225 japanese

09/12/2025

🔳 ကျွန်မတို့အားလုံး ခဏလောက် ရပ်ပြီး စဉ်းစားကြည့်ရအောင်။ အချိန်ဆိုတဲ့ မြစ်ရေဟာ ဘယ်သူ့ကိုမှ စောင့်မနေဘူးလေ။ မြစ်ရေက ဆက်လက် စီးဆင်းနေသလိုပဲ၊ ကျွန်မတို့ ဘဝထဲက အခိုက်အတန့်တွေကလည်း တစ်စက္ကန့်ချင်း ကုန်ဆုံးနေပါတယ်။

ဂျပန်လူမျိုးတွေက ဒီအမှန်တရားကို ကောင်းကောင်း နားလည်ထားပုံရတယ်။ သူတို့မှာ "Ichigo Ichie" ဆိုတဲ့ လှပတဲ့ စကားလုံးလေး ရှိပါတယ်။ ဘာကို ဆိုလိုသလဲဆိုတော့ "အခိုက်အတန့်တိုင်းဟာ တစ်သက်မှာ တစ်ခါ"တဲ့"

တကယ်လဲ စဉ်းစားကြည့်ပါဦး။ ဒီမနက် သောက်ခဲ့တဲ့ ကော်ဖီတစ်ခွက်ရဲ့ နွေးထွေးမှု၊ လမ်းဘေးက ပန်းစည်းဆီက ရခဲ့တဲ့ ပန်းရနံ့၊ ဒါမှမဟုတ် ချစ်ရတဲ့သူရဲ့ အပြုံးတစ်ပွင့်...။ ဒီအရာတွေဟာ အခုချိန်မှာပဲ အမှန်တကယ် ရှိနေတဲ့ အရာတွေပါ။ နောက်ထပ် ဘယ်တော့မှ အတိအကျ ဒီအတိုင်း ပြန်ဖြစ်လာမှာ မဟုတ်ဘူးလေ။

ကျွန်မတို့က မကြာခဏဆိုသလို ဘာလုပ်မိလဲဆိုရင် အတိတ်ကို နောင်တရ နေတတ်တယ်။ "ဒီလိုလုပ်ခဲ့ရင် ကောင်းသား" လို့ တွေးပြီး စိတ်ပင်ပန်းနေတတ်တယ်။ ဒါမှမဟုတ် အနာဂတ်ကို စိုးရိမ် ပူပန်နေတတ်တယ်။ "နောက်လ ဘာဖြစ်မလဲ"၊ "ရှေ့လျှောက်အဆင်ပြေပါ့မလား" ပေါ့။
ဒီလို စိုးရိမ်ပူပန်မှုတွေ၊ နောင်တရမှုတွေနဲ့ အချိန်ကုန်နေတဲ့အတွက် တကယ့်ဘဝရဲ့ လှပမှုတွေကို လွဲချော်နေမိတယ် မဟုတ်လား။

Ichigo Ichie က ကျွန်မတို့ကို ရိုးရှင်းတဲ့ လျှို့ဝှက်ချက်တစ်ခုကို ပြောပြတယ်။ အဲဒါကတော့-

"အခု လက်ရှိကိုပဲ အာရုံစိုက်ပါ"။

🔳 အစာစားရင်လည်း အစာရဲ့အရသာကို အပြည့်အဝ ခံစားပါ။ လမ်းလျှောက်ရင်လည်း ခြေထောက်အောက်က မြေကြီးရဲ့ အထိအတွေ့ကို သိနေပါစေ။ ဒီလို လုပ်လိုက်တဲ့အခါ၊ ကျွန်မတို့ဟာ ပစ္စုပ္ပန်ရဲ့ စွမ်းအင် နဲ့ ဆက်သွယ်မိသွားပါတယ်။

📌 ဒီနေ့ဟာ ထူးခြားတဲ့ လက်ဆောင်တစ်ခုပါ။ အခိုက်အတန့်တိုင်းကို အရေးပါတဲ့ အဖြစ်အပျက်တစ်ခုအဖြစ် သတ်မှတ်လိုက်ပါ။

ဒါကြောင့်မို့လို့၊ စိတ်ဖိစီးမှုတွေ၊ အတိတ်နဲ့ အနာဂတ်ရဲ့ ဝန်ထုပ်ဝန်ပိုးတွေကို ခဏ ချထားလိုက်ပါ။ ဒီနေရာ၊ အခုအချိန် မှာပဲ ကျွန်မတို့ရဲ့ စစ်မှန်တဲ့ ပျော်ရွှင်မှု နဲ့ ဘဝကို ပြည့်ဝစွာ ရှင်သန်ခြင်းရဲ့ လျှို့ဝှက်ချက်ကို ရှာဖွေတွေ့ရှိနိုင်မယ်ဆိုတာကို မမေ့ပါနဲ့နော်။ သင့်ရဲ့ "Ichigo Ichie" အခိုက်အတန့် ကို အခုပဲ ရှာဖွေခံစားလိုက်ပါ။

#သင်ဇာစိုးထင်

06/12/2025

ကျွန်မတို့ကို စိတ်ခွန်အား အများကြီး ပေးစေမယ့် ဂျပန်စကားပုံလေးတစ်ခုကို‌ ပြောပြချင်ပါတယ်။
"ပြုံးရွှင်နေရင် ကံကောင်းခြင်းတွေ ရောက်လာနိုင်တယ်"

「笑う門には福来る」 (Warau kado ni wa fuku kitaru) တဲ့။ အသံထွက်က နည်းနည်းရှည်ပေမယ့် အဓိပ္ပာယ်က အရမ်းရိုးရှင်းပြီး နက်နဲပါတယ်။
မြန်မာလိုဆိုရင်တော့ "ပြုံးရွှင်နေတဲ့ အိမ်တံခါးဝဆီကို ကံကောင်းခြင်းတွေ ရောက်လာတတ်တယ်"ပေါ့ရှင်။ ပိုပြီးလွယ်အောင်ပြောရရင် "ပြုံးရွှင်နေရင် ကံကောင်းခြင်းတွေ ရောက်လာမယ်" လို့ မှတ်ထားလို့ ရပါတယ်။

ကျွန်မတို့ ဘာလို့ ပြုံးဖို့လိုအပ်လဲ?

ဒီစကားပုံကို ဂျပန်လူမျိုးတွေက ဘာလို့ ဒီလောက်တန်ဖိုးထားရလဲဆိုတော့ သူတို့မှာ ခိုင်မာတဲ့ ယုံကြည်ချက်တစ်ခု ရှိနေလို့ပါ။ ကျွန်မရဲ့ အတွေ့အကြုံအရဆိုရင် ဒီအချက်လေးတွေက တကယ်မှန်ပါတယ်။

စဉ်းစားကြည့်ပါ။ ကျွန်မတို့ စိတ်ညစ်စရာတစ်ခုခု ဖြစ်လာလို့ မျက်မှောင်ကြုတ်ပြီး နေတဲ့အခါ၊ အဲဒီစိတ်ညစ်မှုက ပိုပြီး အားကောင်းလာသလို ခံစားရတတ်တယ်။
ဒါပေမယ့် ခဏလေး ရပ်လိုက်ပြီး အတင်းလေးဖြစ်ဖြစ် ပြုံးလိုက်တဲ့အခါမှာ စိတ်က နည်းနည်းလေး ပေါ့သွားတာကို သတိထားမိဖူးမှာပါ။
အပြုံးဆိုတာက ကျွန်မတို့ရဲ့ ဦးနှောက်ကို "အရာရာ အဆင်ပြေပါတယ်" ဆိုတဲ့ လျှို့ဝှက်အချက်ပြမှု ပေးလိုက်တာနဲ့တူပါတယ်။ အဲဒီအခါ အကောင်းမြင်စိတ်တွေ အလိုလို တက်လာပါတော့တယ်။

"ပတ်ဝန်းကျင်ကပါ ကူညီချင်လာတယ်"

ကိုယ့်ပတ်ဝန်းကျင်ကို ကြည့်လိုက်ပါ။ အမြဲတမ်း မျက်နှာတည်နေတဲ့သူ၊ မျက်နှာချဉ်းသေနေတဲ့သူတွေဆီကို ဘယ်သူကမှ သွားပြီး စကားပြောချင်မှာမဟုတ်ဘူး။ အပြုံးလေးနဲ့ ဆက်ဆံတတ်တဲ့သူရဲ့ ဘေးနားမှာတော့ လူတွေက ဝိုင်းအုံချင်ကြတယ်။ အခက်အခဲကြုံလာရင်တောင် သူ့ကို ကူညီဖို့ ဝန်မလေးကြဘူး။ ကံကောင်းခြင်းဆိုတာ ဒီလို လူတွေဆီကနေ ရောက်လာတဲ့အခွင့်အလမ်းတွေ၊ အကူအညီတွေပဲ မဟုတ်လားရှင်။

"ကံကြမ္မာကို ကိုယ်တိုင် ဆွဲဆောင်တာ"

ဂျပန်လူမျိုးတွေက ကံကောင်းခြင်းဆိုတာ လက်ပိုက်ထိုင်စောင့်နေလို့ ရတာ မဟုတ်ဘူးလို့ ယုံကြည်ကြပါတယ်။ ပျော်ရွှင်တဲ့စိတ်၊ ကြိုဆိုတဲ့မျက်နှာထားနဲ့ နေတဲ့သူတွေဆီကို အကောင်းမြင်စွမ်းအင် (Positive Energy) တွေက ရောက်လာတယ်လို့ ဆိုပါတယ်။ သူတို့အတွက် အိမ်တံခါးဝမှာ ပြုံးနေတယ်ဆိုတာ "ကံကောင်းခြင်းတွေ၊ ငါတို့ကို လာခဲ့ပါ" လို့ ဖိတ်ခေါ်နေတာနဲ့ အတူတူပါပဲ။

ကျွန်မဘဝမှာ အခက်အခဲတွေ၊ စိတ်ပျက်စရာတွေ ကြုံရတဲ့အခါတိုင်း ဒီစကားပုံလေးကို အမြဲတမ်း ပြန်သတိရမိတယ်။

ကျွန်မဘယ်လိုလုပ်လဲဆိုတော့...

