05/01/2026
ပြည့် ကို ခြေရာခံခြင်း
------------------------
ထားဝယ်စကားသံတွင် ပြည့်ကို လဆွဲသံဖြင့် ပြောဆဲဖြစ်သည်။ ရှေးမြန်မာကျောက်စာအချို့တွင်လည်း ပြည့်ကို လဆွဲပါ အရေးအသားဖြင့် တွေ့ရသည်။
သက္ကရာဇ် ၅၀၀ ကျော်က ကျောက်စာအချို့ပါ ရေးသားပုံကို ပုံတွင် ရှုပါ။
___ ပ္လည္အ် ___ ပ္လည်___ ကို အနီရောင်မျဉ်းသားပြထားပါသည်။
ပြည့်၊ ပြည့်စုံ၊ (ပြာသို) လပြည့် စသော အဓိပ္ပာယ်များနှင့်ရေးထားပါသည်။
ည အောက်တွင် အ ရှိနေခြင်းမှာ ယနေ့ခေတ်မြန်မာစာတွင် သုံးနေသော အောက်မြစ် (-့) သဘောဖြစ်သည်။ ထို့ကြောင့် __ ပ္လည္အ် __ဆိုသည်မှာ ပြည့် ဟု ဆိုနိုင်ပါသည်။ [ပုတ္တဟူ နိယ္အ် = ဗုဒ္ဓဟူး နေ့ ဟုရေးထားသည့်ကိုရှုပါ။ ]
ထားဝယ်သံကို မြန်မာစာဖြင့်ရေးလျှင် လဆွဲသံ အတွက် စဉ်းစားရလေ့ရှိသည်။ ယခင်က ရှေးမြန်မာစကား၊စာ ၌ အသုံးတွင်ခဲ့သော လဆွဲသည် ယပင့် နှင့် ယရစ် အသွင် ပြောင်းလဲလာသည်ဟု မှတ်ချက်ချထားသည်များရှိသည်။
ထို့ကြောင့် ပြည့် ကို ရေးဖို့အတွက် ရှေးမြန်မာကျောက်စာပါ ___ ပ္လည္အ် ___ကို ယူသုံးနိုင်၏။ သို့သော် ညအောက်တွင် အ ရှိနေခြင်းကို အမြင်ရှုပ်လျှင်၊ ဖတ်ရသူအဖို့ ခက်နေလျှင် ယနေ့ မြန်မာစာတွင် အသုံးတွင်နေနှင့်ပြီးသော အောက်မြစ်/အောက်ကမြစ် (-့) ကို ယူသုံးလိုက်၍ရနိုင်သည်။
ထိုအခါ မြန်မာစကား ပြည့် သည် ထားဝယ်အသံရေးလျှင် __ ပ္လည့် __ဟု ဖြစ်လာပေမည်။ အမြင်လည်း သိပ်မရှုပ်တော့သလို ရှေးမြန်မာကျောက်စာနှင့် ယနေ့ခေတ် မြန်မာစာ ပေါင်းစပ်မှု ဖြစ်လာနိုင်သည်။
