21/11/2021
ဥပဒေသ (၄)
လိုအပ်တာထက်ကို လျော့ပြောပါ။
ကိုရီယိုလနက်စ်သည် ရှေးခေတ်ရောမပြည်၏ မဟာစစ်သူရဲကောင်းတစ်ဦး ဖြစ်တယ်။ ဘီစီ ငါးရာစု တဝက်အချိန်လောက်က သူသည် အရေးကြီးသော တိုက်ပွဲပေါင်းများစွာကို အောင်နိုင်ခဲ့ပြီး မြို့ကို ဘေးအန္တရာယ်များမှ အခါခါ ကယ်တင်နိုင်ခဲ့ပါတယ်။ သူ့အချိန်အများစုကို စစ်မြေပြင်တွင် ကုန်ဆုံးခဲ့သည့်အတွက် ရောမသားအချို့သာလျှင် သူ့ကို လူပုဂ္ဂိုလ်ချင်း ရင်းနှီးရ် သူ့အား ဒဏ္ဍာရီလာ သူရဲကောင်းအဖြစ် မော်ကွန်းတင်ချင်ကြတယ်။
၄၅၄ ဘီစီမှာတော့ ကိုရီယိုလနက်စ်သည် သူ့ကျော်ကြားမှုကို အသုံးချပြီး နိုင်ငံရေးထဲ ဝင်ရောက်ဖို့ ဆုံးဖြတ်ခဲ့ပါတယ်။ ကောင်စီရဲ့ ရာထူးအမြင့်ပိုင်းရဖို့ ရွေးကောက်ပွဲ ဝင်ခဲ့ပါတယ်။ ဒီရာထူးအတွက် ဝင်ရောက်ယှဥ်ပြိုင်သူတွေဟာ လူရှေ့ထွက် စကားပြောရမည်ဖြစ်ပြီး ကိုရီယိုလနက်စ်လည်း လူရှေ့ထွက်ကော သူသည် ရောမအတွက် ဆယ့်ခုနစ်နှစ်မကအောင် တိုက်ခိုက်ခဲ့သည်မှ ရရှိခဲ့သော သူ့အမာရွတ်တွေကို လူတွေကို ပြသခဲ့ပါတယ်။ လူအုပ်ထဲက တချို့သာလျှင် သူ၏ရဲစွမ်းသတ္တိနှင့် မျိုးချစ်စိတ်ပြယုဂ်ဖြစ်သော အမာရွတ်များအကြောင်း တရှည်တလျား မိန့်ခွန်းကို ကြားပြီး မျက်ရည်ဝဲစေပါတယ်။ ကိုရီယိုလနက်စ်၏ ရွေးကောက်ပွဲ ဖြစ်မှာတော့ သေချာနေပြီ။
မဲပေးတဲ့နေ့လည်း ရောက်ရော ကိုရီယိုလနက်စ်တစ်ယောက် စီးနိတ်တဖွဲ့လုံး၊ မြို့ရပ်မိရပ်ဖတွေနဲ့ မင်းမျိုးမင်းနွယ်တွေ ခြံရံပြီး ရုံးထဲကို ဝင်ရောက်ခဲ့ပါတယ်။ ဒီမြင်ကွင်းကို မြင်ရတဲ့သာမန်လူတွေခမျာမှာတော့ ရွေးကောက်ပွဲနေ့မှာ ဟိတ်ကြီးဟန်ကြီး လုပ်ပြနေသလို ခံစားရပါတယ်။
ပြီးတော့ ကိုရီယိုလနက်စ် မိန့်ခွန်းထပ်ပြောပါတယ်။ အများစုကတော့ သူ့ကို အဖော်လိုက်ပေးတဲ့ လူချမ်းသာတွေကို ချီးမွမ်းခန်းဖွင့်တာပေါ့။ သူ့စကားလုံးတွေက အထက်စီးဆန်ပြီး မောက်မာနေပါတယ်။ မဲနိုင်မှာ သေချာတဲ့အကြောင်း၊ စစ်မြေပြင်က စွန့်စားခန်းတွေအကြောင်း ကြွားလုံးပစ်နေပါတော့တယ်။ မင်းမျိုးမင်းနွယ်တွေ ကြိုက်နှစ်သက်လောက်တဲ့ ဟာဟတွေ၊ ပြိုင်ဘက်များအပေါ် ဒေါသတကြီး စွပ်စွဲချက်တွေနဲ့ ရောမပြည်ကို သူဆောင်ကြဥ်းပေးလာမယ့် ချမ်းသာကြွယ်ဝမှုတွေအကြောင်း။ ဒီတကြိမ် လူတွေ နားထောင်သိရှိလိုက်ရတာကတော့ ဒဏ္ဍာရီတွင်မယ့် စစ်သားကြီးက သူလိုငါလို ငကြွားကြီး ဆိုတာပါပဲ။
ကိုရီယိုလနက်စ်၏ ဒုတိယမိန့်ခွန်းက ရောမပြည်တလျှောက် အလွန်လျင်မြန်စွာ ပျံ့နှံ့သွားခဲ့ပြီး လူအများစုက သူ ရွေးကောက်ပွဲ မနိုင်တာ သေချာအောင် လုပ်ဆောင်ကြပါတယ်။ မဲရှုံးသွားတဲ့ ကိုရီယိုလက်နက်စ်သည် စစ်မြေပြင်ကို ပြန်သွားခဲ့ရပြီး သူ့ကို ဆန့်ကျင်မဲပေးခဲ့တဲ့ သာမန်လူတန်းစားတွေကို အခဲမကြေ ဖြစ်ကာ လက်စားချေဖို့ စောင့်နေပါတယ်။ အပတ်အချို့ကြာတော့ ရောမပြည်ကို စပါးစေ့ သဘော်ကြီး ဆိုက်လာတယ်။ စီးနိတ်က ဒီဆန်စပါးစေ့တွေကို ပြည်သူတွေကို အလကား ဖြန့်ဝေပေးဖို့ အဆင်သင့် ဖြစ်နေပြီ။ သို့ပေမယ့် သူတို့ မဲပေးဖို့ ပြင်ဆင်နေကြတုန်း ကိုရီယိုလနက်စ် ရောက်ချလာတယ်။ သူ အခြေအတင် ရန်ဖြစ်ခဲ့တဲ့ ဖြန့်ဝေမှုဟာ တမြို့လုံးမှာ မကောင်းတဲ့ သက်ရောက်မှု တခုခု ဖြစ်မှာပါပဲ။ ရွေးကောက်ခံအမတ်တော်တော်များများ နိုင်သွားပုံပါပဲ။ သို့ပေမယ့် ဖြန့်ဝေမှုအတွက် မဲကတော့ သံသယဖြစ်ဖွယ်။ ကိုရီယိုလနက်စ်က ဒီမှာတင် မရပ်သွားပါဘူး။ သူက ဒီမိုကရေစီ အယူအဆကို ရှုံ့ချတယ်။ သူက လူတွေရဲ့ ကိုယ်စားလှယ်တွေ၊ လူသိများတဲ့ ခေါင်းဆောင်တွေနဲ့ ရှောင်ရှားနေဖို့ အကြံပေးတယ်။ မင်းမျိုးမင်းနွယ်တွေကိုသာ ပြန်လည် အုပ်ချုပ်စေချင်တယ်။
ကိုရီယိုလနက်စ်ရဲ့ နောက်ဆုံးမိန့်ခွန်းက စကားလုံးတွေသည် လူတွေထံရောက်ရှိသွားချိန်မှာတော့ သူတို့ဒေါသတွေက အကန့်အသတ် မရှိတော့ပါဘူး။ ပြည်သူ့ခေါင်းဆောင်တွေကို စီးနိတ်ကို သွားခိုင်းပြီး ကိုရီယိုလနက်စ်ကို သူတို့ရှေ့လာပေးဖို့ တောင်းဆိုခဲ့တယ်။ သူက မလာဘူး ငြင်းတယ်။ တနိုင်ငံလုံး အဓိကရုဏ်းတွေ ဖြစ်ကုန်တယ်။ လူထုအုံကြွမှုကို ကြောက်လာတဲ့ စီးနိတ်က နောက်ဆုံးတော့ ဆန်ဖြန့်ဝေမှုကို ခွင့်ပြုခဲ့ရတယ်။ ပြည်သူ့ခေါင်းဆောင်တွေကတော့ ကျေနပ်သွားပြီ။ သို့ပေမယ့် လူတွေက ကိုရီယိုလနက်စ့်ကို သူတို့ရှေ့လာပြီး စကားပြော တောင်းပန်ဖို့ကို တောင်းဆိုနေဆဲ။ သူသာ နောင်တရပြီး တောင်းပန်ခဲ့မယ်ဆိုရင် သူ့ထင်မြင်ယူဆချက်တွေကို သူ့ဘာသာသူ ထိန်းသိမ်းထားဖို့ သဘောတူခဲ့မယ်ဆိုရင် သူကို စစ်မြေပြင် ပြန်ဖို့ ခွင့်ပြုပေးကြမှာပါ။
ကိုရီယိုလနက်စ်က သူ့စကားကို အာရုံစိုက်ပြီး နားထောင်မယ့် လူတွေရှေ့မှာ နောက်ဆုံး တစ်ကြိမ် ပေါ်လာခဲ့ပါတယ်။ သူဟာ ဖြည်းဖြည်းနဲ့ ညင်ညင်သာသာလေး စကားစပြောခဲ့တယ်။ သို့ပေမယ့် ပြောရင်း ပြောရင်းနဲ့ ပိုပိုဆိုးလာတယ်။ သူ ထပ် စော်ကားတယ်။ သူ့လေသံက အထက်စီးဆန်တယ်။ သူ့အပြုအမူတွေက အထင်အမြင်သေးဖွယ်။ သူ စကားပြောလေ လူတွေက ပိုစိတ်ဆိုးလာလေ။ နောက်ဆုံးတော့ သူ့ကို ဝိုင်းအော်ကြပြီး ငြိမ်နေစေလိုက်တယ်။
ပြည်သူ့ခေါင်းဆောင်တွေက ကိုရီယိုလနက်စ်ကို ရှုံ့ချတယ်။ ရာဇဝတ်တရားသူကြီးဆီမှာ အပ်တယ်။ တာပေယံကျောက်တုံးပေါ်ကနေ သူ့ကို ပစ်ချခိုင်းပြီး သေဒဏ်စီရင်ခိုင်းတယ်။ အားရဝမ်းမြောက်နေတဲ့ လူအုပ်ကြီးက ဆုံးဖြတ်ချက်ကို ကျေနပ်တယ်။ မင်းမျိုးမင်းနွယ်တွေက ကြားက ဖျန်ဖြေပေးဖို့ ကြိုးစားတယ်။ အမိန့်က တသက်တာ ပြည်နှင်ဒဏ်ပါ။ လူတွေသည် ရောမပြည်၏ မဟာစစ်သူရဲကောင်းကြီး မြို့ကို ဘယ်တော့မှ ပြန်မလာနိုင်မှန်းလည်း သိရော လမ်းတွေပေါ်မှာ ပျော်ပွဲရွှင်ပွဲတွေ ကျင်းပတယ်။ တကယ်တော့ ဘယ်သူမှ အဲ့လိုပွဲမျိုး မမြင်ဖူးဘူး။ တိုင်းတပါးခြား ရန်သူတို့ စစ်ရှုံးသွားတာတောင်မှ မလုပ်ဖူးတဲ့အရာပါ။
ရှင်းလင်းချက်
နိုင်ငံရေးထဲ မဝင်ခင် ကိုရီယိုလနက်စ်ဆိုသည့် အမည်နာမသည် ကြောက်ရွံ့ရိုသေမှုကို ခံစားမိစေသည်။
