10/06/2023
မေတ္တာတရား ရဲ့ စွမ်းအင်များ ။
(Dr. Than Than Sein).
၏ စာစုမှ ကူးယူမျှဝေ ပါသည် ၊
စာအနည်းငယ်ရှည််သည့် မှတ်စုကောင်းပါ။
Love Energy မေတ္တာ ရဲ့ စွမ်းအင် ကြောင့် ရေ သည် လှပသော Crystal ပြောင်းလဲသွားတယ် ဆိုတဲ့ စမ်းသပ်ချက်ကို လုပ်ဆောင် ခဲ့သူ Masaru Emoto နဲ့ ဒီစွမ်းအင် သတ္တိကို သတိရမိတာမို့ ကျွန်မ ရဲ့ မွေးနေ့ မတိုင်ခင် ၁၉ ရက်နေ့ ညနေ မှာ သားကိုအုတ်ကို တိုင်းလိုင်းဖွင့်ရန် ဖုန်းဆက်ပြောခဲ့လိုက်ပါတယ်..။ ကျွန်မ က အင်တာနက် မရတဲ့ ပေါင်းလောင်းဒေသ ကို ရောက်ရှိနေခဲ့ တာ မို့ ပါ။
ဖြူစင်ရှင်းသန့် သော.. အကျိုးလိုလားသော..မိမိ အတွက် တန်ပြန်ရလို မှု မပါဝင်သော မေတ္တာ ရဲ့ စိတ်လှိုင်းများကို ကျွန်မ ပေါပေါ များ များ ရွှင်လန်းနှစ်ခြိုက်စွာ ခံယူ သိမ်းဆည်းမိခဲ့ပါတယ်..။
လူ၄၀၀ ကျော် မျှ ဆုတောင်းပေးခြင်း ၊ စာဖြင့်ရေးသားခြင်း ၊ ဖုန်းဆက်ခြင်း ၊ ဓာတ်ပုံ များ ပို့ ခြင်း စတဲ့ စိတ်လှိုင်းများ သည် ကျွန်မအား ရေ ခရစ္စတယ်ကဲ့သို့ လှပစေသလို စိတ်ခွန်အား သန့်စင် အားဖြည့်နိုင်စွမ်းရှိလိမ့်မယ် ဆိုတာ ကျွန်မ ယုံကြည်မိပါတယ်..။
ဒီနေ့ လည်းကျွန်မ ရဲ့ Biotech မောင်နှမ များက ဂျူလိုင်လ မှာ မွေးဖွားကြသူ များ ဖြစ်တဲ့ မယဉ်ယဉ်ထွေး ၊ မစောသန္တာ နဲ့ ကျွန်မ တို့ အတွက် မွေးနေ့ပွဲလေးကျင်းပပေးခဲ့ပါတယ်..။
Dr. Masaru Emoto ဆိုတာကလည်း ဂျူလိုင်လ ၂၂ ရက် မှာ မွေးခဲ့သူဆိုတော့ ကျွန်မ တို့ လို ဂျူလိုင်လ မွေးဖွားသူ ချင်းမို့ ထူးထူးခြားခြားသတိရမိဖြစ်ခဲ့ ပါတယ်..။
၁၉၄၃ ခုနှစ် ဂျူလိုင် ၂၂ ကလောက ထဲဝင်ရောက်ခဲ့တဲ့ ဒေါက်တာ အီမိုတို ဟာ ၂၀၁၄ အောက်တိုဘာလ ၁၄ ရက်မှာ လောက ထဲက ထွက်ခွာသွားခဲ့ပါတယ်..။
သူ့အကြောင်းကို တော့ ကျေးဇူးတော်ရှင်ပိုင်းလော့ဆရာတော် ဘုရား ကြီး ရဲ့ တရား ပွဲ တွေ မှာ ဟောပြောခဲ့တာမို့ ကျွန်မ ကသူနဲ့ ရင်းနှီး ခဲ့ပါတယ်..။
