MyanHealth Training Centre

ဒီနေ့မှာ MyanHealth Training Center ကနေ ဆေးပစ္စည်းအဝင်စစ်ဆေးခြင်း လမ်းညွှန်ကို ပြောပြပေးသွားမှာ ဖြစ်ပါတယ်။

Stock Receiving လုပ်ငန်းစဉ်ဟာ ဆေးဆိုင်တစ်ဆိုင်လုံးရဲ့ အရည်အသွေးကို ထိန်းကျောင်းပေးတဲ့ "Gatekeeper" (တံခါးစောင့်) တာဝန်ကို ထမ်းဆောင်နေတာပါ။

ဆေးဝါးတွေ စင်ပေါ်မတင်ခင်မှာ သင်စစ်ဆေးရမယ့် အဓိကတာဝန်တွေကို ပိုမိုနားလည်လွယ်ပြီး စနစ်တကျရှိစေဖို့ အောက်ပါအချက်များကို လိုက်နာဖို့လိုအပ်ပါတယ်။

၁။ အရေအတွက်နှင့် အမျိုးအမည် တိုက်စစ်ခြင်း (Voucher Matching)
ပစ္စည်းရောက်လာတာနဲ့ ပထမဆုံးလုပ်ရမှာက စာရင်းနဲ့ လက်တွေ့ ကိုက်ညီမှု ရှိ၊ မရှိ စစ်ဆေးဖို့ပါ။
✨Item & Strength: ဆေးအမည်တူရုံနဲ့ မပြီးပါဘူး။ ဆေးအာနိသင် (ဥပမာ - 500mg လား၊ 250mg လား) တိကျမှုရှိမရှိ တိုက်စစ်ပါ။
✨Unit Check: တစ်ဗူးမှာ ဆေးကတ် ဘယ်နှကတ်ပါသလဲ၊ ဆေးလုံးအရေအတွက် (Total Quantity) ဘယ်လောက်လဲဆိုတာကို Invoice (ဘောင်ချာ) နဲ့ တစ်ခုချင်း ရေတွက်ပါ။
✨မှတ်တမ်းတင်ပါ: အပို/အလို ရှိခဲ့ရင် ဆေးစင်ပေါ် မတင်ခင်ကို Senior ကို ချက်ချင်းအစီရင်ခံပါ။

၂။ သက်တမ်းကာလ (Expiry Date) စောင့်ကြည့်ခြင်း
ဆေးဝါးတွေဟာ သက်တမ်းကုန်ခါနီးလေ၊ လူနာအတွက် အာနိသင်လျော့နည်းနိုင်ခြေ ရှိလေဖြစ်ပါတယ်။
✨၁ နှစ်ခွဲ စည်းကမ်း (The 18-Month Rule): ဆေးဝါးတွေရဲ့ သက်တမ်းဟာ အနည်းဆုံး (၁) နှစ်ခွဲ (၁၈ လ) ကျန်ရှိနေရပါမယ်။
✨သတိပြုရန်: သက်တမ်း (၁) နှစ်နဲ့အထက် ကျန်သေးရင်တောင်မှ အရင်ရှိပြီးသား Stock တွေထက် သက်တမ်းစောနေရင် FEFO (First Expired, First Out) စနစ်အတိုင်း သက်တမ်းစောတာကို ရှေ့ထုတ်ထားဖို့ ပြင်ဆင်ပါ။

၃။ ဆေးဝါး၏ ရုပ်ပိုင်းဆိုင်ရာ ကြံ့ခိုင်မှု (Physical Quality Control)
ဆေးဗူးခွံဟာ ဆေးကို ကာကွယ်ပေးထားတဲ့ အကာအကွယ်ဖြစ်လို့ ပျက်စီးနေရင် ဆေးအာနိသင်ကိုပါ ထိခိုက်နိုင်ပါတယ်။
✨အထုပ်အပိုး (Packaging): ဆေးဗူးတွေ ချိုင့်ဝင်နေတာ၊ စုတ်ပြဲနေတာ၊ ဆေးကတ်ထဲကို လေဝင်နေတာ (Punctured Strips) မျိုးရှိရင် လုံးဝလက်မခံပါနဲ့။
✨ဆေးရည်နှင့် ထိုးဆေး: ဆေးရည်ဗူးတွေမှာ အနယ်ဖတ်တွေပါနေတာ၊ ဆေးရည်အရောင် ပြောင်းနေတာ ဒါမှမဟုတ် အဖုံးလုံခြုံမှုမရှိတာမျိုးကို အထူးဂရုစိုက်ကြည့်ပါ။
✨အပူချိန် (Storage Conditions): ရေခဲသေတ္တာထဲ ထားရမယ့်ဆေး (Cold Chain Items) တွေ ရောက်လာရင် အအေးဓာတ်ရှိမရှိ အရင်ဆုံးစမ်းသပ်ပြီး သတ်မှတ်အပူချိန်အတွင်း အမြန်ဆုံး ပြန်သိမ်းဆည်းပါ။

👩🏼‍⚕️ အကြံပြုချက်
✨ပစ္စည်းစစ်ဆေးနေစဉ်အတွင်း မသင်္ကာစရာ တစ်ခုခုတွေ့ရှိပါက ဆုံးဖြတ်ချက်ကို ကိုယ်တိုင်မချSenior Staff ကို အသိပေးဖို့လိုအပ်ပါတယ်။

