20/08/2020
【👉“Spend Less, Invest More” 👈】
ကျွန်တော်အသက် (၁၈) လောက်တုန်းက ကိုယ့်မှာသာ ကိုယ်ပိုင်ဝင်ငွေရှိလာခဲ့ရင် ကားဝယ်ချင်တယ်၊ အိမ်ဝယ်ချင်တယ် ဆိုပြီး အမြဲတမ်း စိတ်ကူးယဉ်ခဲ့တာ… ဘာလို့ဆို ကိုယ်ပိုင်ကားသာ ရှိရင် သူငယ်ချင်းတွေအကြား ကြွားလို့ရတယ်၊ လူလည်း ပိုရှိန်မယ်ပေါ့… အချိန်တွေကြာလာတော့ အခုတကယ် ကိုယ်ပိုင် ဝင်ငွေလေးလည်း ရှိလာရော ကားဝယ်ဖို့က ကျွန်တော်တကယ် လိုအပ်နေတဲ့အရာမဟုတ်မှန်း သဘောပေါက်လာတယ်။ အဲဒါထက် ပိုအရေးကြီးတဲ့အရာ၊ ပိုတန်ဖိုးရှိတဲ့အရာတွေ ကျွန်တော်သင်ယူဖို့ လိုအပ်နေသေးတယ်။ ကျွန်တော်ဖြည့်ရမယ့် ယိုပေါက်တွေ အများကြီး ရှိနေသေးတယ်။ 🧐
ဒီလိုပါပဲ ငယ်ရွယ်ချိန်မှာတော့ ကျွန်တော်တို့တွေဟာ သင်ယူလေ့လာပြီး ရင်းနှီးမြှုပ်နှံဖို့ထက် သုံးဖြုန်းဖို့အရေးကို ပိုတွေးတတ်ကြပါတယ်။ 💲ဘာလို့လဲဆိုတော့ ရေတိုသဘောတရားလောက်ကိုပဲ ကျွန်တော်တို့ တွေးနိုင်ကြသေးတာကိုး။ ဒါကြောင့် လူကြီးတွေကလည်း အကြိမ်ကြိမ် ငယ်ရွယ်တုန်း အချိန်ရှိတုန်းမှာ ပညာရှာ ဆိုပြီး ဆုံးမခဲ့ကြတာပေါ့။ တကယ်တမ်း ငယ်ရွယ် ပျိုမျစ်တုန်း ကျွန်တော်တို့မှာရှိတဲ့ အချိန်တွေ၊ ခွန်အားတွေ၊ ငွေကြေးတွေကိုသာ ကိုယ့်ကိုယ်ကိုယ် မြှင့်တင်ဖို့အတွက် ရင်းနှီးမြှုပ်နှံခဲ့မယ်ဆိုရင် တစ်ချိန်မှာ ကိုယ့်ရဲ့ အားထုတ်မှုအတွက် ဂုဏ်ယူနေမိမှာသေချာပါတယ်။ ဒါကြောင့်မို့ ငယ်တုန်း အပျော်ရှာတာလည်း တော်သင့်ရုံလောက်ရှာပါ၊ တကယ့် တန်ဖိုးကို မြင်နိုင်အောင် ကြိုးစားပါ အဓိကကတော့ ပညာရေး၊ အသိပညာ၊ ဗဟုသုတ၊ အရည်အချင်း၊ အတွေးအခေါ်တွေကို မြှင့်တင်ဖို့၊ ကိုယ်ရည်သွေးဖို့အတွက် ပိုပြီး ရင်းနှီးမြှုပ်နှံပေးကြဖို့ ပြောချင်ပါတယ်။ 🌅