ဒေါက်တာ အီမိုတို ဟာ လူတွေ ရဲ့ အကောင်းမြင် စိတ်ထား ၊ ချစ်ခင်မြတ်နိုးသော တန်ဘိုးထားတတ်သော စကားလုံး များ ၊ သည် ရေ ကို သန့်စင်ကြည်လင်စေတယ် ဆိုတာ တွေ့ရှိခဲ့သူဖြစ်ပါတယ်..။ ထိုစကားလုံး ဆိုတာကလည်းတွေးပြီး မှ ပြောရတာဆိုတော့ စိတ် မှာ ရည်မှန်းပုံဖေါ် လိုက်တဲ့ စိတ်ကူးမှ တဆင့် ထွက်လာတဲ့ စကားလုံးတွေ ဆိုတော့ အတွေး နဲ့ ဆက်စပ်တဲ့ပုံရိပ်တွေပါပဲ ..။
ဒေါက်တာ အီမိုတို ဟာ ၁၉၉၀ ခုနှစ်လောက်ကစပြီး သူ့ရဲ့ စမ်းသပ်ချက်တွေကို ပြုလုပ်ခဲ့တာ ဖြစ်ပါတယ်..။
ဒေါက်တာ အီမိုတို ဟာ Yokohama, Japan, မှာမွေးဖွားခဲ့ပြီး Yokohama Municipal University မှ နိုင်ငံတကာဆက်ဆံရေး International Relations ဘာသာရပ် နဲ့ ဘွဲ့ ရရှိခဲ့ ပါတယ်..။
( ဘဝ အတွက် ရေ- Water For Life Foundation) မှာ ဥက္ကဋ္ဌ အဖြစ် ဆောင်ရွက်ခဲ့ပြီး ၁၉၉၂ ခုနှစ်မှာအင်ဒီးယား တက္ကသိုလ် Open International University for Alternative Medicine မှ *Doctor of Alternative Medicine* ဘွဲ့ ကိုရရှိခဲ့ သူဖြစ်ပါတယ်..။ မြန်မာ မှာဆိုရင် ဆရာ ဒေါက်တာခင်မောင်လွင် တို့ ဆရာမကြီး ဒေါက်တာ ဒေါ်ခင်နွယ် ဝင်း တို့ လို က်စားခဲ့တဲ့ ဆေးပညာလိုမျိုးပါ..။
သူလုပ်ခဲ့တဲ့ စမ်းသပ်ချက်ကတော့ ရေ ရဲ့ ခရစ္စတယ် ဖြစ်မှု ဟာ စိတ်ရဲ့ စွမ်းအင်များ ၊ ရိုက်ခတ်လှုပ်ရှား မှု များနဲ့ ဆက်စပ်ပတ်သက်နေတယ် လို့ ယုံကြည်ခဲ့ပါတယ်…။ ရေ တစ်မျိုးတစ်စားတည်းကို ဖန်ခွက် များစွာမှာ ခွဲ ထည့်လိုက်ပါတယ်..။ တစ်ခွက်စီမှာ ရှိတဲ့ရေ တွေကို စကားလုံးအသီးသီး နဲ့ ထိတွေ့ စေပါတယ်..။ ဂီတ သံ ၊ ဘုရားရှိခိုးသံ စသည်ဖြင့်လည်းပါပါတယ်..။
ပြီးတော့ ထိုရေခွက်အသီးသီးကို အေးခဲစေပြီး crystals များကို microscopic photography ရိုက်ပါတယ်..။
ဒေါက်တာအီမိုတို သုံးစွဲခဲ့တဲ့ စကားလုံး တွေကတော့
၁။ “You make me sick, I will kill you”
၂။ “Adolph Hitler”
၃။ “Thank you”
၄။ “Love and Appreciation” စတာ တွေဖြစ်ပြီး အင်္ဂလိပ်ဘာသာ၊ ဂျာမန် ဘာသာ စသည်ဖြင့်လည်း ခွဲခြားစမ်းသပ်ခဲ့ ပါ သေးတယ်..။