"မှန်ထဲကြည့်ပြီး ပြုံးလိုက်တယ်"

ပြုံးလိုက်တာနဲ့ ချက်ချင်းပဲ စိတ်ဖိစီးမှုက အနည်းငယ် လျော့ကျသွားတာကို ခံစားရတယ်။

"ကျေးဇူးတင်စရာတစ်ခုခု ရှာတယ်"

အရာရာတိုင်း ဆိုးနေတယ်လို့ ထင်ရပေမယ့်..

"ဒီနေ့လည်း နေသာပါတယ်"

"အိပ်ဖို့ နေရာရှိနေသေးတယ်"

စတဲ့ သေးငယ်တဲ့ အရာလေးတွေကို ကျေးဇူးတင်ကြည့်လိုက်တယ်။ အဲဒီ ကျေးဇူးတင်စိတ်က အပြုံးကို အစစ်အမှန် ဖြစ်စေပါတယ်။ ကျွန်မတို့လည်း ဒီနေ့ကစပြီး ဒီဂျပန်စကားပုံလေးကို လက်ကိုင်ထားပြီး နေထိုင်ကြည့်ရအောင်လားရှင်။

"အမြဲတမ်းပြုံးရွှင်နေမယ်ဆိုရင် ကံကောင်းခြင်းတွေဟာ ကျွန်မတို့ရဲ့ဘဝတံခါးဝကို မလွဲမသွေ ရောက်လာပါလိမ့်မယ်" လို့ ကျွန်မရဲရဲကြီး အာမခံချင်ပါတယ်။

#သင်ဇာစိုးထင်

05/12/2025

ဂျပန်မှာ Koi လို့ခေါ်တဲ့ ငါး အမျိုးအစား က ရေစီးမြန်မြန် မလိုက်ဘူး။
အေးဆေးလေး၊ ငြိမ်ငြိမ်သက်သက်
တစ်ချက်ချင်း၊ တဖြည်းဖြည်း
အချိန်မှန်မှန်နဲ့သာ လိုရာကို ကူးခတ်တတ်တဲ့ငါးလေးပါ။

🐟 သူ့ရဲ့ ကျွမ်းကျင်ချက်ကအမြန်ဆုံးမဟုတ်ပေမဲ့တကယ့် “right timing” ကို စောင့်တတ်ခြင်းပါပဲ။

ဒီစိတ်ဓာတ်ကပဲနောင်မှာ ကျော်လွှားနိုင်စွမ်းကိုတည်ဆောက်ပေးတယ်။

Koi ငါးရဲ့ သည်းခံမှုလိုပဲစိတ်ပညာသုတေသနတစ်ခုကလည်း ဒီသဘောတရားကို အတည်ပြုပြောပြထားပါတယ်။

University တစ်ခုက ကလေးတွေကို စမ်းသပ်တဲ့အခါ

📱 “Game ကို 20 မိနစ် မဖွင့်ဘဲ သည်းခံနိုင်ရင်
အကြီးမားဆုံး Gift ပေးမယ်”လို့ ပြောတယ်။

တချို့က ၂–၃မိနစ် ထဲမှာပဲ Game ဖွင့်သွားတယ်။
တချို့ကတော့ ဖုန်းကို ဘေးမှာထားပြီးပတ်ဝန်းကျင်ကို ကြည့်လိုက် စကားပြောလိုက် သင်ကြားနည်းလေးတွေသုံးပြီးကိုယ့်စိတ်ကို ကာကွယ်နိုင်ကြတယ်။

⏳ ၁၅–၂၀ နှစ်ကြာပြီး ပြန်ကြည့်တဲ့အခါ…

အဲဒီ “20 မိနစ်သည်းခံနိုင်ခဲ့သူ” တွေက
📌 စာ၊ အလုပ်တွေကို ဂရုတစိုက်တတ်သူ
📌 ဆုံးဖြတ်ချက်မှန်တတ်သူ
📌 ငွေကြေး ကိုင်တွယ်တတ်သူ
📌 Career ကို တဖြည်းဖြည်း တည်ဆောက်တတ်သူ
အဖြစ် ထင်ထင်ရှားရှားမြင်တွေ့ရတယ်။

🇯🇵 ဂျပန်လူမျိုးတွေအမြဲယုံကြည်တတ်တဲ့သဘောတရားက

"မှန်ကန်တဲ့အချိန်ကို စောင့်တတ်နိုင်သူက
နောင်မှာ အောင်မြင်တတ်တယ်” ဆိုတာပါပဲ။

🌱 ဘဝမှာတောင် အချိန်တိုင်းပဲချက်ချင်းပျော်စရာလေးတွေကို မရွေးဘဲ‌ နောင်အကျိုးရှိမယ့်အရာကို ပိုဦးစားပေးတတ်ရင် ကိုယ်ရမယ့် reward ကKoi ငါးလိုပဲလှပချောမွေ့ပြီး၊ နောက်ပိုင်းမှာ အကြီးကျယ် အောင်မြင်လာတတ်တယ်။

✨ Self-control today = Beautiful future tomorrow✨

「我慢は力なり」
(Gaman wa chikara nari)
➡ “သည်းခံမှုက အင်အား”
နေ့စဉ်အသေးစား သည်းခံမှုတွေက
နောင်မှာက အောင်မြင်မှုကြီးတွေ ဖြစ်လာတတ်ပါတယ်။

#သင်ဇာစိုးထင်

14/11/2025

🌱「Mottainai」 — တန်ဖိုးရှိသမျှကို မဖြုန်းတီး‌ စေချင်တဲ့ ဂျပန်စိတ်ဓာတ်🌱

ဒီစကားလုံးလေးကို ကျမ အရမ်းသဘောကျပါတယ်။

ဂျပန်မှာ ဆိုရင် “Mottainai (もったいない)” လို့အလုပ်ခွင်မှာ တော်တော်လေးပြောကြပါတယ်။

အလကားမဖြစ်စေချင်ဘူး။
တန်ဖိုးရှိတာကို တန်ဖိုးမဲ့အောင်မလုပ်သင့်ဘူး။
သုံးသမျှကို လေးစားချင်တယ် ဆိုတဲ့အဓိပ္ပါယ်လေးပါ။

✔️ 1. ဂျပန်လူမျိုးတွေဟာအစားအသောက်ကိုကုန်အောင်စားတတ်ကြပါတယ်။

တစ်ခါတစ်ရံ အစားအစာလေးတွေ ကျန်သွားရင်
“もったいない！” လို့ပြောကြပါတယ်။
ဒီဟင်းတပွဲရဖို့
👉 သဘာဝတရား(နေ ၊လေ )ကနေဆန် ၊အသီးအရွက်‌ ပေးပါတယ်။
👉 လောလောဆယ်အားစိုက်ချက်ပြုတ်ထားရတဲ့ လူတယောက်ရဲ့လုပ်အား
👉 ငွေကြေး
အကုန်လုံး တန်ဖိုးရှိနေတယ်လို့ယူဆလို့ပါ။

✔️ 2. ပစ္စည်းတစ်ခုတောင် အလွယ်မပစ်ကြပါဘူး။

ဂျပန်လူမျိုးတွေက
🧵 အဝတ်အစား ပြန်ပြင်ခြင်း
🛠️ ပျက်ကွဲတာလေး ပြန်စုပြင်ခြင်း
📦 လိုအပ်သူတစ်ယောက်ကို ပြန်ပေးသုံးခြင်း
“သုံးလို့ရသေးတယ်… ပစ်မယ်ဆို Mottainai” လို့ပြောကြပါတယ်။

✔️ 3. သဘာဝအရင်းအမြစ်ကိုလည်း လေးစားတတ်ကြတယ်။

💧 ရေ
🔥 မီး
🌲 သစ်သား
🌾 စားသောက်ကုန်
အကုန်လုံးကို “အလကား မဖြစ်စေချင်ပဲ တန်ဖိုးရှိတယ်” လို့ထင်ကြပါတယ်။ မူလတန်း ထဲက သဘာဝတရားကိုချစ်တတ်အောင်သင်ကြပါတယ်။

✔️ 4. လူတ‌စ်ယောက်ရဲ့ အချိန်နဲ့ ကျေးဇူးကို ဖြုန်းပစ်ရင်လဲMottainai လို့ပြောကြပါတယ်။

လူတစ်ဦးက
👐 ကူညီပေးတာ
⏳ အချိန်ပေးထားတာ
💗 ကြင်နာမှု
ပျက်သုန်းသွားမယ်ဆို ရင်“Mottainai” လို့လည်းပြောပါတယ်။