⚠️ အကိုက်အခဲပျောက်ဆေး (NSAIDs) အကြောင်း သိကောင်းစရာ 💊
ခေါင်းကိုက်၊ ခါးနာ၊ ခြေလက်ကိုက်ခဲပြီဆိုတာနဲ့ Ibuprofen, Diclofenac, Naproxen စတဲ့ ဆေးတွေကို ပြေးဝယ်လေ့ရှိကြပါတယ်။ ဒီဆေးတွေကို ဆေးပညာအရ NSAIDs လို့ခေါ်ပြီး အကိုက်အခဲ၊ အဖျားနဲ့ အရောင်ကျဖို့အတွက် အရမ်းထိရောက်ပါတယ်။
ဒါပေမဲ့... စနစ်တကျ မသုံးတတ်ရင် ဘေးထွက်ဆိုးကျိုးတွေ ရှိနိုင်တာကိုရော သိပါသလား? 🤔
✅ ဘယ်လို သုံးစွဲကြမလဲ?
• ဆရာဝန် သို့မဟုတ် ကျွမ်းကျင်ဆေးပညာရှင် ညွှန်ကြားချက်အတိုင်းသာ သောက်ပါ။
• အစာအိမ်မထိခိုက်အောင် အစာစားပြီးမှ သောက်ပါ။
• လိုအပ်မှသာသောက်ပါ (ရေရှည်စွဲသောက်တာမျိုး ရှောင်ပါ)။
🚨 သတိထားရမယ့် ဘေးထွက်ဆိုးကျိုးများ
• အစာအိမ်: ရင်ပူတာ၊ ပျို့အန်တာ၊ အစာအိမ်အနာဖြစ်ပြီး သွေးယိုတာမျိုး ဖြစ်တတ်ပါတယ်။
• ကျောက်ကပ်: ခြေလက်ဖောရောင်တာ၊ ကျောက်ကပ်ထိခိုက်တာမျိုး ဖြစ်နိုင်ပါတယ်။
• နှလုံး: သွေးတိုးနဲ့ နှလုံးရောဂါအခံရှိသူတွေ အထူးသတိထားရပါမယ်။
• အသားအရေ: အဖုအပိမ့်ထွက်တာ၊ ဓာတ်မတည့်တာမျိုး ဖြစ်နိုင်ပါတယ်။
👴👶 အထူးဂရုစိုက်ရမည့်သူများ (High-Risk)
• အသက် ၅ နှစ်အောက် ကလေးငယ်များ
• အသက်ကြီးရွယ်အိုများ
• နှလုံး၊ ဆီးချို နှင့် ကျောက်ကပ်ရောဂါအခံရှိသူများ

ဆေးရုံဆေးခန်း၊ ဆေးဆိုင်မှာ အလုပ်ကျန်းမာရေးဝန်ထမ်းတို့အတွက် လက်ဆေးတာက ဘာကြောင့် အရေးကြီးတာလဲ ဆိုတာကို ပေါ့ပေါ့ပါးပါးလေး ပြန်ရေးပေးလိုက်တယ်နော်။

🧼 ဆေးကောင်တာမှာ လက်ဆေးဖို့ ဘာလို့ ဒီလောက် အရေးကြီးတာလဲ?
ဆေးဆိုင်ဆိုတာ ကျန်းမာရေးမကောင်းတဲ့သူတွေ အမြဲလာနေတဲ့နေရာဖြစ်လို့ ပိုးမွှားတွေ အခြေချဖို့ အကောင်းဆုံးနေရာ တစ်ခုပါပဲ။ ကျွန်တော်တို့က ဆေးတွေ၊ ပစ္စည်းတွေကို ကိုင်တွယ်နေရတဲ့သူတွေဖြစ်လို့ လက်ကို သန့်ရှင်းအောင် မထားရင် -

✨ကိုယ့်ကိုယ်ကိုယ် ကာကွယ်ဖို့: လူနာတွေဆီက ပိုးမွှားတွေ ကိုယ့်ဆီမကူးအောင် အဓိက ခံစစ်က လက်ဆေးတာပါပဲ။
✨လူနာတွေကို ကာကွယ်ဖို့: ကိုယ့်လက်မှာ ကပ်နေတဲ့ ပိုးမွှားတွေကတစ်ဆင့် တခြားလူနာတွေဆီ မရောက်အောင် တားဆီးပေးပါတယ်။
✨ဆေးဝါးတွေ မညစ်ညမ်းဖို့: ဆေးလုံး၊ ဆေးကတ်တွေကို ကိုင်တွယ်တဲ့အခါမှာလည်း ပိုးမွှားတွေ မပါသွားဖို့ အရမ်းအရေးကြီးပါတယ်။