တိုက်ပွဲများဆီက အောင်မြင်မှုတိုင်းသည် သူ့အား အလွန်ရဲရင့်သော ယောက်ျားတစ်ဦးအဖြစ် ပြသပေးသည်။ နိုင်ငံသားတွေက သူ့အကြောင်း နည်းနည်းလေး သိသွားရုံမျှဖြင့် ဒဏ္ဍာရီတွင်မည့် သူ့အမည်သည်လည်း တွဲလျက်ပါလာခဲ့သည်။ ရောမနိုင်ငံသားတွေရှေ့ သူ ထွက်လာပြီးကော သူ့စိတ်ထဲရှိသမျှလည်း ပြောဆိုပြီးစီးသည့်အချိန်တွင် ခမ်းနားကြီးကျယ်မှုနှင့် ဒဏ္ဍာရီဆန်မှုတို့သည် ပျောက်ကွယ်လုနီးပါး ဖြစ်ကုန်သည်။ သူသည် သာမန်စစ်သားတစ်ယောက်လို ကြွားဝါပြောဆို ထိုးနှက်တိုက်ခိုက်တတ်သည်။ သူသည် နှိပ်စက်ခံရသကဲ့သို့ မလုံခြုံမှု ခံစားရသကဲ့သို့ လူတွေကို စော်ကားထိခိုက်နစ်နာစေသည့် စကားများကို စွပ်စွဲပြောဆိုသည်။ ရုတ်တရက်ဆိုသလို သူသည် လူတွေ တွေးထင်ထားသည့် သူမျိုး မဟုတ်တော့ချေ။ ဒဏ္ဍာရီဆန်မှု နှင့် တကယ့်အပြင်လောကရှိ ကွဲပြားခြားနားမှုသည် သူ့အား သူရဲကောင်းအဖြစ် ယုံကြည်လိုသည့် လူတွေအား ကြီးမားစွာ စိတ်ပျက်စေသည်။ ကိုရီယိုလနက်စ် စကားတွေ ပိုပြောလေ သူ့စွမ်းအားတွေသည် နည်းလာလေ။ သူ့စကားတွေအား မထိန်းနိုင်သောသူသည် သူ့ကိုယ်သူလည်း ထိန်းသိမ်းနိုင်မည် မဟုတ်မှာ ပြသနေသည်။ ရိုသေလေးစားမှုနှင့်လည်း မထိုက်တန်ချေ။
ကိုရီယိုလနက်စ်သာ စကားနည်းနည်းပဲ ပြောဆိုခဲ့မယ်ဆိုလျှင် လူတွေက သူ့အား မည်သည့်အခါမျှ ဆန့်ကျင်ခဲ့မည် မဟုတ်ပဲ သူ့ခံစားချက် အစစ်အမှန်အားလည်း မည့်သည့်အခါမှ သိလာလိမ့်မည် မဟုတ်ပေ။ သူ့ စွမ်းအားအသွင်အပြင်ကို ထိန်းသိမ်းနိုင်မည်ဖြစ်ပြီး ကောင်စီလူကြီးအဖြစ် ရွေးကောက်ခံရမည်မှာလည်း သေချာသလောက်ပင် ဖြစ်သည်။ သူ၏ ဒီမိုကရက်တစ်မဆန်သော ရည်မှန်းချက်များလည်း ရရှိနိုင်မည်ပင် ဖြစ်သည်။ သို့ပေမယ့် လူသား၏လျှာသည် လူတချို့သာ ပိုင်ပိုင်နိုင်နိုင် ထိန်းချုပ်နိုင်စွမ်းရှိသော တိရိစ္ဆာန်ရိုင်းတစ်ကောင် ဖြစ်သည်။ လျှာသည် လှောင်အိမ်ထဲက ချိုးဖောက်ထွက်ဖို့ စဥ်ဆက်မပြတ် ကြိုးစားနေမည်သာဖြစ်ပြီး ကောင်းကောင်း မထိန်းချုပ်နိုင်ပါက ယင်းသည် ရိုင်းစိုင်းပြီး သင့်အား နောင်တတရားတို့ကို ရင်ဝယ် ပိုက်စေမည် ဖြစ်သည်။ မိမိတို့၏ အဖိုးထိုက်တန်သော စကားလုံးများကို ဖြုန်းတီးပစ်သော သူတို့သည် ဩဇာအာဏာအား ရရှိနိုင်မည် မဟုတ်။
လပြည့်ညတွင် ကမာကောင်များသည် အခွံဖွင့်လျက် နေကြသည်။ ဂဏန်းတစ်ကောင်က တွေ့သွားသောအခါ သူသည် ကျောက်တုံးတခဲကို အခွံထဲသို့ ပစ်ထည့်လိုက်သည်။ ကမာကောင်သည် အခွံကို မပိတ်နိုင်တော့ချေ။ ထို့ကြောင့် ဂဏန်းသည် စားစရာ အသား ရသွားသည်။ ဒါသည် ဟောင်ပွာအာကျယ် တတ်သောသူတို့၏ ကံကြမ္မာပင် ဖြစ်သည်။ နားထောင်သူ၏ သနားညှာတာမှုကိုသာ မှီတည်နေရသူတို့အဖြစ်သို့ ရောက်ရှိသွားသည်တကား။
လီယိုနာဒို ဒဗင်စီ (၁၄၅၂-၁၅၁၉)
20/11/2021
အပိုင်း(၂)
သင်၏လှုပ်ရှားမှုများကို ထင်ယောင်ထင်မှား ဖြစ်စေရန် မီးခိုးမှိုင်းတိုက်ပါ။
၁၉၁၀ခုနှစ်တွင် ချီကာဂိုတွင်နေထိုင်သော မစ္စတာဆမ် ဂီးဇီးလ်သည် သူ့ကုန်လှောင်ရုံကို ဒေါ်လာ ၁သန်းနီးပါးနဲ့ ရောင်းချခဲ့ပါတယ်။ သူဟာ အချိန်ပိုင်းလောက်သာ အလုပ်လုပ်ပြီး သူ့ပိုင်ဆိုင်မှုမြောက်မြားစွာကို စီမံခန့်ခွဲနေခဲ့ပါတယ်။ သို့ပေမယ့် သူဟာ စိတ်ထဲမှာတော့ အရင်ရက်တွေကလိုမျိုး အပေးအယူ လုပ်ချင်နေခဲ့တာ ဖြစ်ပါတယ်။ တနေ့တော့ ဂျိုးဆက် ဝေးလ် ဆိုသူ လူငယ်လေးတစ်ယောက် သူ့ရုံးခန်းကို လာရောက်ခဲ့ပါတယ်။ သူ ရောင်းချဖို့ရန်ရှိတဲ့ အဆောက်အဦးတစ်ခုကို ဝယ်ယူချင်လို့ပါ။ ဂီးဇီးလ်သည် အရောင်းအဝယ်ကို ရှင်းပြပါတယ်။ ဈေးကတော့ ဒေါ်လာ ၈၀၀၀ ပါ။ သို့ပေမယ့် ဝယ်မယ့်သူသည် ဒေါ်လာ ၂၀၀၀ သာ ငွေအရင်ချထားလို့ ရပါတယ်။ ဝေးလ်က သူ စဥ်းစားဦးမယ် ပြောတယ်။ ဒါပေမယ့် နောက်တနေ့မှာပဲ ပြန်ရောက်လာပြီးတော့ အကယ်ရ် ဂီးဇီးလ်သာ ရက်အနည်းငယ် သူ့ကို စောင့်ပေးနိုင်မယ်ဆိုရင် ငွေသားချည်းပဲ ဒေါ်လာ၈၀၀၀ ကို တလုံးတခဲတည်း ချေပြီး ဝယ်မယ် ပြောပါတယ်။ ဝေးလ် လုပ်နေတဲ့ အပေးအယူ တခုသာ အလုပ်ဖြစ်ခဲ့တယ်ဆိုရင်ပေါ့။ နားနားနေနေ အလုပ်လုပ်နေတဲ့သူတစ်ယောက်ဖြစ်တဲ့ ပါးနပ်သောဂီးဇီးလ်လို စီးပွားရေးသမားကတောင် ဝေးလ်တစ်ယောက် ဒီလောက်များတဲ့ ငွေပမာဏ (ယခုခေတ်ငွေ ဒေါ်လာတသိန်းခွဲဝန်းကျင်)ကို မြန်မြန်ဆန်ဆန် ဘယ်လိုများ ရှာမယ်ဆိုတာ သိချင်နေရှာသတဲ့။ ဝေးလ်က ပြောဖို့ရန်တွန့်ဆုတ်နေပြီး အကြောင်းအရာကို စကားလွှဲလိုက်ပါတယ်။ သို့ပေမယ့် ဂီးဇီးလ်ကတော့ မရမချင်းကို ဆက်မေးနေတော့တာ။ နောက်ဆုံးတော့ စိတ်ချရလောက်တဲ့ ယုံကြည်မှုရသွားတော့ ဝေးလ်က ဂီးဇီးလ်ကို အောက်ပါဇာတ်လမ်းကို ပြောပြပါတော့တယ်။
ဝေးလ်ရဲ့ဦးလေးက ငွေသန်းပေါင်းများစွာ ချမ်းသာတဲ့ ငွေရှင်တွေဆီမှာ အတွင်းရေးမှူးအဖြစ် အလုပ်လုပ်ပါတယ်။ ဒီလူချမ်းသာတွေသည် လွန်ခဲ့တဲ့ဆယ်နှစ်လောက်က မီချီဂန်မှာ အမဲလိုက် အိမ်လေးတစ်အိမ်ကို ဈေးပေါပေါနဲ့ ဝယ်ခဲ့တယ်။ သူတို့ဟာ ဒီအမဲလိုက်အိမ်လေးကို အသုံးမပြုတာ တော်တော်ကြာပြီ။ ဒါကြောင့် ရောင်းဖို့ရန် ဆုံးဖြတ်ချက်ချလိုက်ပြီး ဝေးလ်ရဲ့ဦးလေးကို သူ ရောင်းပေးနိုင်မလား မေးတယ်။ အကြောင်းကြောင်းတွေကြောင့်ပဲ ဂေးလ်ရဲ့ဦးလေးသည် ဒီလူချမ်းသာတွေကို အငြိုးထားထားတာ နှစ်ချီနေပြီ။ အခု သူတို့ကို လက်တုံ့ပြန်ဖို့ရန် အခွင့်အရေးပဲ။ သူတို့သည် ဒီအိမ်ကို ဒေါ်လာ ၃၅၀၀၀နဲ့ အယောင်ပြရောင်းမယ်။ (ဝေးလ်ရဲ့ အလုပ်က အယောင်ပြဝယ်သူကို ရှာပေးဖို့)သူဌေးတွေက ချမ်းသာလွန်းတဲ့အတွက် ဒီဒေါ်လာ ၃၅၀၀၀လောက်ကို ဈေးကို မှုမှာ မဟုတ်ဘူး။ ထို့နောက် အယောင်ပြသမားသည်ဒီအိမ်ကို ကာလပေါက်ဈေး ဒေါ်လာ ၁၅၅၀၀၀ နဲ့ ရောင်းမှာဖြစ်တယ်။ ဒုတိယမြောက် အရောင်းအဝယ်မှာ ဦးလေးရယ်၊ ဝေးလ်ရယ်၊ အယောင်ပြဝယ်သူရယ်က အကျိုးအမြတ်ကို ခွဲယူကြမှာ ဖြစ်တယ်။ ဒါတွေအားလုံးဟာ တရားနည်းလမ်းကျကျ ဖြစ်ပြီး သူ့ဦးလေးလည်း လက်တုံ့ပြန်ဖို့ အခွင့်ကောင်းပေါ့။