တန်ဖိုးရှိတဲ့စိတ်ကို ဘယ်လိုမှ မပျက်စေချင်တဲ့ သဘောပါ။

✔️ 5. ဘဝမှာ Mottainai ကို အသုံးချကြည့်မယ်ဆိုရင်

✨ မလိုဘဲမဝယ်ပါနဲ့။
✨ မသုံးဖြစ်ပဲကျ‌န် နေတဲ့ပစ္စည်းလေးတွေ ပြန်သုံးကြည့်ပါ။
✨ အချိန်ကို အလကားမသုံးဖို့ ကြိုးစားပါ။
✨ မင်းအပေါ်ကူညီပေးတဲ့သူတွေကို ပိုလေးစားပါ။

“Mottainai” ဆိုတာ
အစားအစာ၊ ပစ္စည်း၊ သဘာဝ… တစ်ချို့ပဲမဟုတ်ပဲလူတစ်ယောက်ရဲ့အချိန်နဲ့ ကျေးဇူးတရားတွေကိုတောင် တန်ဖိုးမပျက်စေချင်တဲ့လေးစားမှုပါ။

ဒီစိတ်ဓာတ်လေးကို နေ့စဉ်ဘဝမှာ ထည့်သုံးမယ်ဆိုရင်
ဘဝက ပိုပြီးတန်ဖိုးရှိပါလိမ့်မယ်🌟

#သင်ဇာစိုးထင်

08/11/2025

မနေ့က ဂျပန်လုပ်ငန်းခွင်မှာ "ရှောင်"သင့်တဲ့အရာလေးတွေပြောပြထားပြီးပြီဆိုတော့ ဒီနေ့တော့ လက်ကိုင်ထားသင့်တဲ့ "ဆောင် "ရမယ့် အရာ လေးတွေကို ပြောပြပေးသွားပါမယ်။

"ရှောင်"သင့်တာရော" ဆောင်" သင့်တဲ့ အရာတွေက စိတ်ထင်သလိုရေးထားတာမဟုတ်ပဲ ကျမ ဂျပန်မှာ နေတုန်းက ဘဝနဲ့ရင်းပြီး ရခဲ့တဲ့ သင်ခန်းစာ လေးတွေပဲ ဖြစ်ပါတယ်။

ဂျပန်လုပ်ငန်းခွင်က တည်ငြိမ်မှု၊ အာရုံစိုက်မှု၊ အပြန်အလှန်လေးစားမှုတွေကို အလွန်အရေးပေးထားတဲ့နေရာပါ။

အလုပ်တစ်ခုကို တယောက်ထဲ ကောင်းစွာလုပ်နိုင်တဲ့သူထက် အဖွဲ့လိုက် အပြန်အလှန် ထောက်ပံ့နိုင်တဲ့သူ ကိုပိုတန်ဖိုးထားကြပါတယ်။
အောက်ပါ အခြေခံအချက်များကို နားလည်ထားမယ်ဆိုရင် တက်ကြွပြီး ဂျပန်လုပ်ငန်းခွင်မှာ အဆင်ပြေပြေလုပ်ဆောင်နိုင်လာပါလိမ့်မယ်။

(၁) အချိန်ကို လေးစားခြင်း

ဂျပန်မှာ အချိန်က သဘောထားကို ကိုယ်စားပြုပါတယ်။
နောက်ကျခြင်း = တာဝန်မယူနိုင်သူ။
အချိန်မတိုင်ခင် ရောက်ခြင်း = ယုံကြည်စိတ်ချရသူ။

အလုပ် စသည့်အချိန် မတိုင်ခင် ၅–၁၀ မိနစ်အလိုမှာ ရောက်သင့်ပါတယ်။

Meeting/Training အတွက် လိုအပ်တာတွေ စောစောပြင်ဆင်ထားသင့်ပါတယ်။

> နောက်ကျမိရင် “Osokunatte sumimasen” ကို တိတိကျကျ ပြောပြရပါမယ်။တောင်းပန်ရပါမယ်။

(၂) နှုတ်ဆက်ခြင်း (挨拶 – Aisatsu)

ဂျပန်လုပ်ခွင်မှာ “နှုတ်ဆက်နိုင်ခြင်း” က လူကို လေးစားတတ်ခြင်းအဖြစ် မြင်ကြပါတယ်။

မနက်ခင်းမှာ Ohayou gozaimasu (မင်္ဂလာနံနက်ခင်းပါ)

အလုပ်ပြီးတဲ့အခါ Otsukaresama desh*ta( အလုပ်အားလုံးအတွက် ကျေးဇူးတင်ပါတယ်)
Yoroshiku onegaishimasu (အပြန်အလှန်ကူညီပေးပါ)

နှုတ်ဆက်ခြင်းက တယောက်နဲ့တယောက် ကို အလုပ်ခွင်မှာ ပိုရင်းနှီးလာစေပါတယ်။

စကားနည်းတဲ့သူဖြစ်ရင်တောင် နှုတ်ဆက်တတ်သူတော့ဖြစ်ရပါမယ်။

(၃) အဖွဲ့လိုက်လုပ်ဆောင်ခြင်း

ဂျပန်အလုပ်ခွင်မှာ “ငါတစ်ယောက်ထဲထူးချွန်ရမယ်” ဆိုတာထက်
“အဖွဲ့တစ်ခု လုံးအောင်မြင်ခြင်း” က ပိုတန်ဖိုးရှိပါတယ်။

မြန်မာလူမျိုးတွေက ငယ်ငယ်ထဲက အတန်းထဲ အဆင့်တစ် ရဖို့ ပဲ အားသန် လာပြီး အဖွဲ့နဲ့လုပ်ဆောင်ခြင်းမှာ အရမ်းအားနည်းကြတာမို့ ဒီအချက်လေးကိုအထူးဂရုစိုက်သင့်ပါတယ်။

ကျမတို့လူမျိုးတွေမှာ ဖြစ်တတ်တာက စာလဲအရမ်းတော်တယ်။ အလုပ်လဲအရမ်းတော်တယ် ဒါပေမယ့်လူတွေနဲ့ ပူးပေါင်းဆောင်ရွက်ဖို့အားနည်းတယ်လို့ မကြာခဏ ကြားရပါတယ်။

ကိုယ့်တာဝန်ပြီးပြီဆိုရင် → ကိုယ့်အနီး ဆုံးကလူကို ကူညီပါ။

ပြဿနာတခုဖြစ်လာရင် → တစ်ယောက်တည်း မဖြေရှင်းပဲ တိုင်ပင်ပြောပြရပါတယ်။

> Minna de yarou (အတူတကူပြုလုပ်ကြစို့) ဆိုတဲ့စကားက အလုပ်ခွင်ရဲ့အသက်ပါ။

(၄) ပြင်ဆင်ခြင်း

ဂျပန်မှာ “အလုပ်မြန်" တာဟာ ဂုဏ်ယူစရာမဟုတ်ပါဘူး။
တိတိကျကျ၊ စနစ်တကျ လုပ်တာကို ပိုတန်ဖိုးထားပါတယ်။တိတိကျကျ နဲ့ စနစ်တကျ ဖြစ်ဖို့ဆိုရင် ဘာမဆို မလုပ်ခင် ကြိုတင် ပြင်ဆင်ပြီးလုပ်ရပါတယ်။

ကျမ ကျောင်းတက်တုန်းက အချိန်ပိုင်းအလုပ်ကို Foodium ဆိုတဲ့ supermarket မှာ 2နှစ်ကြာလုပ်ခဲ့ပါတယ်။ အဲ့ဒီ supermarket ရဲ့ ဆိုင်ခွဲ အသစ်မဖွင့်ခင် ခြောက်လ ကြိုပြီးအလုပ်ခန့်ထားပြီး တခြားဆိုင်ခွဲတွေမှာ ကြိုတင်ပြင်ဆင်မှုတွေအတွက် သွားလုပ်ခဲ့ရပါတယ်။

ဂျပန်လူမျိုးတွေရဲ့ ကြိုတင်ပြင်ဆင်တတ်ခြင်းဟာ ကျမ ငယ်ငယ်ထဲက အသွေးအသားထဲစိမ့်ဝင်နေတာမို့ ဒီအရွယ်ထိ ဒီအကျင့်ကောင်းလေးဟာ ‌ရှင်သန်နေတုန်းပါပဲ။

အတိုချုပ်ပြောရရင်တော့

ဂျပန်လုပ်ခွင်မှာ အဓိက ၃ ချက်က

1. အချိန်ကို လေးစား
2. လူကို လေးစား
3. အဖွဲ့ကို လေးစား

ဒီ( ၃ )ချက်ကို သေချာ မှတ်သားလုပ်ဆောင်နိုင်ရင်မည်သည့်အလုပ်ခွင်မဆို အဆင်ပြေပြီး လုပ်ငန်းခွင်မှာပျော်ရွှင်တဲ့သူ ဖြစ်လာပါလိမ့်မယ်။

#သင်ဇာစိုးထင်

07/11/2025

🇯🇵ဂျပန်လုပ်ငန်းခွင်မှာ ရှောင်သင့်တဲ့ အပြုအမူများ

ဂျပန်လုပ်ငန်းခွင် တွေမှာ
“အလုပ်ကို တစ်ယောက်ထဲမလုပ်ပဲ အဖွဲ့လိုက်လုပ်တာ” ကို အခြေခံထားပါတယ်။
ဒါကြောင့် လူနဲ့ လူကြား ထိတွေ့ဆက်ဆံပုံ + သတင်းပေးပို့ပုံ က အရမ်းအရေးကြီးပါတယ်။

ရှောင်ရမယ့်အချက်လေးတွေကတော့

❌ ① အလိုက်သိပြီး မစစ်‌ ဆေးဘဲ လုပ်လိုက်ခြင်း

ကြိုပြီးကူလုပ်တာဟာ စေတနာကောင်းပေမယ့်
မစစ်ကြည့်ဘဲလုပ်လိုက်ရင် ပြသနာတက်နိုင်ပါတယ်။

ဘာကြောင့် ရှောင်သင့်လဲ?