💡 ဘယ်လိုဆေးရမလဲဆိုတာ ပုံလေးထဲမှာ ကြည့်ရအောင်!
လက်ကို ရေနဲ့ ဆပ်ပြာသုံးပြီး စက္ကန့် ၄၀ ကနေ ၆၀ အထိ စနစ်တကျ ဆေးပေးဖို့ လိုပါတယ်။ ဘယ်လိုဆေးရမလဲဆိုတဲ့ အဆင့် (၀) ကနေ (၁၁) အထိကို အပေါ်က ပုံလေးထဲမှာ သေချာပြထားပေးပါတယ်နော်။
✨ပုံထဲကအတိုင်း လက်ဖဝါး၊ လက်ဖမိုး၊ လက်ချောင်းကြားနဲ့ လက်မတွေကို တစ်ဆင့်ချင်း စနစ်တကျ ပွတ်တိုက်ပေးပါ။
✨အထူးသဖြင့် အဆင့် (၆) နဲ့ (၇) မှာပါတဲ့ လက်မနဲ့ လက်ချောင်းထိပ်လေးတွေကို ပုံထဲကအတိုင်း မမေ့တမ်း ဆေးပေးဖို့ လိုပါတယ်ခင်ဗျာ။

လူနာတစ်ယောက်ကို ဝန်ဆောင်မှုပေးပြီးတိုင်း (ဒါမှမဟုတ်) ပစ္စည်းအသစ်တွေ ကိုင်တွယ်ပြီးတိုင်းမှာ ပုံထဲက နည်းလမ်းအတိုင်း လက်ဆေးတဲ့ အလေ့အကျင့်လေး လုပ်ထားမယ်ဆိုရင် အားလုံးအတွက် ဘေးကင်းမှာဖြစ်ပါတယ်။

🤰 ကိုယ်ဝန်ဆောင်မေမေနဲ့ နို့တိုက်မိခင်တွေကို ဆေးပေး၊ ဆေးရောင်းတဲ့အခါ 🤱

ကိုယ်ဝန်ဆောင်မေမေတွေနဲ့ နို့တိုက်မိခင်တွေ အတွက် ဆေးဝါးရွေးချယ်မှုက အရမ်းကို သတိထားရတဲ့ အပိုင်းဖြစ်ပါတယ်။ ကျန်းမာရေးဝန်ထမ်း တစ်ယောက်အနေနဲ့ ဒီအချက်လေးတွေကို မမေ့ပါနဲ့နော် -

၁။ မေးဖို့ ဝန်မလေးပါနဲ့ (Double Check!)
အမျိုးသမီးလူနာတွေ ဆေးလာဝယ်တဲ့အခါ "ကိုယ်ဝန်ရှိနေပါသလား" (သို့မဟုတ်) "ကလေးနို့တိုက်နေရပါသလား" ဆိုတာကို အရင်ဆုံး မေးမြန်းပေးပါ။ ဒါဟာ စပ်စုတာမဟုတ်ဘဲ သူတို့ရဲ့ ကျန်းမာရေးအတွက် အရေးကြီးဆုံး ခံစစ်ကို တည်ဆောက်ပေးတာပါ။

၂။ ကိုယ့်သဘောနဲ့ကိုယ် ဆုံးဖြတ်ချက် မချပါနဲ့ (Safety First)
"ဒီအားဆေးကတော့ ကိုယ်ဝန်ဆောင်လည်း ရပါတယ်" လို့ ကိုယ့်ဘာသာ ထင်ရုံနဲ့ မရောင်းပါနဲ့ဦး။ ဆေးဝါးအချို့ဟာ သန္ဓေသားနဲ့ ကလေးငယ်အပေါ် သက်ရောက်မှု ရှိနိုင်တာမို့ စွန့်စားမှု (Risk) လုံးဝ မယူပါနဲ့။

၃။ ကျွမ်းကျင်သူ (Doctor/Pharmacist) ဆီလွှဲပေးပါ
"မမက ကိုယ်ဝန်ရှိနေတာဆိုတော့ ပိုပြီး စိတ်ချရအောင် ကျွန်တော်တို့ရဲ့ Doctor/Pharmacist နဲ့ ခဏလောက် ဆွေးနွေးပေးပါဦးနော်" လို့ ယဉ်ယဉ်ကျေးကျေး ပြောပြီး ဆရာ/ဆရာမတွေဆီ လွှဲပြောင်းပေးလိုက်ပါ။ ဒါဟာ လူနာအပေါ်မှာ ကျွန်တော်တို့ ဘယ်လောက် အလေးထားတယ်ဆိုတာကို ပြသရာလည်း ရောက်ပါတယ်!

💡 Extra Tip:
စကားလုံးတွေထက် ပိုအရေးကြီးတာက ဖော်ရွေတဲ့ မျက်နှာထားနဲ့ စိတ်ရှည်တဲ့ လေသံ ပါ။ လူနာက ကိုယ့်ကို ယုံကြည်သွားရင် သူတို့ရဲ့ အခြေအနေမှန်ကို ပိုပြီး ပွင့်ပွင့်လင်းလင်း ပြောပြလာမှာ အသေအချာပါပဲ။

အားလုံးပဲ စနစ်ကျတဲ့ ဝန်ဆောင်မှုတွေနဲ့ လူနာတွေကို ဝန်ဆောင်မှုပေးနိုင်ကြပါစေ! ✨👩‍⚕️👨‍⚕️

💊 "ဆေးမပေးခင်... ဒီတစ်ခွန်းတော့ မမေ့တမ်း မေးလိုက်ပါ"
ကျန်းမာရေးဝန်ထမ်းတစ်ယောက်အတွက် အလုပ်အများဆုံးအချိန်မှာ မေ့သွားတတ်ပေမယ့် လူနာ့အသက်အန္တရာယ်အတွက် အရေးကြီးဆုံး မေးခွန်းတစ်ခု ရှိပါတယ်။ အဲဒါကတော့ "ဆေးဓာတ်မတည့်တာ ရှိပါသလား" ဆိုတဲ့ မေးခွန်းပါပဲ!

