Cele Cele Agri

🛑 ဆယ်စုနှစ်တစ်ခုကျော် ကြာလာပြီးတဲ့နောက်မှာတော့ ကျန်းမာရေးအတွက် အာဟာရမြှင့်ထားတဲ့ ခရမ်း ရောင် ခရမ်းချဉ်သီးတွေကို အမေရိကန်စိုက်ပျိုးရေးဦးစီးဌာန (United States of Agriculture Department) - (USDA) ကနေ စိုက်ပျိုးဖို့ ဘေးကင်းတယ်ဆိုပြီး အတည်ပြုလိုက်ပြီ ဖြစ်ပါတယ်။

👉 ဒီခရမ်းချဉ်သီးတွေဟာ ယခင်ရှိပြီးသား မျိုးကွဲတွေထက်ကို ဓာတ်တိုးဆန့်ကျင်ပစ္စည်း (antioxidants) တွေ ၁၀ ဆအထိ ပိုမိုထုတ်လုပ်နိုင်ဖို့ မျိုးဗီဇတွေကို ပြုပြင်ထားတာလည်း ဖြစ်ပါတယ်။

📌၂၀၀၈ ခုနှစ်တုန်းက Nature Biotechnology ဂျာနယ်ဟာ စိတ်ဝင်စားစရာကောင်းတဲ့ လေ့လာမှုတစ်ခုကို ဖော်ပြခဲ့ပါတယ်။

အန်သိုဆိုင်ရာနင်စ် (Anthocyanins) လို့ခေါ်တဲ့ ဓာတ်တိုးဆန့်ကျင်ပစ္စည်း အမြောက်အမြားကို ထုတ်လုပ်ဖို့ မျိုးဗီဇပြုပြင်ထားတဲ့ ခရမ်းချဉ်သီးတွေကို သုတေသနပြုလုပ်နေကြောင်း ဖော်ပြခဲ့တာ ဖြစ်ပါတယ်။

ဆောင်းပါးအပြည့်အစုံဖတ်ရန်>>>
https://bit.ly/3UuttCw



ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။

Green Way app ယူရန်👇
Android - http://bit.ly/greenwaymyanmar
iOS - https://apple.co/3MAoJGW
Web - https://greenwaymyanmar.com/
Channels
Telegram - https://t.me/greenwaymyanmar
Viber - https://bit.ly/3OMSLJo
Fb Group - https://bit.ly/3yeE0sO
Youtube - youtube.com/c/GreenWayapp
#ခရမ်းရောင်ခရမ်းချဉ်

#အမေရိကန်

🪹မြေဆီလွှာ ဓာတ်ခွဲစမ်းသပ်ခြင်းရဲ့ အကျိုးကျေးဇူးများ

သီးနှံတွေစိုက်ပျိုးတဲ့အခါ မြေပြင်ချိန်ကနေ စလို့ သီးနှံရဲ့ သက်တမ်းတစ်လျှောက်မှာ ဓာတ်မြေဩဇာတွေ၊ သဘာဝမြေဩဇာတွေကို ထည့်သွင်းအသုံးပြုကြလေ့ ရှိပါတယ်။ မြေဩဇာကျွေးခြင်းဟာ ကောင်းတဲ့အလေ့အကျင့် ဆိုပေမယ့် မလိုအပ်တဲ့အချိန် မလိုအပ်တဲ့ နေရာမှာ ကျွေးခဲ့ပြန်ရင်လည်း ထိရောက်မှုရှိမှာ မဟုတ်ပါဘူး။ ဒါ့ကြောင့် မိမိ အသုံးပြုလိုက်ရတဲ့ ငွေကြေး၊ လုပ်အားနဲ့ အမှန်တကယ် အကျိုး ရှိ/ မရှိ တို့ကို ပြန်လည်ချိန်ဆဖို့ လိုအပ်ပါတယ်။ ယခုလို စိုက်ပျိုးရေးသွင်းအားစုတွေ အဆမတန် ဈေးနှုန်းမြင့်တက်နေတဲ့ အချိန်မှာ ပိုလို့တောင် ချိန်ဆသင့်ပါသေးတယ်။

ယခုနောက်ပိုင်းမှာတော့ သီးနှံတွေ စိုက်ပျိုးရာမှာ ဓာတ်မြေဩဇာတွေ အသုံးပြုတဲ့အခါ အမှန်တကယ် ထိရောက်မှုရှိပြီး အထွက်နှုန်းကောင်းလာစေဖို့ အကျိုးအမြတ်တွေ ရရှိဖို့အတွက် မြေဆီလွှာကို ဓာတ်ခွဲစမ်းသပ်သင့်တယ်ဆိုတာ တောင်သူဦးကြီးတွေ အတော်များများ လက်ခံလာကြပီလည်း ဖြစ်ပါတယ်။ ယနေ့အချိန်မှာ မြေဆီလွှာဓာတ်ခွဲစမ်းသပ်နိုင်တဲ့ ဝန်ဆောင်မှုတွေလည်း ရှိနေတာမို့ အလွယ်တကူ စမ်းသပ်စစ်ဆေးနိုင်ကြပြီ ဖြစ်ပါတယ်။ စိုက်ခင်း မြေဆီလွှာကို စမ်းသပ်ရာမှာ မြေနမူနာကို ဓာတ်ခွဲခန်းရှိရာသို့ ပေးပို့စမ်းသပ်နိုင်သလို မိမိစိုက်ခင်းထဲမှာကိုပဲ အလွယ်တကူအသုံးပြုနိုင်တဲ့ မြေဆီလွှာ ဓာတ်ခွဲသေတ္တာ (soil test box) တွေ နဲ့လည်း စမ်းသပ်နိုင်ပါတယ်။ ဒါ့အပြင် မြေဆီလွှာရဲ့ ချဥ်/ ငန် ကိန်းကို အလွယ်တကူ တိုင်းတာနိုင်တဲ့ မြေ ချဥ်/ ငန် တိုင်း ကိရိယာ (pH meter) တွေကိုလည်း အသုံးပြုလို့ရပါတယ်။

မြေဆီလွှာရဲ့ အာဟာရဓာတ်တွေ ကုန်ခမ်းလာခြင်းနဲ့ ပျက်စီးလာခြင်းဟာ တောင်သူတွေအတွက် စိန်ခေါ်မှုတစ်ခု ဖြစ်ပါတယ်။ သင့်တော်မှု မရှိတဲ့ မြေဆီလွှာ စီမံခန့်ခွဲမှုတွေကြောင့် ကမ္ဘာတစ်ဝန်းမှာ အာဟာရပြည့်ဝတဲ့ မြေဆီလွှာ တန်ချိန်ပေါင်း ၂၄ ဘီလီယံဟာ နှစ်စဥ် ဆုံရှုံးနေတာလည်း ဖြစ်ပါတယ်။ မြေဆီလွှာကို ဓာတ်ခွဲစမ်းသပ်လိုက်ခြင်းအားဖြင့် မြေဆီလွှာရဲ့ အာဟာရဓာတ် ပါဝင်မှု၊ ချို့တဲ့နေမှု၊ ချဥ်/ ငန် ကိန်း ပမာဏ၊ အော်ဂဲနစ်ဒြပ်စင်များ ပါဝင်နေမှု စတာတွေကို သိရှိနိုင်မှာ ဖြစ်ပါတယ်။ မြေဆီလွှာ ဓာတ်ခွဲစမ်းသပ်မှုကနေ ရရှိလာတဲ့ အစီရင်ခံစာတွေဟာဆိုရင် ကျွန်ုပ်တို့ စိုက်ခင်းနဲ့ သင့်တော်မယ့် မြေသြဇာအသုံးချမှု အကြံပြုချက်တွေကိုလည်း ထိထိရောက်ရောက် ပေးနိုင်မှာ ဖြစ်ပါတယ်။ ဒါ့ကြောင့် မြေဆီလွှာကို ဓာတ်ခွဲစမ်းသပ်ခြင်းဟာ လယ်ယာစီမံခန့်ခွဲမှုအတွက် ကောင်းမွန်တဲ့ အကျိုးကျေးဇူးတွေကို ပေးစွမ်းနိုင်မှာ ဖြစ်ပါတယ်။