ဒေါက်တာ အီမိုတို ဟာ ဓာတ်ပုံဆရာ တစ်ယောက်ကို ငှားရမ်းခဲ့ပြီးနောက် ဓာတ်ပုံရိုက်စေခဲ့ပါတယ်..။ ရေ ကိုခဲလိုက်ပြီးနောက် ခရစ္စတယ် ရဲ့ Molecular Structure အမျိုးမျိုးဖြစ်နေတာ ထူးခြားတဲ့ ပုံ-စံတွေကို တွေ့ တဲ့အခါကျတော့မှ ထိုပုံအသီသီးကို နာမည် ကပ်ပါတယ်..။
အကောင်းမြင်စိတ်ထားနဲ့ မေတ္တာဓာတ်အပြည့် ပြောဆိုတာ ကျတော့ အချိုးအစားကျနစွာ လှပနေတာတွေ့ ရပါတယ်..။
အမုန်းဓာတ် နဲ့ ရှုံ့ချပြောဆိုတဲ့စကားလုံး နဲ့ ထိတွေ့ ခံရတဲ့ ရေ မှာတော့ အချိုးမကျ တဲ့အပြင် မလှပတဲ့ ခရစ္စတယ် ဖြစ်နေတာကို ပုံမှာပါတဲ့အတိုင်း မြင် တွေ့ ရပါတယ်..။
ဟစ်တလာဆိုသူအကြောင်း စကားလုံးဆိုရင်တော့အမုန်းနဲ့ပုံဖော်ရတော့မလှပါ။ မာသာထရီဆာ ဆိုရင် လှပါတယ် ။
ဆူညံတဲ့ heavy metal ဂီတသံကတော့ ရေ crystal ကိုတောင် ယိုင်ရွဲ့စေတယ်စေရင် နားထောင်သူများချင့်ချိန် ရမယ်လို့ ကျွန်မထင်ပါတယ် ။
ဘာသာစကားတွေ ဘယ်လို ပဲပြောင်းပြောင်း ရိုင်းစိုင်းတဲ့ ဘန်းစကား တွေ ကြမ်းတမ်းတဲ့ နှုတ်ထွက်စကား တွေက ရေရဲ့ ဖွဲ့စည်းမှုကို ပျက်စေပါတယ်..။ ဒါကြောင့်စိတ်ရဲ့ စွမ်းအင် သည် Ultra Violet Light သို့မဟုတ် Electromagnetic Wave ကဲ့သို့ ရိုက်ခတ်မှု ကြောင့်ဖြစ်တယ် လို့ ဒေါက်တာ အီမိုတို က ဆိုခဲ့တာပါ..။
ဒေါက်တာအီမိုတို ရေးသားခဲ့တဲ့ The Hidden Messages of Water စာအုပ်ဟာ New York Times best seller အရောင်းရဆုံးစံချိန်တင်ခဲ့ပါတယ်..။
“Messages from Water 1” ကို (1999)ခုနှစ် တွင်လည်းကောင်း
“Messages from Water 2” ကို (2002), ခုနှစ် တွင်လည်းကောင်း
“Messages from Water 3” ကို (2004), ခုနှစ် တွင်လည်းကောင်း
“Messages from Water 4” ကို (2008) ခုနှစ် တွင်လည်းကောင်း ထုတ်ဝေခဲ့တာ ကမ္ဘာ့အရောင်းရဆုံး စံချိန်တင်နိုင်ခဲ့ပါတယ်..။
၂၀၀၁ ခုနှစ် မှာ တော့ အရင်စာအုပ်တွေ ထဲ မှာဖေါ်ပြသလို ပုံ တွေ မပါဝင်ပဲ (Water Knows the Answer- ရေ ကအဖြေ ကိုသိသည် ။ ) ဆို တဲ့နာမည် နဲ့ ရှင်းလင်းချက် များယူဆချက်များ ကိုသာဖေါ်ပြခဲ့ပါတယ်..။ အဲဒီစာအုပ်ကလည်းဂျပန် မှာသာမကဘူး ကမ္ဘာ မှာ ပါ နာမည် ကျော်ကြားလူကြိုက်များခဲ့ပါတယ်..။