ဂီးဇီးလ်တစ်ယောက် သိသင့်သလောက် သိသွားပြီ။ သူက အယောင်ပြဝယ်သူ လုပ်ပေးချင်တယ်။ ဝေးလ်က သူ့ကိုခေါ်ဖို့ရန် တွန့်ဆုတ်နေတယ်။ ဒါပေမယ့် ဂီးဇီးလ်က နောက်ဆုတ်ပေးမှာ မဟုတ်။ မြိုးမြိုးမြက်မြက်လေးလည်း ရမယ်။ စွန့်စားခန်းလည်းဆန်မယ်။ ဒါက သူ့ကို ပျော်နေစေတယ်။ ဝေးလ်က ရှင်းပြတယ်။ အပေးအယူဖြစ်ဖို့ ဂီးဇီးလ် ဒေါ်လာ ၃၅၀၀၀ကို ငွေသား ပေးရမယ်။ ဂီးဇီးလ်က သူသည် မီလျံနာတစ်ယောက်ဖြစ်တဲ့အတွက် ဒီလောက် ငွေက သူလက်ဖျောက်တချက် တီးရုံနဲ့ ရတယ်လို့ ပြောတယ်။ ဝေးလ်က နောက်ဆုံးတော့ စိတ်ကောင်းဝင်သွားပြီး သူ့ဦးလေး၊ ဂီးဇီးလ်နဲ့ သူဌေးတွေကို ဂေးလ်ဘဒ်၊ အီလီနွိုက်မှာ တွေ့ဆုံဖို့ စီစဥ်ပေးရန် သဘောတူလိုက်တော့တယ်။
ဂေးလ်ဘဒ် သွားတဲ့ရထားပေါ်မှာ ဂီးဇီးလ်က ဦးလေးဆိုသူနဲ့တွေ့ခဲ့တယ်။ စီးပွားရေးကိစ္စတွေကို အကျေတလည် ဆွေးနွေးနိုင်တဲ့ အထင်ကြီးစရာလူတစ်ယောက်ပါပဲ။ ဝေးလ်က နောက်တစ်ယောက် ခေါ်လာသေးတယ်။ ဗိုက်ရွှဲရွှဲနဲ့ ဂျော့ ဂရို့စ်လို့ ခေါ်တဲ့သူတစ်ယောက်။ ဝေးလ်က ဂီးဇီးလ်ကို ပြောပြတယ်။ သူအရင်တုန်းက လက်ဝှေ့နည်းပြ လုပ်ခဲ့ဖူးပြီး ဂရို့စ်သည် သူလေ့ကျင့်ဖူးသမျှထဲမှာ ဆုရဖို့အလားအလာရှိတဲ့ အားကစားသမားတစ်ယောက်။ ဂရိုစ့်ကို ဘော်ဒီ ကျကျနနဖြစ်သွားအောင် သူလုပ်ပေးဖို့ ခေါ်လာတဲ့အကြောင်း။ အလားအလာရှိတဲ့ လက်ဝှေ့သမားတစ်ယောက်အတွက် ဂရိုစ့်ရဲ့ ပုံပန်းသဏ္ဍာန်က အထင်ကြီးစရာ မကောင်းပါဘူး။ ဆံပင်ကဖြူပြီး ဘီယာဗိုက်နဲ့။ ဒါပေမယ့် ဂီးဇီးလ်ဟာ အလုပ်ကိစ္စအတွက်သာ တအားစိတ်လှုပ်ရှားနေတဲ့အတွက် တကယ်တမ်းကျတော့ အဲ့လူရဲ့ ၀၀ဖိုင့်ဖိုင့်သဏ္ဍာန်ကို သတိမမူမိပါဘူး။
ဂေးလ်ဘဒ်ရောက်တော့ ဝေးလ်နဲ့သူ့ဦးလေးက သူဌေးတွေကို သွားကြိုနေတုန်း ဂီးဇီးလ်သည် ချက်ချင်းကိုပဲ လက်ဝှေ့အိတ်စွပ်နေတဲ့ ဂရိုစ့်နဲ့တူတူ ဟိုတယ်မှာ စောင့်နေခဲ့တယ်။ ဂီးဇီးလ်က ကြည့်မိတော့ ဂရိုစ့်က လက်ဝှေ့ရေး စပြပါတော့တယ်။ မိနစ်အနည်းငယ် လေ့ကျင့်ပြီး အသက်ရှုသံ မမှန်တော့တဲ့ လက်ဝှေ့သမားကို ဂီးဇီးလ် လျစ်လျူရှုခဲ့ပါတယ်။ နေရာနည်းနည်းဝေးလို့လည်း မကြားတာဖြစ်မှာ။ ဟန်ရေးပြတာတော့ တကယ့်လက်ဝှေ့သမားအတိုင်းပဲ။ နောက်တစ်နာရီကြာပြီးတော့ ဝေးလ်နဲ့ သူ့ဦးလေးက သူဌေးတွေနဲ့အတူ ရောက်လာခဲ့ပါတယ်။ လှတပတ ဝတ်စားထားတဲ့ အားကြိုးမာန်တက် ပြောဆိုလာကြပြီး အထင်ကြီးစရာကောင်းတဲ့ လူတသိုက်ပါပဲ။ တွေ့ဆုံပွဲကတော့ အဆင်ပြေပြေနဲ့ ပြီးစီးသွားတယ်။ သူဌေးတွေက ဂီးဇီးလ်ကို ဒေါ်လာ ၃၅၀၀၀နဲ့ ရောင်းဖို့ သဘောတူလိုက်တယ်။ ဘဏ်ကိုသွင်းဖို့တောင် အဆင်သင့်ပဲ။
အလုပ်သေးလေးကတော့ ပြီးသွားပြီ။ သူဌေးတွေက ထိုင်ခုံမှာထိုင်ပြီး ငွေရေးကြေးရေးအကြောင်း ဆွေးနွေးနေပြီး “ဂျေပီမောဂန်” ဆိုတဲ့ လူနာမည်ကို သူတို့အချင်းချင်း ရင်းနှီးသယောင် ပြောဆိုနေကြလေရဲ့။ နောက်ဆုံးတော့ သူတို့ထဲကတစ်ယောက်က ထောင့်မှာရှိနေတဲ့ လက်ဝှေ့သမားကို တွေ့သွားတယ်။ သူဌေးက သူ့အသိထဲမှာလည်း လက်ဝှေ့သမားတစ်ယောက် ရှိကြောင်း ပြောတယ်။ ဝေးလ်က ကျယ်ကျယ်လောင်လောင် ရယ်ပြီး သူ့လူက သူဌေးရဲ့လက်ဝှေ့သမားကို အလွယ်လေး အလဲထိုးနိုင်ကြောင်း ပြောတယ်။ စကားပြောဆိုနေကြရင်းကနေ အခြေအတင်တွေ ဖြစ်လာကြတယ်။ အရှိန်ပိုပြင်းသွားအောင် ဝေးလ်က သူဌေးတွေကို လောင်းမလား မေးတယ်။ သူဌေးတွေကလည်း လောင်းမယ် သဘောတူပြီး မနက်ဖြန် တပွဲထိုးသတ်ရန်အတွက် သူတို့လူကို အဆင်သင့်လုပ်ခိုင်းဖို့ ထွက်သွားကြတယ်။
သူတို့ထွက်သွားပြီးပြီးချင်းမှာပဲ ဂီးဇီးလ်ရှေ့မှာတင် ဦးလေးက ဝေးလ်ကို ဆူတယ်။ သူတို့ဆီမှာ လောင်းဖို့ ပိုက်ဆံ မရှိဘူး။ ဒါကို သူဌေးတွေ သိသွားတာနဲ့ ဝေးလ်ဦးလေးက အလုပ်ပြုတ်မှာ။ သူ့ကိုပဲ ဒီအရှုပ်ထုပ်ထဲ ဆွဲသွင်းမိတဲ့အတွက် ဝေးလ်က သူ့ဦးလေးကို တောင်းပန်တယ်။ သို့ပေမယ့် သူ့မှာ အစီအစဥ◌် ရှိတယ်။ သူက ဟိုဘက်က လက်ဝှေ့သမားကို ကောင်းကောင်းသိတယ်။ သူ့ကို လာဘ်နည်းနည်းထိုးလိုက်တာနဲ့ သူတို့ ပွဲကို ထိန်းလို့ရတယ်။ သို့ပေမယ့် လောင်းဖို့ငွေက ဘယ်ကရမှာလဲ လို့ ဦးလေးက ပြန်မေးတယ်။ ငွေမရှိရင် အလကားပဲလေ။ ဂေးလ်လည်း ကြားသင့်သလောက် ကြားပြီးပြီ။ သူ့အပေးအယူကို ဘယ်လိုမှ မကောင်းတဲ့ကိစ္စကြောင့်နဲ့မှ အထိအခိုက် မခံချင်တဲ့အတွက် သူ့ပိုက်ဆံ ဒေါ်လာ၃၅၀၀၀ကို လောင်းကြေးအတွက် သုံးဖို့ ပြောတယ်။ အကယ်ရ် သူရှုံးသွားရင်တောင်မှ အိမ်ရောင်းရငွေထဲကနေ အမြတ်တွေအများကြီး ကျန်သေးတယ်လေ။ တူဝရီးတွေက သူ့ကို ကျေးဇူးတင်ကြတယ်။ သူတို့နှစ်ယောက်ရဲ့ ဒေါ်လာ၁၅၀၀၀နဲ့ ဂီးဇီးလ်ရဲ့ ဒေါ်လာ ၃၅၀၀၀နဲ့ဆို လောင်းကြေးထပ်ဖို့ အဆင်ပြေသွားပြီ။ အဲဒီညနေက လက်ဝှေ့သမားနှစ်ယောက် အစမ်းထိုးနေကြတာကို ဟိုတယ်ခန်းထဲမှာ ဂီးဇီးလ်ကြည့်နေတုန်း သူ့စိတ်က မနက်ဖြန် လက်ဝှေ့ပွဲက နိုင်မယ့်ပိုက်ဆံရယ်၊ အိမ်ရောင်းရငွေက ရမယ့် ပိုက်ဆံကိုသာ တွက်နေလေရဲ့။
ထိုးပွဲက နောက်တစ်နေ့ အားကစားခန်းမထဲမှာ ပြုလုပ်မှာ ဖြစ်တယ်။ ဝေးလ်က ငွေတွေကို သော့ခတ်ထားတဲ့သေတ္တာထဲမှာ ထည့်သိမ်းထားလိုက်တယ်။ အားလုံးက ဟိုတယ်ခန်းထဲမှာ ပြင်ဆင်ထားသလို အဆင်ပြေပုံပဲ။ သူဌေးတွေကတော့ သူတို့လက်ဝှေ့သမား ထိုးနေပုံကို ကြည့်ပြီး စိတ်ညစ်နေကြတယ်။ ဂီးဇီးလ်ကတော့ လွယ်လွယ်ကလေးရမယ့် ပိုက်ဆံကို စိတ်ကူးယဥ◌်နေလေရဲ့။ ထို့နောက် ရုတ်တရက်ကြီး သူဌေးတွေရဲ့ လက်ဝှေ့သမားက ထိုးလိုက်တဲ့ လက်သီးက ဂရိုစ့်ရဲ့မျက်နှာကို သွားထိပြီး သူလဲကျသွားတယ်။ သူလည်း မြေပေါ်ကျကော ပါးစပ်က သွေးတွေပန်းထွက်လာတယ်။ သူ ချောင်းဆိုးပြီး ငြိမ်ကျသွားကော။ သူဌေးတွေထဲက တစ်ယောက်ဖြစ်တဲ့ အရင်က ဆရာဝန်လုပ်ဖူးတဲ့ သူတယောက်က သူ့သွေးခုန်နှုန်းကို စမ်းကြည့်တယ်။ သူ သေသွားပြီ။ မီလျံနာတွေက လန့်ဖြန့်ကုန်ပြီ။ ရဲတွေ ရောက်မလာခင် သူတို့အားလုံး နေရာကနေ အမြန်ထွက်သွားကြတယ်။ မဟုတ်ရင် သူတို့အားလုံး လူသတ်မှုနဲ့ တရားစွဲခံရလိမ့်မယ်။