💁🏻‍♀️မြေဆီလွှာ ဓာတ်ခွဲစမ်းသပ်ခြင်းကနေ ရရှိနိုင်မယ့် အကျိုးကျေးဇူးများ

🪹 မြေဆီဩဇာ ကောင်းမွန်ခြင်းကို မြေဆီလွှာရဲ့ ဓာတုဂုဏ်သတ္တိ၊ ရုပ်ပိုင်းဆိုင်ရာ ဂုဏ်သတ္တိနဲ့ ဇီဝ ဂုဏ်သတ္တိများအပေါ်မှာ မူတည်ပြီး ဆုံးဖြတ်ကြတာ ဖြစ်ပါတယ်။ မြေဆီလွှာကို စမ်းသပ်စစ်ဆေးခြင်းအားဖြင့် မိမိရဲ့ စိုက်ခင်းမြေဆီလွှာမှာ ဖော်ပြပါ ဂုဏ်သတ္တိများ ရှိ/ မရှိကို သိရှိနိုင်မှာ ဖြစ်ပါတယ်။
🪹 မြေဆီလွှာကို စမ်းသပ်စစ်ဆေးခြင်းဟာ မြေဆီလွှာနဲ့ သက်ဆိုင်တဲ့ အချက်အလက်တွေကို ပိုမိုသိရှိစေပြီး မြေဆီလွှာတိုက်စားမှု၊ မြေဆီဩဇာညံ့ဖျင်းမှုနဲ့ ပျက်စီးယိုယွင်းခြင်းကဲ့သို့သော မြေဆီလွှာဆိုင်ရာ အန္တရာယ်တွေကို လျှော့ချပေးနိုင်မှာဖြစ်ပြီး ရေရှည်မှာ လယ်ယာလုပ်ငန်းမှ အကျိုးအမြတ်တွေကို တိုးမြင့်လာစေမှာ ဖြစ်ပါတယ်။
🪹 မြေဆီလွှာကို စမ်းသပ် စစ်ဆေးလိုက်ခြင်းအားဖြင့် အပင်အတွက် အများဆုံးလိုအပ်တဲ့ နိုက်ထရိုဂျင်၊ ဖော့စဖောရပ်နဲ့ ပိုတက်စီယမ် ကဲ့သို့ အရေးပါတဲ့ အာဟာရဓာတ်တွေ မိမိစိုက်ခင်း မြေဆီလွှာထဲမှာ ပမာဏဘယ်လောက်ရှိနေတယ်၊ ဘယ်နေရာမှာရှိနေတယ် ဆိုတာမျိုး သိရှိခွင့် ရမှာဖြစ်ပါတယ်။
🪹 ဓာတ်ခွဲစမ်းသပ်တဲ့အခါ မြေဆီလွှာကျန်းမာရေးအတွက် အရေးပါသလို သီးနှံတွေရဲ့ အထွက်နှုန်းအပေါ်မှာ သက်ရောက်နိုင်တဲ့ ဂုဏ်သတ္တိတွေဖြစ်တဲ့ ချဥ်/ ငန် ကိန်း (pH)၊ မြေဆီလွှာရှိ ဆားပျော်ဝင်မှု (Soil electrical conductivity – EC)၊ မြေဆီလွှာမှာရှိတဲ့ အော်ဂဲနစ် ဒြပ်စင်ပမာဏ (Organic content – OC) စတာတွေရဲ့ အခြေအနေကို သိရှိခွင့် ရမှာ ဖြစ်ပါတယ်။
🪹 မြေဆီလွှာကို စမ်းသပ်စစ်ဆေးခြင်းဖြင့် တောင်သူများအနေနဲ့ အာဟာရဓာတ်တွေနဲ့ ရေကို ထိရောက်စွာ အသုံးချနိုင်မှာဖြစ်ပြီး စိုက်ပျိုးရေးဆိုင်ရာ ကုန်ထုတ်စွမ်းအားကိုလည်း တိုးတက်စေနိုင်မယ့် နည်းလမ်းဖြစ်ပါတယ်။
🪹 မြေဆီလွှာ ဓာတ်ခွဲစမ်းသပ်ခြင်းဖြင့် မြေဆီလွှာနဲ့ သီးနှံပင်တွေရဲ့ အာဟာရ လိုအပ်မှုအပေါ် မူတည်ပြီး အသုံးပြုရမယ့် မြေဩဇာအမျိုးအစား၊ နှုန်းထား၊ အသုံးပြုရမယ့်အချိန်နဲ့ နေရာများကိုပါ အတိအကျ သိရမှာ ဖြစ်ပါတယ်။
🪹 မြေဆီလွှာနဲ့ သီးနှံအတွက် အမှန်တကယ်လိုအပ်တဲ့ မြေဩဇာအမျိုးအစားနဲ့ နှုန်းထားများ သိရှိရမှာ ဖြစ်တဲ့အတွက် မလိုအပ်တဲ့ ဓာတ်မြေဩဇာတွေ ဝယ်ယူအသုံးပြုရခြင်းအတွက် ငွေကြေးကုန်ကျမှု လျော့နည်းသွားမှာလည်း ဖြစ်ပါတယ်။
🪹 မြေဆီလွှာကို ဓာတ်ခွဲစမ်းသပ်လိုက်တဲ့အတွက် စိုက်ခင်းအတွက် အသုံးပြုရမယ့် အာဟာရဓာတ်တွေကို အတိအကျ သိနိုင်ကာ အပင်ညီညာပြီး ကြီးထွားမှုကောင်းခြင်း၊ ပေါင်းမြက်များနဲ့ ကောင်းစွာ ယှဥ်ပြိုင်နိုင်ခြင်း၊ သီးနှံများရင့်မှည့်မှု ညီညာခြင်းနဲ့ အရည်အသွေး ကောင်းခြင်း စတဲ့ ကောင်းကျိုးတွေလည်း ရရှိနိုင်မှာ ဖြစ်ပါတယ်။
🪹 မြေဆီလွှာရဲ့ အာဟာရပါဝင်မှုကို မသိဘဲ ဓာတ်မြေဩဇာတွေ အသုံးပြုတဲ့အခါမှာ မြေဩဇာအလွန်အကျွံ သုံးစွဲတာမျိုးဖြစ်နိုင်ပါတယ်။ မြေဩဇာတွေ အလွန်အကျွံ သုံးစွဲတဲ့အခါမှာ ရလဒ်အနေနဲ့ မြေဩဇာလောင်ပြီး အရွက်တွေဝါလာတာမျိုး၊ ကျွေးလိုက်တဲ့ အဟာရတွေ တဖြည်းဖြည်း စိမ့်ထွက်ကုန်တာမျိုး၊ ပတ်ဝန်းကျင်နဲ့ ရေထုကို ညစ်ညမ်းစေတာမျိုးအပြင် ရေနေသတ္တဝါတွေကို ထိခိုက်တာမျိုးအထိ ဖြစ်နိုင်ပါတယ်။ ဒါ့ကြောင့် မြေဆီလွှာကို ဓာတ်ခွဲစမ်းသပ်ခြင်းဖြင့် မြေဩဇာအလွန်အကျွံ သုံးစွဲတာမျိုးကို ကာကွယ်ပေးနိုင်မှာ ဖြစ်ပါတယ်။

ဒါ့ကြောင့် တောင်သူဦးကြီးများအနေဖြင့် ဓာတ်မြေဩဇာတွေကို ပုံမှန်အသုံးပြုနေတာထက် မိမိစိုက်ခင်းရဲ့ မြေဆီလွှာနဲ့ အပင်တွေအတွက် အမှန်တကယ်လိုအပ်မယ့် မြေဩဇာအမျိုးအစားနဲ့ နှုန်းထားများကို သိရှိပြီး အသုံးပြုတာက အချိန်ကုန်သက်သာ၊ လူအား ငွေအား သက်သာပြီး အကျိုးရှိစေမှာ ဖြစ်ပါတယ်။ ဒါ့ကြောင့် မြေဆီလွှာကို ဓာတ်ခွဲစမ်းသပ်ပြီးမှ ဓာတ်မြေဩဇာတွေကို အသုံးပြုကြဖို့ အကြံပြုလိုက်ရပါတယ်ခင်ဗျာ…

Htoo (Agri)

Ref:
https://www.harvestogroup.com/
https://www.agrocares.com/

အရည်အသွေးကောင်းတဲ့ မျိုးစေ့ဆိုတာ

သီးနှံတွေစိုက်ပျိုးဖို့ မျိုးစေ့တွေရွေးချယ်ရာမှာ နှစ်လိုဖွယ်လက္ခဏာတွေ ပါရှိနေတဲ့ မျိုးစေ့တွေကို အရည်အသွေးကောင်းတဲ့ မျိုးစေ့ရယ်လို့ ခေါ်ဆိုကြပါတယ်။ အရည်အသွေးကောင်းတဲ့ မျိုးစေ့ဆိုတာ ယေဘူယျအားဖြင့် အပင်ပေါက်နှုန်းကောင်းတာ၊ အစိုဓာတ်နဲ့ အလေးချိန်မှန်ကန်မှုရှိတာ၊ ပိုး ရောဂါကင်းစင်တာ စတဲ့ လက္ခဏာတွေရှိရမှာ ဖြစ်ပါတယ်။ နောက်တစ်ချက်ကတော့ အရည်အသွေးကောင်းတဲ့ မျိုးစေ့ရယ်လို့ ဆိုလိုက်တာနဲ့ တပြိုင်နက် အပင်ပေါက်ကောင်းခြင်း၊ လျင်မြန်စွာ ပေါက်ရောက်နိုင်ခြင်းနဲ့ ကျန်းမာသန်စွမ်းခြင်း စတဲ့ အချက်တွေအပေါ်မှာလည်း ကောင်းကောင်း အာမခံနိုင်ရမှာ ဖြစ်ပါတယ်။

အရည်အသွေးကောင်းတဲ့ မျိုးစေ့တွေမှာ ရှိသင့်တဲ့ အခြေခံ လက္ခဏာတွေကတော့ အောက်ပါအတိုင်း ဖြစ်ပါတယ်။
- မျိုးဗီဇအရ သန့်စင်မှု မြင့်မားခြင်း
- ရုပ်ပိုင်းဆိုင်ရာ သန့်စင်မှု မြင့်မားခြင်း
- မျိုးအပေါ်မူတည်ပြီး ကောင်းမွန်သော ပုံသဏ္ဍာန်၊ အရွယ်အစား၊ အရောင်အသွေးများ ပိုင်ဆိုင်ခြင်း
- ရုပ်ပိုင်းဆိုင်ရာ ကျန်းမာသန်စွမ်းပြီး မှန်ကန်သော အလေးချိန်ရှိခြင်း
- မျိုးညှောင့်ပေါက်မှု ကောင်းခြင်း

အရည်အသွေးကောင်းတဲ့ မျိုးစေ့တွေကို ဘာကြောင့် ရွေးချယ် အသုံးပြုသင့်တာလဲ?
အရည်အသွေးကောင်းတဲ့ မျိုးစေ့တွေကို ရွေးချယ်စိုက်ပျိုးတဲ့အခါမှာ
- မျိုးစေ့နှုန်းထား လျော့ချနိုင်ခြင်း
- အပင်ပေါက်နှုန်း မြင့်မားခြင်း
- အစားထိုး ပြန်လည်စိုက်ပျိုးရတာ လျော့နည်းခြင်း
- အပင်များ တညီတညာတည်း ကြီးထွားနိုင်ခြင်း
- သီးနှံများ ကြီးထွားသန်မာစေခြင်း
- ပေါင်းပြဿနာ လျော့နည်းစေခြင်း
- အင်းဆက်ပိုးမွှားများနဲ့ ရောဂါများကို ခံနိုင်ရည်ရှိခြင်း စတဲ့ အကျိုးကျေးဇူးတွေ ရရှိနိုင်မှာ ဖြစ်ပါတယ်။


မျိုးစေ့ရွေးချယ်ရာမှာ အရေးပါတဲ့ အချက်များ

ညစ်ညမ်းမှု (Impurity)
မျိုးစေ့ထဲမှာ ပါဝင်နေတဲ့ ညစ်ညမ်းမှု မှန်သမျှကို ရည်ညွှန်းတာ ဖြစ်ပါတယ်။ အထူးသဖြင့် ပေါင်းပင်မျိုးစေ့များ၊ အခြားသီးနှံတွေရဲ့မျိုးစေ့များ၊ မလိုလားအပ်တဲ့ ညစ်ညမ်းမှုများ (အမှိုက်သရိုက်၊ ဖုန်၊ သဲ၊ ကျောက်ခဲ) စတာတွေ ပါဝင်နေမယ်ဆိုရင်တော့ သန့်စင်ကောင်းမွန်တဲ့ မျိုးစေ့လို့ ခေါ်ဆိုနိုင်မှာ မဟုတ်ပါဘူး။
မျိုးစေ့အရွယ်အစား (Seed size)
မျိုးစေ့အရွယ်အစားဟာလည်း ယေဘူယျအားဖြင့် အရေးပါတဲ့ လက္ခဏာတစ်ရပ်ဖြစ်ပါတယ်။ မျိုးစေ့အရွယ်အစား မှန်ကန်သင့်တော်မှု ရှိမယ်ဆိုရင် ကျန်းမာသန်စွမ်းတဲ့ အပင်ပေါက်တွေကို ရရှိအောင် စွမ်းဆောင်ပေးနိုင်မှာ ဖြစ်ပါတယ်။
ထိခိုက်ပျက်စီးမှုနဲ့ ပိုးရောဂါကျရောက်မှု (Damaged or infected seed)
အရည်အသွေးကောင်းတဲ့ မျိုးစေ့ဆိုတာ မလိုလားအပ်တဲ့ပစ္စည်းများနဲ့ ပိုးမွှား ရောဂါ ကျရောက်နေတဲ့ မျိုးစေ့တွေ ကင်းစင်ဖို့ လိုအပ်ပါတယ်။ ဒါ့အပြင် ထိခိုက်ပျက်စီးနေတဲ့ မျိုးစေ့တွေကို စိုက်ပျိုးမယ်ဆိုရင် အပင်ပေါက်နှုန်း ကျဆင်းမှာဖြစ်သလို အပင်ငယ်လေးတွေရဲ့ ကျန်းမာသန်စွမ်းမှုကိုလည်း ထိခိုက်မှာဖြစ်တာကြောင့် သတိပြုရမှာ ဖြစ်ပါတယ်။ ​​

