09/11/2025
🙄 كانقراو في أمان الله الدرس الأول من الكيمياء ديال الباكالوريا _ التتبع الزمني لتحول كيميائي Suivi Temporel d'une transformation chimique _
و قلت لهاد التلميذة أننا فهاد السنة غانعرفو 5 ديال الطرق باش نحققو هاد التتبع و ذكرتهم ليها :
1. التتبع عن طريق قياس الضغط , التركيز , حجم غاز , الموصلية أو ال PH
سالينا الدرس و التلميذة لاحظات أننا خدمنا غير على 4 ديال الطرق و جات من بعد كاتسول فين هو التتبع عن طريق قياس ال PH ؟
الجواب ديالي كان هو أننا مازال ماعندناش أدوات رياضياتية أساسية بحال الدوال اللوغاريثمية Ln
✋تسنات حتى تعرفنا على هاد الدالة لأول مرة في مجزوءة التحولات النووية ☢ و عاااودات سولات واش ماشي هادي الدالة لي قلتي ؟؟ فأكدت أنها هي
🕒فبدات كل مرة تجي و تسول على الموضوع وتفكر حتى وصلات للعلاقة اللي من خلالها درت التمثبل المبياني اللي كايبان فالشكل اللي فالصورة لي لتحت .. صحيح أنني عطيتها المفتاح ديال شحال من حاجة ولكن كان ذلك على شكل مجرد تلميحات ديال باياش خاصها تبدا
و بالفعل .. هاد التلميذة الذكية النجيبة الفضولية وصلات لعلاقة مازال ليها 3 ديال الدروس عاااد تقراها و هاد التمثيل المبياني غاتشوفو و غايتحط ليها فالوطني و الفروض بشكل متكرر و هي لي صانعاه و فاهماه و عارفاه منين جاي و عارفة طرق الاستثمار فيه
و لهذا و من هذا المنبر كانقوليها أن الناس بحالها قلال و أتمنى لها مستقبل علمي منير و مرتب .. أتمنى ليها تحافظ على هاد النفس و الطاقة .. كيفما كانتمنى ليها بالخصوص ماتصادفش فالمسار ديالها شي أستاذ لي يكرهها فالمادة و البحث العلمي .. الله يرضي عليك الله يرضي عليك الله يرضي عليك
اه نسيت نقوليكم أن هاد المخ هادي جايبة لينا 9.5/20 فالفرض الأول