ဂီးဇီးလ်လည်း အလန့်တကြား အားကစားခန်းမထဲက သုတ်ချေတင်ထွက်ပြီး ချီကာဂိုကို ပြန်လာခဲ့တယ်။ သူ့ပိုက်ဆံ ၃၅၀၀၀ တော့ ကျန်ခဲ့လေရဲ့။ လူသတ်မှုထဲ ပါတာထက်စာရင် ဒါက အသေးအဖွဲ ပေးဆပ်ရတဲ့ သဘောမျိုး ထားလိုက်တာနဲ့ တူပါတယ်။ သူသည် ဝေးလ်ကော တခြားသောသူတွေကိုပါ ထပ်မတွေ့ချင်တော့ဘူး။
ဂီးဇီးလ်လည်း ပြေးထွက်သွားပြီးကော ဂရိုစ့်တစ်ယောက်လည်း အေးဆေး မတ်တပ်ထရပ်တယ်။ သူ့ပါးစပ်က ပန်းထွက်လာသော သွေးတွေသည် သူ့ပါးစောင်ထဲမှာ ဖွက်ထားတဲ့ ကြက်သွေးနဲ့ ရေပူတွေဖြည့်ထားတဲ့ ဘောလုံးလေးထဲက ထွက်လာတာ။ ဒီကိစ္စကြီးတခုလုံးကို စီမံတာကတော့ အဝါရောင်ကလေး လို့ လူသိများတဲ့ ဝေးလ်ပဲ ဖြစ်ပါတယ်။ သမိုင်းတလျှောက်မှာ အလိမ်ဇာတ်လမ်းတွေ အထွင်နိုင်ဆုံး သူတယောက်ပါ။ ဝေးလ်သည် တခြားသော လူလိမ်တွေဖြစ်တဲ့ သူဌေးအယောင်ဆောင်သူတွေနဲ့ လက်ဝှေ့သမားတွေနဲ့အတူ ဒေါ်လာ ၃၅၀၀၀ ခွဲဝေယူကြတယ်။ ရက်အနည်းငယ်နဲ့ မြိုးမြိုးမြက်မြက် ရသွားတာပေါ့။
ရှင်းလင်းချက်
အဝါရောင်ကလေးသည် သူ အလိမ်ဇာတ်လမ်းမခင်းခင် သားကောင် ဂီးဇီးလ်ကို သေချာစောင့်ကြည့်လေ့လာခဲ့တယ်။ အလိမ်လက်ဝှေ့ထိုးပွဲကသာ ဂီးဇီးလ်ကို သူ့ပိုက်ဆံတွေဆီက မြန်မြန်ခွာထုတ်ဖို့ အကောင်းဆုံး လိမ်ညာမှုဖြစ်မယ်လို့ သူ သိခဲ့တယ်။ ဒါပေမယ့်လည်း လက်ဝှေ့ထိုးပွဲကိစ္စကို တည့်တိုးကြီးသွားပြောရင် ဂီးဇီးလ်က ငြင်းဆန်လိမ့်မယ်ဆိုတာလည်း သူသိတယ်။ ဒါကြောင့် သူ့ဦးတည်ချက်ကို ဖုံးကွယ်ပြီး အာရုံစိုက်မှု လွဲစေရန် အမဲလိုက်အိမ်ရောင်းမယ့်ကိစ္စနဲ့ မီးခိုးမှိုင်း တိုက်လိုက်တယ်။
ရထားစီးတဲ့တလျှောက်ကော ဟိုတယ်ခန်းထဲမှာကော ဂီးဇီးလ်ရဲ့စိတ်ဟာ အပေးအယူ အဆင်ပြေပြေ ဖြစ်မြောက်သွားဖို့၊ ပိုက်ဆံ လွယ်လွယ်ရဖို့၊ ချမ်းသာတဲ့သူတွေနဲ့ တရင်းတနှီးနေဖို့သာ စိုးမိုးနေတယ်။ ဂရို့စ်သည် ပုံပန်းမကျဖြစ်ကာ သတ်လတ်ပိုင်းအရွယ်လောက်ဖြစ်မှ အဆင်ပြေမယ်ဆိုတာကို သူ သတိမထားမိခဲ့ဘူး။ စီးပွားရေးလုပ်ငန်းနဲ့ လက်ဝှေ့ပွဲအတွက်သာ စိတ်အာရုံရောက်နေပြီး ဂရိုစ့်ကို အသေးစိတ်လေ့လာဖို့ရန်ကတော့ တအားကို နောက်ကျသွားပြီ။ ပြိုင်ပွဲက ကစားသမားရဲ့အခြေအနေထက်စာရင် လာဘ်ထိုးမှုပေါ် မူတည်နေတာလည်း ပါပါလိမ့်မယ်။ လက်ဝှေ့သမားသေသယောင် ဖြစ်စေမှုက ဂီးဇီးလ်အား သူ့ပိုက်ဆံတွေအားလုံးကို မေ့ကျန်ခဲ့စေတဲ့အထိ သူဟာ လက်တွေ့ဘဝနဲ့ ကွာဟခဲ့တယ်။
အဝါရောင်ကလေးဆီကနေ သင်ယူကြပါ။ အကျွမ်းတဝင်ရှိပြီး သိသာမှုမရှိတဲ့ရှေ့တန်းက အပြည့်စုံဆုံး မီးခိုးမှိုင်းပါပဲ။ သာမန်လို့ထင်ရတဲ့ အကြံအစည်တခုနဲ့ သင့်ဦးတည်ရာဖြစ်တဲ့ စီးပွားရေး အပေးအယူ၊ ငွေကြေးအကြံအစည်ကို ချဥ်းကပ်ပါ။ သားကောင်ရဲ့စိတ်ဟာ တခြားအာရုံရောက်နေမှာြဖစ်ပြီး သံသယတွေလည်း ဖြစ်ပေါ်လာမှာ မဟုတ်တော့ဘူး။ ဒါက သင် သူ့ကို ဒုတိယလမ်းကြောင်းပေါ် တဖြည်းဖြည်းချင်း တွန်းတင်ပေးခြင်းဖြစ်ပြီး လျှောကျပြီဆိုတာနဲ့ သင့်ထောင်ချောက်ထဲ ကူကယ်ရာမဲ့ ကျရောက်သွားမှာ ဖြစ်ပါတယ်။
14/11/2021
ဥပဒေသ(၃)
သင် အလိုရှိရာကို ဖုံးကွယ်ထားပါ။
အပိုင်း (၁)
ဆယ့်ခုနစ်ရာစုနှစ်အတွင်း ပြင်သစ်ပြည်တွင် နာမည်အကျော်ကြားဆုံးသော အထက်တန်းစားပြည့်တန်ဆာမယ် နီနွန် ဒယ် လစ်ကလိုဆိုသူ ရှိလေသည်။ လွန်ခဲ့သော အပတ်တော်တော်များများက သူမသည် မာကွီး ဒယ် ဆစ်ဗီးလ် ဆိုသူ လူငယ်လေးတစ်ယောက်က လှပပြီး အနားကပ်ရန်ခက်ခဲသော မြို့စားအမျိုးသမီးလေးတယောက်အား လိုက်လံပိုးပန်းမှုအကြောင်း ပြောပြနေသည်ကို စိတ်ရှည်စွာ နားထောင်ပေးပါတယ်။ ထိုအချိန်တွင် နီနွန်သည် အသက်ခြောက်ဆယ့်နှစ်နှစ် ရှိနေပြီဖြစ်ကား အသက်နှစ်ဆယ့်နှစ်နှစ်အရွယ် ချောမောခန့်ညားပြီး တဇွတ်ထိုးဆန်ကာ ချစ်မှုရေးရာတွင် အတွေ့အကြုံမရှိဖြစ်နေသော လူငယ်ကလေး မာကွီးထက်တော့ ချစ်ခြင်းမေတ္တာတွင် အတွေ့အကြုံ ရှိတဲ့သူ ဖြစ်ပါတယ်။ ပထမတော့ နီနွန်သည် မာကွီးပြောပြသော သူ့အလွဲတွေအကြောင်း နားထောင်ပြီး သဘောတွေ့နေလေရဲ့။ သို့ပေမယ့် နောက်ဆုံးမှာတော့ သူမ သဘော မတွေ့နိုင်တော့ပါဘူး။ အမျိုးသမီးတယောက်ကို ချဥ◌်းကပ်သည့် တကယ့်အခြေအနေတွေမှာ မကျွမ်းကျင်မလိမ္မာမှုတွေကို
သည်းမခံနိုင်တော့တဲ့အဆုံး လူငယ်လေးကို သူမ အုပ်ထိန်းပြီး သင်ကြားပေးဖို့ကို ဆုံးဖြတ်လိုက်ပါတယ်။
ပထမဆုံး လူငယ်လေးသည် ဒီအရာကို စစ်ပွဲလို သဘောထားရမည်။ ထိုလှပသောမြို့စားအမျိုးသမီးလေးကတော့ တခြားသော စစ်သူကြီးများလို သူ သေချာဂရုစိုက် ဝန်းရံတိုက်ခိုက်ရမည့် ခံတပ်ရဲတိုက်ကြီးပေါ့။ အဆင့်တဆင့်ချင်းစီကို အစီအစဥ◌်ဆွဲပြီး အသေးစိတ် ဂရုစိုက် ပြင်ဆင်ပြီး လုပ်ဆောင်ရမှာ ဖြစ်ပါတယ်။
မာကွီးကို စစချင်း အကြံပေးတာကတော့ မြို့စားအမျိုးသမီးလေးအား အကွာအဝေးတစ်ခုကနေ သိပ်အရေးမပေးသလို ချဥ◌်းကပ်ဖို့ပါပဲ။ နောက်များမှာတော့ သူတို့နှစ်ယောက်တည်းရှိတဲ့အခါ သူသည် မြို့စားအမျိုးသမီးလေးအား မိတ်ဆွေကဲ့သို့ ခင်မင်လိုကြောင်း ချစ်သူ ဖြစ်လို၍ မဟုတ်ကြောင်းကို အယုံသွင်းစေပါတယ်။ ဒါကတော့ သူမကို စိတ်ဒွိဟ ဖြစ်စေဖို့ပါ။ မြို့စားအမျိုးသမီးလေးက လူငယ်လေး၏ စိတ်ဝင်စားတဲ့သူ တစ်ယောက် မဟုတ်ဘူးဆိုတာပါ။ သူက ခင်မင်ဖို့သက်သက်ကိုသာ စိတ်ဝင်စားတာပေါ့လေ။
