SH.F.K "Ashim Agushi" Ladorisht

18/05/2026

Më 14.05.2026, shkolla jonë pati kënaqësinë të mirëpresë Klubin e Librit “Yjet e Dijes”. Me shumë ngrohtësi, buzëqeshje dhe dashuri për librin, anëtarët e klubit sollën tek nxënësit mesazhe të bukura për rëndësinë e leximit dhe magjinë që fsheh çdo faqe libri. Ata treguan se sa e bukur është bota e leximit dhe sa shumë dritë, dije e imagjinatë sjell ajo në jetën e fëmijëve.

Qëllimi i këtij klubi është të lexojmë së bashku, të krijojmë miqësi të bukura dhe të shpërndajmë dashurinë për librin, sepse çdo libër hap një derë të re drejt dijes, imagjinatës dhe ëndrrave të bukura.
Përgëzojmë znj. Argjenta Demiri Xheladini për këtë iniciativë kaq të bukur dhe frymëzuese, e cila sjell më pranë nxënësit me botën e librave dhe dashurinë për leximin✍️📚

11/05/2026

Me sukses u realizua aktiviteti ekologjik “Vikendi Gjeneral” në SHFK “Ashim Agushi” – Ladorisht dhe shkollat periferike “Jeta e Re”Frëngovë dhe “Baftiar Banushi”Zagraçan.

Gjatë aktivitetit u realizua pastrimi dhe rregullimi i hapësirave shkollore, mbjellja e luleve dhe aktivitete sensibilizuese për mbrojtjen e ambientit. 🌿

Një falënderim i veçantë për drejtorin e JП Комунално Струга NP Komunale Strugë z. Resul Çollaku, i cili na mundësoi mbi 200 fidane dhe lule për mbjellje në hapësirat shkollore, duke dhënë një kontribut të çmuar në gjelbërimin dhe zbukurimin e ambientit tonë. 🌱

Faleminderit të gjithë nxënësve, mësimdhënësve dhe pjesëmarrësve për kontributin dhe bashkëpunimin!
GENERALKA WEEKEND

09/05/2026

Qendra Rajonale për Menaxhim me Kriza në qytetin e Strugës realizoi një prezantim për aktivitetin dhe funksionimin e Qendrës për Menaxhim me Kriza në Republikën e Maqedonisë së Veriut për nxënësit e shkollës fillore “Ashim Agushi” – Ladorisht.

Prezantimi u fokusua kryesisht në këto pika:

Njohja me Qendrën për Menaxhim me Kriza dhe përvojën e saj 20-vjeçare;

Llojet e fatkeqësive natyrore që shkaktojnë kriza në RMV;

Bashkëpunimi me institucionet e tjera kompetente;

Numri emergjent 112 dhe rëndësia e tij.

Gjatë prezantimit, nxënësit treguan interes dhe kureshtje të madhe, duke marrë pjesë aktive me pyetje dhe diskutime. Aktiviteti ishte mjaft edukativ dhe i dobishëm për ngritjen e vetëdijes së nxënësve lidhur me menaxhimin e krizave dhe sigurinë
Центар за управување со кризи

08/05/2026

06/05/2026

Në shkollën tonë, çdo nxënës ka të drejtë të ndihet i sigurt, i respektuar dhe i dëgjuar.
Në këtë frymë, është krijuar Këndi i Mirëkuptimit dhe Dëgjimit, një hapësirë informuese dhe mbështetëse e përgatitur nga stafi pedagogjik dhe psikologjik, ku nxënësit mund të shprehin lirshëm mendimet dhe shqetësimet e tyre, duke u ndjerë të kuptuar dhe të vlerësuar.
Gjithashtu, në dispozicion është edhe Kutia e Raportimeve, e cila u mundëson nxënësve të raportojnë çdo rast shqetësues në mënyrë të sigurt dhe konfidenciale.
Së bashku ndërtojmë një mjedis shkollor të shëndetshëm, me mirëkuptim, respekt dhe empati.

05/05/2026

Në kuadër të aktiviteteve sportive shkollore, nxënësit e shkollës “Ashim Agushi” së bashku me nxënësit e shkollave periferike morën pjesë në garat e volejbollit me gjeneratën 2011, duke përfaqësuar denjësisht institucionet e tyre arsimore.

Gjatë këtij aktiviteti, u zhvilluan ndeshje cilësore dhe me nivel të lartë gare. Veçanërisht në përballjen e vajzave, u dallua një lojë e bukur, bashkëpunim i shkëlqyer dhe angazhim maksimal. Megjithatë, pavarësisht paraqitjes shumë të mirë, rezultati nuk ishte në anën tonë.