ဆေးရောင်းရုံတင်မဟုတ်ဘဲ လူနာတွေ ဘေးကင်းဖို့အတွက် ဒီအချက်လေးတွေကို အမြဲသတိရပေးပါ -

၁။ မရောင်းခင် မဖြစ်မနေမေးပါ (Safety First!)
ဆေးမထုတ်ပေးခင်မှာ "ဦးလေး/မမ တို့မှာ အရင်က ဆေးတစ်မျိုးမျိုး သောက်ဖူးလို့ ယားယံတာ၊ အဖုအပိမ့်ထွက်တာ ဒါမှမဟုတ် ဓာတ်မတည့်တာမျိုး ရှိဖူးပါသလား" လို့ အမြဲမေးရပါမယ်။ ဒါဟာ လူနာ့အသက်ကို ကယ်တင်လိုက်တာနဲ့ အတူတူပါပဲ။

၂။ ဒီဆေးတွေဆို ပိုဂရုစိုက်ပါ (High Alert!)
အကိုက်အခဲပျောက်ဆေးတွေ (Painkillers) နဲ့ ပိုးသတ်ဆေး (Antibiotics) တွေဟာ ဓာတ်မတည့်မှု အဖြစ်အများဆုံးဆေးတွေ ဖြစ်ပါတယ်။ ဒီဆေးမျိုးတွေ လာဝယ်ရင်တော့ ပိုပြီး သေချာအောင် မေးပေးပါနော်။

၃။ တွေ့ပြီဆိုတာနဲ့ Pharmacist/Doctors ဆီ လွှဲလိုက်ပါ
လူနာက "ဓာတ်မတည့်တာ ရှိတယ်" လို့ ပြောလာရင် ကိုယ့်ဘာသာ ဆက်မရောင်းပါနဲ့ဦး။ ဘယ်ဆေးနဲ့ မတည့်တာလဲဆိုတာ သေချာမှတ်သားပြီး Pharmacist/Doctor ဆီ ချက်ချင်းလွှဲပေးပါ။ ဆရာ/ဆရာမတွေက ပိုပြီး ဘေးကင်းတဲ့ ဆေးကို ရွေးချယ်ပေးပါလိမ့်မယ်။

ကျွန်တော်တို့ရဲ့ အဓိကတာဝန်က လူနာတွေ ကျန်းမာဖို့ပါ။ မေးခွန်းလေး တစ်ခွန်းက လူတစ်ယောက်ရဲ့ အသက်ကို ဘေးကင်းစေနိုင်တာမို့ "မေးဖို့ မမေ့ပါနဲ့”
အားလုံးပဲ လူနာတွေကို အကောင်းဆုံး ဝန်ဆောင်မှုပေးနိုင်ကြပါစေ! ✨👩‍⚕️👨‍⚕️

ဆေးညွှန်းစာတန်း (Label) ကပ်တာဟာ ဆေးဆိုင်တစ်ဆိုင်ရဲ့ နောက်ဆုံးပိတ် အရေးကြီးဆုံး တာဝန်တစ်ခုပါ။ လူနာလက်ထဲ ဆေးမရောက်ခငနဲ့ စနစ်တကျနဲ့ ကျန်းမာရေးဝန်ထမ်းတွေအနေနဲ့ ဆောင်ရွက်နိုင်ဖို့ စိတ်ဝင်စားစရာ အချက်လေးတွေကို ထပ်ပြီးပြောပြပေးထားပါတယ်။

💊စမတ်ကျတဲ့ Label တစ်ခုမှာ ဘာတွေပါသင့်သလဲ?
ဆေးအိတ်ပေါ်မှာ Label ကပ်ရုံတင်မဟုတ်ဘဲ လူနာအတွက် တကယ့်ကို အထောက်အကူပြုမယ့် အချက်အလက်လေးတွေကို အခုလို ထည့်သွင်းပေးနိုင်ပါတယ် -
✅လူနာအမည် (Patient Name): မိသားစုဝင်အချင်းချင်း ဆေးမှားသောက်တာမျိုး မဖြစ်အောင် နာမည်ကို ရှင်းရှင်းလင်းလင်း ရေးပေးပါ။
✅ဆေးအမည်နှင့် အာနိသင် (Medication Name): ဆေးရဲ့ Brand နာမည်အပြင် Generic နာမည် (ဥပမာ - Paracetamol) ကိုပါ သိထားရင် ပိုကောင်းပါတယ်။
✅သောက်သုံးရမည့် ပမာဏ (Dosage Instructions): "တစ်ခါသောက် တစ်လုံး၊ တစ်နေ့ သုံးကြိမ်" ဆိုတာမျိုးကို ဂဏန်းနဲ့ရော စာနဲ့ရော ရှင်းနေအောင် ရေးပါ။
✅အထူးသတိပေးချက်များ (Special Instructions): "အစာစားပြီးမှ သောက်ရန်"၊ "အိပ်ငိုက်စေနိုင်သည်"၊ "ရေများများသောက်ရန်" စတဲ့ အချက်လေးတွေက လူနာအတွက် အရမ်းတန်ဖိုးရှိပါတယ်။
✅ဆေးသက်တမ်း (Expiry Date): ဆေးက ဘယ်အချိန်အထိ စိတ်ချရသလဲဆိုတာကိုလည်း သေချာစစ်ဆေးဖော်ပြပေးပါ။