နီနွန် ဆက်လက် စီစဥ◌်ပါတယ်။ မြို့စားအမျိုးသမီးလေးက စိတ်မရေမရာ ဖြစ်နေချိန်မှာ သူမကို မနာလိုသဝန်တိုအောင် လုပ်ဖို့ပါပဲ။ ပါရီမြို့က အထင်ကရ ပွဲတော်ကြီးတခုမှာ နောက်တခါထပ်ဆုံတော့ မာကွီးက တခြားသော ငယ်ရွယ်ချောမောလှပတဲ့ အမျိုးသမီးလေးကို သူ့ဘေးမှာ ခေါ်ဆောင်လာခြင်းပဲ ဖြစ်ပါတယ်။ ထိုငယ်ရွယ်ချောမောလှပသော အမျိုးသမီးလေးမှာ နောက်ထပ် သူငယ်ချင်းချောချောလေးတွေ ပါလေတော့ ပါရီမြို့မှာ မာကွီးကို အလှဆုံး မိန်းမချောလေးတွေ ဝိုင်းနေတာကို မြို့စားအမျိုးသမီးလေးက တွေ့မြင်ရမှာပါ။ သူမသည် မနာလိုဖြစ်ရုံမျှမက မာကွီးအား ပျိုတိုင်းကြိုက်တဲ့နှင်းဆီခိုင် အဖြစ်ပါ ထင်စေပါတယ်။ နီနွန်ကတော့ မာကွီးတစ်ယောက် နားလည်ဖို့ကို တော်တော်ရှင်းပြရပါတယ်။ သူမ စိတ်ရှည်လက်ရှည် ရှင်းပြတယ်။ အမျိုးသမီးတွေက ကိုယ် စိတ်ဝင်စားတဲ့ အမျိုးသားတစ်ယောက်ကို တခြားသောအမျိုးသမီးတွေကပါ စိတ်ဝင်စားတာကို မြင်ချင်တာပါ။ ထိုသို့ လုပ်ခြင်းသည် အမျိုးသားအပေါ် တန်ဖိုးထားစေပြီး တခြားသော ရွေးစရာတွေထဲမှ သူ့ကိုပဲ ခြေမြန်လက်မြန် ဆွဲယူရခြင်းသည် ပိုစိတ်ကျေနပ်စရာကောင်းလို့ပါပဲ။
မြို့စားအမျိုးသမီးလေး မနာလိုဝန်တိုသည်နှင့် အကြံအစည်ကို ဆက်လက်လုပ်ဆောင်ပါတယ်။ အခုကတော့ သူမကို စနိုးစနောင့် လုပ်ရမယ့် အချိန်ပါ။ နီနွန်ရဲ့ ညွှန်ကြားချက်တွေအတိုင်း မာကွီးသည် မြို့စားအမျိုးသမီးလေး သူ့အားလာစေချင်သည့် ပွဲတွေကို မတက်ရောက်ပါဘူး။ နောက်တော့ မြို့စားအမျိုးသမီး မကြာခဏ လာတတ်သည့် နေရာများသို့ သူအရင်က မလာဖူးပေမယ့်လည်း ရုတ်တရက်ဆိုသလို ရောက်ချလာတတ်ပါတယ်။ သူမကတော့ သူ့ရဲ့ လှုပ်ရှားမှုတွေကို မခန့်မှန်းတတ်အောင် ဖြစ်နေပါပြီ။ ထိုအရာအားလုံးသည် သူမအား စိတ်ပိုင်းဆိုင်ရာ ဒွိဟဖြစ်စေသည့် အခြေအနေသို့ တွန်းပို့စေကာ အောင်မြင်သော ညှို့ယူဖမ်းစားချက် ဖြစ်စေဖို့ ကြိုတင်လုပ်ဆောင်ထားချက်တွေပဲ ဖြစ်ပါတယ်။
တကွက်ပြီး တကွက် ရွှေ့တာတွေက အချိန်အပတ်အချို့ ကုန်သွားပါတယ်။ နီနွန်က မာကွီးရဲ့ တိုးတက်မှုကို ထိန်းချုပ်ပေးပါတယ်။ မြို့စားအမျိုုးသမီးလေးက ကောင်လေးပြောသမျှ ဟာသတွေကို ရယ်မောတာတွေ၊ ပြောြပတဲ့အကြောင်းအရာတွေကို အလေးပေးနားထောင်တာတွေကို နီနွန်ရဲ့ အထောက်တော်ကွန်ရက်ကနေတစ်ဆင့် သိရလေရဲ့။ ကောင်လေးအကြောင်းလည်း ရုတ်တရက်ဆိုသလို မေးတာတွေလည်း ရှိတယ်ဆိုတာ ကြားသိခဲ့ရတယ်။ တွေ့ဆုံပွဲတွေမှာလည်း မာကွီးကို ရှာပြီး သူ့နောက်က လိုက်နေလေရဲ့။ ကောင်လေးရဲ့ညှို့ချက်အောက်မှာ ကောင်မလေးတစ်ယောက် ရုန်းထွက်မရနိုင် ဖြစ်နေပြီဆိုတာ နီနွန်က သေချာပေါက် သိနေပြီ။ အခုတော့ အပတ်ပေါင်းများစွာကုန်လို့ တလ နှစ်လတောင် ရှိရောပေါ့။ သို့ပေမယ့် အကုန်လုံးသာ ချောချောမွေ့မွေ့ အဆင်ပြေရင် ရဲတိုက်ကြီးလည်း ကျတော့မယ်။
နောက်ရက်အနည်းငယ်အကြာမှာ မာကွီးတစ်ယောက် မြို့စားအမျိုးသမီးအိမ်မှာ သူတို့နှစ်ယောက်တည်း ရှိနေပါတယ်။ ရုတ်တရက်ဆိုသလို သူဟာ အခြားသူတစ်ယောက် ဖြစ်သွားတယ်။ နီနွန်ရဲ့ ညွှန်ကြားချက်များကို မလိုက်နာဘဲ သူ့သဘောနဲ့သူ မြို့စားအမျိုးသမီးလက်ကို ကိုင်ကာ သူမကို ချစ်နေကြောင်း ပြောြပလိုက်တော့တယ်။ အမျိုးသမီးလေးဟာ စိတ်ရှုပ်ထွေးသွားပုံ ရတယ်။ သူ မမျှော်လင့်ထားတဲ့ တုံ့ပြန်မှုမျိုး။ သူမက ယဥ◌်ကျေးစွာနဲ့ပဲ ဆိတ်ဆိတ်နေလိုက်တော့တယ်။ ကျန်ရှိတဲ့ ညနေခင်းတစ်လျှောက်ကိုတော့ သူနဲ့ အကြည့်ချင်းရှောင်ပြီး သူ့ကို ကောင်းသောညပါ လို့တောင် မနှုတ်ဆက်တော့ဘူး။ သူနောက်အခါများမှာ သွားရောက်လည်ပတ်တိုင်းလည်း သူမ အိမ်မှာ မရှိဘူးလို့ပဲ အကြောင်းပြန်ကြားတယ်။ နောက်ဆုံး သူမဟာ ပြန်လည် လက်ခံတွေ့ဆုံချိန်မှာတော့ နှစ်ယောက်စလုံး ရှိုးတို့ရှန်းတန်းဖြစ်ပြီး နေရထိုင်ရ အဆင်မပြေတော့ဘူး။ ညှို့စားချက်ကတော့ ပျက်ပြယ်သွားလေပြီ။
ရှင်းလင်းချက်
နီနွန် ဒယ် လစ်ကလို့စ်သည် ချစ်ခြင်းမေတ္တာနဲ့ ပတ်သတ်ပြီး အရာအားလုံး သိသူဖြစ်တယ်။ သူမရဲ့ ချစ်သူတွေက ထိုအချိန်ကာလက အတော်ဆုံးသော စာရေးသူ၊ တွေးခေါ်သူ၊ နိုင်ငံရေးသမားတွေ ဖြစ်ကြတယ်။ ညှို့ယူဖမ်းစားတယ်ဆိုတာ သူမအတွက်တော့ ကစားနည်းတစ်ခုပါပဲ။ ကျွမ်းကျင်မှုနဲ့ လေ့ကျင့်ရတဲ့အရာ။ သူမ အသက်အရွယ်ရလာတော့ သူမရဲ့ ကျော်ဇော်မှုကလည်း ကြီးထွားလာခဲ့တယ်။ ပြင်သစ်နိုင်ငံက အရေးပါအရာရောက်မိသားစုတွေဟာ သူတို့သားတွေကို အချစ်နဲ့ပတ်သတ်ပြီး သင်ကြားဖို့ကို သူမဆီ ပို့ဆောင်ပေးတယ်။
အမျိုးသားနဲ့ အမျိုးသမီးဟာ အတော့်ကို ကွဲပြားတယ်ဆိုတာ နီနွန် သိတယ်။ ဒါပေမယ့် ညှို့ယူဖမ်းစားခံရတယ်ဆိုရင် သူတို့ဟာ တူတူပါပဲ။ အတွင်းထဲမှာတော့ သူတို့ အညှို့ခံနေရတယ်ဆိုတာကို သိတယ်။ သို့ပေမယ့် သူတို့ ဦးဆောင်ခံရတဲ့ ခံစားချက်ကို သဘောကျကြလို့ မသိမသာ နေတဲ့သဘော။ တခြားသောသူက ထူးဆန်းတဲ့ကမ္ဘာသို့ သူတို့အား ခေါ်ဆောင်သွားတာကို ပျော်မွေ့နေကြတယ်။ ညှို့ယူဖမ်းစားမှုက အခရာပါပဲ။ သို့ပေမယ့် အကြံဥာဏ်ပေါ်လည်း မူတည်သေးတယ်။ သင်၏ ဦးတည်ချက်ကို ကြေညာလို့အဆင်မပြေသလို စကားလုံးတွေနဲ့ တိုက်ရိုက်ဖော်ပြလို့လည်း မရပါဘူး။ အဲ့အစား သင့်ပစ်မှတ်တွေကို မသိသာအောင် လုပ်ထားရမယ်။ သူတို့ ကျရှုံးဖို့ရန်အတွက် သူတို့ လုံးဝကို စိတ်ဒွိဟဖြစ်နေမှ ရမယ်။ သင့်သကေတတွေကို ရောထွေးအောင် ထားရမယ်။ တခြားတစ်ယောက်အပေါ်မှာ စိတ်ဝင်စားချင်ယောင်ဆောင် (ထောင်ချောက်)။ ပစ်မှတ်အပေါ်မှာ စိတ်ဝင်စားပုံ ရှိတယ်ဆိုတာလည်း သဲလွန်စပေး၊ သူ့အပေါ် သာမန်ကာလျှံကာ ဆက်ဆံရေးရှိတဲ့ပုံ ဟန်ဆောင်။ ဒီလိုပုံစံမျိုးဟာ ဒွိဟ ဖြစ်စေရုံတင်သာမက သူတို့ကိုလည်း စိတ်လှုပ်ရှားစေပါတယ်။
ဒီပုံပြင်ကို မြို့စားအမျိုးသမီးလေး ရှုထောင့်က ကြည့်ရအောင်။ မာကွီးရဲ့ အကွက်ရွှေ့မှု အတော်များများ အပြီးမှာ သူမတစ်ယောက် မာကွီးသည် ကစားနည်းတခုကို ကစားနေတယ်ဆိုတာ သူမ ခံစားမိတယ်။ ဒါပေမယ့် ဒီကစားနည်းဟာ သူမကို ပျော်ရွှင်စေတယ်။ သူက သူမကို ဘယ်ခေါ်ဆောင်နေတယ်ဆိုတာ သူမ မသိ။ သူ့ရွှေ့ကွက်တွေဟာ သူမကို စိတ်ဝင်စားစေတယ်။ တခုချင်းဆီကနေ နောက်တကွက်ကို စောင့်မျှော်နေစေတယ်။ သူမ၏ သဝန်တိုမှုနဲ့ စိတ်ရှုပ်ထွေးမှုကိုတောင်မှ သူမ ကျေနပ်နေမိတယ်။ တခါတရံကျတော့ လုံခြုံစိတ်ချမှုရဲ့ ငြီးငွေ့ခြင်းထက် စိတ်ခံစားမှုတခုခုက ပိုကောင်းတယ်လေ။ မာကွီးသည်လည်း အမျိုးသားအများစုလို ကွယ်ဝှက်ထားတဲ့ ရွှေ့ကွက်တွေ ရှိမှာပဲ။ ဒါပေမယ့် သူမက စိတ်ပါလက်ပါနဲ့ကို စောင့်ကြည့်နေတာ။ စောင့်ကြည့်နေတယ်ဆိုတာကလည်း သူဘာများ ဆက်လုပ်ဦးမလဲဆိုတာ ဖြစ်ကောင်းဖြစ်နိုင်ပါတယ်။