မျိုးစေ့ ရှင်သန်နိုင်မှုအတွက် အရေးပါတဲ့ အချက်များ

အစိုဓာတ်ပါဝင်မှု (Moisture content)
အစိုဓာတ်ဟာ မျိုးစေ့ရဲ့ အသက်ရှင်နိုင်မှုနဲ့ ကျန်းမာသန်စွမ်းမှုတို့အပေါ်မှာ လွှမ်းမိုးမှု ရှိတာဖြစ်ပါတယ်။ မျိုးစေ့တွေကို သက်တမ်းကြာရှည်စေချင်တယ် အချိန်ကြာမြင့်စွာ သိုလှောင်ထားချင်တယ် ဆိုရင်တော့ အစိုဓာတ်ပါဝင်မှုကို ၁၂ - ၁၄ ရာခိုင်နှုန်းမှာ ထားရှိပေးဖို့ လိုအပ်ပါတယ်။
အပင်ပေါက်နှုန်း (Germination percentage)
ရှင်သန်နိုင်တဲ့ မျိုးစေ့အရေအတွက်ပေါ် မူတည်ပြီးတော့ မျိုးစေ့နှုန်းထားကို သတ်မှတ်တာ ဖြစ်ပါတယ်။ မျိုးစေ့နှုန်းထားဟာ ကောင်းစွာထိန်းချုပ်ထားနိုင်တဲ့ အခြေအနေအောက်မှာ မျိုးစေ့တွေကိုစမ်းသပ်ခြင်းနဲ့ အပင် ပေါက်လာတဲ့ မျိုးစေ့အရေအတွက်ကို ဆုံးဖြတ်ပြီး သတ်မှတ်ကြတာ ဖြစ်ပါတယ်။
ကျန်းမာသန်စွမ်းမှု (Seed vigor)
မျိုးစေ့ရဲ့ကျန်းမာသန်းစွမ်းမှုဟာ စိုက်ခင်းရဲ့ အခြေအနေတွေပေါ်မှာ များစွာသက်ရောက်မှုရှိတာ ဖြစ်ပါတယ်။ မိမိစိုက်ပျိုးတဲ့ သီးနှံရဲ့မျိုးအပေါ် မူတည်ပြီးတော့ အပင်ပေါက်နှုန်းက ကွာခြားမှုရှိနိုင်ပေမယ့် ကျန်းမာသန်စွမ်းတဲ့ မျိုးစေ့သာဖြစ်မယ်ဆိုရင် ယေဘူယျအားဖြင့် အစိုဓာတ်ကိုစုပ်ယူပြီး ၂ ရက်အတွင်းမှာ အမြစ် စထွက်မှာ ဖြစ်ပြီး ၄ ရက်အတွင်းမှာ ပထမအရွက် ထွက်ရှိလာရမှာ ဖြစ်ပါတယ်။ ကျန်းမာသန်စွမ်းတဲ့ မျိုးစေ့ဆိုတာဟာ အပင်ပေါက်ပြီးတာနဲ့ တပြိုင်နက် အဆက်မပြတ် ရှင်သန်ကြီးထွားနိုင်စွမ်းရှိဖို့လည်း လိုအပ်ပါတယ်။ သန်စွမ်းမှု နည်းတဲ့ မျိုးစေ့တွေကို စိုက်ပျိုးမယ်ဆိုရင် အားနည်းပြီး ထိခိုက်လွယ်မယ့်အပြင် ပတ်ဝန်းကျင်ရဲ့ ဖိစီးမှု (ဒဏ်) Stress တွေကိုလည်း ခံနိုင်ရည်နည်းမှာ ဖြစ်ပါတယ်။

Htoo (Agri)

Source
- https://pakagrifarming.blogspot.com/

ရှာလကာရည်ကို ပေါင်းနှိမ်နင်းရာတွင် အသုံးပြုခြင်း

သဘာဝအော်ဂဲနစ်နည်းနဲ့ သီးနှံတွေစိုက်ပျိုးတဲ့အခါ ရှာလကာရည်ကို သဘာဝပေါင်းသတ်ဆေးအနေနဲ့ အသုံးပြုကြလေ့ရှိပါတယ်။ ရှာလကာရည်မှာပါဝင်တဲ့ အက်စစ်ဂုဏ်သတ္တိဟာ (acetic acid) ပေါင်းပင်တွေကို ကာကွယ်နှိမ်နင်းပေးနိုင်တဲ့ အစွမ်းရှိတာကြောင့်ဖြစ်ပါတယ်။ အက်စစ်ဂုဏ်သတ္တိပိုများလေ ပေါင်းပင်တွေကို နှိမ်နင်းနိုင်လေ ဖြစ်ပါတယ်။ အိမ်တွေမှာ ချက်ပြုတ်စားသောက်တဲ့အခါ အသုံးပြုလေ့ရှိတဲ့ ရှာလကာရည်တွေကတော့ အက်စစ်ဂုဏ်သတ္တိနည်းပါတယ်။ အများအားဖြင့် ၅ ရာခိုင်နှုန်းခန့်သာ ပါဝင်လေ့ရှိပါတယ်။ ဒါ့ကြောင့် သီးနှံစိုက်ခင်းတွေမှာ ပေါင်းနှိမ်နင်းဖို့ အသုံးပြုမယ်ဆိုရင်တော့ အက်စစ်ဂုဏ်သတ္တိပမာဏ ၂၀ ကနေ ၃၀ ရာခိုင်နှုန်းရှိတဲ့ ရှာလကာရည်တွေကို ရွေးချယ်သင့်ပါတယ်။ အက်စစ်ဓာတ်ပါဝင်မှုများတဲ့ ရှာလကာရည်တွေကို အသုံးပြုမယ်ဆိုရင်တော့ စနစ်တကျသေချာကိုင်တွယ်ဖို့ လိုအပ်ပါတယ်။ အရေပြားနဲ့ မျက်နှာအစိတ်အပိုင်းတွေကို တိုက်ရိုက်ထိတွေ့တာမျိုး မဖြစ်စေဖို့ သေချာသတိပြုသင့်ပါတယ်။

တစ်ရာသီခံပေါင်းတွေကို နှိမ်နင်းရာတွင် မိမိစိုက်ခင်းမှာ နှစ်စဥ်ပေါက်ရောက်လေ့ရှိတဲ့ ပေါင်းအမျိုးအစား၊ ၎င်းတို့ရဲ့ မျိုးစေ့ချတဲ့အချိန် စတာတွေကို သိထားမယ်ဆိုရင်တော့ အလွယ်တကူ ကာကွယ်နှိမ်နင်းနိုင်မှာ ဖြစ်ပါတယ်။ နှစ်ရှည်ပေါက်ရောက်တဲ့ ပေါင်းတွေကို ကာကွယ်နှိမ်နင်းနိုင်ဖို့ကတော့ မလွယ်ကူလှပါဘူး။ နှစ်ရှည်ပေါင်းတွေကို မျိုးစေ့မပေါက်အောင် တားဆီးခြင်းဟာလည်း ထိရောက်တဲ့နည်းလမ်းတော့မဟုတ်ပါဘူး။ ဘာကြောင့်လဲဆိုတော့ ၎င်းတို့ကို နှိမ်နင်းလိုက်လို့သေဆုံးသွားပေမယ့်လည်း အမြစ်ကနေတဆင့် ပြန်လည်ရှင်သန်လာနိုင်တာကြောင့် ဖြစ်ပါတယ်။ ဒီလိုအခြေအနေမျိုးမှာတော့ ရှာလကာရည်ကို မကြာခဏ ပုံမှန်အသုံးပြုပြီး ကာကွယ်နှိမ်နင်းနိုင်ဖို့ လိုအပ်ပါတယ်။ ထပ်ခါထပ်ခါ အသုံးပြုခြင်းဖြင့် ပေါင်းတွေအားနည်းပြီး နောက်ဆုံးမှာ သေဆုံးသွားမှာ ဖြစ်ပါတယ်။

ပြုလုပ်နည်း
လိုအပ်တဲ့ ပစ္စည်းတွေကတော့ ပန်းကန်ဆေးဆပ်ပြာအရည်၊ အိမ်သုံးဆား၊ ရှာလကာရည်နဲ့ ဆေးဖျန်းမယ့် စပရေးဗူး (Spray bottle) တို့ပဲ ဖြစ်ပါတယ်။ ရှာလကာရည်မှာ ပါဝင်တဲ့ အက်စစ်ဓာတ်ဟာဆိုရင် ပေါင်းပင်မှာရှိတဲ့ ရေကိုစုပ်ယူပြီးတော့ အပင်တွေကိုခြောက်သွေ့ သေဆုံးသွားစေတာ ဖြစ်ပါတယ်။ ပန်းကန်ဆေးဆပ်ပြာအရည်ဟာ ပေါင်းပင်တွေရဲ့ အပြင်ဘက်အလွှာ သို့မဟုတ် ဖယောင်းအလွှာ (Cuticle layer) ကို ချေဖျက်ပေးပြီး ရှာလကာရည်ရဲ့ လုပ်ဆောင်ချက်တွေကို ထောက်ပံ့ပေးပါတယ်။ ယခုဖော်ပြမယ့် နှုန်းထားက မိမိနေအိမ် ခြံဝန်းအတွင်း တနိုင်တပိုင် ပေါင်းနှိမ်နင်းရာမှာ အသုံးပြုရမယ့် နှုန်းထားဖြစ်ပါတယ်။
ထည့်သွင်းရမယ့်နှုန်းထားကတော့
- ရှာလကာရည် ၁ ဂါလံ (အက်စစ်ဓာတ်ပါဝင်မှု ၅ ရာခိုင်နှုန်း)
- အိမ်သုံးဆား ၁ ခွက် (လက်ဖက်ရည်ပန်းကန်လုံး)
- ဆပ်ပြာအရည် ထမင်းစားဇွန်း ၁ ဇွန်း
၎င်းတို့ကို ရောစပ်ကာ အပြည့်အဝ ပျော်ဝင်သည်အထိ သေချာစွာမွှေပေးရမှာ ဖြစ်ပါတယ်။ အပြည့်အဝ ပျော်ဝင်ပြီဆိုရင်တော့ ဆေးဖျန်းနိုင်ပြီ ဖြစ်ပါတယ်။
ဒီသဘာဝပေါင်းသတ်ဆေးကို အသုံးမပြုခင် သိထားရမယ့် အချက်အလက်တချို့ရှိပါသေးတယ်။ အောက်ဖော်ပြပါအတိုင်း ဖြစ်ပါတယ်။
- ရှာလကာရည်ပေါင်းသတ်ဆေးမှာ ဓာတုဆေးတွေလို ရွေးချယ်ပေါင်းသတ်ပေးတဲ့ အာနိသင်မရှိတာကြောင့် အသုံးပြုရာမှာ အခြားသောအပင်တွေကို မထိခိုက်စေဖို့ သတိပြုသင့်ပါတယ်
- လေမတိုက်ဘဲ နေသာတဲ့အချိန်မျိုးတွေမှာ ဆေးဖျန်းသင့်ပါတယ်။ နေရောင်ဟာ ရှာလကာရည်ကြောင့် ပေါင်းပင်တွေ ခြောက်သွေ့သွားအောင် ကူညီပေးနိုင်ပါတယ်။ လေတိုက်နေရင် မလိုတဲ့နေရာကို ဆေးတွေရောက်သွားနိုင်တာကြောင့် သတိပြုသင့်ပါတယ်
- ရှာလကာရည်ပေါင်းသတ်ဆေးဟာ ပေါင်းပင်တွေရဲ့ အမြစ်ကိုတိုက်ရိုက်မထိတွေ့ပဲ အပေါ်ဘက် အစိတ်အပိုင်းတွေကိုသာ ထိခိုက်ပျက်စီးစေနိုင်တာကြောင့် ကြီးမားတဲ့ ပေါင်းပင်တွေနှိမ်နင်းမယ်ဆိုရင် သေချာ အသုံးပြုသင့်ပါတယ်
- တစ်ရာသီခံပေါင်းပင်တွေကိုတော့ အလွယ်တကူနှိမ်နင်းနိုင်ပေမယ့် နှစ်ရှည်ပေါင်းတွေကို နှိမ်နင်းရာမှာတော့ ခက်ခဲနိုင်တာကြောင့် စနစ်တကျနဲ့ အကြိမ်ကြိမ်အသုံးပြုပေးဖို့ လိုအပ်ပါတယ်

