06/07/2022
စိတ်ကူးဉာဏ်ဆိုတာ စာစီစာကုံးအတွက်
သိပ်အရေးပါတဲ့အရာပါ
ပေးထားတဲ့ စာတစ်ကြောင်းကိုကြည့်ပြီး
အတွေးပွားရတဲ့အခါ စိတ်ကူးဉာဏ်က အခရာပါ
ဉာဏ်ကွန့်မြူးရင်း အတွေးတွေကို ချရေးလိုက်ရင်
စာတစ်ကြောင်းဟာ စာတစ်ပိုဒ်ဖြစ်လာရပါတယ်
ဥပမာ နံနက်ခင်း၏သာယာပုံ လို့ပေးထားတယ်ဆိုပါတော့
ကိုယ်က သာယာပုံတွေကို စတင်တွေးရပါတော့မယ်
နံနက်ခင်းရဲ့မြင်ကွင်းကို စိတ်အတွေးမှာ ပုံဖော်ရပါပြီ
ပထမဆုံး ကောင်းကင်ကြီးရဲ့ သာယာပုံအရင်တွေးမယ်
ပြီးရင် နေထွက်ချိန်ရဲ့ သာယာပုံကို မြင်မယ်
ပန်းပင်လေးတွေရဲ့ အလှနဲ့ ပတ်ဝန်းကျင် သာယာပုံ
ငှက်ကလေးတွေရဲ့ လှုပ်ရှားပုံ အသံကြားရပုံတွေ
လေညင်းတိုက်ခတ်လာတဲ့အခါ သာယာသွားတာ
ဒါလေးတွေကို ဆက်စပ်အတွေးနဲ့ ဉာဏ်ကွန့်လိုက်တဲ့အခါ
စာတစ်ကြောင်းကနေ စာတစ်ပိုဒ်ဖြစ်သွားတာပါပဲ
ကျောင်းသားတစ်ယောက်ဟာ ကိုယ့်ဉာဏ်ကို
အသုံးချ တွေးတောမယ် မှတ်သားမယ် ဆိုရင်
စာစီစာကုံးတင်မကပါဘူး အခြားသောဘာသာရပ်တွေမှာပါ
အတွေးဉာဏ်နဲ့ စဉ်းစားအသုံးချတတ်လာပါလိမ့်မယ်
ဒါတင်မကပါဘူး
လုပ်ငန်းခွင်တွေမှာပါ ပိုတွေးမိမယ်
ပိုပြီးစဉ်းစားလာမိမယ်
ဒီအခါ စိတ်ကူးသစ်တွေ အတွေးသစ်တွေပေါ်လာပါလိမ့်မယ်
စာသင်ခြင်းဟာ စာဖတ်တတ်ဖို့ဆိုတာထက်
သင်ကြားလိုက်တဲ့အကြောင်းအရာတိုင်းပေါ်မှာ
တွေးတောဆင်ခြင်မှတ်သားပြီး လက်တွေ့ဘဝထဲထိ
ခေါ်လာနိုင်ဖို့လိုပါတယ်
မြန်မာစာသင်ရင် မြန်မာစာရဲ့လေးနက်မှုတွေ
တွေးခေါ်စဉ်းစားနိုင်ဖို့တွေ မြန်မာ့ဓလေ့တွေ မြန်မာ့အကြောင်းတွေ
သင်ခန်းစာယူဖို့တွေကို လက်တွေ့ဘဝထဲထိ ခေါ်နိုင်ရပါမယ်
ကိုယ်တွေ့သိပြီး ကိုယ်တွေ့အသုံးချနိုင်ရပါမယ်
မြန်မာစာသင်ပြီး ဘာမှမရလိုက်ရင်တော့
မြန်မာစာဖတ်တတ်တာပဲ ဖြစ်သွားပါလိမ့်မယ်
သင်ကြားမှုတိုင်းကို
စိတ်ကူးဉာဏ်လေးနဲ့ တွေးခေါ်စဉ်းစားပြီး
ဘာသာရပ်တိုင်းကို လေ့လာအားထုတ်မယ်ဆိုရင်
မြန်မာစာ စာစီစာကုံးသာမကပါဘူး
အင်္ဂလိပ်စာရော အခြားဘာသာရပ်တိုင်းမှာ ထူးချွန်လာမယ်
အသိအတွေးတွေလည်း ပိုရင့်ကျက်လာပါလိမ့်မယ်
စိတ်ကူးဉာဏ်တိုးဖို့ဆိုရင် လုပ်ရမှာက
စာဖတ်ပါ စာများများဖတ်ပါ
ဖတ်သမျှစာတွေဆီကနေ သင်ယူလိုက်ရ သိလိုက်ရတဲ့
အရာမှန်သမျှကို လက်တွေ့ဘဝထဲမှာအသုံးချပါ
ဒါဆိုရင်တော့ ပညာတတ်ဖြစ်လာပါပြီနော်
စာများများဖတ်ပါ စာစီစာကုံးတွေဖတ်ပါ
များများတွေးပါ များများဆင်ခြင်ပါ
စာထဲမှာပါတဲ့ တချို့အရာတွေကို မသိခဲ့ရင်
သိလိုတာမှန်သမျှ Google ခေါက်ရှာပါ
စာဖတ်အားတက်လာရင် အတွေးဉာဏ်ရင့်သန်လာပါလိမ့်မယ်
ဆင်ခြင်တတ်လာတဲ့အခါ
ဘဝမှာ အမှားနည်းသွားပါလိမ့်မယ်
ကိုယ်ရည်မှန်းတဲ့လမ်းတွေ မြင့်မားသွားပါလိမ့်မယ်
