08/06/2023
ခင်ဖုန်းသက်ဝေ ဂယ်လာရီ - သန်းတင့်
လွမ်းစရာရှိလို့
ကျွန်တော် မအားသေးကြောင်း
ပြောလိုက်မိပါတယ် ခင်ဖုန်းသက်ဝေ။
မေနဲ့ ဩဂုတ်မှာ အရင်လေတွေ တိုက်ရင်
အရင်ပန်းတွေပဲ ပွင့်ကြဦးမှာပါ။
လိုအပ်ရင် ပန်းအသစ်တွေ လဲပေးဖို့
ဘယ်အပင်ကိုမှ
ကျွန်တော် မတောင်းဆိုချင်ပါဘူး။
အပြည့်အ၀ လွမ်းခွင့်ရတာဟာလည်း
လူဖြစ်ကျိုးနပ်မှု အခက်အခဲတစ်ခုပါကွယ်။
ခင်ဖုန်းသက်ဝေ ကြားလိုက်လားတော့ မသိဘူး
တချို့ဆို တိုးလျှိုပေါက်ကြီးကို
ပုန်းညက်ပန်းလေး ဖြစ်သွားကြတာလေ။
လမ်းဘေးက အချိုရည်ဘူးခွံလေးကို
ပိတ်ကန်ပစ်လိုက်မယ်။
လမ်းလျှောက်ရင်း
ကြော်ငြာဆိုင်းဘုတ်တွေ ဖတ်မယ်။
သတ္တိရှိချင်ယောင်ဆောင်ပြီး
စပယ်ယာကို ဘုကြည့်ကြည့်မယ်။
အားလုံး လွယ်လွယ်လေးပါ။
ဖယ်ဒရယ်ပြည်ထောင်စုကြီး တည်ဆောက်တာက အစ
ရှမ်းကိုးမီးဝိုင်းက ကျင့်၀တ်ဆိုင်ရာ ပြဿနာတွေ အထိ
လွယ်တတ်ပါတယ်။
ဒေါသရော အတ္တရော ကြီးတဲ့ ကောင်တွေ
မျိုးသုဉ်းသွားဖို့အရေးထိ
လွယ်ကောင်း လွယ်နေနိုင်ပါတယ်။
စိုးရိမ်ထိတ်လန့်နေတဲ့
အစွမ်းအစ အမျိုးမျိုးကို ပိုင်ဆိုင်ဖို့
လွယ်ပါလိမ့်မယ်။
ဆင်ခြင်တုံတရားကို ချရေးဖို့
ပို့(စ)ကတ်လေးတစ်ခု ရှာရတာ
လွယ်ပါလိမ့်မယ်။
အို
အားလုံး လွယ်ကောင်းလွယ်နေကြပါလိမ့်မယ်။
စပယ်ဖြူ တုံးခါမှ ခင်ဖုန်းသက်ဝေရယ်
ဘယ်စိတ်လည်လို့ ပေါ်လာပြန်တယ်
ခက်တယ် ခင်ဖုန်းသက်ဝေရယ်
သိပ်ခက်တယ်။
(နှင်း ခေါင်းစီးအောက်မှ တပိုင်းတစဖော်ပြခြင်း)
#သန်းတင့်
#ခင်ဖုန်းသက်ဝေဂယ်လာရီ