💊အမှားအယွင်းကင်းစေမယ့် အလေ့အကျင့်ကောင်း (၃) ချက်
ကျွန်တော်တို့ အလုပ်များနေတဲ့အချိန်မှာတောင် အမှားမပါအောင် ဒီနည်းလမ်းလေးတွေကို သုံးကြည့်ပါ -

၁။ မျက်လုံးနဲ့သေချာကြည့်ပြီး တိုက်စစ်ပါ (Triple Check System)
✨ဆေးပုလင်းထဲက ထုတ်တဲ့အချိန် တစ်ခါစစ်ပါ။✨Label ရိုက်တဲ့အချိန် (ဒါမှမဟုတ် ရေးတဲ့အချိန်) တစ်ခါစစ်ပါ။
✨လူနာလက်ထဲ ထည့်ပေးခါနီးမှာ တစ်ခါ ထပ်စစ်ပါ။

၂။ အာရုံနောက်စေမယ့်အရာတွေကို ရှောင်ပါ (No Distraction)
✨Label ရေးနေချိန် ဒါမှမဟုတ် ဆေးထုတ်နေချိန်မှာ ဖုန်းပြောတာ၊ တခြားသူနဲ့ စကားလက်ဆုံကျတာမျိုးကို ခဏရပ်ထားပါ။ အာရုံစိုက်မှု ၁၀၀% ပေးခြင်းက အမှားကို သုညအထိ လျှော့ချပေးနိုင်ပါတယ်။

၃။ လူနာကို ပြန်မေးပါ (Teach-Back Method)
✨ဆေးပေးပြီးတဲ့အခါ "အန်တီ... ဒီဆေးကို ဘယ်လိုသောက်ရမလဲဆိုတာ ပြန်ပြောပြပေးလို့ ရမလားခင်ဗျာ" လို့ ယဉ်ယဉ်ကျေးကျေး မေးမြန်းပါ။ ဒါဟာ ကျွန်တော်တို့ ရေးပေးလိုက်တဲ့ Label ကို လူနာက တကယ်နားလည်ရဲ့လားဆိုတာ အတည်ပြုနိုင်တဲ့ အကောင်းဆုံးနည်းလမ်းပါပဲ။

ကျွန်တော်တို့ရဲ့ စေ့စပ်သေချာမှုက လူနာတွေအတွက် နွေးထွေးတဲ့ ဂရုစိုက်မှုတစ်ခုပါပဲ။ လုပ်ငန်းခွင်မှာ အားလုံးပဲ အဆင်ပြေပြေနဲ့ စမတ်ကျကျ ဆောင်ရွက်နိုင်ကြပါစေခင်ဗျာ။ 💪💙

ငါးကြီးဆီ (Fish Oil) အကြောင်း သိကောင်းစရာ

ငါးကြီးဆီ (Fish Oil) ဟာ ကျန်းမာရေးအတွက် အလွန်အသုံးဝင်တဲ့ Omega-3 fatty acids ကြွယ်ဝစွာပါဝင်တဲ့ အာဟာရဖြည့်စွက်စာတစ်ခု ဖြစ်ပါတယ်။

🐟 ငါးကြီးဆီ (Fish Oil) နှင့် Omega-3
ငါးကြီးဆီမှာ DHA နဲ့ EPA လို့ခေါ်တဲ့ Omega-3 fatty acids တွေ ပါဝင်ပါတယ်။ ဒီဓာတ်တွေကို ခန္ဓာကိုယ်က အလိုအလျောက် မထုတ်လုပ်နိုင်တဲ့အတွက် အစားအစာ (သို့မဟုတ်) ဖြည့်စွက်စာမှတစ်ဆင့် ရယူနိုင်ပါတယ်။

👨‍⚕️ငါးကြီးဆီရဲ့ အကျိုးကျေးဇူးတွေကတော့-
✨တစ်ပတ်ကို အနည်းဆုံး ၂ ကြိမ် ငါးကြီးဆီစားသုံးပေးခြင်းကနှလုံးရောဂါကြောင့် သေဆုံးနိုင်ခြေကို လျော့ကျစေပါတယ်။
✨သွေးတိုးရောဂါရှိသူတွေမှာ သွေးပေါင်ချိန်ကို အနည်းငယ်လျော့ကျစေနိုင်ပါတယ်။
✨သွေးထဲမှာရှိတဲ့ မကောင်းတဲ့ အဆီဓာတ်တွေကို သိသိသာသာလျော့ကျစေပြီး ကောင်းသော အဆီဓာတ်တွေ ကို တိုးပွားစေပါတယ်။
✨အဆစ်အမြစ်များ ကိုက်ခဲခြင်း၊ တောင့်တင်းနေခြင်းတို့ကိုသက်သာစေပါတယ်။

