26/05/2025
المنفعة هي أساس الإحترام
------------------------------------------------
الإنسان باغي ازيد بحياتوا القدام, باغي اتطور ويعيش مزيان, و كل واحد كيساعد الناس ازيدوا القدام او كيقدم ليهوم حلول لمشاكل ديالهوم كيديروه فوق الراس, الأغلبية دايرا هاكا من غير واحد القلة ديال الإستغلاليين و النرجسيين.
كنحتارموا الطبيب و الأم و الشرطي, حيت الخدمات لي كايقدموا لينا غالية, كايضحيوا بوقتهوم او حياتهوم على قبلنا.
الاحترام هو جزاء ديال هاد الناس, و الناس الواعرين واخا مانكونوش كانحملوا فيهوم شعرة, مفروض علينا نحتارموهوم حيت ببساطة واعرين.
كاين لي باغي الإحترام او التقدير فابور, باغي الناس إقدسوه بلا مجهود, علاش أخويا شكون نتا؟
الأمثلة كثيرة على هاد الإستحقاقية الخاوية, ولكن في النهاية كتبان الحقيقة, تعيى ما تنفخ او تهز النيف لسما, نهار لي غايجي الانسان لي عامر غاتبان قداموا نكرة.
لي ماعندوا مكانة فالمجتمع اعرف بلي هو ما خدامش على راسوا, ماعندوا تا إضافة فالحياة.
بلا ما يشكي او اطلع ليه الدم, الحياة واقعية او عادلة, باغي خدمة, شناهوما المهارات لي عندك, عارف دير شي حاجة, ما عارف والوا ما تكولش الخدمة ماكايناش, سير تعلم معا و سوق للمهارات ديالك.
الجنس الاخر ماكاينجاذبش ليك, إذن نتا ماخدام, ما زوين, ما رياضي, ما عارف تهضر, ما تكولش الناس نرجسيين او لا استغلايين, شوف نتا اشمن فائدة كتقدم ليهوم, الناس مادايرينش جمعية او خيرية باش اعطيوك داكشي لي باغي بلا مقابل.
الناس كينجاذبوا للناس لي فيهوم فائدة, فحاول تكون فيك منفعة ماشي زايد ناقص.