Htoo (Agri)

ကိုးကားချက်
- https://www.homeguides.sfgate.com/

ပျိုးပင်တွေမှာ ကျရောက်လေ့ရှိတဲ့ အဖြူရောင်မှိုများ

သီးနှံပင်တွေကို ပျိုးထောင်ပြီးစိုက်ပျိုးတဲ့အခါ ပျိုးခင်းထဲမှာရှိတဲ့ မြေဆီလွှာ မျက်နှာပြင်နဲ့ ပျိုးပင်လေးတွေပေါ်မှာ တစ်ခါတရံ အဖြူရောင်မှိုတွေရှိနေတာကို တွေ့မြင်ဖူးကြမယ်ထင်ပါတယ်။ အဲ့ဒီလို မြင်တွေ့ရခြင်းဟာ ပျိုးပင်တွေစိုက်ပျိုးထားတဲ့ ပတ်ဝန်းကျင်မှာ ပြဿနာတစ်စုံတစ်ခုရှိနေကြောင်း ညွှန်ပြနေတာလည်း ဖြစ်ပါတယ်။ မှိုတွေရဲ့ သဘောသဘာဝဟာ ပူနွေးစိုစွတ်တဲ့ ပတ်ဝန်းကျင်ကို ကြိုက်နှစ်သက်တာဖြစ်ပါတယ်။ ဒါ့ကြောင့် မှိုတွေဖြစ်ပေါ်လာတဲ့ ပြဿနာတွေကို အပူချိန်၊ အလင်းရောင်၊ စိုထိုင်းဆနဲ့ လေဝင်လေထွက်ကဲ့သို့ ပတ်ဝန်းကျင်အခြေအနေများကို ထိန်းညှိပေးခြင်းဖြင့် ဖြေရှင်းနိုင်ပါတယ်။ ပုံမှန်အားဖြင့်တော့ မျိုးစေ့ကနေပျိုးထောင်ပြီးစိုက်ပျိုးတဲ့အခါ အဖြူရောင်မှိုတွေတွေ့ရခြင်းဟာ ဖြစ်ရိုးဖြစ်စဥ်တစ်ခုလည်း ဖြစ်ပါတယ်။ ပျိုးပင်အများစုဟာ သဘာဝအရ ပူနွေးစိုစွတ်တဲ့ အခြေအနေကိုလိုအပ်တာမို့ ၎င်းအခြေအနေဟာ မှိုတွေကြီးထွားလာဖို့အတွက်လည်း ပြည့်စုံတဲ့အနေအထား ဖြစ်နေပါတယ်။ သို့ပေမယ့်လည်း ၎င်းမှိုတွေရှိနေခြင်းဟာ ပျိုးပင်တွေအတွက် အန္တရာယ်ရှိစေနိုင်ပြီး အရမ်းဆိုးရွားရင် သေစေနိုင်တဲ့အထိ ဖြစ်နိုင်တာမို့ ဂရုပြုဖို့လိုအပ်ပါတယ်။

အဖြူရောင်မှိုတွေဟာ ဘာအမျိုးအစားတွေလဲ?
ဒီဆောင်းပါးမှာ သုံးနှုန်းထားတဲ့ အဖြူရောင်မှိုဆိုတာက သီးခြားမှိုအမျိုးအစားတစ်ခုကို ဆိုလိုတာမဟုတ်ပါဘူး။ အဖြူရောင် (သို့မဟုတ်) အရောင်ခပ်မှိန်မှိန်ရှိတဲ့ မှိုတွေကို ရည်ညွှန်းပြီး ယေဘူယျခေါ်ဆိုတာ ဖြစ်ပါတယ်။ ပျိုးပင်တွေမှာ ကျရောက်တတ်တဲ့မှိုတွေဟာ တစ်မျိုးနဲ့တစ်မျိုးဆင်တူတာကြောင့် စိုက်ပျိုးတဲ့သူတွေအနေနဲ့လည်း ခွဲခြားရတာ ခက်ခဲလေ့ရှိပါတယ်။ ယေဘူယျအားဖြင့် ပျိုးပင်အဆင့်မှာ တိုက်ခိုက်လေ့ရှိတဲ့မှိုတွေကတော့ ဖားဥမှို (Powdery mildew)၊ ဖျူစေရီယမ် (Fusarium)၊ ရိုင်ဇိုတိုးနီးယား (Rhizoctonia)၊ စပရိုဖိုက်တစ် (Saprophytic) စတဲ့ မှိုတွေဖြစ်ပါတယ်။
အချို့သော အဖြူရောင်မှိုတွေဟာ ပျိုးပင်တွေပေါ်မှာပေါက်ရောက်လေ့ရှိပြီး အများစုကတော့ မြေဆီလွှာပေါ်နဲ့ ဆွေးမြေ့နေတဲ့ သဘာဝအော်ဂဲနစ်ပစ္စည်းတွေမှာ ရှင်သန်ပေါက်ရောက်ကြပါတယ်။ မှိုတွေဟာ ပျိုးပင်တွေကို တိုက်ရိုက်ထိခိုက်နိုင်မှု အလားအလာနည်းပေမယ့် အပင်ငယ်လေးတွေအတွက် အန္တရာယ်ရှိတဲ့ ပတ်ဝန်းကျင်တစ်ခုကိုတော့ ဖန်တီးနိုင်ပါတယ်။ သို့ပေမယ့်လည်း ဒီအခြေအနေမှာတော့ အပင်စိုက်ပျိုးသူတွေအနေနဲ့ မှိုအမျိုးအစား အတိအကျကို ခွဲခြားသတ်မှတ်ဖို့လောက်ထိ မလိုအပ်ဘဲ မှိုကျရောက်မှုကို ကြိုတင်ကာကွယ်ထားနိုင်ခြင်းကသာ ပိုပြီးအကျိုးရှိစေမှာ ဖြစ်ပါတယ်။

အဖြူရောင်မှိုတွေက အပင်ပေါက်တွေကို ထိခိုက်နိုင်သလား?
ပျိုးခင်းထဲမှာ အဖြူရောင်မှိုတွေကိုတွေ့ရှိပါက ချက်ချင်းဖယ်ရှားနိုင်မယ်ဆိုရင် ပျိုးပင်တွေဟာ ကောင်းကောင်းရှင်သန်နိုင်မှာ ဖြစ်ပါတယ်။ သို့သော် ပထမတစ်ကြိမ်ကာကွယ်ထားပြီးသော်လည်း ပတ်ဝန်းကျင်မှာ အပြောင်းအလဲမရှိဘဲ မှိုတွေထပ်တွေ့ရအုံးမယ်ဆိုရင်တော့ ပျိုးပင်တွေအတွက် အန္တရာယ်ရှိတဲ့အနေအထား ဖြစ်ပါတယ်။ ပျိုးပင်တွေမှာ မှိုတွေကျရောက်တာ များလာတဲ့အခါ စိုစွတ်ထိုင်းမှိုင်းခြင်းဆိုတဲ့ အနေအထားကို ဦးတည်လာမှာ ဖြစ်ပါတယ်။ အဲ့ဒီအခြေအနေမှာ ပျိုးပင်တွေဟာ များသောအားဖြင့် ဖြူဖျော့ကာ အမွှေးနုလေးတွေ တဖြည်းဖြည်းဖုံးအုပ်လာပြီး ပင်စည်ဟာလည်း ပျော့ပျောင်းလာမှာ ဖြစ်ပါတယ်။ ဒါ့အပြင် အရွက်တွေဟာလည်း အရောင်ပျက်ပြယ်ပြီး ပျော့လာမှာ ဖြစ်ပါတယ်။ မြေမျက်နှာပြင်အောက်မှာ ရှိနေတဲ့ အမြစ်တွေဟာလည်း ပုံမှန်ထက် သေးငယ်ပြီး အားနည်းလာမှာ ဖြစ်ပါတယ်။ ပျိုးပင်ဘဝမှာ စိုစွတ်ထိုင်းမှိုင်းခြင်းလက္ခဏာ တွေ့ရပြီဆိုတာနဲ့ ပြန်လည်ကောင်းမွန်ဖို့က အလားအလာနည်းသွားပြီ ဖြစ်ပါတယ်။ ဒီလိုအခြေအနေမျိုးကြုံတွေ့ရပြီဆိုရင်တော့ အရည်အသွေးကောင်းတဲ့မျိုးစေ့တွေနဲ့ ပြန်လည်အစားထိုးစိုက်ပျိုးပြီး ပတ်ဝန်းကျင်အခြေအနေတွေနဲ့ ချိန်ညှိကာ အလားတူပြဿနာမျိုး ထပ်မဖြစ်ပွားအောင် ကြိုတင်ကာကွယ်ခြင်းကသာ အကောင်းဆုံးနည်းလမ်း ဖြစ်ပါတယ်။