⚠️ သတိပြုရန်
ငါးကြီးဆီ အလွန်အကျွံ သောက်သုံးမိပါက
ရင်ပူခြင်း၊ ပျို့အန်ခြင်း သို့မဟုတ် ဝမ်းလျှောခြင်း၊ -အရေပြားပေါ်မှာ အနီစက်များ ထွက်ခြင်း၊
-သွေးယိုစီးမှုကို ပိုမိုဖြစ်ပေါ်စေနိုင်ပြီး လေဖြတ်နိုင်ခြေကိုလည်း တိုးမြင့်စေပါတယ်။

📢အကယ်၍ အောက်ပါဆေးဝါးများကို သောက်သုံးနေရပါကဆရာဝန်နဲ့ တိုင်ပင်ဆွေးနွေးပြီးမှ ငါးကြီးဆီကို သောက်သုံးစေလိုပါတယ်။
သွေးကျဆေးများ - သွေးပေါင်ချိန် အရမ်းကျသွားနိုင်လို့ပါ။
သွေးကျဲဆေးများ - သွေးယိုစီးမှု ဖြစ်နိုင်ခြေ ပိုများစေပါတယ်။
ကိုယ်ဝန်တားဆေးများ - ငါးကြီးဆီရဲ့ အဆီဓာတ်လျော့ချပေးတဲ့ အာနိသင်ကို အနှောင့်အယှက် ဖြစ်စေနိုင်ပါတယ်။
Vitamin E - ငါးကြီးဆီ သောက်ခြင်းကြောင့် ဗီတာမင် E ပမာဏ လျော့နည်းသွားနိုင်ပါတယ်။

“ဒီဆေးပဲ လိုချင်တာ... တခြားဟာဆို မသောက်ရဲဘူး" 🙅‍♂️🚫

ဆေးဆိုင်တိုင်းမှာ နေ့တိုင်းလိုလို ကြုံတွေ့နေရတဲ့ မြင်ကွင်းလေးတစ်ခုရှိပါတယ်။ ဆေးကတ်အဟောင်းလေးကို လက်ကမလွှတ်တမ်း ကိုင်ထားပြီး မိမိတို့ဆီမှာ ပစ္စည်းပြတ်နေလို့ အရည်အသွေးတူတာလေး ညွှန်ပေးပေမယ့် "မရဘူး... ဒါပဲ ပေး" လို့ ငြင်းနေတဲ့ အခြေအနေမျိုးပါ။ ဒါဟာ ဆေးဆိုင်လုပ်ငန်းရှင်တွေနဲ့ ဝန်ထမ်းတွေအတွက် တကယ့်ကို အခက်တွေ့ရတဲ့ ကိစ္စပဲဖြစ်ပါတယ်။

တကယ်တော့ လူနာတွေက ဆေးနာမည်ကို စွဲလမ်းနေတာထက် သူတို့ရဲ့ "ကျန်းမာရေးအတွက် စိုးရိမ်စိတ်" ကြောင့်သာ ဖြစ်ပါတယ်။ "ဆေးပြောင်းသောက်ရင် မပျောက်မှာ စိုးတာ"၊ "ဘေးထွက်ဆိုးကျိုး ရှိမှာ ကြောက်တာ" စတဲ့ စိုးရိမ်စိတ်တွေကို ကျော်ဖြတ်နိုင်ဖို့ MyanHealth Training Center က အကြံပြုချင်တဲ့ နည်းလမ်း (၄) ချက်ကို ကြည့်လိုက်ရအောင်။ 👇

၁။ ဆေးအာနိသင်တူကြောင်း ပညာရှင်ပီသစွာ ရှင်းပြပါ
✨အတင်းအကျပ် ရောင်းတာမျိုးမဟုတ်ဘဲ ဆေးထဲမှာပါဝင်တဲ့ ဓာတ်ပစ္စည်း (Active Ingredient) တူညီကြောင်း၊ သောက်ရမယ့် ပမာဏနဲ့ ရရှိမယ့် အကျိုးအာနိသင် အတူတူပဲဖြစ်ကြောင်းကို ယုံကြည်အောင် ရှင်းပြပါ။
✨”ဒီဆေးထဲမှာ ပါဝင်တဲ့ ဓာတ်ပစ္စည်းက အတူတူပဲဖြစ်လို့ ရောဂါပျောက်ကင်းမှုက တထပ်တည်းကျပါတယ်" လို့ သေချာနားလည်အောင် ပြောပြပေးဖို့ လိုပါတယ်။

၂။ ဆေးရရှိနိုင်မယ့် လမ်းကြောင်းကို ကျယ်ပြန့်အောင် ထားပါ
✨ဆေးပြတ်လပ်မှုကို အနည်းဆုံးဖြစ်အောင် လက်ကားဒိုင် အများအပြားနဲ့ ချိတ်ဆက်ထားပါ။ ဒါမှ လူနာတောင်းတဲ့ တံဆိပ်မရှိရင်တောင် အရည်အသွေး တူညီတဲ့ တခြားရွေးချယ်စရာကို ချက်ချင်း ထုတ်ပြနိုင်မှာပါ။

၃။ ရောင်းကုန်ထက် ယုံကြည်မှုကို အရင်တည်ဆောက်ပါ
✨လိမ်ညာပြီး မရောင်းပါနဲ့။ မိမိညွှန်ပေးတဲ့ ဆေးအသစ်ဟာ ကျန်းမာရေးဌာန (FDA) ရဲ့ ထောက်ခံချက် ရရှိပြီးသား ဖြစ်ကြောင်း၊ စံနှုန်းပြည့်မီကြောင်း သေချာဖို့လိုပါတယ်။ လူနာက သင့်ကို ယုံကြည်သွားရင် နောက်တစ်ကြိမ်မှာ ဆေးပြောင်းတိုက်ရတာ ပိုလွယ်ကူသွားပါလိမ့်မယ်။

