25/03/2026
ကျောင်းအုပ်ကြီးရုံးခန်းနောက်က သရက်ပင်ကပြောတယ်။
ငါ့သရက်သီးတွေလည်း ကြီးလာနေပြီကွ။
သူတို့တွေ တစ်နှစ်ပတ်လုံး ငါ့သစ်ရွက်ကြွေတွေကို ကောက်ယူလှဲကျင်းပေးပြီး သန့်ရှင်းရေးအမြဲလုပ်နေခဲ့တာ။ ကျေးဇူးတင်တဲ့အနေနဲ့ ငါ့သီးကင်းတွေကို စားစေချင်လိုက်တာ။ ငါလည်း ကလေးတွေကို အရမ်းလွမ်းတာပဲ တဲ့။
ယောက်ျားလေးအိမ်သာနောက်က သင်္ဘောပင်ကြီးကလည်းပြောတယ်။
ငါလည်း လွမ်းပေမယ့် စိတ်ချမ်းသာရပါတယ်။ ဘာလို့ဆို ကလေးတွေက ငါ့အသီးကို ခဏခဏခူးစားကြတယ်လေ။ လိုသလောက်ပဲ ဆွတ်ယူပြီး အကုန်ကုန်အောင်စားကြတာမြင်တော့ ငါ အရမ်းစိတ်ချမ်းသာတာပေါ့။ အခုလည်း သူတို့မရှိတဲ့ခဏ ငါ အားမွေးပြီး ငါ့အသီးတွေ ကြီးရင့်လာအောင် လုပ်ထားမယ်။ ဒါမှ သူတို့ပြန်လာရင် ငါ့ကိုမြင်တာနဲ့ အရမ်း ပျော်သွားကြမှာ တဲ့။
ဇီဝဝါငုတ်တိုလေးက တခြားအပင်တွေကို ပြောတယ်။
ကလေးတွေ ငါ့ကို သေသေချာချာစိုက်ခဲ့ပေမယ့် ငါ ရှင်ပါ့မလား မသိတော့ဘူး။ ငါလည်း မင်းတို့လိုပဲ ငါ့ရဲ့ရှင်သန်မှုနဲ့ သူတို့ကိုကြိုချင်လိုက်တာ။ ငါ ရှင်သန်ဖို့အားယူနေတုန်းမှာ ကျောင်းပိတ်သွားတော့ ငါ ရေဆာတယ်။ ငါရေမဝဘူး။ ဒီမှာရှိနေသေးတဲ့ ဆရာ၊ ဆရာမတွေကလည်း သူတို့အလုပ်နဲ့သူတို့ရှုပ်နေတော့ ငါ့ကို ဂရုမစိုက်အားကြဘူးလေ။ ငါလည်း ရှင်သန်ချင်ပါတယ်။ ငါလည်း ကလေးတွေကို လွမ်းပါတယ် တဲ့။
ကဲ ငါ့ကောင်တို့ရေ။ အရမ်းကြီးလည်း Drama မခင်းကြပါနဲ့ကွာ။
နွေရာသီရောက်လာပြီမို့ ကလေးတွေကို အပြင်အရမ်းမထွက်ဖို့။
ထွက်ခဲ့ရင်လည်း ဦးထုပ်တွေ၊ ထီးတွေ ဆောင်းဖို့။
လက်ရှည်တွေဝတ်ဖို့။
ဝတ်တဲ့အရောင်ကလည်း အပူကို မစုပ်ယူတဲ့ အရောင်ဖျော့ဖျော့လေးတွေ အရောင်နုနုလေးတွေဝတ်ဖို့။
ချွေးတွေကို စုပ်ယူနိုင်တဲ့ ချည်သားအေးအေးလေးတွေ ဝတ်ဖို့။
ဂိမ်းအရမ်းမဆော့ဖို့။
အချိန်မှန်မှန်အိပ်ဖို့။
လိမ်လိမ်မာမာနေဖို့။
အဲ့ဒါတွေလည်း မှာကြပါဦး။
လွမ်းတဲ့အကြောင်းပဲ ပြောမနေကြပါနဲ့ဟ လို့ အသက်ကြီးကြီးနဲ့ အလံတိုင်ကြီးက ယိုင်နဲ့နဲ့ကြီးရပ်နေရင်းနဲ့ပြောတယ်။
သူ့ခြေရင်းက ရွက်လှပင်လေးတွေက ပြန်ပြောတယ်။ စိတ်ချစမ်းပါဗျာ။ ကလေးတွေက လိမ္မာပြီးသားပါ။ အဲ့လို လိမ္မာကြတဲ့ ကလေးတွေမို့ ကျုပ်တို့က လွမ်းနေရတာပေါ့ဗျာ တဲ့။