အဖြူရောင်မှိုများကို ကာကွယ်ခြင်း
၁။ အသုံးပြုမယ့် ပစ္စည်းကိရိယာများကို ပိုးသတ်ပါ
မျိုးစေ့ကို ချမစိုက်ခင်ကတည်းက စိုက်ပျိုးရာမှာ အသုံးပြုမယ့် ပစ္စည်းကိရိယာ တန်ဆာပလာတွေအားလုံးကို ကြိုတင်ပြီးပိုးသတ်ထားသင့်ပါတယ်။ အရေးမကြီးဘူးလို့ထင်ရပေမယ့် အဲ့လို ပစ္စည်းတွေကနေတစ်ဆင့် မှိုမျိုးစေ့ (mold spore) တွေပါဝင်လာနိုင်တာကြောင့် သေချာပြုလုပ်သင့်ပါတယ်။
၂။ သင့်တော်တဲ့ စပ်မြေအသုံးပြုပါ
ပျိုးပင်တွေစိုက်ပျိုးတဲ့မြေဟာ အလွန်စိုစွတ်နေမယ်ဆိုရင် မှိုတွေပေါက်ပွားလာမှာ ဖြစ်ပါတယ်။ ဒါ့ကြောင့် ပေါ့ပါးပြီး လေဝင်လေထွက်ကောင်းကာ ရေစိမ့်ဝင်နိုင်စွမ်းလည်းရှိတဲ့ မြေကိုရွေးချယ်သင့်ပါတယ်။ ပျိုးမယ့်မြေမှာ သဘာဝမြေဩဇာတွေ ထပ်ထည့်ပေးနိုင်မယ်ဆိုရင်တော့ အကောင်းဆုံးပါပဲ။ ဒါ့အပြင် တီကျစ်စာ၊ အုန်းဆံဖတ်၊ ကျောက်ပွ စတာတွေလည်းထည့်ပေးနိုင်ပါတယ်။
၃။ မြေသား စိုစွတ်မှုများခြင်းကို သတိပြုပါ
ပျိုးခင်းတွေကို ခြောက်သွေ့တာမျိုးမဖြစ်အောင် ဂရုစိုက်ရသလို အရမ်းကြီးစိုစွတ်နေတာမျိုးလည်း မဖြစ်သင့်ပါဘူး။ စိုစွတ်မှုများနေခြင်းဟာ မှိုတွေပေါက်ပွားဖို့အခြေအနေပေးသလို ပျိုးပင်တွေကိုလည်း လျင်လျင်မြန်မြန်ပုပ်သွားစေနိုင်တဲ့ အခြေအနေဖြစ်ပါတယ်။ ဒါ့ကြောင့် ပျိုးခင်းမှာရှိတဲ့ မြေသားကို အစိုဓာတ်မျှတမှု ရှိ မရှိ ၂ ရက် ၁ ကြိမ်ခန့် စစ်ဆေးသင့်ပါတယ်။
၄။ လေဝင်လေထွက်ကောင်းအောင် လုပ်ပေးပါ
ပျိုးပင်တွေရဲ့ ပတ်ဝန်းကျင်ကို လေဝင်လေထွက်ကောင်းအောင်ပြုလုပ်ပေးခြင်းဖြင့် ရေငွေ့ပျံခြင်းကို မြှင့်တင်ပေးနိုင်ပြီး ပတ်ဝန်းကျင်စိုစွတ်မှုကို ကာကွယ်ပေးနိုင်ပါတယ်။ ထို့ကြောင့် မှိုများထွက်ပေါ်လာနိုင်မှုကိုလည်း လျော့ချပေးနိုင်ပါတယ်။ အလုံပိတ်အခန်းတွေနဲ့ အပင်တွေပျိုးမယ်ဆိုရင်လည်း မျိုးစေ့ကနေ အညှောင့်ထွက်ပြီဆိုတာနဲ့ အနည်းဆုံး တစ်နေ့လျှင်တစ်ကြိမ် လေဝင်လေထွက်ရအောင် ပြုလုပ်ပေးသင့်ပါတယ်။
၅။ သင့်တော်တဲ့အပူချိန်မှာ ထားပါ
မိမိစိုက်ပျိုးမယ့် သီးနှံအပေါ်မူတည်ပြီး ပျိုးပင်တွေအတွက် သင့်တော်တဲ့အနေအထားအတိုင်း အပူချိန်ကိုထိန်းညှိပေးဖို့လိုအပ်ပါတယ်။ အကာအကွယ်မရှိဘဲ မြင့်မားတဲ့အပူချိန်နဲ့ အချိန်ကြာမြင့်စွာရှိမယ်ဆိုရင် ပျိုးပင်တွေကို ထိခိုက်နိုင်သလို မှိုတွေပေါက်ပွားဖို့လည်း အားပေးရာရောက်မှာ ဖြစ်ပါတယ်။
၆။ သင့်တော်တဲ့အလင်းရောင်မှာ ထားပါ
အလင်းရောင်ဟာလည်း ပျိုးပင်တွေရှင်သန်ကြီးထွားဖို့နဲ့ မှိုတွေပေါက်ပွားမှုကို တားဆီးရာမှာ အရေးပါတဲ့ အချက်တစ်ချက်ဖြစ်ပါတယ်။ ပျိုးပင်တွေ ကောင်းစွာကြီးထွားနိုင်ဖို့နဲ့ ရေငွေ့ပြန်ဖို့အတွက် တစ်နေ့ကို အလင်းရောင် ၁၆ နာရီရရှိဖို့ လိုအပ်တာ ဖြစ်ပါတယ်။ ဒါ့ကြောင့် အလင်းရောင်ကောင်းကောင်းရှိဖို့ မလွယ်ဘူဆိုရင်တော့ အပင်တွေစိုက်ပျိုးဖို့ ဖန်တီးပြုလုပ်ထားတဲ့ Grow Light တွေကို အသုံးပြုနိုင်ပါတယ်။
၇။ ပျိုးပင်အရေအတွက် သတိပြုပါ
အပင်စိုက်ပျိုးတဲ့အခါ အပင်ပေါက်နှုန်းကောင်းစေဖို့အတွက် မျိုးစေ့နှုန်းထားကို အများကြီးအသုံးပြုကြလေ့ရှိပါတယ်။ အရည်အသွေးကောင်းတဲ့ မျိုးစေ့တွေဆိုရင် စိုက်သမျှအားလုံးပေါက်နိုင်တာမို့ နေရာကျဥ်းကျဥ်းမှာ ပျိုးပင်တွေထူထပ်စွာ ပေါက်လာနိုင်ပါတယ်။ ပျိုးပင်တွေကြပ်သိပ်စွာ ပေါက်ရောက်နေခြင်းဟာ အမြစ်ရဲ့ပတ်ဝန်းကျင်မှာ လေဝင်လေထွက်မရှိတော့ဘဲ မှိုတွေပေါက်ပွားဖို့ကို ဦးတည်လာစေမှာ ဖြစ်ပါတယ်။ ဒီလိုအခြေအနေမှာတော့ သေးငယ်ပြီးလှီနေတဲ့ အပင်လေးတွေကို နုတ်ယူဖယ်ရှားပေးခြင်းဖြင့် ကာကွယ်နိုင်ပါတယ်။

Htoo (Agri)

ကိုးကားချက်
- https://www.picturethisai.com/

" ရေဝါးပင်ဆိုလို့ ဝါးမျိုးရင်းဝင်အပင်လို့ ထင်စရာရှိပါတယ်။ တကယ်တော့ ဝါးမျိုးရင်းဝင်အပင် မဟုတ်ပါဘူး။ ရေဝါးပင်ဟာ မီးကွင်းဂမုန်းပင်နဲ့ မျိုးရင်းတူတဲ့ အပင်ဖြစ်ပါတယ် "
========================================================

အင်္ဂလိပ်အမည် - Inchplant, Wandering Jew, Spiderwort
ရုက္ခဗေဒအမည် - Tradescantia zebrina

ရေဝါးပင်ဆိုလို့ ဝါးမျိုးရင်းဝင်အပင်လို့ ထင်စရာရှိပါတယ်။ တကယ်တော့ ဝါးမျိုးရင်းဝင်အပင် မဟုတ်ပါဘူး။ ရေဝါးပင်ဟာ မီးကွင်းဂမုန်းပင်နဲ့ မျိုးရင်းတူတဲ့ အပင်ဖြစ်ပါတယ်။

ရေဝါးပင်ဟာ ကျောက်ကပ်အတွက်ကောင်းစေတယ်၊ ဆေးဖက်ဝင်တယ်ဆိုပြီး အွန်လိုင်းပေါ်မှာ နာမည်ကြီးနေတဲ့ အပင်လည်းဖြစ်ပါတယ်။

အပင်စိုက်ပျိုးသူတွေကြားမှာတော့ မြက်ကြွပ်ပြာပင် ဆိုပြီးတော့လည်း ခေါ်ဆိုကြပါသေးတယ်။
သူ့ရဲ့မျိုးကွဲတွေက ၁၂ မျိုးလောက်ထိရှိပေမယ့် အပင်စိုက်ပျိုးသူတွေကြားမှာတော့ အဓိကအားဖြင့် မျိုးကွဲ ၃ - ၄ မျိုးလောက်ကိုပဲ စိုက်ပျိုးတာတွေ့ရပါတယ်။

ရေဝါးပင်ဟာ အကြမ်းခံသလို စိုက်ပျိုးပြုစုရတာလည်း လွယ်ကူပါတယ်။ ဒါ့အပြင် အသင့်စိုက်ပျိုးပြီးသား ဝယ်ယူမယ်ဆိုရင်လည်း ဈေးနှုန်းအားဖြင့်သက်သာသလို ၎င်းရဲ့လှပတဲ့ အရွက်တွေကြောင့် အပင်စိုက်ပျိုးသူတွေကြားမှာ လူကြိုက်များတဲ့ အပင်လည်းဖြစ်ပါတယ်။

ဒီအပင်ဟာ မြေပေါ်မှာကပ်ပြီးပေါက်ရောက်နိုင်သလို၊ ပန်းအိုးတွေ၊ ချိတ်ဆွဲအလှအိုးတွေနဲ့လည်း အလွယ်တကူ စိုက်ပျိုးနိုင်တဲ့ အပင်ဖြစ်ပါတယ်။

၎င်းရဲ့ မူရင်းဒေသကတော့ မက္ကစီကို၊ အမေရိကအလယ်ပိုင်းနဲ့ ကိုလံဘီယာ နိုင်ငံတို့ပဲ ဖြစ်ပါတယ်။ အထူးသဖြင့် အပူပိုင်းရာသီဥတု ရှိတဲ့ဒေသတွေမှာ ရှင်သန်ပေါက်ရောက်နိုင်ပါတယ်။

အပင်အမြင့်က ၆ လက်မကနေ ၉ လက်မလောက်အထိရှိနိုင်ပါတယ်။ ဘေးဘက်ကိုတော့ ၁ ပေကနေ ၂ ပေလောက်ထိ ဖြန့်ကျက်သွားနိုင်ပါတယ်။

ရေဝါးပင်ရဲ့ အရွက်တွေဟာ ကြည့်လိုက်တာနဲ့ ဆွဲဆောင်မှုရှိပြီး ခရမ်း၊ အစိမ်း၊ မီးခိုး၊ ငွေရောင်နဲ့ ကြေးရောင်ဆိုပြီး အမျိုးမျိုးရှိကြပါတယ်။