ကမ္ဘာ ပေါ် မှာ ရှုပ်ထွေး ဆန်းကြယ် လှသော အရာများစွာရှိပါတယ်..။ အကြောင်း ရင်းကို သိအောင်ကြိုးစားလေ နားလည် နိုင်စွမ်းကင်းမဲ့ရလေလေ ဖြစ်ရပါတယ် တဲ့..။
ရှုပ်ထွေးနက်နဲသောအကြောင်းအရာများစွာရဲ့ ၃ % လောက်ကိုသာ နားလည် နိုင်ကြပြီး ၉၇ % ကတော့ ရှုပ်ထွေးနက်နဲနေဆဲ လို့ ဒေါက်တာ အီမိုတို ကဆိုပါတယ်..။
သိပ္ပံ လောက မှာကတော့ ပြီးပြည့်စုံ တဲ့ Experimental Design တွေ မဟုတ်လို့ ဆိုပြီး ဒေါက်တာ အီမိုတိုရဲ့ စမ်းသပ်ချက်ကို Pseudo Science သိပ္ပံအတု လို့ ဝေဖန် ကြတာတွေလည်းရှိခဲ့ပါတယ်..။
ကျွန်မ ကတော့ ဘုရားရှင် ရဲ့ တရားတော် နဲ့ ကိုက်ညီ မှု ရှိလို့ ယုံကြည်လက်ခံ ပါတယ်..။ လိပ်ဥများစွာ ဥချ ခဲ့တဲ့ လိပ်မကြီး ဟာ လိပ်ကလေး တွေကို အဝေးရောက်နေသော်လည်းမေတ္တာဖြန့်ကျက်နိုင်လို့ အကောင်ပေါက်စေခဲ့တယ်..။ တစ်စုံတရာကြောင့်လိပ်မကြီး သေဆုံးခဲ့လျှင်အကောင်မပေါက်တော့ တဲ့ သဘာဝ တရား များလည်း ရှိထားသည်ပင် ..။
ကျွန်မတို့ ရဲ့ကျေးဇူးတော်ရှင် ပိုင်းလော့ဆရာတော်ဘုရား ရဲ့ ( အချိန်တိုင်းတွေး နေရင်းဘဝပြောင်းနေသည် ) ဆိုတဲ့ စကားလုံး ကို ဒေါက်တာ အီမိုတို ရဲ့ စမ်းသပ်ချက်ကထောက်ခံ ရာရောက်တယ် လို့ ထင်မြင်မိပါတယ်..။
မေတ္တာတရားရဲ့ စွမ်းအင်များ တစ်နည်း Love Energy ကြောင့် သက်မဲ့ ဖြစ်တဲ့ ရေ ရဲ့ Crystal Structure တောင်ပြောင်းလဲ နိုင်စွမ်း ရှိတယ် ဆိုလျှင်…သက်ရှိဖြစ်တဲ့ ကျွန်မ ချစ်တဲ့ သစ်ပင်များ နဲ့ ချစ်ခင်မြတ်နိုးစွာ စကား ပြောဆို ပါလျှင် လှပစွာ ရှင်သန်စိမ်းလန်းစေမယ်ဆိုတာကိုဖြင့် တကယ် ပဲ ယုံကြည် မိပါတယ်..။
ထို့ထက် ထို့ထက်….. သက်ရှိသတ္တဝါများ…. လူသား များ အားလုံးသည် ချစ်ခင်မြတ်နိုးခြင်း ၊တန်ဘိုးထားလေးစားခြင်း ရဲ့ အဓိပ္ပါယ် များ လွှမ်းခြုံ လျက် ရှိစေ ရန် ကျွန်မ ဆုတောင်း လိုပါတယ်..။ ထို မေတ္တာ ရဲ့ စွမ်းအင်များကြောင့် လောက ကမ္ဘာ သာယာ လှပပါစေကြောင်း ယုံကြည်မျှော်လင့်လျှက် ။
မေတ္တာဖြင့်
သစ္စာအလင်း
( 20.July 2015)