ဂျပန်လုပ်ငန်းမှာ အလုပ်တိုင်း 確認 (かくにん) = အတည်ပြုခြင်း လိုအပ်ပါတယ်။

တစ်ယောက်က ဘယ်သူ့ကိုမှ အသိမပေးပဲ လုပ်လိုက်တာကြောင့် ပျောက်သွားတဲ့ အဆင့်တစ်ဆင့်ကြောင့် အလုပ်တွေ ကမောက် ကမ ဖြစ်နိုင်ပါတယ်။

✅ စနစ်ကျလုပ်နည်း

これ、先にやってもいいですか？
(ဒီဟာ ကြိုလုပ်ထားရမယ့်အလုပ်ပါလား?)
အလိုက်တသိလုပ်ပေး‌ချင်ရင် အပေါ်ကလို မဖြစ်မနေ မေးရပါမယ်။

---

❌ ② မေးရမှာကို ရှက်နေခြင်း

မသေချာရင် မမေးပဲ တိတ်တိတ်နေမိတတ်ကြတယ် ။
ဒါက အမှားကို ပိုကြီးစေတတ်ပါတယ်။

ကျမတို့ မြန်မာလူမျိုးတွေက ကိုယ့်ကို အထင်သေးမှာ ကြောက်တဲ့စိတ်နဲ့ မသိရင် မမေးတတ်ကြပါဘူး။

ဘာကြောင့် ရှောင်သင့်လဲဆိုရင်တော့

ဂျပန်လူမျိုးတွေက မေးတာကို အားနည်းချက်လို့မထင်ကြပါဘူး။ ‌မသိရင် မသိဘူး ပြောတာကို ပိုသဘောကျ ကြပါတယ်။

❌ ③ ဒေါသကိုမထိန်းနိုင်ခြင်း

အလုပ်နေရာဟာ စိတ်ညစ်တာတွေကိုပြသရမယ့်နေရာ မဟုတ်ပါဘူး။

ဘာကြောင့် ရှောင်သင့်လဲဆိုရင်

ဂျပန်လူတွေက 感情= စိတ်ခံစားချက်နဲ့ အလုပ် ကို သီးခြားထိန်းတတ်ကြတယ်။

စိတ်တိုပြီး ဒေါသကိုမထိန်းနိုင်တာကို プロ意識がない (ပရော်မဟုတ်) လို့ ထင်တတ်ကြပါတယ်။

❌ ④ မပြီးသေးတဲ့ အလုပ်ကို တိတ်တိတ်‌ လေးထားခြင်း

“မပြီးသေးတာမို့ မပြောဘူး” ဆိုတာ မမှန်ပါဘူး။

ဘာကြောင့် ရှောင်သင့်လဲဆိုရင်တော့

上司 (အထက်) က လက်ရှိအခြေအနေကို မသိတာမို့ကိုယ်တကယ်လုပ်နေရဲ့လားဆိုပြီး သံသယဖြစ်စေတတ်ပါတယ်။

✅ လုပ်သင့်တဲ့နည်း

現在、進行中です。終わりましたらご連絡します。
(လက်ရှိလုပ်ဆောင်နေပါတယ်၊ ပြီးတာနဲ့ သတင်းပေးပါမယ်)
လို့ ပြောပြီး မပြီးသေးတာကိုဆက်လုပ်သင့်ပါတယ်။

❌ ⑤ ကိုယ်တယောက်ထဲ ဆုံးဖြတ်ပြီးလုပ်တာကို အထူးရှောင်ကြဉ်သင့်ပါတယ်။

報連相（ほうれんそう） မရှိရင်
အဖွဲ့အစည်းအတွင်း ယုံကြည်မှုကျ သွားတတ်ပါတယ်။

✅ 報告（ほうこく） အခြေအနေ သတင်းပေးခြင်း
連絡（れんらく） အချက်အလက် သီးခြားပြောခြင်း
相談（そうだん） အမြင် တောင်းခံခြင်း ၊ တိုင်ပင်ခြင်း

確認（かくにん） အတည်ပြုခြင်း က အမှားကို ရှောင်နိုင်ပါတယ်။
報連相（ほうれんそう） သတင်းပေး / မျှဝေ / ဆွေးနွေး ယုံကြည်မှုတည်ဆောက်ရပါမယ်။

ကျမကိုယ်တိုင် ဂျပန်မှာနေတဲ့အချိန်က အပေါ်ကအမှားလေးတွေ ကို မသိပဲ မှားမိခဲ့တာမို့ မောင်လေး ၊ ညီမလေး တွေ အတွက် သိသလောက်လေး ဝေမျှပေးလိုက်ပါတယ် ။

#သင်ဇာစိုးထင်

06/11/2025

"စိုးရိမ်တာထက် လုပ်လိုက်တာက ပိုလွယ်တတ်တယ်"

🔳 ကျွန်မတို့ လူတိုင်းဟာ ဘဝမှာ တစ်ခုခုကို စိုးရိမ်ပူပန်ဖူးကြမှာပါ။ အထူးသဖြင့် စိန်ခေါ်မှုအသစ်တစ်ခုကို စတင်တော့မယ်၊ အရေးကြီးတဲ့ ဆုံးဖြတ်ချက်တစ်ခုကို ချမှတ်ရတော့မယ်ဆိုရင်ပေါ့..။

အဲဒီအချိန်မှာ ကျွန်မတို့ခေါင်းထဲမှာ အတွေးပေါင်းစုံ၊ အကြောက်တရားပေါင်းစုံက ဝင်လာတတ်ပါတယ်။

"ငါလုပ်နိုင်ပါ့မလား?"
"မအောင်မြင်ရင် ဘယ်လိုလုပ်မလဲ?"
"လူတွေက ငါ့ကိုရယ်နေမလား?"

အဲ့ဒီလို စိုးရိမ်စိတ်တွေနဲ့ လုံးလည်ချာလည်လိုက်နေတဲ့ အချိန်မျိုးအတွက် အရမ်းကောင်းတဲ့ စကားလေးတစ်ခုရှိပါတယ်။ အဲဒါလေးကတော့...

❤️ "စိုးရိမ်တာထက် လုပ်လိုက်တာက ပိုလွယ်တတ်တယ်"

အဓိပ္ပါယ်က ဘာကိုဆိုလိုတာလဲ ဆိုတော့.. ?

ဒီစကားရဲ့တိုက်ရိုက်အဓိပ္ပာယ်ကို ကြည့်မယ်ဆိုရင် ဥပမာ.. ကိုယ်ဝန်ဆောင်ပြီး ကလေးမွေးဖွားခြင်းမယ့် မိခင်တစ်ဦးနဲ့ဆက်စပ်နေပါတယ်။

မိခင်တစ်ဦးဟာ ကိုယ်ဝန်လွယ်ထားတဲ့အချိန်မှာ ကလေးမွေးဖွားခြင်းရဲ့ နာကျင်မှုကို ကြိုတင်တွေးပြီး အရမ်းစိုးရိမ်နေတတ်ပါတယ်။ ဒါပေမဲ့ တကယ်တမ်း မွေးဖွားပြီးသွားတဲ့အခါမှာ ကြိုတင်စိုးရိမ်ထားသလောက် အရာရာဟာ ခက်ခဲနက်နဲမနေဘဲ စိုးရိမ်မှုတွေထက် ပျော်ရွှင်စရာအခြေအနေတစ်ခုကို ရောက်သွားတတ်ပါတယ်။

📌 ဒီတော့၊ ဘဝအတွက် အဓိပ္ပါယ်ဖွင့်ဆိုရရင်...

✅ ကြိုတင်စိုးရိမ်ပူပန်ခြင်းဟာ အချိန်ကုန်၊ လူပင်ပန်းပြီး ဘာမှမထူးပါဘူး။

✅ တကယ်တမ်း လက်တွေ့လုပ်ဆောင်လိုက်တဲ့အခါမှာတော့ စိုးရိမ်ထားတာထက် များစွာ ပိုမိုလွယ်ကူပြီး အချိန်တိုအတွင်းမှာပဲ အောင်မြင်စွာ ပြီးဆုံးသွားတတ်ပါတယ်။

✅ စိုးရိမ်မှုကနေ လက်တွေ့လုပ်ဆောင်မှုဆီကို
ကျွန်မတို့ရဲ့ စိုးရိမ်ပူပန်မှုတွေဟာ အများအားဖြင့် စိတ်ကူးထဲမှာ ဖန်တီးထားတဲ့ ရန်သူတွေပါပဲ။

စိုးရိမ်ခြင်းက ကျွန်မတို့ကို လှုပ်ရှားမှုမရှိအောင် တားဆီးတယ်။ လှုပ်ရှားမှုမရှိခြင်းက ကျွန်မတို့ကို ပိုပြီး စိုးရိမ်ပူပန်စေတယ်။ အဲဒီလိုနဲ့ ကျွန်မတို့ဟာ စိုးရိမ်ခြင်းသံသရာထဲမှာ ပိတ်မိနေတတ်တယ်။

"တွေးနေမယ့်အစား လုပ်လိုက်ပါ။"
"စိုးရိမ်နေရမယ့်အစား စတင်လိုက်ပါ။"