မာကွီးက သူကျရှုံးစေနိုင်လောက်သော စကားလုံးဖြစ်တဲ့ ချစ်တယ်ဆိုတဲ့ အရာကို ပြောထွက်လိုက်မိချိန်မှာတော့ အရာရာဟာ ပြောင်းလဲသွားခဲ့ပါပြီ။ အကွက်ထပ်ရွှေ့လို့ရတဲ့ ကစားနည်းမဟုတ်တော့ပါဘူး။ သူ့၏ ရည်ရွယ်ချက် ပေါ်သွားပြီ။ သူက သူမကို ပိုးပန်းနေတဲ့အကြောင်း။ ဒါက သူ လုပ်ဆောင်ခဲ့သမျှအရာအားလုံးကို မီးမောင်းထိုးပြလိုက်သလိုပဲ။ အရင်က ချစ်ခင်နှစ်သက်ဖွယ်ရာတွေက အခုတော့ ရုပ်ပျက်ဆင်းပျက်ဖြစ်ပြီး ဒုက္ခရောက်စေခဲ့ပြီ။ မြို့စားအမျိုးသမီးလေးသည် ရှက်ရွံ့ပြီး အသုံးချခံရတယ်လို့ ခံစားနေရတယ်။ ဘယ်သောအခါမျှ ပြန်လည်ဖွင့်ပေးမှာ မဟုတ်တော့တဲ့ ပိတ်သွားတဲ့တံခါးတချပ် ဖြစ်သွားပါပြီ။
လှည့်စားမှု မရှိဘူးဆိုရင် နေလို့မဖြစ်နိုင်တဲ့ ယနေ့လို ခေတ်ကြီးထဲမှာတောင် လှည့်စားမခံပါနှင့်။
လှည့်စားမှုနှင့်တူသောအရာ ဖုံးအုပ်ထားသော သင်၏ အကောင်းဆုံးသော ပညာသားပါပါ လိမ်လည်မှု ဖြစ်ပါစေ။
ဘောတစာ ဂရာဆီယမ်
13/11/2021
ဥပဒေသ ၂.၂
ရန်သူကို အသုံးချနည်း သင်ယူပါ။
ဟန်မင်းဆက် ပြုတ်ကျပြီးနောက် ရာစုနှစ်များတွင် တရုတ်နိုင်ငံသည် တဗိုလ်တက် တဗိုလ်ဆင်း သွေးချောင်းစီးမှုပုံစံဖြင့် တည်ရှိနေခဲ့သည်။ ရဲမက်တွေသည် ပျော့ညံ့သော ဧကရာဇ်ဘုရင်ကို လုပ်ကြံမည်။ ထို့နောက် အင်အားကြီးသော စစ်သူကြီးက နဂါးထီးနန်းကို အစားထိုး ဝင်ရောက်အုပ်ချုပ်စိုးစံမည်။ စစ်သူကြီးသည် မင်းဆက်အသစ်ကို စတင်တည်ထောင်ကာ သူ့ကိုယ်သူ ဧကရာဇ်ဘုရင်အဖြစ် သရဖူဆောင်းမည်။ သူ့ ဆက်လက်ရှင်သန်မှုအတွက် သူ့နောက်လိုက် စစ်သူကြီးအချို့ကို သတ်မည်။ နောက်နှစ်အနည်းငယ်ကြာပြီးနောက် ထိုကဲ့သို့သော အဖြစ်မျိုး ထပ်မံဖြစ်ပေါ်လာမည်။ တရုတ်ပြည်၏ တပါးတည်းသော ဧကရာဇ်ဖြစ်ဖို့ရာကတော့ ဝန်းရံနေသော ရန်သူအနည်းငယ်သည် ဩဇာအာဏာအနည်းဆုံ ဖြစ်နေရမည်ဖြစ်ပြီး တိုင်းပြည်၏ လုံခြုံမှုအနည်းဆုံးနေရာသို့ ပို့ထားရမည်သာ ဖြစ်သည်။
အေဒီ၉၅၉တွင် စစ်သူကြီးချောင်ကောင်းရင်သည် ဧကရာဇ်ဆန် ဖြစ်လာသည်။ သူသည် ပြသာနာများကို သိသည်။ ဖြစ်နိုင်ချေကတော့ တစ်နှစ် သို့မဟုတ် နှစ်နှစ်အတွင်း သူ လုပ်ကြံခံရနိုင်သည်။ ဒီဖြစ်နေကျပုံစံကို သူ ဘယ်လိုချိုးဖျက်ရမလဲ။ သူ ဧကရာဇ်ဖြစ်ပြီး မကြာခင်မှာပဲ ဧကရာဇ်ဆန်က မင်းဆက်အသစ်ကို စတင်တည်ထောင်ခြင်း အထိမ်းအမှတ်အဖြစ် စားသောက်ပွဲကြီး တည်ခင်းဧည့်ခံရန် အမိန့်ချမှတ်လိုက်တာ စစ်တပ်ထဲမှ အာဏာအပြင်းထန်ဆုံး ဗိုလ်ချုပ်တွေကို ဖိတ်ကြားလိုက်တယ်။ သူတို့ ဝိုင်သောက်ကြတော့ သူဟာ အစောင့်တွေကို ဖယ်ရှားစေလိုက်ပြီး ဗိုလ်ချုပ်တွေချည်းသာလျှင် ကျန်နေစေတယ်။ သူ တချက်ထဲနဲ့ လုပ်ကြံခံရမှာ စိုးရွံ့ကောင်း စိုးရွံ့နေမယ်။ အဲ့ဒီအစား သူက သူတို့ကို ပြောတယ်။ “တရက်လုံး အကြောက်တရားနဲ့ ငါကိုယ်တော် ရှင်သန်နေရတယ်။ စားပွဲမှာကော အိပ်ရာထဲမှာကော ငါကိုယ်တော် စိတ်မလုံဘူး။ သင်တို့ထဲက ဘယ်သူများ ထီးနန်းကို မျှော်မှန်းနေသူ မရှိဘဲနေမလဲ။ သင်တို့ရဲ့ သစ္စာစောင့်သိမှုကို ငါကိုယ်တော် သံသယ မဝင်ပါဘူး။ ဒါပေမယ့်လည်း အကယ်ရ် အခြေအနေကြုံကြိုက်လာခဲ့လို့ ချမ်းသာကြွယ်ဝမှုနဲ့ ရာထူးကို မက်မောတဲ့ သင်တို့ရဲ့ လက်အောက်ငယ်သား တစ်ယောက်ယောက်က သင်တို့ကို အဝါရောင်ဧကရာဇ်ဝတ်ရုံကို ဝတ်ဆင်ဖို့ အတင်းတိုက်တွန်းလာခဲ့ရင်တော့ သင်တို့လည်း ဘယ်ပုံဘယ်နည်းနဲ့မှ ငြင်းရက်နိုင်မှာ မဟုတ်ဘူး။” အရက်မူးပြီး သူတို့အသက်အတွက် စိုးရိမ်နေကြသော စစ်သူကြီးများက သူတို့သည် ဘာအပြစ်မှ မလုပ်ပဲ သစ္စာစောင့်သိပါ့မယ်လို့ ပြောကြတယ်။ ဒါပေမယ့် ဧကရာဇ်ဆန်မှာတော့ တခြားအကြံတွေ ရှိနေပါတယ်။ ဥစ္စာဓနနဲ့ ဂုဏ်ထူးဂုဏ်ရှိန်တွေကို ခံစားပြီး နေ့ရက်တိုင်းကို အေးအေးချမ်းချမ်း ဖြတ်သန်းသွားဖို့ အကောင်းဆုံးနည်း ရှိပါတယ်။ “အကယ်ရ် သင်တို့သာ သင်တို့ရဲ့ လုပ်ပိုင်ခွင့်တွေကို စွန့်လွှတ်မယ်ဆိုရင် ငါကိုယ်တော်က သင်တို့ကို သင်တို့ဆန္ဒရှိသလောက် အဆိုတော်တွေ၊ အမျိုးသမီးတွေကို သင်တို့ရဲ့အဖော်အဖြစ် တော်ကောက်နိုင်တဲ့ နယ်မြေကောင်းတွေနဲ့ လှပတဲ့အိမ်တော်တွေ ချီးမြှင့်ပေးဖို့အသင့်ပဲ။”
အံ့အားသင့်နေကြတဲ့ စစ်သူကြီးတွေက ဧကရာဇ်ဆန်သည် သူတို့ကို စိတ်ပူပန်ကြောင့်ကြမှု၊ ရုန်းကန်လှုပ်ရှားမှုတွေနဲ့ နေထိုင်ရမည့်ဘဝအစား ဥစ္စာဓနနဲ့လုံခြုံမှုကို ကမ်းလှမ်းနေတာပါလားလို့ သဘောပေါက်သွားတော့တယ်။ နောက်တစ်ရက်လည်းရောက်ရော စစ်သူကြီးအားလုံး ရာထူးကနေ နှုတ်ထွက်သွားကြပြီး ဧကရာဇ်ဆန် ချီးမြှင့်မြှောက်စားတဲ့ နယ်မြေတွေမှာ အဆင့်အတန်းမြင့်မြင့်နဲ့ နေထိုင်အနားယူသွားပါတော့တယ်။
ဒီအကြောင်းအရာမှာတော့ ဧကရာဇ်ဆန်သည် သူ့ကို သစ္စာဖောက်နိုင်သည့် “ခင်မင်ရင်းနှီးလှသော” ဝံပုလွေတသိုက်ကို လုပ်ပိုင်ခွင့်အာဏာတွေ စွန့်လွှတ်ပြီး သိမ်မွေ့ကျိုးနွံသော သိုးငယ်ကလေးများအဖြစ်သို့ ပြောင်းလဲလိုက်ခြင်းပဲ ဖြစ်တယ်။
နောက်နှစ်အနည်းငယ်အကြာအထိ ဧကရာဇ်ဆန်သည် သူ့တိုင်းပြည်တွင် အနှောင့်အယှက်မရှိဘဲ သူ့အုပ်ချုပ်မှုကို တည်မြဲနေစေခဲ့တယ်။ အေဒီ ၉၇၁တွင် ဟန်ပြည်နယ်တောင်ပိုင်းရှိ ဘုရင်လူသည် နှစ်ပေါင်းများစွာ ပုန်ကန်ပြီးနောက် နောက်ဆုံးတွင် ဧကရာဇ်ဆန်ဆီမှာ အညံ့ခံအရှုံးပေးတော့တယ်။ လူ အံ့အားသင့်တာကတော့ ဧကရာဇ်ဆန်သည် နိုင်ငံတော်တရားရုံးတွင် လူ့ကို ရာထူးတစ်နေရာပေးပြီး သူ့ကို နန်းတော်သို့ ဖိတ်ခေါ်ကာ သူတို့၏ အသစ်ဖြစ်တည်သော ခင်မင်ရင်းနှီးမှုအတွက် ဝိုင်ဖြင့် ဧည့်ခံခြင်းပဲ ဖြစ်တယ်။ ဘုရင်လူက ဧကရာဇ်ကမ်းသောဝိုင်ခွက်ကို လက်ခံယူပြီး အဆိပ်ပါမည်ကြောက်သဖြင့် သောက်ဖို့ရန် တုံ့ဆိုင်းနေတယ်။ “ကျွန်တော်မျိုး ကျူးလွန်ခဲ့တာတွေက သေဖို့ ထိုက်တန်ပါတယ်။ သို့ပေမယ့် ကျွန်တော်မျိုး အသက်အတွက် အရှင်မင်းကြီးကို အသနားခံပါတယ်။ ကျွန်တော်မျိုး ဒီဝိုင်ခွက်ကို မသောက်ရဲပါ အရှင်မင်းကြီး” လို့ လျှောက်တင်ခဲ့တယ်။ ဧကရာဇ်ဆန်က ရယ်တယ်။ လူ့ဆီက ခွက်ကိုယူပြီး သောက်ပြတယ်။ အဆိပ် မပါ ပါဘူး။ အဲ့ဒီအချိန်ကစပြီး လူသည် သူ၏ အယုံကြည်ရဆုံးနဲ့ သစ္စာအရှိဆုံး မိတ်ဆွေ ဖြစ်လာပါတော့တယ်။