သဘာဝအတိုင်းဆိုရင်တော့ ရေဝါးပင်ဟာ ပွင့်ဖတ် ၃ ခုပါတဲ့ အပွင့် ပွင့်လေ့ရှိပေမယ့် အိမ်တွင်း အလှစိုက် ပျိုးတဲ့အခါမှာတော့ ပန်းပွင့်တာကို ကြုံရခဲပါတယ်..။ ပွင့်မယ်ဆိုရင်တော့ ပန်းပွင့်တွေက မျိုးအပေါ်မူတည်ပြီး ခရမ်း၊ ပန်းရောင်နဲ့ အဖြူရောင်ဆိုပြီး တွေ့ရတတ်ပါတယ်။

အလင်းရောင်
ရေဝါးပင်ကို အိမ်အတွင်းမှာစိုက်ပျိုးမယ်ဆိုရင် နေရောင်တိုက်ရိုက်မကျဘဲ အလင်းရောင်ကောင်းကောင်းရတဲ့ နေရာမျိုးမှာစိုက်ပျိုးသင့်ပါတယ်။ ပြူတင်းပေါက်လိုနေရာမျိုးမှာ ထားရင်တော့ အကောင်းဆုံးပါပဲ။ နေရောင်နဲ့ တိုက်ရိုက်ထိတွေ့တာကြာမယ်ဆိုရင်တော့ အရွက်တွေလောင်နိုင်ပါတယ်။ အရွက်ပေါ်မှာရှိနေတဲ့ အရောင်နဲ့ ပုံစံတွေ ဖျော့လာတယ်၊ အရောင်မှိန်လာတယ်ဆိုရင်တော့ အလင်းရောင်လုံလောက်စွာ မရကြောင်းဖော်ပြနေတဲ့ လက္ခဏာပဲ ဖြစ်ပါတယ်။

မြေ
ရေဝါးပင်ဟာ အက်စစ်ဓာတ်အနည်းငယ်ဆန်တဲ့ မြေမျိုးကို ကြိုက်နှစ်သက်ပါတယ်။ ရေစိမ့်ဝင်မှုကောင်းစေဖို့ အတွက် သဘာဝအော်ဂဲနစ်ပစ္စည်းတွေ ထည့်ပေးလို့ရပါတယ်။ ဒါမှမဟုတ်ရင် အလှစိုက်အပင်တွေအတွက် သီးသန့်ထုတ်ထားတဲ့ အသင့်သုံးစပ်မြေတွေနဲ့လည်း စိုက်ပျိုးနိုင်ပါတယ်။

ရေ
ရေဝါးပင်ဟာ ရေဝပ်နေတာမျိုးမဟုတ်ဘဲ မြေအစိုဓာတ်ပုံမှန်ရှိနေတာမျိုးကို ကြိုက်နှစ်သက်တဲ့ အပင်ဖြစ်ပါတယ်။ အပင်စိုက်ထားတဲ့ အိုးထဲမှာရှိတဲ့ အပေါ်ယံမြေသားရဲ့ ၁ - ၂ လက်မခန့်ဟာ ကောင်းစွာ ခြောက်သွေ့နေတယ် ဆိုရင်တော့ ရေလောင်းပေးသင့်ပါတယ်။ ဒါ့ကြောင့် မြေသားအခြေအနေကိုကြည့်ပြီး ရေကို ၃ ရက်တစ်ကြိမ် (သို့မဟုတ်) တစ်ပတ်လျှင် တစ်ကြိမ် လောင်းနိုင်ပါတယ်။

အပူချိန်နဲ့ စိုထိုင်းဆ
အပူချိန်ကတော့ ၁၈ ဒီဂရီစင်တီဂရိတ်ကနေ ၂၃ ဒီဂရီစင်တီဂရိတ်အတွင်းကို အကြိုက်နှစ်သက်ဆုံးဖြစ်ပါတယ်။ သို့ပေမယ့်လည်း ပူနွေးတဲ့ရာသီဥတုရှိတဲ့ ဒေသတွေမှာလည်း ကောင်းစွာရှင်သန်နိုင်ပါတယ်။ ၁၀ ဒီဂရီစင်တီဂရိတ် အောက်မှာရှိတဲ့ နေရာတွေမှာ စိုက်ပျိုးမယ်ဆိုရင်တော့ အရွက်တွေမှာအရောင်ပျက်ပြယ်သွားနိုင်ပြီး ထိခိုက်ပျက်စီးတာမျိုး တွေ့ရမှာ ဖြစ်ပါတယ်။ ရေဝါးပင်ဟာ ပုံမှန်ထက်ကို အစိုဓာတ်ကြိုက်နှစ်သက်တဲ့ အပင်ဖြစ်ပါတယ်။ ဒါ့ကြောင့် ရေလောင်းတဲ့အပြင် ၁ ရက်ခြားလောက်ကို ရေဖျန်းတဲ့ဗူးနဲ့ အပင်ပေါ်ကို ဖျန်းပေးသင့်ပါတယ်။ အကယ်လို့ အရွက်တွေညိုလာတာမျိုးတွေ့ရမယ်ဆိုရင်တော့ အပင်စိုက်ပျိုးထားတဲ့ ပတ်ဝန်းကျင်ဟာ စိုထိုင်းဆနည်းနေပြီဆိုတာကို သတိပြုသင့်ပါတယ်။

မြေဩဇာ
ရေဝါးပင်ရဲ့ အားသာချက်တစ်ခုကတော့ မြေဩဇာ အထူးတလည်ကျွေးစရာမလိုတာပဲ ဖြစ်ပါတယ်။ အပင်တွက် ပိုကောင်းအောင် ကျွေးချင်တယ်ဆိုရင်တော့ ဆန်ဆေးရည်လောင်းတာမျိုး၊ အီးအမ်ဖျော်ရည်လောင်းတာမျိုး၊ ကော်ဖီသောက်ပြီးကျန်ရှိတဲ့ ကော်ဖီအမှုန့်ထည့်ပေးတာမျိုး စသည်ဖြင့် သဘာဝပစ္စည်းလေးတွေ သုံးရင်ပဲ အဆင်ပြေနိုင်ပါတယ်။

အပင်ပွားခြင်း
ရေဝါးပင်ဟာ အပင်ပွားရတာလည်း လွယ်ကူတဲ့အပင်ဖြစ်ပါတယ်။ အပင်ပွားမယ်ဆိုရင် အနည်းဆုံး အရွက် ၁ ရွက်ပါပြီး ၄ လက်မခန့်ရှိတဲ့ ပင်စည်ကိုဖြတ်ယူကာ စပ်မြေအသင့်ရှိတဲ့ အိုးထဲမှာထိုးစိုက်ထားရမှာပါ။ အဲ့ဒီဖြတ်ထားတဲ့ အပိုင်းလေးကို ရေပုံမှန်လောင်းပေးဖို့တော့လိုအပ်ပါတယ်။ ဒါမှမဟုတ် ဖြတ်ထားတဲ့ပင်စည် အပိုင်းလေးကို ရေထဲမှာစိမ်ထားမယ်ဆိုလည်း ရပါတယ်။ ရေစိမ်မယ်ဆိုရင်တော့ ၁ ပတ် ၁ ကြိမ်ခန့် ရေလဲပေး သင့်ပါတယ်။ ရက်သတ္တပတ်အနည်းငယ်အကြာမှာ အမြစ်ထွက်လာတာကို တွေ့ရမှာဖြစ်ပါတယ်။ အမြစ်ထွက် လာပြီဆိုရင်တော့ မိမိစိုက်ပျိုးချင်တဲ့ ပုံစံနဲ့ နေရာအသစ်မှာ စိုက်ပျိုးနိုင်ပါတယ်။ ရေဝါးပင်ကို မြေပေါ်မှာ ချစိုက်မယ်ဆိုရင် ကြာလာတာနဲ့အမျှ အပင်အုံထူလာပြီး ချုံပုတ်ပုံစံဖြစ်လာနိုင်တာကြောင့် ပုံမှန်ညှပ်ပေးနိုင်မယ် ဆိုရင်တော့ အဆင်ပြေပါတယ်။ မြေမှာချစိုက်တဲ့အခါ သတိပြုသင့်တာက ဒီအပင်ဟာ ပွားတာမြန်တဲ့အတွက် အလှစိုက်ပင်ကနေ ပေါင်းပင်ကဲ့သို့ ဖြစ်လာနိုင်တာကြောင့် ပန်းအိုးနဲ့ထည့်စိုက်တာမျိုး၊ ချိတ်ဆွဲပြီး အလှစိုက် တာမျိုးတွေက ပိုသင့်တော်ကြောင်း အကြံပြုလိုပါတယ်။

ရေဝါးပင်က တကယ်ပဲဆေးဖက်ဝင်သလား?

ရေဝါးပင်ဟာ ကျောက်ကပ်အတွက်ကောင်းစေတယ်ဆိုပြီး အွန်လိုင်းမှာနာမည်ကြီးတဲ့ အလှစိုက်အပင် ဖြစ်ပါတယ်။ တချို့သောသူတွေလည်း စမ်းသပ်သုံးစွဲရင်းနဲ့ ဝေဒနာပျောက်ကင်းကြောင်း ပြန်လည်မျှဝေတာမျိုး တွေလည်း ရှိကြပါတယ်။ သိပ္ပံနည်းကျစမ်းသပ်ထားတာမျိုး ဟုတ် မဟုတ်မသိရတဲ့အတွက် စာရေးသူအနေနဲ့ ကတော့ အသုံးပြုနည်းကို မျှဝေသွားမှာ မဟုတ်ပါဘူး။ လေ့လာတွေ့ရှိမိသလောက် ကောင်းကျိုးလေးတွေကိုပဲ ဖော်ပြပေးသွားပါမယ်။

ရေဝါးပင်မှာဆိုရင် ဓာတ်တိုးဆန့်ကျင်ပစ္စည်းတွေပါဝင်တာကြောင့် ရောင်ရမ်းမှုအချို့ကို တိုက်ဖျက်ပေးနိုင်တယ် လို့ သိရပါတယ်။ ဒါ့အပြင်ရေဝါးပင်ကို ဂျမေကာ၊ မလေးရှား၊ တရုတ်နဲ့ မက္ကစီကို နိုင်ငံတွေရဲ့ ရိုးရာဆေး တွေဖော်စပ်ရာမှာ အသုံးပြုကြတယ်လို့လည်း တွေ့ရှိပါတယ်။ လက်ဖက်ရည်ကြမ်းနဲ့ တွဲစပ်ပြီး အအေးမိတာ မျိုးတွေ၊ တီဘီရောဂါနဲ့ သွေးဖိအား ပြဿနာတွေ ကုသရာမှာလည်း အသုံးပြုကြတယ်လို့တွေ့ရှိရပါတယ်။