တစ်ခုခုကို စတင်လိုက်တာနဲ့၊ အဲဒီအလုပ်ရဲ့ သဘောသဘာဝကို ပိုပြီး နားလည်လာပါတယ်။ ဘယ်လိုဖြေရှင်းရမယ်ဆိုတာကိုလည်း မြင်လာပါတယ်။

"စိုးရိမ်မှု" ဆိုတဲ့ ကြီးမားတဲ့ တောင်ကြီးဟာ တကယ်တမ်း စတင်တက်လှမ်းလိုက်တဲ့အခါမှာတော့ "ဖြေရှင်းနိုင်တဲ့ အဆင့်ဆင့်သော လှေကားထစ်ကလေးတွေအဖြစ်" ပြောင်းလဲသွားတာကို မြင်တွေ့ရပါလိမ့်မယ်။

📌 ဒီအတွေးအခေါ်ကို ကျွန်မတို့ရဲ့ နေ့စဉ်ဘဝမှာ အခုလို အသုံးချလို့ရပါတယ်။

☘️ စာမေးပွဲအတွက် စိုးရိမ်နေမယ့်အစား၊ စာအုပ်ကိုဖွင့်ပြီး အခန်းတစ်ခန်းကို ဖတ်လိုက်ပါ။

☘️ တင်ပြချက် (Presentation) ကို ကြောက်နေမယ့်အစား၊ စာမျက်နှာတစ်ရွက်စာပဲ စတင်ပြင်ဆင်လိုက်ပါ။

☘️ ဖုန်းခေါ်ဆိုဖို့ တွန့်ဆုတ်နေမယ့်အစား၊ နံပါတ်ကိုနှိပ်ပြီး "ဟယ်လို" လို့ ပြောလိုက်ပါ။

ကျွန်မတို့ရဲ့ စိတ်ပူပန်မှုအများစုဟာ မလိုအပ်ပါဘူး။ အဲဒီစိုးရိမ်စိတ်တွေကို တွန်းလှန်ပြီး လက်တွေ့ခြေလှမ်းတစ်လှမ်း လှမ်းလိုက်တာဟာ စိုးရိမ်ပူပန်မှု သန်းပေါင်းများစွာထက် ပိုပြီးတော့ စွမ်းအားရှိပါတယ်။

📌 ဒါကြောင့် နောက်တစ်ကြိမ် ဘယ်အရာကိုမဆို စတင်ဖို့ စိုးရိမ်နေတယ်ဆိုရင်၊ ဒီစကားလေးကို သတိရလိုက်ပါနော်..။

အားလုံးပဲ စိုးရိမ်စိတ်တွေကို ကျော်ဖြတ်ပြီး ကိုယ့်ရဲ့ပန်းတိုင်ဆီကို အောင်မြင်စွာ လှမ်းနိုင်ကြပါစေရှင်..။

#သင်ဇာစိုးထင်

05/11/2025

"မျောက်ပင်လျှင် သစ်ပင်ပေါ်က ပြုတ်ကျတတ်တယ်" ဆိုတာလေး ကြားဖူးကြတယ်ဟုတ်..?

ဒီစကားလေးက ဘာကို ဆိုလိုချင်တာလဲ ဆိုတော့ ..

မျောက်ဆိုတာ သစ်ပင်တက်တဲ့နေရာမှာ သူ့ထက်ကျွမ်းကျင်တဲ့သူ မရှိဘူး ဟုတ်တယ်မလား။ သူတို့အတွက်က သစ်ပင်ပေါ် ခုန်ပေါက်ပြေးလွှားနေတာ၊ တွဲလောင်းခိုနေတာတွေက အသက်ရှူသလိုပဲ လွယ်ကူနေတာ။

ဒါပေမဲ့... ဒီစကားလေးက တို့တွေကို ပြောပြနေတာက "အဲဒီလောက် မျက်စိမှိတ်လုပ်နိုင်တဲ့ မျောက်တောင်မှ တစ်ခါတလေ ခြေချော်ပြီး ပြုတ်ကျတတ်သေးတာပဲ" ဆိုတာပါပဲ။

ဆိုလိုရင်းက ရှင်းရှင်းလေးပါ။ ဘယ်လောက်ပဲ ကျွမ်းကျင်ပါတယ် ပြောပြော၊ ဘယ်လောက်ပဲ အတွေ့အကြုံများနေပါစေ၊ လူတိုင်းဟာ အမှားတစ်ခုခုတော့ လုပ်မိတတ်ကြတာပါပဲ။

ဒီအဖြစ်လေးတွေကို တို့တွေရဲ့ နေ့စဉ်ဘဝထဲမှာပဲ ပြန်မြင်ယောင်ကြည့်ရအောင်...

☘️ ကျောင်းသားဘဝတုန်းကဆို...
တစ်နှစ်ပတ်လုံး သင်္ချာကို ညတိုင်းတွက်၊ အပိုင်နိုင်ဆုံး ကျက်မှတ်ထားတဲ့ အတန်းထဲက အတော်ဆုံး သူငယ်ချင်းတောင်မှ စာမေးပွဲနေ့ကျမှ လွယ်လွယ်လေး ပုစ္ဆာတစ်ပုဒ်ကို တွက်ချက်မှားပြီး အမှတ်လျော့သွားတာမျိုး... မကြုံဖူးဘူးလား။

☘️ အလုပ်ခွင်ထဲ ရောက်တော့ရော...
နှစ်ပေါင်းများစွာ လုပ်ကိုင်လာတဲ့ လုပ်ငန်းကျွမ်းကျင်သူ ဆရာကြီး၊ အင်ဂျင်နီယာကြီးတစ်ဦးတောင်မှ တစ်ခါတလေ သေးငယ်တဲ့ တွက်ချက်မှုလေးတစ်ခု မှားယွင်းသွားပြီး ပြဿနာလေးတွေ ဖြစ်သွားတာမျိုး။

☘️ အားကစားမှာဆိုရင်...
ပင်နယ်တီကန်ရာမှာ တစ်ခါမှ မလွဲဖူးဘူးဆိုတဲ့ နာမည်ကျော် ဘောလုံးသမားတောင်မှ အရေးကြီးဆုံးပွဲမှာ ကန်သွင်းပုံ လွဲချော်သွားတာမျိုးပေါ့။

ဒီလို အဖြစ်အပျက်တွေအားလုံးက မျောက်သစ်ပင်ပေါ်က ပြုတ်ကျတယ် ဆိုတဲ့ သဘောတရားလေးကို အတိအကျ ဖော်ပြနေတာပါပဲ။ ဟုတ်တယ်မလား... တို့တွေအားလုံးက စက်ရုပ်တွေမှ မဟုတ်တာပဲလေ..။

☘️ ဒီစကားလေးက တို့တွေကို တန်ဖိုးရှိတဲ့ အချက်နှစ်ခုကို ညင်ညင်သာသာ သတိပေးနေပါတယ်။

၁။ ကိုယ့်ကိုယ်ကိုယ် သိပ်အထင်မကြီးဖို့ (နှိမ့်ချတတ်ဖို့)
တို့တွေက တစ်ခုခုမှာ ကျွမ်းကျင်လာတဲ့အခါ "ငါကတော့ ဒါမျိုး အေးဆေးပဲ" ဆိုပြီး ကိုယ့်ကိုယ်ကိုယ် သိပ်အထင်ကြီးသွားတတ်တယ်။

အဲဒီလို လွယ်လွယ်လေးလို ပေါ့ဆလိုက်တဲ့အချိန်ကျမှ အမှားက ဝင်လာတတ်တာ။ "မျောက်တောင် ပြုတ်ကျသေးတာပဲ၊ ငါတို့လည်း မှားနိုင်တယ်" ဆိုတဲ့ နှိမ့်ချတဲ့စိတ်လေးကို အမြဲမွေးထားဖို့ လိုပါတယ်။

၂။ နားလည်မှုပေးတတ်ဖို့ (ကိုယ်ချင်းစာတတ်ဖို့)
တခြားသူတစ်ယောက် အမှားလုပ်မိတဲ့အခါ "သူက ဒီလောက် ကျွမ်းကျင်နေတာကို၊ ဘာလို့ မှားရတာလဲ" လို့ ချက်ချင်း အပြစ်တင်မယ့်အစား နားလည်မှုပေးနိုင်တဲ့ စိတ်ထားလေး ရှိရမယ်လေ။ သူတို့လည်း မျောက်လေးလိုပဲ၊ ခဏတာ ဟန်ချက်ပျက်သွားတာမျိုး ဖြစ်နိုင်တာပေါ့။

ဒါတင်မကဘူး၊ ကိုယ်ကိုယ်တိုင် မှားတဲ့အခါမှာလည်း "ငါတော့ မဖြစ်သင့်ဘူး" ဆိုပြီး ကိုယ့်ကိုယ်ကိုယ် သိပ်ပြီး အပြစ်တင် မကွပ်ကဲနေဘဲ၊ "အေး... မှားတတ်တာပဲ" လို့ လက်ခံပြီး ဒီအမှားကနေ သင်ခန်းစာယူဖို့ ကိုယ့်ကိုယ်ကိုယ် အားပေးရမယ်။

တကယ်တော့ "မျောက်ပင်လျှင် သစ်ပင်ပေါ်က ပြုတ်ကျတတ်တယ်" ဆိုတဲ့ ဒီစကားလေးက ဘဝရဲ့ သဘာဝတရားကို ရိုးရိုးရှင်းရှင်းလေး ထင်ဟပ်ပြနေတာပါပဲ။