ရှင်းလင်းချက်
တရုတ်စကားပုံတစ်ခု ရှိပါတယ်။ မိတ်ဆွေတွေကို မေးရိုးနဲ့နှိုင်းပြီး သွားကိုတော့ အန္တရာယ်ရှိတဲ့ တိရစ္ဆာန်လို့ တင်စားထားတာပါ။ အကယ်ရ် သင်သာ သတိမထားမိရင် သူတို့က သင့်ကို ဝါးမိကိုက်မိလိမ့်မယ်။ ဧကရာဇ်ဆန်က ထီးနန်းတည်မြဲဖို့အရေးဆိုတာ မေးရိုးနေရာမှာ ရှိနေတာကို သူသိခဲ့တယ်။ စစ်တပ်ထဲမှာ ရှိနေတဲ့ သူ့ “မိတ်ဆွေတွေက” သူ့ကို အသားလို ဝါးမြိုပစ်လိမ့်မယ်။ အကယ်ရ် သူ တနည်းနည်းနဲ့ ရှင်သန်နိုင်ခဲ့တယ်ဆိုရင်တောင် အစိုးရအဖွဲ့ထဲက “မိတ်ဆွေတွေက” သူ့ကို ညစာ လုပ်စားလိမ့်မယ်။
ဧကရာဇ်ဆန်က သူ့မိတ်ဆွေတွေနဲ့ ဘာပြသာနာမှ မတက်ချင်ဘူး။ သူ့နောက်လိုက် စစ်သူကြီးတွေကို ကောင်းမွန်လှတဲ့ နယ်မြေတွေကို လာဘ်ထိုးပြီး အဝေးနှင်လိုက်တယ်။ သူတို့ကို သတ်တာထက်စာရင် ဒါအများကြီး ပိုကောင်းတဲ့ နည်းလမ်းပါ။ နို့မို့ရင် တခြားစစ်သူကြီးတွေက လက်တုံ့ပြန်ဖို့ ကြိုးစားလိမ့်မယ်။ ပြီးတော့ ဆန်သည် “ခင်မင်သော” ဝန်ကြီးတွေနဲ့ ပတ်သတ်ပြီးလည်း ဘာမှ အထွေအထူး လုပ်ဆောင်စရာ မလိုတော့ဘူး။ အနည်းနဲ့အများတော့ သူတို့သည်လည်း နာမည်ကြီး အဆိပ်သင့်ဝိုင်သောက်ပြီး အသက်မဆုံးရှုံးရတော့ဘူးပေါ့လေ။
မိတ်ဆွေတွေကို အားကိုးမယ့်အစား ဆန်သည် သူ့ရန်သူတွေကို အသုံးချခဲ့တယ်။ တစ်ယောက်ပြီးတစ်ယောက်ကို ပိုမိုစိတ်ချယုံကြည်ရတဲ့ လူတွေအဖြစ် သူပြောင်းလဲခဲ့တယ်။ မိတ်ဆွေတစ်ယောက်က လိုအင်ဆန္ဒ တခုပြီးတခု မျှော်လင့်နေချိန် မနာလိုဝန်တိုမှုတွေနဲ့ ကြည့်ရှုနေချိန် ဒီရန်သူဟောင်းတွေက ဘာကိုမှ မမျှော်လင့်ပဲ အရာရာကို လုပ်ဆောင်ပေးတယ်။ ခေါင်းဖြတ်ဓားအောက်မှာ အသက်ပေးရမယ့်ယောက်ျားဟာ ရုတ်တရက် အသက်ချမ်းသာရာ ရလိုက်တော့ သူ့အပေါ် အသက်ချမ်းသာပေးတဲ့ ကျေးဇူးရှင်အပေါ်ကိုလည်း ကမ္ဘာဆုံးတဲ့အထိ အလွန်ကို ကျေးဇူးသိတတ်တဲ့ သူတစ်ယောက် ဖြစ်သွားပါတယ်။ ထိုအချိန်မှာပဲ ရန်သူဟောင်းတွေသည် ဆန်ရဲ့အယုံကြည်ရဆုံး မိတ်ဆွေတွေ ဖြစ်သွားတော့တာပါပဲ။
ဆန်သည် အာဏာလုမှုတွေ၊ ရုန့်ရင်းကြမ်းတမ်းမှုတွေနဲ့ ပြည်တွင်းစစ် အစရှိတဲ့ ဖြစ်နေကျအဖြစ်အပျက်တွေကို ချိုးဖျက်နိုင်ခဲ့ပြီး ဆန်မင်းဆက်သည်လည်း တရုတ်ပြည်ကြီးကို နှစ်ပေါင်းသုံးရာကျော် အုပ်စိုးမင်းမူနိုင်ခဲ့ပါတယ်။
ပြည်တွင်းစစ် အထွတ်အထိပ်ရောက်ချိန် အေဗရာဟင် လင်ကွန်း ပြောကြားခဲ့တဲ့ မိန့်ခွန်းတစ်ခုထဲမှာ သူက တောင်ပိုင်းသားတွေကို အမှားလုပ်မိတဲ့ လူသားတွေပါလို့ ရည်ညွှန်းပြောဆိုခဲ့တယ်။ အသက်ကြီးကြီး အမျိုးသမီးတစ်ယောက်က ထိုတောင်ပိုင်းသားတွေကို အမြစ်ပြတ် ချေမှုန်းသုတ်သင်ရမယ့် ကျေအေးပေးဖို့ရာ မဖြစ်နိုင်သော ရန်သူတွေလို့ မသုံးနှုန်းတဲ့အတွက် လင်ကွန်အား ဝေဖန်ပြစ်တင်ခဲ့ပါတယ်။ လင်ကွန်း ပြန်ဖြေခဲ့သည်က “ ဘာဖြစ်လို့လဲ မဒမ်။ မိတ်ဆွေအဖြစ် ပြောင်းလဲလို့ရတဲ့ ရန်သူတွေကို ကျွန်ုပ် မချေမှုန်းပါဘူး” ဆိုတာပါပဲ။
07/11/2021
Unicode
ဥပဒေသ(၂.၁)
မိတ်ဆွေများအပေါ် မျက်စိစုံမှိတ် မယုံကြည်ရ။
အေဒီ ကိုးရာစုအလယ်လောက်မှာ (၃ယောက်မြောက်) မိုက်ကယ်ဆိုတဲ့ လူငယ်လေးသည် ဘိုင်ဇန်တိုင်းအင်ပါယာကြီးကို နန်းမွေဆက်ခံရယူခဲ့ပါတယ်။ သူ့မယ်တော် ဧကရာဇ်ဘုရင်မ သီယိုဒိုရာကတော့ သီလရှင်ကျောင်းတစ်ကျောင်းကို နှင်ခြင်းခံရပြီး သူမ၏ချစ်သူ သီရော့တစ်တုကတော့ သီယိုဒိုရာကို နန်းချဖို့ရန် လျို့ဝှက်ပူးပေါင်းကြံစည်တဲ့ ခေါင်းဆောင်ဆိုပြီး အသတ်ခံခဲ့ရပါတယ်။ မိုက်ကယ်ရဲ့ဥ◌ီးရီးတော်ဖြစ်တဲ့ ဥာဏ်အမြော်အမြင်နဲ့ ပြည့်စုံသော ဘားဒတ်စ်သည် မိုက်ကယ်ကို နန်းတင်ခဲ့ပါတယ်။
အခုဆိုရင်တော့ဖြင့် မိုက်ကယ်သည် ငယ်ရွယ်ပြီး အတွေ့အကြုံနုသေးတဲ့ အုပ်ချုပ်သူဘုရင်တစ်ပါး ဖြစ်နေပါပြီ။ သူ့ဘေးမှာတော့ မကောင်းကြံစည်သူတွေ၊ လုပ်ကြံချင်သူတွေနဲ့ အသုံးအဖြုန်းကြီးသူတွေသာ ပတ်လည်ဝိုင်းလို့ နေပါတယ်။ ဒီလို အန္တရာယ်ကျရောက်နေတဲ့အခိုက်မှာ သူ့အဖော်အဖြစ် သူယုံကြည်နိုင်လောက်တဲ့ လူတစ်ယောက်ကို လိုအပ်နေတာဖြစ်ပါတယ်။ သူ့အချစ်ဆုံး သူငယ်ချင်းဖြစ်တဲ့ ဘစစ်လီယက်စ်ကိုပဲ သူမြင်ယောင်နေတယ်။ ဘစစ်လီယက်စ်က အုပ်ချုပ်ရေးနဲ့ နိုင်ငံရေးမှာ အတွေ့အကြုံ မရှိပါဘူး။ တကယ်တော့ သူက တော်ဝင်မြင်းဇောင်းရဲ့ ခေါင်းဆောင်အကြီးအကဲပါ။ သို့ပေမယ့် သူက သူ့ချစ်ခင်မှုနဲ့ ကျေးဇူးကို အချိန်နှင့်အမျှ သက်သေပြနိုင်ခဲ့ပါတယ်။
သူတို့က လွန်ခဲ့တဲ့ နှစ်အနည်းငယ်အတွင်းက တွေ့ဆုံခဲ့ကြတာဖြစ်ပြီး မိုက်ကယ် မြင်းဇောင်းကို ကြွရောက်လည်ပတ်ချိန်မှာ မြင်းရိုင်းတစ်ကောင် လွတ်သွားပါတယ်။ လယ်သမား မက်ဆီဒိုနီးယန်းဆီက လူငယ်လေး ဘစစ်လီယက်စ်က မိုက်ကယ်ရဲ့ အသက်ကို ကယ်ခဲ့တာြဖစ်ပါတယ်။ လူငယ်လေးရဲ့ ခွန်အားနဲ့ သတိက မိုက်ကယ်ကို အထင်ကြီးစေခဲ့တယ်။ မြင်းလေ့ကျင့်ပေးသူ ဘစစ်လီယက်စ်ကို ချက်ချင်းဆိုသလို မြင်းဇောင်းရဲ့ ခေါင်းဆောင်အဖြစ် တိုးမြှင့်ခန့်အပ်လိုက်တယ်။ မိုက်ကယ်ဟာ သူ့မိတ်ဆွေကို လက်ဆောင်တွေ၊ မျက်နှာသာပေးမှုတွေနဲ့ ဆက်ဆံခဲ့ပြီး သူတို့ဟာ တတွဲတွဲ ဖြစ်လာပါတော့တယ်။ ဘစစ်လီယက်စ်ကို ဘိုင်ဇန်တီယမ်က အကောင်းဆုံးကျောင်းကို ပို့ပေးခဲ့ပြီး ကြမ်းကြမ်းတမ်းတမ်း လယ်သမားလေးဟာ လိမ္မာယဥ◌်ကျေးပြီး ခေတ်ပညာတတ် နန်းတွင်းသား တစ်ယောက် ဖြစ်လာခဲ့ပါတယ်။
အခုတော့ မိုက်ကယ်ဟာ ဧကရာဇ်ဘုရင်ကြီး ဖြစ်လာခဲ့ပါပြီ။ သူ့ကို သစ္စာရှိတဲ့သူတစ်ယောက်ကို လိုအပ်နေပါပြီ။ အရာရာတိုင်းအတွက် သူ့အပေါ် ကျေးဇူးကြွေးတင်နေတဲ့သူတစ်ယောက်ထက် ဘယ်သူ့ကိုများ ကောင်စီဥက္ကဌအဖြစ်၊ ဘုရင့်အိမ်တော်ထိန်းအဖြစ် ယုံကြည်နိုင်ပါ့မလဲ။