**စာဖတ်သူအနေနဲ့ ကျန်းမာရေးအတွက် အသုံးပြုမယ်ဆိုရင်တော့ သေချာတတ်ကျွမ်းနားလည်တဲ့ သူတွေနဲ့ တိုင်ပင်ဆွေးနွေးပြီးတော့မှ အသုံးပြုဖို့ အကြံပြုလိုက်ရပါတယ်။

ဇင်ထူးနိုင်
ကိုးကားချက်
https://www.thespruce.com/ , https://www.progardentips.com/

တခြား စိုက်/မွေး နည်းပညာ ဗဟုသုတတွေ သိရှိဖို့နဲ့ စိုက်/မွေး အသိုင်းအဝိုင်းနဲ့ ချိတ်ဆက်ဖို့ Green Way app ကို http://onelink.to/greenway ကနေ ရယူသုံးစွဲကြပါစို့..။

#ရေဝါးပင်_မြက်ကြွပ်ပြာပင်
#အိမ်တွင်းအလှစိုက်ပင်

ခိုင်တိုစန်နှင့် ၎င်း၏အကျိုးကျေးဇူးများ

ခိုင်တိုစန်ဆိုတာဘာလဲ?
ခိုင်တိုစန်ဆိုတာ ပုဇွန်၊ ဂဏန်း၊ ကျောက်ပုဇွန် အစရှိတဲ့ ရေနေသတ္တဝါတွေရဲ့ အခွံကနေရရှိတဲ့
သဘာဝဓာတ်တစ်မျိုးဖြစ်ပါတယ်။ ခိုင်တိုစန်ဟာ သဘာဝအော်ဂဲနစ်ဆေးတစ်မျိုးဖြစ်ပြီး
ဘေးလည်းကင်းကာ ကောင်းကျိုးများစွာရှိတဲ့အတွက်ကြောင့် ယနေ့အချိန်မှာ
တွင်ကျယ်စွာအသုံးပြုနေကြပြီလည်း ဖြစ်ပါတယ်။ ခိုင်တိုစန်ကို ဇီဝနည်း၊ ဓာတုနည်းများဖြင့်
ထုတ်လုပ်နိုင်ကြပြီး စိုက်ပျိုးရေးလုပ်ငန်းများမှာသာမက ကျန်းမာရေးဆိုင်ရာဆေးဝါးများ၊
အလှကုန်ပစ္စည်းများနဲ့ စားသောက်ကုန်များအထိပါ အသုံးပြုကြပါတယ်။ ဒါ့အပြင် ခိုင်တိုစန်ကို ကြက်၊
ဝက်၊ ဘဲ၊ ငါး၊ ပုဇွန်၊ နွား၊ သိုး၊ ဆိတ်၊ ငုံး၊ ကြက်ဆင် စတဲ့ မွေးမြူရေးလုပ်ငန်းတွေမှာ တိရိစ္ဆာန်တွေရဲ့
အစာနဲ့သောက်ရေထဲမှာ ထည့်သွင်းကျွေးမွေးတာမျိုးလည်း ပြုလုပ်ကြပါတယ်။ ခိုင်တိုစန်ဟာ
သဘာဝဆေးဖြစ်တဲ့အတွက် စိုက်ပျိုးရေးမှာ အသုံးပြုမယ်ဆိုရင်လည်း
ကိုင်တွယ်အသုံးပြုရတဲ့သူသာမက စားသုံးတဲ့သူရော သဘာဝပတ်ဝန်းကျင်အတွက်အတွက်ပါ
ထိခိုက်ညစ်ညမ်းမှုအန္တရာယ် ရှိစေမှာမဟုတ်ပါဘူး။

ခိုင်တိုစန်ဟာဆိုရင် အထက်မှာဖော်ပြခဲ့သလိုပဲ ပုဇွန်၊ ကျောက်ပုဇွန်၊ ဂဏန်း စတဲ့ သတ္တဝါတွေရဲ့
ပြင်ပအရိုးစုများမှာ အဓိကပါဝင်နေပြီး ၎င်းတို့ဟာ သဘာဝမှာ တွေ့ရှိနိုင်တဲ့ အပေါများဆုံးသော
အော်ဂဲနစ်ပိုလီမာများထဲမှ တစ်ခုအပါအဝင်ဖြစ်ပါတယ်။ ခိုင်တိုစန်ကို အစေ့၊ အရွက်၊ သစ်သီးနဲ့
ဟင်းသီးဟင်းရွက်များအပေါ် ပက်ဖျန်းပေးခြင်းနဲ့ မြေဩဇာအဖြစ် အသုံးပြုခြင်းကြောင့် ကောင်းမွန်တဲ့
အကျိုးကျေးဇူးများကို ရရှိစေမှာ ဖြစ်ပါတယ်။ ခိုင်တိုစန်အသုံးပြုခြင်းဟာ အပင်များကို
အန္တရာယ်ဖြစ်စေနိုင်တဲ့ ရောဂါပိုးမွှားတွေကို ကာကွယ်ပေးနိုင်ရုံသာမက အပင်ကိုလည်း
ကျန်းမာသန်စွမ်းစေပါတယ်။ ဒါ့ကြောင့် ခိုင်တိုစန်အသုံးပြုခြင်းဖြင့် သီးနှံတွေရဲ့ အထွက်နှုန်းနဲ့
အရည်အသွေးကိုလည်း တိုးလာစေမှာ ဖြစ်ပါတယ်။

စိုက်ပျိုးရေးမှာ ခိုင်တိုစန်အသုံးပြုခြင်းရဲ့ အားသာချက်များ
သီးနှံတွေ စိုက်ပျိုးရာမှာ ဓာတုဆေးဝါးတွေ အသုံးပြုခြင်းဟာ သီးနှံတွေရဲ့
အထွက်နှုန်းကိုတိုးလာစေမှာဖြစ်ပေမယ့် သဘာဝပတ်ဝန်းကျင်၊ အသုံးပြုသူနဲ့ စားသုံးသူတို့ရဲ့
ကျန်းမာရေးကိုတော့ အနည်းနဲ့အများ ထိခိုက်မှုရှိမယ်ဆိုတာ ယုံမှားသံသယ ဖြစ်စရာတောင်မလိုပါဘူး။
ဒါ့အပြင် ဓာတုဆေးဝါးတွေ ဆက်တိုက်အသုံးပြုလာကြတဲ့အခါ ပိုးမွှား ရောဂါတွေဟာ ဆေးတွေကို
ခံနိုင်ရည်ရှိလာကြတာ တောင်သူတွေကိုယ်တွေ့ဖြစ်ပါလိမ့်မယ်။ သို့ပေမယ့် ယနေ့ခေတ်မှာတော့
သဘာဝအော်ဂဲနစ်ဆေးဝါးတွေကို စိုက်ပျိုးရေးနယ်ပယ်မှာ ပိုပြီး တွင်တွင်ကျယ်ကျယ်
မိတ်ဆက်လာကြသလို တောင်သူတွေကိုယ်တိုင်ကလည်း အသုံးပြုနေကြပြီး
သိသာတဲ့ပြောင်းလဲမှုတွေကို လက်တွေ့ကြုံဖူးကြမယ်လို့ ယုံကြည်ပါတယ်။ စိုက်ပျိုးရေးမှာ
ခိုင်တိုစန်အသုံးပြုခြင်းကြောင့် ရရှိနိုင်တဲ့ အကျိုးကျေးဇူး အားသာချက်တွေကတော့
အောက်ပါအတိုင်းဖြစ်ပါတယ်။
- အပင်ရဲ့အာဟာရရရှိမှုနဲ့ ကြီးထွားမှုများအပေါ် လှုံ့ဆော်ပေးနိုင်ပြီး အပင်ပေါ်မှာ တိုက်ရိုက်
အကျိုးသက်ရောက်နိုင်တာကြောင့် အထွက်နှုန်း သိသိသာသာတိုးစေခြင်း
- အပင်ရဲ့ အာဟာရတန်ဖိုးကို မြှင့်တင်ပေးပြီး မရှိမဖြစ်လိုအပ်တဲ့ သတ္တုဓာတ်များကို
ပိုမိုစုပ်ယူနိုင်စေခြင်း
- မှို၊ ဘက်တီးရီးယားနဲ့ ဗိုင်းရပ်စ် စတဲ့ သီးနှံပင်များအတွက် အန္တရာယ်ဖြစ်စေနိုင်တဲ့
ဇီဝသက်ရှိများကို နှိမ်နင်းပေးနိုင်ပြီး အပင်များအား ကျန်းမာသန်စွမ်းစေခြင်း
- အပင်ရဲ့ ဇီဝကမ္မဖြစ်စဥ်များကို ထိခိုက်မှု မရှိခြင်း
- အကျိုးပြု အဏုဇီဝသက်ရှိများရဲ့ လုပ်ဆောင်ချက်များနဲ့ ကြီးထွားမှုကို ကောင်းမွန်စေခြင်း
- ရေအရင်းအမြစ်များကို ထိန်းသိမ်းရာတွင် ကူညီပေးနိုင်ခြင်း
- မြေရဲ့ အရည်အသွေးနဲ့ မြေဆီလွှာဖွဲ့စည်းတည်ဆောက်မှုကို ပြုပြင်ပေးနိုင်ခြင်း
- မျိုးစေ့ပေါက်အား ကောင်းစေခြင်း
- ဟင်းသီးဟင်းရွက်နဲ့ သစ်သီးဝလံများကို ကြာရှည်ခံစေပြီး အရောင်အသွေးလှစေခြင်း
- အပင်ရဲ့ အမြစ်များအား သန်စွမ်းစေခြင်း

- လူနဲ့ တိရိစ္ဆာန်များအတွက် အဆိပ်အတောက်မဖြစ်စေခြင်း
- ပတ်ဝန်းကျင်ကို ထိခိုက်ညစ်ညမ်းမှု မရှိစေခြင်း
- သီးနှံများရိတ်သိမ်းပြီးနောက်ပိုင်းကာလတွင် ပိုးမွှား၊ ရောဂါထိန်းချုပ်ရာ၌ အသုံးပြုနိုင်ခြင်း
- ပမာဏအနည်းငယ်အသုံးပြုရုံဖြင့် ထိရောက်မှုရှိခြင်း

သတိပြုရမည့်အချက်များ
- ပိုး၊ ရောဂါမကျရောက်ခင်ကတည်းက ဖျန်းပေးထားရခြင်း
- အာလူးလောင်မဲကဲ့သို့ ရောဂါများတွင် ခိုင်တိုစန်တစ်မျိုးတည်း အသုံးမပြုနိုင်ခြင်း
- ဓာတုဆေးများကဲ့သို့ အပင်ပေါ်မှာကြာရှည်စွာ မရှိနိုင်ခြင်း
- အာနိသင် ပိုမိုထိရောက်ပြီး ကြာရှည်စေရန် တစ်ပတ် (သို့မဟုတ်) နှစ်ပတ်လျှင် တစ်ကြိမ်
ဖျန်းပေးရန် လိုအပ်ခြင်း
- အပူချိန်များတဲ့ နေရာများမှာ ကြာရှည်စွာ သိုလှောင်မထားသင့်ခြင်း