📌 ဘယ်လောက်ပဲ ထူးချွန်ထက်မြက်နေပါစေ၊ လူရယ်လို့ ဖြစ်လာရင် အမှားနဲ့တော့ ဘယ်ကင်းနိုင်မလဲ။ အဓိကကတော့ အမှားလုပ်မိတဲ့အခါ "ငါမှားသွားပါလား" လို့ ရိုးရိုးသားသား လက်ခံနိုင်ဖို့နဲ့၊ အဲဒီအမှားတွေကနေ သင်ခန်းစာယူပြီး ပိုကောင်းတဲ့လူတစ်ယောက် ဖြစ်လာအောင် ကြိုးစားသွားဖို့ပါပဲ။

#သင်ဇာစိုးထင်

04/11/2025

"ခုနစ်ခါ လဲကျ၊ ရှစ်ခါ ပြန်ထ" (Nanakorobi Yaoki)

ဒီနေ့ ကျွန်မပြောပြချင်တဲ့ အကြောင်းအရာလေးတစ်ခု ရှိပါတယ်။ ဒါကတော့ ဂျပန်စကားပုံလေးတစ်ခုပါပဲ။

七転び八起き (Nanakorobi Yaoki)

မြန်မာလို တိုက်ရိုက်ပြန်ရင်တော့ "ခုနစ်ခါ လဲကျ၊ ရှစ်ခါ ပြန်ထ" ပေါ့။

ဒီစကားလေးက နားထောင်လိုက်ရင်တော့ ရိုးရိုးလေးပါပဲ။ "ဪ... လဲကျရင် ပြန်ထပေါ့"။ ဒါပေမဲ့ ဒီစကားပုံလေးရဲ့ နောက်ကွယ်မှာ ဂျပန်လူမျိုးတွေရဲ့ ဘဝကို ရင်ဆိုင်ဖြတ်သန်းပုံ၊ သူတို့ရဲ့ ခံနိုင်ရည်ရှိမှု (resilience) နဲ့ ဇွဲလုံ့လအကြောင်း ပြောစရာတွေ အများကြီး ရှိပါတယ်။

လဲကျခြင်းဆိုတာ ဘဝရဲ့ သာမန်အစိတ်အပိုင်းတစ်ခုပါ။ ကျွန်မတို့အားလုံးရဲ့ ဘဝကို တစ်ချက်ပြန်ကြည့်ရအောင်။ အရာရာတိုင်းက ကိုယ်ဖြစ်ချင်သလို ဖြောင့်တန်းနေခဲ့ရဲ့လား..?။
မဟုတ်ပါဘူး..။

ကျောင်းတုန်းက စာမေးပွဲကျတာ၊ အလုပ်ထဲမှာ အဆူအဆဲခံရတာ၊ ကိုယ်မျှော်လင့်ထားတဲ့ ပရောဂျက်ကြီး မအောင်မြင်တာ၊ ချစ်ရတဲ့သူနဲ့ အဆင်မပြေတာ၊ စီးပွားရေးမှာ အရှုံးပေါ်တာ... ဒါတွေအကုန်လုံးက "လဲကျခြင်း" တွေပါပဲ။

"ခုနစ်ခါ" ဆိုတဲ့ ဂဏန်းက တိတိကျကျ ခုနစ်ခါတည်းကို ပြောတာ မဟုတ်ပါဘူး။ "အကြိမ်ပေါင်းများစွာ" လို့ ဆိုလိုတာပါ။ ဘဝမှာ ကျွန်မတို့ အကြိမ်ပေါင်းများစွာ ရှုံးနိမ့်မယ်၊ လဲကျမယ်။ ဒါက ရှောင်လွှဲလို့မရတဲ့ သဘာဝတရားကြီးပါ။

အရေးကြီးဆုံးအပိုင်းက "ရှစ်ခါ ပြန်ထခြင်း" ပါ။
ဒီစကားပုံရဲ့ အဓိက အသက်က ဒုတိယပိုင်းမှာပါ။ "ရှစ်ခါ ပြန်ထ" တဲ့။

သင်္ချာနည်းအရ တွက်ကြည့်ရင် နည်းနည်းထူးဆန်းနေမလား။ ခုနစ်ခါလဲကျရင် ခုနစ်ခါပဲ ပြန်ထရမှာ မဟုတ်ဘူးလား။ ဘာလို့ ရှစ်ခါ ဖြစ်နေရတာလဲ..?။

ဒါက အရမ်းလှတဲ့ အတွေးအခေါ်တစ်ခုပါ။ "ရှစ်" ဆိုတာ "ခုနစ်" ထက် တစ်ကြိမ် ပိုပါတယ်။

ဆိုလိုတာက...

သင်ဘယ်နှကြိမ်ပဲ လဲကျပါစေ၊ သင်ပြန်ထတဲ့အကြိမ်က အမြဲတမ်း တစ်ကြိမ် ပိုနေရမယ် ဆိုတဲ့ အဓိပ္ပာယ်ပါ။

သင့်ကို ဘဝက အကြိမ် ၁၀၀ တွန်းလှဲရင်၊ သင်က အကြိမ် ၁၀၁ ကြိမ်မြောက် ပြန်ထရမယ်။ နောက်ဆုံး လဲကျပြီးတဲ့နောက်မှာတောင် "ငါ ထပ်ထမယ်" ဆိုတဲ့ စိတ်ဓာတ်ပါ။ ဒါဟာ ဘယ်တော့မှ အရှုံးမပေးဘူး၊ ဘယ်တော့မှ နောက်မဆုတ်ဘူးဆိုတဲ့ ကြံ့ကြံ့ခိုင်မှုရဲ့ ပြယုဂ်ပါပဲ။

ဂျပန် "ဒါရုမ" အရုပ်လေးတွေနဲ့ တူတယ်..။

ဂျပန်နိုင်ငံမှာ "ဒါရုမ (Daruma)" လို့ခေါ်တဲ့ အရုပ်လေးတွေ ရှိပါတယ်။ မျက်လုံးမပါသေးတဲ့၊ လုံးလုံးဝိုင်းဝိုင်း အရုပ်နီနီလေးတွေပါ။ သူတို့ရဲ့ အဓိကထူးခြားချက်က ဘာလဲသိလား။ သူတို့ကို ဘယ်လိုပဲ တွန်းလှဲလှဲ၊ ဘယ်ဘက်ကိုပဲ လှဲချလိုက်ပါစေ၊ သူတို့က ချက်ချင်း "မတ်" ခနဲ ပြန်ထောင်လာပါတယ်။

သူတို့ရဲ့ အောက်ခြေမှာ အလေးတုံးခံထားလို့ပါ။

ဒီအရုပ်လေးတွေက "Nanakorobi Yaoki" ဆိုတဲ့ စကားပုံကို ပုံဖော်ထားတာပါ။ ဘဝက သင့်ကို တွန်းလှဲလိုက်တိုင်း၊ သင်က အောက်ခြေခိုင်ခိုင်နဲ့ ချက်ချင်း ပြန်ထောင်မတ်နိုင်ရမယ်။

လဲကျတိုင်း နာကျင်တာ သဘာဝပါ

ဒီစကားပုံက "လဲကျရင် မနာကျင်ရဘူး" လို့ မပြောပါဘူး။ "မငိုရဘူး၊ စိတ်ဓာတ်မကျရဘူး" လို့လည်း မဆိုလိုပါဘူး။

လဲကျရင် နာမှာပဲ။ စာမေးပွဲကျရင် စိတ်ညစ်မှာပဲ။ အလုပ်မှာ အဆင်မပြေရင် ပင်ပန်းမှာပဲ။ ဒါတွေအားလုံးက လူသားဆန်တဲ့ ခံစားချက်တွေပါ။

"Nanakorobi Yaoki" က သင့်ကို နာကျင်ခွင့်၊ စိတ်ဓာတ်ကျခွင့် ပေးထားပါတယ်။ ခဏနားပါ။ အားမွေးပါ။ ဒါပေမဲ့... အဲ့ဒီမှာတင် အပြီးတိုင် လဲမနေလိုက်ဖို့ အရေးကြီးဆုံးပါ။

နာကျင်မှုကနေ သင်ခန်းစာယူပါ။
ဘာကြောင့် လဲကျခဲ့တာလဲ ပြန်သုံးသပ်ပါ။
ပြီးရင်... ဖုန်ခါပြီး ပြန်ထပါ။
အဲဒါကမှ တကယ့် "ရှစ်ခါမြောက် ပြန်ထခြင်း" ပါ။

သင့်ရဲ့ "ရှစ်ခါမြောက်" က ဘာလဲ..?