Edhe djemtë u paraqitën në një nivel të kënaqshëm, duke dëshmuar përgatitje serioze, përkushtim dhe shpirt gare. Në përgjithësi, të gjithë nxënësit treguan karakter të fortë, disiplinë dhe sjellje shembullore gjatë gjithë aktivitetit.

Kjo përvojë ishte shumë e vlefshme dhe motivuese, duke shërbyer si shtysë për përmirësime dhe arritje edhe më të mëdha në të ardhmen.

30/04/2026

Në një atmosferë festive dhe plot emocione, më 12 Prill, shkolla fillore “Ashim Agushi” në fshatin Ladorisht shënoi 85-vjetorin e themelimit të saj. Ky jubile i rëndësishëm u kremtua me një manifestim të veçantë, ku u ndërthurën bukur tradita, kultura dhe përkushtimi ndaj dijes.
Programi artistik ishte i larmishëm, duke përfshirë këngë, valle dhe recitime të përgatitura me shumë përkushtim nga nxënësit dhe mësimdhënësit. Përmes performancave të tyre, ata përcollën emocione të veçanta dhe mesazhe frymëzuese për rëndësinë e arsimit dhe dashurinë për vendin.
Ky përvjetor shërbeu edhe si një moment reflektimi për rrugëtimin 85-vjeçar të shkollës, për brezat që janë edukuar në këtë institucion dhe për rolin e saj të rëndësishëm në zhvillimin e komunitetit. Shkolla fillore “Ashim Agushi” vazhdon të mbetet një vatër e fortë e dijes dhe edukimit ndër vite.

27/04/2026

Nxënësit e katër objekteve të shkollës sonë morën pjesë në aktivitetin sportiv të futbollit, duke përfaqësuar me dinjitet dhe përkushtim institucionin tonë. Në këtë garë u përfshinë dy gjenerata: ajo e vitit 2015 dhe ajo e vitit 2011.
Gjenerata e vitit 2015 zhvilloi një ndeshje të mirë, duke treguar përgatitje dhe shpirt gare, megjithatë rezultati nuk ishte në favorin e tyre.
Nga ana tjetër, gjenerata e vitit 2011 arriti të fitojë disa ndeshje me një lojë të bukur dhe të organizuar. Ata treguan aftësi të larta dhe bashkëpunim të shkëlqyer në fushë, duke arritur deri në finale, ku pësuan humbje pas një përballjeje të fortë.
Pjesëmarrja e nxënësve në këtë aktivitet sportiv dëshmon rëndësinë e sportit në zhvillimin e tyre fizik dhe social, si dhe forcimin e frymës së bashkëpunimit dhe konkurrencës së ndershme.

23/04/2026

Më datat 22 dhe 23 prill 2026 u realizua me sukses diseminimi i rezultateve dhe përvojave nga trajnimi për testimin shtetëror të klasave të pesta.

Në shkollën qendrore në Rasadnik, diseminimi u mbajt nga mësuesja Lindiana Brava dhe pedagogia Diana Dauti, me pjesëmarrjen e mësimdhënësve të ciklit të ulët nga Rasadniku dhe Zagraçani.

Ndërsa në shkollën e Ladorishtit, diseminimi u udhëhoq nga mësuesja Arbëresha Ajro, me pjesëmarrjen e mësimdhënësve nga Ladorishti dhe Frëngova.

Qëllimet e diseminimit ishin:
• Njohja e detajuar me rezultatet e testimit
• Analizimi i të dhënave dhe identifikimi i sfidave
• Përmirësimi i procesit të mësimdhënies
• Përdorimi i të dhënave për zhvillimin e nxënësve

Ky aktivitet shërbeu si një mundësi e mirë për shkëmbim përvojash dhe forcim të bashkëpunimit mes mësimdhënësve, në funksion të rritjes së cilësisë në arsim.

Falënderojmë të gjithë mësimdhënësit për pjesëmarrjen dhe angazhimin e tyre!

18/04/2026

Jemi krenarë të ndajmë suksesin e nxënëses sonë, Andja Lena, në garat e akredituara të gjuhës angleze, të organizuara nga Shoqata e Mësuesve të Gjuhës dhe Letërsisë Angleze në RMV (ELTAM MK).

Në garat rajonale, të mbajtura më 18.04.2026, nxënësja e Shkollës Fillore “Ashim Agushi”, Andja Lena (klasa IX), arriti rezultat të shkëlqyer, duke fituar vendin e dytë me 87 pikë, nën mentorimin e arsimtarit të gjuhës angleze Fatjon Shaqiri .

Ky sukses është rezultat i punës së vazhdueshme dhe angazhimit serioz. E përgëzojmë përzemërsisht Andjën dhe mentorin e saj, dhe u urojmë shumë suksese në garat shtetërore që do të mbahen më 09.05.2026 📚