဲ ပြည်ပကျောင်းကို လှမ်းယူလို့ရတဲ့ လက်မှတ်တွေ၊ ပြည်တွင်းတဝက် ပြည်ပတဝက် ယူလို့ရတဲ့ လက်မှတ်တွေ၊ ပြည်တွင်းမှာတက်ပြီး နောက်ဆုံးနှစ်ကို ပြည်ပမှာယူလို့ရတဲ့ လက်မှတ်တွေ စသည်ဖြင့် လက်မှတ်ရသင်တန်းတွေ/ကျောင်းတွေ အလွန်ပဲ များပြားလွန်းပါတယ်.
မောင်/ညီမ တို့ ကျောင်းပြီးလို့ လုပ်ငန်းခွင်ဝင်တော့မယ်ဆိုရင် သို့မဟုတ် အဆင့်မြင့်ပညာတွေ ဆက်လက်ဆည်းပူးဖို့ ကျောင်းလျှောက်ထားတော့မယ်ဆိုရင် အလုပ်ကို သို့မဟုတ် ကျောင်းကို တင်ပြမယ့် ဘွဲ့/ဒီပလိုမာ/စာတီဖီကိတ်တွေက မိမိရဲ့ အရည်အချင်းကို ထောက်ခံပေးနိုင်တဲ့ အာမခံချက်အပြည့်အဝရှိတဲ့ Accredited စာရွက်စာတမ်းတွေ ဖြစ်နေဖို့ အင်မတန်အရေးကြီးပါတယ်. သို့မဟုတ်ခဲ့ရင်တော့ အဲဒီကျောင်းမှာ တက်ရောက်ခဲ့တဲ့ အချိန် ငွေ လူ အင်အားမှန်သမျှဟာ သဲထဲရေသွန်ဆိုသလို ဖြစ်သွားနိုင်တာကြောင့်ပါ.
Accreditation ဆိုတာ…?
Accreditation ဆိုတာက သက်ဆိုင်ရာနိုင်ငံရဲ့ အစိုးရက ပညာရေးဆိုင်ရာကိစ္စရပ်များအတွက် ဆောင်ရွက်ရန် အာဏာလွှဲအပ်ထားတဲ့အဖွဲ့အစည်း (ဥပမာ ပညာရေးဝန်ကြီးဌာန)က ကျောင်းတစ်ကျောင်း၏ ပညာရေးဆိုင်ရာဆောင်ရွက်ချက်များ/လုပ်ငန်းများသည် အရည်အချင်းပြည့်မီကြောင်းနှင့် အဆိုပါကျောင်း၌ တက်ရောက်အောင်မြင်ခဲ့ကြသည့် ကျောင်းသားများသည်လည်း သတ်မှတ်အရည်အချင်းပြည့်ဝကြကြောင်း အာမခံချက်ပေး၍ အသိအမှတ်ပြုပေးထားခြင်း ဖြစ်ပါတယ်.
(Accreditation အကြောင်း အသေးစိတ်ကို အချိန်ရခဲ့ရင် ထပ်ရေးပေးပါမယ်. အခုတော့ စာရှည်သွားမှာစိုးတဲ့အတွက် ဒီမှာပဲ ရပ်ခွင့်ပြုပါ.)
ဒီတော့ ဂျင်းမမိရအောင် အာမခံချက်အပြည့်အဝရှိအောင် ပြည်တွင်းကျောင်းများကပြောတဲ့ သူတို့နဲ့တွဲဖက်လုပ်ကိုင်နေတဲ့ နိုင်ငံရပ်ခြားက ကျောင်းရဲ့ Accreditation ခိုင်မာမှုကို အဆိုပါ ပြည်တွင်းကျောင်းမှာ မေးမြန်းရမှာဖြစ်သလို ကိုယ်တိုင်လဲ အွန်လိုင်းကရှာဖွေရမှာဖြစ်ပါတယ်. ဒါ့အပြင် တတ်သိနားလည်နိုင်သူများထံမှာလဲ စုံစမ်းပြီးမှသာ ကျောင်းရွေးချယ်ခြင်းကို ဆုံးဖြတ်ကြရန်မှာ ပထမဦးစွာအရေးကြီးသောအချက်ဖြစ်ကြောင်း အကြံပြုရေးသားလိုက်ပါတယ်. မှန်ကန်ခိုင်မာတဲ့ကျောင်းများကို ရွေးချယ်နိုင်ကြပါစေရှင်.
#ပျော်ရွှင်အောင်မြင်သောဘဝများပိုင်ဆိုင်နိုင်ကြပါစေ
#ကိုယ်စိတ်နှစ်ပါးကျန်းမာအောင်ထိန်းသိမ်းနေထိုင်နိုင်ကြပါစေ
#အများအကျိုးသယ်ပိုးနိုင်ကြပါစေ
Photo credit to Original Uploader