အခု ဒီဆောင်းပါးကို ဖတ်နေတဲ့ သင်ရော... ဘဝမှာ "လဲကျ" နေတဲ့ အချိန်တစ်ခုခုများ ရောက်နေလား။
အလုပ်အသစ်ရှာရတာ အဆင်မပြေဘူးလား။
သင်တန်းတစ်ခုတက်နေတာ အရမ်းခက်ခဲနေလား။
ကိုယ့်ရဲ့ ရည်မှန်းချက်နဲ့ အလှမ်းဝေးနေသလို ခံစားနေရလား။

ဘဝဆိုတာ နောက်ဆုံးမှာ ဘယ်သူက အကြိမ်အနည်းဆုံး လဲကျလဲဆိုတာနဲ့ တိုင်းတာတာ မဟုတ်ပါဘူး။ ဘယ်သူက လဲကျတိုင်း ပြန်ထနိုင်တဲ့ ဇွဲအရှိဆုံးလဲ ဆိုတာနဲ့ တိုင်းတာတာပါ။

သင် "ခုနစ်ခါ" လဲကျသွားတာ ဖြစ်နိုင်ပါတယ်။ ဒါပေမဲ့ သင့်မှာ "ရှစ်ခါမြောက်" ပြန်ထနိုင်တဲ့ အခွင့်အရေး အမြဲတမ်းရှိနေပါတယ်။

#သင်ဇာစိုးထင်

03/11/2025

"ယုန်နှစ်ကောင်နောက်လိုက်ရင် တစ်ကောင်မှမရဘူး"

"ယုန်နှစ်ကောင်နောက်လိုက်ရင် တစ်ကောင်မှမရဘူး" ဆိုတဲ့ ဂျပန်စကားပုံလေးတစ်ခု ရှိပါတယ်။ တကယ်တော့ ဒီစကားပုံလေးဟာ ရိုးရှင်းပေမဲ့ ကျွန်မတို့ရဲ့ နေ့စဉ်ဘဝမှာ အမြဲသတိရသင့်တဲ့ အရေးကြီးဆုံး သင်ခန်းစာတစ်ခုကို ဖော်ပြနေတာပါ။

စဉ်းစားကြည့်ပါဦး တောထဲမှာ ယုန်နှစ်ကောင်ကို တစ်ပြိုင်နက်တည်း အပြေးလိုက်ဖမ်းနေတဲ့ မုဆိုးတစ်ယောက်ကို မြင်ယောင်ကြည့်ပါ။

သူက တစ်ကောင်ကို ဖမ်းချင်လို့ ညာဘက်ကို ခဏပြေးလိုက်၊ နောက်တစ်ကောင်ကို လိုချင်လို့ ဘယ်ဘက်ကို ခဏလှည့်လိုက်နဲ့ ဟိုယောင်ယောင် ဒီယောင်ယောင် ဖြစ်နေပါလိမ့်မယ်။

နောက်ဆုံးမှာ ဘာဖြစ်သွားမလဲ..။ ယုန်နှစ်ကောင်စလုံး အလွယ်တကူ ထွက်ပြေးလွတ်မြောက်သွားပြီး သူလည်း လက်ဗလာနဲ့ ကျန်ခဲ့ရပါလိမ့်မယ်။

ဒါဟာ ကျွန်မတို့ဘဝနဲ့ ဘယ်လောက်တူသလဲဆိုတာ သတိထားမိကြလားရှင်..။

🔳 တစ်ပြိုင်နက်တည်း အားလုံးကိုလိုချင်တဲ့အခါ
ကျွန်မတို့ လူသားတွေဟာ "တစ်ခုတည်းသော ရည်မှန်းချက်" ကို အာရုံစူးစိုက်ရမယ့်အစား "အားလုံးကို တစ်ပြိုင်နက်တည်း လုပ်ချင်၊ ရချင်" တတ်ကြပါတယ်။

• တစ်ချိန်တည်းမှာ စီးပွားရေးနှစ်မျိုးစလုပ်မယ်။
• ဘာသာစကားနှစ်မျိုးကို တစ်ပြိုင်နက်တည်း လေ့လာမယ်။
• အားကစားနှစ်မျိုးစလုံးကို အောင်မြင်အောင် ကြိုးစားမယ်။

📌 အလုပ်၊ အိမ်ထောင်ရေးနဲ့ကိုယ့်ရဲ့ဝါသနာ... အားလုံးကို ၁၀၀% ပြည့်အောင် လုပ်နိုင်ဖို့ ကြိုးစားမယ်။

ဒီလို လုပ်ချင်စိတ်က ကောင်းပါတယ်။ ဒါပေမဲ့ လက်တွေ့မှာတော့ ကျွန်မတို့ရဲ့အချိန်၊ စွမ်းအင်နဲ့ အာရုံစူးစိုက်မှုတွေဟာ ကန့်သတ်ထားတဲ့အရင်းအမြစ်တွေ ဖြစ်ပါတယ်။ အဲဒီအရင်းအမြစ်တွေကို အရာများစွာပေါ် ခွဲဝေချလိုက်တဲ့အခါ တစ်ခုချင်းစီအတွက် ပေးနိုင်တဲ့ အင်အားက နည်းသွားပါတယ်။

☘️ ဒီဂျပန်စကားပုံရဲ့ အနှစ်သာရကတော့ "တစ်ခုတည်းသော အရာပေါ် အာရုံစူးစိုက်ပါ" ဆိုတာပါပဲ။

တစ်ခုတည်းကိုပဲ အာရုံစိုက်ပါ။ နှစ်ခုလုံးကို တပြိုင်တည်းလုပ်ဖို့ကြိုးစားရင် ဘယ်တစ်ခုမှ မပြီးမြောက်ပဲဖြစ်သွားတတ်ပါတယ်။

၁။ "ဦးစားပေး သတ်မှတ်ပါ"

ကိုယ်ကဘယ်အရာကို အရင်ဆုံး လိုချင်သလဲ။ ကိုယ့်အတွက် အရေးကြီးဆုံး၊ အောင်မြင်ချင်ဆုံးပန်းတိုင်က ဘာလဲဆိုတာကို ရှင်းရှင်းလင်းလင်း သတ်မှတ်ပါ။

၂။ "ရည်မှန်းချက်တစ်ခု‌နောက်ကိုသာ လိုက်ပါ"

ပထမဦးဆုံး ရည်မှန်းချက်တစ်ခုကို သေချာဖမ်းမိဖို့အတွက် ကျွန်မတို့ရဲ့ အချိန်၊ ကြိုးစားအားထုတ်မှုနဲ့ စိတ်စွမ်းအားအားလုံးကို မြှုပ်နှံလိုက်ဖို့လိုအပ်ပါတယ်။

၃။ "ဖြတ်လမ်းမရှာပါနဲ့"

တစ်ချိန်တည်းမှာ အရာနှစ်ခုလုံးကို ရအောင်ယူဖို့ ကြိုးစားတာဟာ ဖြတ်လမ်းမဟုတ်ပါဘူး။ ရှုပ်ထွေးမှု ကို ဖန်တီးတာပါ။

တစ်ကယ့်ကို အောင်မြင်မှုရရှိတဲ့ ပုဂ္ဂိုလ်ကြီးတွေကို ကြည့်လိုက်ပါ။ သူတို့ဟာ စွမ်းအင်ကို အရာတစ်ခုတည်းပေါ်မှာပဲ အပြည့်အဝ ပုံအောထားကြတာကို တွေ့ရပါလိမ့်မယ်။

"ယုန်တစ်ကောင်တည်းကို အသေအချာလိုက်ဖမ်းမှ" ကျွန်မတို့ရဲ့လက်ထဲကို ရောက်လာပါလိမ့်မယ်။ အဲ့ဒီတစ်ကောင်ကို ရပြီဆိုမှ နောက်တစ်ကောင်ကို ပြန်လိုက်တာဟာ ပိုပြီးပညာရှိရာ ရောက်ပါတယ်။
ဒါကြောင့် အခုကစပြီး ကိုယ့်ကိုယ်ကိုယ်မေးကြည့်ပါ။

📌 "ငါ ယုန်ဘယ်နှစ်ကောင်ကို တစ်ပြိုင်နက်တည်း လိုက်နေမိသလဲ?"

ကိုယ့်ဘဝရဲ့ အရေးကြီးဆုံး ယုန်တစ်ကောင်ကို ရွေးချယ်ပြီး အောင်မြင်မှုရရှိသည်အထိ အားသွန်ခွန်စိုက် လိုက်နိုင်ပါစေလို့ ဆုတောင်းပေးလိုက်ပါတယ်ရှင်။

#သင်ဇာစိုးထင်

29/09/2025

ကိုယ် Interview ပြင်ဆင်ပေးလိုက်တဲ့သမီးတွေ အခုတော့ Japan မှာ ပျော်နေကြပါပြီ ❤️

Tutor/Teacher

02/09/2025

"လူ့အသိုက်အဝန်းထဲက အနိုင်ကျင့်ခြင်း"

"Bully" ဆိုတဲ့ စကားလုံးဟာ အခုခေတ်မှာ လူတိုင်းနီးပါး ရင်းနှီးပြီးသား ဖြစ်နေပါပြီ။ ဒါပေမဲ့ ဒီလို အနိုင်ကျင့်ခံရတာဟာ အားနည်းတဲ့ ကလေးတွေမှာပဲ ဖြစ်တာလားဆိုတော့ အမှန်တော့ မဟုတ်ပါဘူး။ အနိုင်ကျင့်ခံရတာဟာ အရွယ်နဲ့မဆိုင်သလို အားနည်းတာ၊ ခွန်အားကြီးတာနဲ့လည်း မသက်ဆိုင်ပါဘူး။

တစ်ခါတလေ ကိုယ်တိုင်က အနိုင်ကျင့်ခံရတာကို မသိလိုက်ဘဲနဲ့ ဖြစ်နေတတ်သလို၊ ကိုယ်ကိုယ်တိုင်ကလည်း တစ်ယောက်ယောက်ကို အနိုင်ကျင့်မိနေတာကို သတိမထားမိဘဲ လုပ်မိနေနိုင်ပါတယ်။ ဒါကြောင့်မို့လို့ ဒီအနိုင်ကျင့်မှုတွေရဲ့ အဓိကအမျိုးအစားတွေကို ဝေမျှပေးလိုက်ပါတယ်။

"စိတ်နဲ့လူကို နာကျင်စေတဲ့ အနိုင်ကျင့်မှုများ"

