05/05/2026
Ao anatin’ny fanatanterahana ny Tetikasa momba ny Fitantanana Nomérika sy ny Fitantanana ny Mombamomba ny Olom-pirenena Malagasy (PRODIGY), izay natomboky ny fanjakana malagasy miaraka amin’ny fanohanan’ireo mpiara-miombon’antoka ara-teknika sy ara-bola, dia misy fanisana manerana ny firenena ny mpianatra atao, mba hanomezana azy ireo Laharana Tokana Famantarana ny Mpianatra (NUIS).
Ity hetsika ity dia mikendry:
hanamafy ny fahamarinan’ny antontan’isa momba ny sekoly,
hanatsara ny fanaraha-maso ny lalan’ny fianaran’ny mpianatra,
ary hiantoka ny fifandraisan’ireo rafitra nasionaly amin’ny fitantanana ny mombamomba ny olona sy ny sora-piankohonana.
Noho izany, ny fanolorana kopian’ny sora-pahaterahana dia taratasy manan-danja sy tsy maintsy ilaina amin’ny famantarana marina ny mpianatra voakasika.
1. Tanjona
Ireto avy ny tanjon’ity fanatanterahana ity:
Hampiditra ny mpianatra rehetra ao anatin’ny lisitry ny mpianatra an’ny Minisiteran’ny Fanabeazam-pirenena;
Hanome Laharana Tokana Famantarana ny Mpianatra ho an’ny mpianatra rehetra amin’ny sekoly miankina amin’ny fanjakana sy tsy miankina (fanabeazana fototra, ambaratonga voalohany, kolejy, lisea).
2. Toromarika momba ny fanangonana ny kopian’ny sora-pahaterahana
Ny tanjona dia ny hiantohana ny fiarovana ny mombamomba ny mpianatra, mba hahafahana manome azy ireo:
Laharana Tokana Famantarana (NUIS),
ary karatra famantarana ho an’ny mpianatra tsirairay.