၄။ မျက်မြင်သက်သေနဲ့ ယှဉ်ပြပါ
✨စကားနဲ့တင် ရှင်းပြတာထက် ဆေးဘူးခွံမှာပါတဲ့ ဆေးအမည် (Generic Name) လေးတွေကို ဘေးချင်းယှဉ်ပြပါ။ "ဒီဆေးကလည်း တရားဝင် မှတ်ပုံတင်ထားတဲ့ ကုမ္ပဏီကြီးက ထုတ်တာပါ" လို့ ပြပေးခြင်းက လူနာရဲ့ စိုးရိမ်စိတ်ကို ချက်ချင်း လျော့ကျစေပါတယ်။

ဆေးသောက်တဲ့အခါ အစားအသောက် ဆင်ခြင်ဖို့က အရမ်းအရေးကြီးပါတယ်။ ဆေးနဲ့မတည့်တဲ့ အစားအစာတွေတွဲစားမိရင် ဆေးအာနိသင် လျော့သွားတာ ဒါမှမဟုတ် ဘေးထွက်ဆိုးကျိုး ပိုခံစားရတာမျိုး ဖြစ်နိုင်လို့ပါ။ ဒီနေ့မှာ
MyanHealth Training Center ကနေ အသုံးဝင်မယ့် ဆေးနဲ့ အစားအသောက် တွဲမစားသင့်တဲ့ အချက်တွေကို အနှစ်ချုပ် ထုတ်ပေးလိုက်ပါတယ်။

💊 ဆေးသောက်နေရင် ဒါတွေနဲ့ ခဏဝေးဝေးနေရအောင်!
ဆေးကုသမှု ထိရောက်ဖို့ဆိုရင် ဘာတွေ ရှောင်ရမလဲဆိုတာ သိထားဖို့ လိုပါတယ်။ အသုံးများတဲ့ ဆေးတွေနဲ့ မတည့်တဲ့ အစားအစာ (၁၀) မျိုးကို ဖော်ပြပေးလိုက်ပါတယ်

✨နို့နဲ့ နို့ထွက်ပစ္စည်းများ + ပိုးသတ်ဆေး (Antibiotics):
Ciprofloxacin နဲ့ Tetracycline လို ပိုးသတ်ဆေးတွေသောက်ရင် နို့ထွက်ပစ္စည်း ရှောင်ရပါမယ်။ နို့ထဲမှာပါတဲ့ Calcium က ဆေးစုပ်ယူမှုကို အနှောင့်အယှက်ပေးလို့ ဆေးအာနိသင် လျော့သွားနိုင်ပါတယ်။
✨ဟင်းနုနွယ်၊ ကန်စွန်းရွက် (Vitamin K) + သွေးကျဲဆေး (Warfarin):
Vitamin K ကြွယ်ဝတဲ့ အသီးအရွက်တွေက သွေးကျဲဆေးရဲ့ အာနိသင်ကို ပျက်ပြယ်စေပြီး သွေးခဲနိုင်ခြေ ပြန်တက်လာစေပါတယ်။
✨ရှောက်ချိုသီး/ဂရိတ်ဖု (Grapefruit) + အဆီကျဆေး (Statins):
ဒီအသီးက အသည်းရဲ့ ဆေးခြေဖျက်နှုန်းကို နှေးကွေးစေလို့ သွေးထဲမှာ ဆေးပမာဏ အဆမတန် များသွားစေပြီး ကြွက်သားနာတာ၊ ကျောက်ကပ်ထိတာမျိုး ဖြစ်တတ်ပါတယ်။
✨အရက် + အကိုက်အခဲပျောက်ဆေးများ:
တွဲသောက်ရင် အရမ်းကို အိပ်ငိုက်စေပြီး အသက်ရှူနှုန်း နှေးသွားတတ်လို့ အသက်အန္တရာယ်တောင် ရှိနိုင်ပါတယ်။
✨ငှက်ပျောသီး + သွေးတိုးကျဆေး (ACE Inhibitors):
ဒီဆေးတွေက ခန္ဓာကိုယ်ထဲမှာ ပိုတက်စီယမ် (Potassium) ကို တက်စေပါတယ်။ ငှက်ပျောသီးမှာလည်း Potassium ကြွယ်ဝတာကြောင့် တွဲစားရင် နှလုံးခုန် မမှန်တာမျိုး ဖြစ်နိုင်ပါတယ်။
✨အမျှင်ဓာတ်များတဲ့ အစားအစာ (Fiber) + ဆီးချို/နှလုံးဆေး:
အမျှင်ဓာတ် အရမ်းများရင် ဆေးစုပ်ယူမှုကို နှေးကွေးစေလို့ ဆေးအာနိသင် အပြည့်အဝ မရတော့တာမျိုး ဖြစ်တတ်ပါတယ်။
✨နွယ်ချို (Licorice) + သွေးတိုးဆေး:
နွယ်ချိုက သွေးတိုးဆေးရဲ့ အာနိသင်ကို လျော့စေပြီး သွေးပေါင်ချိန် ပြန်တက်လာစေနိုင်ပါတယ်။
✨အသားဓာတ် (Protein) + ပါကင်ဆန်ရောဂါဆေး (Levodopa):
အသားဓာတ်က ဆေးစုပ်ယူမှုကို တားဆီးတတ်လို့ ဆေးသောက်ချိန်နဲ့ အသားစားချိန်ကို ခွဲထားသင့်ပါတယ်။
✨ကော်ဖီ/လက်ဖက်ရည် (Caffeine) + ပန်းနာရင်ကျပ်ရှူဆေး:
ကဖင်းက နှလုံးခုန်နှုန်း မြန်စေသလို ရှူဆေးတွေကလည်း နှလုံးခုန်နှုန်းကို မြှင့်ပေးတာမို့ တွဲမိရင် ရင်တုန်တာ၊ နှလုံးအရမ်းခုန်တာမျိုး ဖြစ်နိုင်ပါတယ်။
✨ဒိန်ချဉ်၊ အသားခြောက် (Tyramine) + စိတ်ကျရောဂါဆေး (MAOIs):
ဒီလို အချဉ်ဖောက်ထားတဲ့ အစားအစာတွေနဲ့ တွဲစားရင် သွေးတိုး အရမ်းတက်ပြီး အရေးပေါ်အခြေအနေ ဖြစ်သွားနိုင်ပါတယ်။