ဘစစ်လီယက်စ်ကို အလုပ်အတွက် သင်ကြားပေးလို့ ရတယ်။ ပြီးတော့ မိုက်ကယ်ကလည်း သူ့ကို ညီအကိုအရင်းတမျှ ချစ်ခင်တယ်လေ။ ဘားဒတ်စ်ထက် အရည်အချင်းမှီတဲ့သူ မရှိဘူးလို့ ပေးကြတဲ့အကြံများကို လျစ်လျူရှုပြီး မိုက်ကယ်သည် သူ့မိတ်ဆွေကို ရွေးချယ်ခဲ့တယ်။
ဘစစ်လီယက်စ်သည် ကောင်းစွာသင်ကြားလေ့လာပြီး မကြာမှီမှာပဲ ဧကရာဇ်ဘုရင်ကြီးကို တိုင်းပြည်ရဲ့ကိစ္စရေးရာအားလုံးမှာ အကြံဥာဏ်ပေးနိုင်ခဲ့တယ်။ တခုတည်းသော ပြသာနာကတော့ ငွေပါပဲ။ ဘစစ်လီယက်စ်သည် ဘယ်သောအခါမှ လုံလောက်တယ်ဆိုတာ မရှိ။ ဘိုင်ဇန်တိုင်းတရားရုံးမှာ လုပ်ရတာသည် ဩဇာအာဏာရဲ့ အခြားသောခံစားခွင့်တွေက သူ့ကို ဥစ္စာဓနကို မက်မောစေတယ်။ မိုက်ကယ်သည် သူ့လစာကို နှစ်ဆ၊ သုံးဆ တိုးပြီး ချီးမြှင့်ခဲ့တယ်။ သူ့ကိုယ်လုပ်တော် အူဒိုဇီယာ အင်ဂါနာနဲ့လည်း လက်ဆက်ပေးခဲ့တယ်။ ယုံကြည်ရတဲ့ မိတ်ဆွေနဲ့အကြံပေးသူကို ဒီလိုမြှောက်စားပြီး အနားမှာ ထားရတာ တန်ပါတယ်။ ဒါပေမယ့် ပိုများပြားတဲ့ ဒုက္ခတွေကတော့ ရောက်လာပါပြီ။ ဘားဒတ်စ်က အခု စစ်တပ်အကြီးအကဲ ဖြစ်နေပါပြီ။ ဘစစ်လီယက်စ်က မိုက်ကယ့်ကို ဒီလူဟာ ဘာမှ ရေရေရာရာ ဖြစ်မြောက်မယ့်သူ မဟုတ်ဘူးလို့ ပြောဆို တိုက်တွန်းခဲ့တယ်။
ဘားဒတ်စ်သည် သူ့တူတော်ကို သူထိန်းချုပ်နိုင်မှာပဲဆိုတဲ့ အထင်မှားမှုနဲ့ မိုက်ကယ်ကို ထီးနန်းတင်ပေးခဲ့တာဖြစ်ပြီး ဒီအချိန်မှာတော့ မိုက်ကယ့်ကို ဖယ်ထုတ်ပြီး သူကိုယ်တိုင် သရဖူဆောင်းမယ်လို့ လျှို့ဝှက်ကြံစည်နိုင်တယ်လို့ သွေးထိုးခဲ့တယ်။ ဧကရာဇ်ဘုရင်ဟာ သူ့ဥ◌ီးရီးတော်ကို သတ်ပါ့မယ်ဆိုပြီး သဘောတူတဲ့အထိ ဘစစ်လီယက်စ်တစ်ယောက် မိုက်ကယ်နားထဲကို အဆိပ်တွေ လောင်းထည့်နေပါတော့တယ်။ မြင်းပြိုင်ပွဲကြီးတစ်ခုမှာ ဘစစ်လီယက်စ်က ဘားဒတ်စ်ကို လူအုပ်ကြားထဲ ပိတ်မိစေပြီး သေအောင် ဓားနဲ့ထိုးသတ်ခဲ့တယ်။ နောက်များမကြာမှီ ဘစစ်လီယက်စ်က တိုင်းပြည်ထိန်းချုပ်ဖို့နဲ့ တော်လှန်ပုန်ကန်မှုတွေကို တိုက်ထုတ်ဖို့ရန် ဘားဒတ်စ်ရာထူးဖြစ်တဲ့ စစ်ဥ◌ီးစီးအကြီးအကဲနေရာကို တောင်းခံပါတော့တယ်။ ဒါကိုလည်း ခွင့်ပြုပေးလိုက်တာပါပဲ။
အခုတော့ ဘစစ်လီယက်စ်ရဲ့ ဩဇာနဲ့ ချမ်းသာကြွယ်ဝမှုကတော့ တိုးမြှင့်လာပါတယ်။ နောက်နှစ်အနည်းငယ်မှာ သူ့ရဲ့ခမ်းကြီးနားကြီး နေထိုင်မှုတွေကြောင့် မိုက်ကယ်က လွန်ခဲ့တဲ့နှစ်များက သူချေးပေးထားတဲ့ ပိုက်ဆံတွေကို ပြန်တောင်းခဲ့တယ်။ မိုက်ကယ် အံ့အားသင့်သွားစေတာကတော့ ဘစစ်လီယက်စ်က တော်တော့်ကိုရိုင်းတဲ့အကြည့်နဲ့ ကြည့်ပြီး ပြန်ဆပ်ဖို့ ငြင်းဆန်ခဲ့တာပါပဲ။ ဧကရာဇ်ဘုရင်က သူ့လုပ်မိတဲ့ ပြသာနာကို သူချက်ချင်း သဘောပေါက်သွားပါတယ်။ အရင်က မြင်းဇောင်းမှာ လုပ်တဲ့ ကောင်လေးက ပိုက်ဆံတွေ၊ စစ်တပ်နဲ့လွှတ်တော်ထဲမှာ မဟာမိတ်တွေ တိုးများလာပြီး အဆုံးသတ်မှာတော့ ဧကရာဇ်ဘုရင်ကိုယ်တိုင်ထက်ကို ဩဇာအာဏာ ပိုရှိလာတာပါပဲ။ နောက်အပတ်အနည်းငယ်ကြာတော့ အရက်အလွန်အကျွံသောက်မိတဲ့တညမှာ မိုက်ကယ်နိုးလာတော့ သူ့ကို စစ်သားတွေ ဝန်းရံထားတာကို သူကိုယ်တိုင် တွေ့ရှိလိုက်ရတယ်။ ဧကရာဇ်ဘုရင်ကို ဓားနဲ့ထိုးသတ်ကြတာကို ဘစစ်လီယက်စ်က ကြည့်နေခဲ့တယ်။ ထို့နောက် သူ့ကိုယ်သူ ဧကရာဇ်ဘုရင်အဖြစ် ကြေညာပြီး အရင်က သူ့ကျေးဇူးရှင်လည်းဖြစ်၊ အကောင်းဆုံးမိတ်ဆွေလည်း ဖြစ်သူရဲ့ ဥ◌ီးခေါင်းကို လှံတံချွန်ထိပ်မှာ တပ်ဆင်ကာ ဘိုင်ဇင်တီယမ်မြို့က လမ်းတွေပေါ်မှာ မြင်းစီးကာ ဝှေ့ယမ်းပြသခဲ့တယ်။
ရှင်းလင်းချက်
(၃ယောက်မြောက်) မိုက်ကယ်သည် သူ့အနာဂတ်အတွက် မျှော်တွေးရာတွင် ဘစစ်လီယက်စ်သည်သာလျှင် သူ့အပေါ်သိတတ်လိမ့်မည်ဟု တွေးထားပုံရသည်။ ဘစစ်လီယက်စ်၏ ချမ်းသာကြွယ်ဝမှု၊ ပညာရေးနှင့် ရာထူးအားလုံးတို့သည် မိုက်ကယ်၏ စောင်မကြည့်ရှုပေးမှုတို့ကြောင့်သာလျှင် ရရှိလာသည်ဖြစ်ရာ ဘစစ်လီယက်စ်သည် အမှုတော်ကို အကောင်းဆုံး ထမ်းဆောင်လိမ့်မည်ဆိုတာ အသေအချာပင် ဖြစ်သည်။ ထို့နောက် တခါ ဘစစ်လီယက်စ်သည် ဩဇာအာဏာ ရှိလာသည်တွင်လည်း မိုက်ကယ်အတွက် အကောင်းချည်းဖြစ်ရာ သူတို့နှစ်ယောက်ကြားရှိ ချစ်ခင်မှုသည်လည်း ခိုင်မြဲလာခဲ့သည်။ ကံထူးသည့်တရက်တွင်မှ ဘစစ်လီယက်စ်၏ မျက်နှာပေါ်ရှိ စော်ကားသောအပြုံးကို တွေ့မိလိုက်မှသာလျှင် ဧကရာဇ်ဘုရင်သည် သူ့အသက်ဘေးထိခိုက်နိုင်သည့် အမှားမျိုး ကျူးလွန်ခဲ့မိပြီဟု မိုက်ကယ် သဘောပေါက်လိုက်မိပြီ။
မိုက်ကယ်သည် မကောင်းဆိုးဝါးတစ်ကောင် ဖန်တီးမိခဲ့သည်။ သူ့လောက်နီးပါး အာဏာရှိသည့် လူတစ်ယောက်ကို သူ ပျိုးထောင်ခဲ့မိလိုက်ပြီ။ ပို၍ အတင့်ရဲလာသောလူတစ်ယောက်၊ လိုချင်တောင့်တသမျှ ရရှိတတ်သော လူတစ်ယောက်၊ သူရရှိလိုက်သော စွန့်ကြဲပေးကမ်းမှုကြောင့် ဝန်ထုပ်ဝန်ပိုးကဲ့သို့ ခံစားရသော သူတစ်ယောက်။ ထိုကဲ့သို့သော အခြေအနေမျိုးတွင် တခြားသူများ လုပ်သလို ရိုးရိုးရှင်းရှင်းလေးသာ လုပ်သွားခြင်း ဖြစ်သည်။ သူတို့ရရှိထားသော မျက်နှာသာပေးမှုကို မေ့ပျောက်ထားပြီး သူတို့ကုသိုလ်ကံကြောင့်သာ အဆင်ပြေချောမွေ့သည့်ဘဝ နေထိုင်နေရသည်ဟု ထင်မှတ်ထားပုံရသည်။
မိုက်ကယ် နားလည်သဘောပေါက်သွားချိန်တွင် သူ့ဘဝသူ ကယ်တင်နိုင်လောက်အောင် အချိန်ရှိသေးသည်။ သို့ပေမယ့် ခင်မင်မှုနဲ့ မေတ္တာတရားက လုပ်သင့်လုပ်ထိုက်သည့် အလုပ်ကို လုပ်ဆောင်ရန် အမှောင်ဖုံးစေသည်။ မိတ်ဆွေတစ်ယောက်က သစ္စာဖောက်နိုင်သည်ကို မည်သူကမျှ မယုံကြည်ကြ။ ထို့အတူ မိုက်ကယ်သည်လည်း သူ့ဥ◌ီးခေါင်း လှံထိပ်တွင် အဆုံးသတ်ခံရသည့်နေ့အထိ မိတ်ဆွေအား ဆက်လက်ယုံကြည်ခဲ့မိပြီတကား။
အရှင် မိတ်ဆွေများလက်မှ ကျွန်ုပ်ကို ကာကွယ်ပေးတောမူပါ။ ရန်သူများ ရန်မှ ကျွန်ုပ်ကိုယ် ကျွန်ုပ် စောင့်ရှောက်နိုင်ပါတယ်။
ဗော့တယ်လ် (၁၆၉၄-၁၇၇၈)