အနိုင်ကျင့်မှုမှာ ပုံစံအမျိုးမျိုး ရှိပါတယ်။

"စကားလုံးနဲ့ အနိုင်ကျင့်ခြင်း (Verbal Bullying)"

ဒါကတော့ ကိုယ်ချင်းစာတရားမရှိဘဲ တစ်ယောက်ယောက်ကို နာမည်ပြောင်ခေါ်တာ၊ ရုပ်ရည်၊ နောက်ခံအကြောင်းအရာတွေကို လှောင်ပြောင်တာ၊ ခြိမ်းခြောက်တာမျိုးတွေ ဖြစ်ပါတယ်။ စကားလုံးတွေဟာ ဓားသွားထက် ပိုထက်တယ်ဆိုတဲ့အတိုင်း ဒီလို အနိုင်ကျင့်မှုဟာ လူတစ်ယောက်ရဲ့ စိတ်ဓာတ်ကို တော်တော်လေး ပျက်စီးစေနိုင်ပါတယ်။

"ရုပ်ပိုင်းဆိုင်ရာ အနိုင်ကျင့်ခြင်း (Physical Bullying)"

ဒီအနိုင်ကျင့်မှုကတော့ ရုပ်ပိုင်းဆိုင်ရာအရ တိုက်ခိုက်တာမျိုးပါ။ ဥပမာ- လက်နဲ့ထိုးတာ၊ ခြေထောက်နဲ့ကန်တာ၊ တွန်းတာ၊ ရိုက်နှက်တာ၊ ဒါမှမဟုတ် တစ်ယောက်ယောက်ရဲ့ ပစ္စည်းကို ရည်ရွယ်ချက်ရှိရှိ ဖျက်ဆီးတာတွေ ဖြစ်ပါတယ်။ အထူးသဖြင့် တစ်ယောက်ယောက်ကို မလုပ်ချင်တဲ့အရာကို အတင်းအဓမ္မ ဖိအားပေးတာမျိုးလည်း ဒီထဲမှာ ပါဝင်ပါတယ်။

"လူမှုရေးအရ အနိုင်ကျင့်ခြင်း (Social Bullying)"

ဒီအမျိုးအစားကတော့ အခုခေတ်မှာ အရမ်းကို အဖြစ်များပါတယ်။ တစ်ယောက်ယောက်ကို လူအုပ်စုထဲကနေ တမင် ဖယ်ထားတာ၊ အပေါင်းအသင်း မလုပ်ဖို့ တိုက်တွန်းတာ၊ သူ့ရဲ့ လျှို့ဝှက်ချက်တွေကို ဖော်ထုတ်ပြီး ဂုဏ်သိက္ခာကျဆင်းအောင် လုပ်တာမျိုးတွေ ပါဝင်ပါတယ်။

ဒီလိုအနိုင်ကျင့်ခံရသူတွေဟာ အထီးကျန်ဆန်ပြီး စိတ်ပိုင်းဆိုင်ရာ ထိခိုက်မှုတွေ အများကြီး ရတတ်ပါတယ်။ အနိုင်ကျင့်သူက အင်အားကြီးရင် ပတ်ဝန်းကျင်တစ်ခုလုံးကို သူ့ဘက်ပါအောင် လုပ်နိုင်တာကြောင့် ခံရသူအတွက် ခံစားရတဲ့ ဝေဒနာက ပိုပြီး ကြီးမားပါတယ်။

"အင်တာနက်ပေါ်က အနိုင်ကျင့်ခြင်း (Cyberbullying)"

ဒီဂျစ်တယ်ခေတ်ရဲ့ ဆိုးကျိုးတစ်ခုလို့လည်း ပြောလို့ရပါတယ်။ လူမှုကွန်ရက်ပေါ်မှာ မဟုတ်မမှန်တာတွေ ရေးသားတာ၊ ဓာတ်ပုံ၊ ဗီဒီယိုတွေကို တရားလက်လွတ် ဖြန့်ဝေတာ၊ စကားလုံးကြမ်းကြမ်းတွေနဲ့ မက်ဆေ့ချ်ပို့ပြီး ခြိမ်းခြောက်တာမျိုးတွေ ပါဝင်ပါတယ်။ ဒါက အရမ်းမြန်တဲ့နှုန်းနဲ့ ပျံ့နှံ့သွားနိုင်တာကြောင့် အနိုင်ကျင့်ခံရသူဟာ ဘယ်ကိုမှ ပြေးမလွတ်နိုင်တော့သလို ခံစားရတတ်ပါတယ်။

ဒီအမျိုးအစားတွေအပြင် လူမျိုး၊ ဘာသာ၊ ကျန်းမာရေး၊ ဒါမှမဟုတ် လိင်ပိုင်းဆိုင်ရာ ခံယူချက်တွေနဲ့ပတ်သက်ပြီး အနိုင်ကျင့်တာတွေလည်း ရှိနေပါသေးတယ်။

"အနိုင်ကျင့်ခံရတဲ့အခါ ဘယ်လို ရပ်တည်မလဲ"

အနိုင်ကျင့်ခံရတဲ့အခါ ဘယ်လိုတုံ့ပြန်သင့်လဲဆိုတာ အခြေအနေပေါ်မူတည်ပြီး ကွဲပြားနိုင်ပါတယ်။ ဒါပေမဲ့ အဓိကကျတဲ့ အချက်တွေကတော့

၁။ တုံ့ပြန်မှု မပေးဘဲ လျစ်လျူရှုပါ - အနိုင်ကျင့်သူတွေဟာ သင့်ရဲ့တုံ့ပြန်မှုကို လိုချင်ကြပါတယ်။ ဒါကြောင့် သူတို့စိတ်ပျက်သွားအောင် လျစ်လျူရှုလိုက်တာက တစ်ခါတလေ အကောင်းဆုံးနည်းလမ်း ဖြစ်ပါတယ်။ သူတို့ပြောတဲ့ စကားတွေကို ဂရုမစိုက်ပါနဲ့၊ သူတို့ရဲ့ အပြုအမူတွေကို လစ်လျူရှုလိုက်ပါ။ ဖြစ်နိုင်ရင် သူတို့နဲ့ ဝေးဝေးနေပါ။

၂။ ပြတ်သားစွာ ရင်ဆိုင်ပါ - အကယ်၍ လျစ်လျူရှုလို့ မရတော့တဲ့ အခြေအနေမျိုးဆိုရင်တော့ ပြတ်ပြတ်သားသား ပြန်ပြောပါ။ "မင်းငါ့ကို မနှောင့်ယှက်ပါနဲ့" ဒါမှမဟုတ် "ဒီလိုမျိုး ပြောတာ ရပ်လိုက်ပါ" လိုမျိုး ကိုယ့်ဘက်က ယုံကြည်မှုရှိရှိ ပြန်ပြောပါ။ ဒါမှ သူတို့ရဲ့ အနိုင်ကျင့်မှုကို မကြောက်ဘူးဆိုတာ ပြသရာလည်း ရောက်ပါတယ်။

၃။ အကူအညီ တောင်းခံပါ - အနိုင်ကျင့်မှုက ဆိုးရွားလာပြီး တစ်ယောက်တည်း မဖြေရှင်းနိုင်တော့ဘူးဆိုရင် အခြားသူတွေဆီက အကူအညီယူဖို့ လိုပါတယ်။ မိဘ၊ ဆရာ၊ အလုပ်ရှင် ဒါမှမဟုတ် ယုံကြည်ရတဲ့ မိတ်ဆွေတွေကို ဖြစ်ပျက်ခဲ့တဲ့အရာတွေအကြောင်း ပွင့်ပွင့်လင်းလင်း ပြောပြပါ။

အကယ်၍ ကျောင်း ဒါမှမဟုတ် အလုပ်ခွင်မှာဆိုရင်လည်း သက်ဆိုင်ရာဌာနကို တိုင်ကြားပါ။ အထောက်အထားတွေဖြစ်တဲ့ ဓာတ်ပုံ၊ ဗီဒီယို၊ စာတွေကို စုဆောင်းထားတာကလည်း သင့်ရဲ့အဖြစ်မှန်ကို ပိုပြီး ထင်ရှားစေနိုင်ပါတယ်။

အရေးအကြီးဆုံးကတော့ အနိုင်ကျင့်ခံရတာ သင့်အမှားမဟုတ်ပါဘူး။ ဒီအခြေအနေကို သင်တစ်ယောက်တည်း ရင်ဆိုင်ဖို့ မလိုပါဘူး။ သင့်ပတ်ဝန်းကျင်မှာ ကိုယ့်ကိုယ်ကိုယ် ဂရုစိုက်ပေးနိုင်မယ့်သူတွေ အများကြီးရှိပါတယ်။

ဒီအနိုင်ကျင့်မှုတွေကို ကိုယ်ချင်းစာတရားနဲ့ နားလည်ပြီး ကိုယ်တိုင်ကလည်း အနိုင်ကျင့်သူ မဖြစ်အောင် သတိထားနေထိုင်မယ်ဆိုရင် ကျွန်မတို့ရဲ့ လူ့အသိုက်အဝန်းလေးဟာ ပိုပြီးတော့ သာယာပြီး လှပလာမှာပါ။ လူတိုင်းဟာ တစ်ဦးနဲ့တစ်ဦး လေးစားချစ်ခင်တဲ့ စိတ်ဓာတ်နဲ့ နေထိုင်မယ်ဆိုရင် အနိုင်ကျင့်မှုတွေ ကင်းဝေးလာမှာပါ။

သင်ဇာစိုးထင်