အတာသင်္ကြန်နှစ်သစ်ကူးနေ့အခါသမယမှာ မြန်မာပြည်သူပြည်သားများအားလုံး ကျန်းမာချမ်းသာကြပြီး စိတ်ချမ်းမြေ့ပျော်ရွှင်ကြပါစေလို့ MyanHealth မိသားစုမှ ဆုမွန်ကောင်း တောင်းပေးလိုက်ပါတယ်ရှင်🙏🏻✨။

မင်္ဂလာပါ MyanHealth မိသားစုဝင်များအားလုံးခင်ဗျာ 🌟

ဒီနေ့မှာတော့ ကျွန်တော်တို့ MyanHealth Training Center ရဲ့ အောင်မြင်မှုမှတ်တိုင်လေးတစ်ခုကို ဝေမျှပေးချင်ပါတယ်။

ပြီးခဲ့တဲ့ရက်ပိုင်းက MyanHealth Pharmacist Aide Training Batch 1 ကနေ Batch 4 အထိ သင်တန်းဆင်းသွားကြတဲ့ ကျောင်းသား၊ ကျောင်းသူဟောင်းတွေနဲ့ ပြန်လည်ဆုံတွေ့ခွင့်ရခဲ့ပြီး ပျော်ရွှင်စရာ အမှတ်တရတွေ အများကြီး ဖန်တီးနိုင်ခဲ့ပါတယ်။ ဒါ့အပြင် ဂုဏ်ယူဝမ်းမြောက်စရာ သတင်းကောင်းတစ်ခုကိုလည်း ပြောပြပါရစေ။

ကျွန်တော်တို့ဆီမှာ Pharmacist Aide သင်တန်း တက်ရောက်ခဲ့သူတွေထဲက တစ်ဝက်ကျော်ဟာ အခုဆိုရင် ဆေးဝါးနယ်ပယ်အသီးသီးမှာ အလုပ်အကိုင်တွေ အသီးသီးရရှိနေကြပြီး လက်တွေ့နယ်ပယ်မှာ ထိထိရောက်ရောက် အသုံးချနေနိုင်ကြပြီ ဖြစ်ပါတယ်။ ဒီလို သင်တန်းသားတွေရဲ့ တိုးတက်အောင်မြင်မှုတွေကို မြင်တွေ့ရတာဟာ MyanHealth အတွက်တော့ တကယ့်ကို အတိုင်းမသိ ဂုဏ်ယူရတဲ့ အောင်မြင်မှုတစ်ခုပါပဲ။

မတ်လမှာ ပြုလုပ်ခဲ့တဲ့ ဒီတွေ့ဆုံပွဲမှာ ဆရာ၊ ဆရာမတွေနဲ့ ကျောင်းသားဟောင်းတွေအကြား အတွေ့အကြုံတွေကို ရင်းရင်းနှီးနှီး ဖလှယ်ခဲ့ကြသလို သင်တန်းတွေ ပိုမိုကောင်းမွန်လာဖို့အတွက် အကြံပြုချက် (Feedback) ကောင်းတွေကိုလည်း ရရှိခဲ့ပါတယ်။ ဒီအချက်အလက်တွေကို အခြေခံပြီးတော့ နောက်လာမယ့် သင်တန်းသားသစ်တွေအတွက် ပိုမိုပြည့်စုံတဲ့ Training Courses တွေကို အကောင်းဆုံး ပြင်ဆင်ရေးဆွဲသွားမှာပါ။

MyanHealth Training Center အနေနဲ့ အနာဂတ်မှာလည်း အရည်အသွေးမြင့်မားတဲ့ ကျန်းမာရေးပညာရပ်တွေကို ဆက်လက်မျှဝေပေးနိုင်ဖို့ အမြဲတမ်း အားသွန်ခွန်စိုက် ကြိုးစားသွားမှာဖြစ်ကြောင်း ကတိပြုပါတယ်ခင်ဗျာ 🩺💊