Htoo (Agri)

ကိုးကားချက်
- http://hylineproducts.com

ခိုင်တိုစန် ဆေးရည် တစ်ဗူး ၂၅၀၀၀ ကျပ်

ဆက်သွယ်မှာယူလိုပါက ဖုန်း 09975244300 ကိုဆက်သွယ်မှာယူနိုင်ပါပြီ""

တီကောင်လေးတွေကပေးတဲ့ မြေဆီလွှာအတွက် ကောင်းကျိုးများ

သင့်ရဲ့စိုက်ခင်းထဲမှာ တီကောင်လေးတွေကို မကြာခဏ တွေ့ရပါသလား။ ဒါဆိုရင် သင့်စိုက်ခင်းရဲ့ မြေဆီလွှာဟာ မြေဆီဩဇာကြွယ်ဝပြီး ကျန်းမာရေးကောင်းမွန်နေတဲ့ လက္ခဏာဖြစ်ပါတယ်။ မြေဆီလွှာထဲမှာ တီကောင်လေးတွေရှိနေခြင်းဟာ လေဝင်လေထွက်ကောင်းစေသလို တီကောင်လေးတွေကနေရရှိတဲ့ တီကျစ်စာကနေတစ်ဆင့် အဖိုးတန်တဲ့ အာဟာရဓာတ်တွေကိုလည်း မြေဆီလွှာထဲ ပြန်လည် ဖြည့်တင်းပေးနိုင်ပါတယ်။ တီကျစ်စာမှာဆိုရင် အပင်အတွက် လိုအပ်တဲ့ အာဟာရဓာတ်များစွာ ပါဝင်နေပါတယ်။ ဒါ့ကြောင့် မိမိစိုက်ခင်းထဲမှာ တီကောင်လေးတွေ တွေ့ရမယ်ဆိုရင် မြေဆီလွှာအတွက်ရော အပင်များအတွက်ပါ အကျိုးရှိစေတဲ့ သက်ရှိလေးတွေဆိုတာ အသိအမှတ်ပြုပေးသင့်ပါတယ်။ တီကောင်လေးတွေဟာ နည်းလမ်းများစွာနဲ့ မြေဆီလွှာကို အကျိုးပြုနေတာ ဖြစ်ပါတယ်။ ဒါ့ကြောင့် ယခုဆောင်းပါးမှာတော့ တီကောင်လေးတွေရှိနေခြင်းဟာ မြေဆီလွှာအတွက် ဘယ်လိုကောင်းကျိုးတွေ ရရှိနိုင်မလဲဆိုတာကို မျှဝေပေးသွားမှာ ဖြစ်ပါတယ်။

မြေဆီလွှာကို အာဟာရဓာတ်များကို ဖြည့်တင်းပေးခြင်း
တီကောင်လေးတွေဟာ အစာ အလွန်စားတဲ့ သတ္တဝါလေးတွေဖြစ်ပါတယ်။ တစ်ရက်မှာဆိုရင် ၎င်းတို့ခန္ဓာကိုယ်အလေးချိန်ရဲ့ တစ်ဝက်လောက်ရှိတဲ့ အစာပမာဏကို စားသုံးကြပါတယ်။ ၎င်းတို့ဟာ အများအားဖြင့် သဘာဝအော်ဂဲနစ်ပစ္စည်းတွေကို စားသုံးကြပါတယ်။ သစ်ရွက်တွေ၊ မြေဆွေးတွေ၊ မြက်ပင်တွေနဲ့ သေဆုံးပျက်စီးနေတဲ့ အမြစ်တွေကို စားသောက်ကြတာဖြစ်ပါတယ်။ ပြီးရင်တော့ တီကောင်လေးတွေဆီကနေ စွန့်ပစ်ပစ္စည်းအဖြစ် တီကျစ်စာထွက်ရှိပါတယ်။ တီကျစ်စာမှာဆိုရင် နိုက်ထရိုဂျင်၊ ဖော့စဖောရပ်၊ မဂ္ဂနီစီယမ်နဲ့ ကယ်လ်စီယမ် ဓာတ်တွေ ကြွယ်ဝစွာပါဝင်နေပါတယ်။ ၎င်းတီကျစ်စာတွေကို အပင်ရဲ့ အမြစ်တွေကနေ အလွယ်တကူ ရယူစားသုံးနိုင်ပါတယ်။

လေဝင်လေထွက်ကောင်းစေခြင်း
အပင်ရဲ့အမြစ်တွေဟာ ရေနဲ့ အာဟာရဓာတ် ရရှိရင် အဆင်ပြေပြီလို့ လူအများစုက မှတ်ယူကြပါတယ်။ အမှန်တော့ အမြစ်တွေဟာ လေကိုလည်း ရရှိဖို့လိုအပ်ပါတယ်။ မြေဆီလွှာထဲမှာ လုံလောက်တဲ့ လေရှူပေါက်လေးတွေမရှိရင် အမြစ်တွေအပေါ် အကျိုးသက်ရောက်မှုရှိနိုင်ပါတယ်။ ဥပမာအားဖြင့် တီကောင်လေးတွေမရှိတဲ့ ရွှံစေးဆန်တဲ့ မြေဆီလွှာမှာဆိုရင် အပင်တွေ ရှင်သန်ကြီးထွားမှု အားနည်းတာကို တွေ့ရမှာဖြစ်ပါတယ်။ တီကောင်လေးတွေရှိတဲ့ မြေဆီလွှာမှာဆိုရင် ၎င်းတို့လှုပ်ရှားသွားလာနေတဲ့ လမ်းကြောင်းလေးတွေကတစ်ဆင့် လေဝင်ပေါက်လေးတွေ ဖြစ်စေပြီး မြေဆီလွှာထဲမှာ လေဝင်လေထွက်ကောင်းစေပါတယ်။ လေဝင်ပေါက်လေးတွေရှိနေတာဟာ အမြစ်တွေအတွက်ပဲ ကောင်းကျိုးရှိတာမဟုတ်ပါဘူး။ ရေနဲ့ အာဟာရဓာတ်တွေကိုလည်း အပင်ဆီသို့ လျင်လျင်မြန်မြန် ပို့ဆောင်ပေးနိုင်ပါတယ်။

မြေဆီလွှာဖွဲ့စည်းတည်ဆောက်မှု ကောင်းစေခြင်း
တီကောင်လေးတွေရှိနေခြင်းဟာ မြေဆီလွှာဖွဲ့စည်းတည်ဆောက်မှုကို ကောင်းစေသလို သီးနှံတွေစိုက်ပျိုးရာမှာ အဓိကအသုံးပြုရတဲ့ မြေဆီလွှာရဲ့ အပေါ်ယံမြေသား အရည်အသွေးကိုလည်း တိုးတက်ကောင်းမွန်စေပါတယ်။ တီကောင်လေးတွေထဲမှာ အချို့သောမျိုးစိတ်တွေဟာ အပေါ်ယံမြေမျက်နှာပြင် အနီးမှာ နေထိုင်ကြလေ့ရှိပါတယ်။ ၎င်းတို့ကနေ ထွက်ရှိလာတဲ့ တီကျစ်စာတွေကြောင့် သဘာဝအတိုင်း အပေါ်ယံမြေမျက်နှာ ပမာဏကိုလည်း တိုးလာစေပါတယ်။ ဒါ့ကြောင့် တီကောင်လေးတွေ များစွာရှိနေတဲ့ မြေဆီလွှာဟာဆိုရင် မြေဆီကြွယ်ဝပြီး ကောင်းမွန်တဲ့ အပေါ်ယံမြေသား အလွှာကိုပါ ရရှိစေမှာ ဖြစ်ပါတယ်။

စိုက်ခင်းထဲမှာ တီကောင်လေးတွေရှိနေအောင် ဘာတွေလုပ်ပေးမလဲ?
- မိမိစိုက်ခင်းမှာ တီကောင်လေးတွေ ရှင်သန်နေထိုင်နိုင်အောင် သဘာဝအော်ဂဲနစ်ပစ္စည်းတွေ ထည့်ပေးလို့ရပါတယ်။ သဘာဝစွန့်ပစ် ပစ္စည်းတွေထည့်ပေးခြင်းဟာ တီကောင်လေးတွေအတွက် အစားအစာ ပေါများစေမှာဖြစ်ပြီး ၎င်းတို့ရဲ့ အရေအတွက်ကိုလည်း တဖြည်းဖြည်းတိုးလာစေမှာ ဖြစ်ပါတယ်။ သူတို့ကို အစားအစာပေးသလို တီကောင်လေးတွေကနေလည်း သင့်စိုက်ခင်းအတွက် မြေဆီဩဇာကြွယ်ဝတဲ့ မြေကိုပြန်လည်ပေးမှာဖြစ်ပါတယ်။
- တီကောင်လေးတွေ ရှိနေစေချင်ရင် မိမိရဲ့ မြေဆီလွှာကို သမမျှတအောင် ထားဖို့လိုအပ်ပါတယ်။ တီကောင်လေးတွေဟာ မြေချဉ်လွန်း/ ငံလွန်းတဲ့ အနေအထားကို မကြိုက်နှစ်သက်ကြပါဘူး။ ဒါ့ကြောင့် မြေဆီလွှာကို အတတ်နိုင်ဆုံး သမမျှတအောင်ထားပေးပါ။
- သီးနှံတွေစိုက်ပျိုးဖို့ မြေဆီလွှာပြုပြင်တဲ့အခါ တတ်နိုင်သမျှ ဓာတုမြေဩဇာတွေမသုံးဘဲ သဘာဝဩဇာတွေကိုပဲ အသုံးပြုပေးသင့်ပါတယ်။ ဓာတု‌မြေဩဇာတွေမှာဆိုရင် အက်စစ်ဓာတ် မြင့်မားစွာပါဝင်တာကြောင့် တီကောင်လေးတွေကို ထိခိုက်နိုင်ပါတယ်။ ဒါ့အပြင် တိရိစ္ဆာန်ထွက် စွန့်ပစ်ပစ္စည်းတွေပါဝင်တဲ့ မြေဩဇာတွေလည်းထည့်ပေးနိုင်ပါတယ်။

Htoo (Agri)
Source
- All About Earthworms: Is it Good For the Soil (http://www.picturethisai.com/)

စိုက်ပျိုးရေးဆိုင်ရာ အသိပညာများ ဆောင်ပါးမျာ့းကို တောင်သူဦးကြီးများအတွက် ဝေမျှပေးသွားပါမည်။

စိုက်ပျိုးရေးမှထုတ်လုပ်သော ထုတ်ကုန်များ ဆေးဝါးများအကြောင်းသိလိုပါက
☎️ဖုန်း 09975244300 ကို ရုံးချိန်အတွင်းဆက်သွယ်မေးမြန်းနိုင်ပါသည်။

viber group : Join Site Phyo Yae on Viber https://invite.viber.com/?g2=AQBaSlrnoECcak1f3Pbse052wqeqnGo5ZijSsHSav%2B81ufvwZqmf0Os4Zvg15Dtb