Engr. Msheireb

قبل 10 سنين بالضبط من اليوم، كنت في وسط معسكر التحضير لامتحانات الشهادة الثانوية واللي استمر 52 يوم بالتمام والكمال بمعدل 8 ساعات يوميا بدون أي توقف...

ولا أي راحة ولا أي يوم أوف؟

ولا يوم كان معدل القراية فيه أقل من 8 ساعات! صدق أو لا تصدق!

الموضوع ما كانش ساهل والتحدي كان كبير ولا يمكن أن ننسى الضغط النفسي والجسدي، والإستنزاف العصبي والذهني خصوصا في 2016 كان الضي يهرب من8-12 ساعة يوميا..

لأن كان فيه هدف محدد وواضح، وكل ما يصيرلي ملل أو تردد أو إحباط، الهدف كان كفيل إنه يخليني نستمر ونشد روحي ونزيد نقرا... (Burning desire🔥)

واليوم وبعد هالسنوات هذه كلها والعمر اللي مشي.. في #لحظة تفكرت التعب في تلك الأيام وسألت نفسي سؤال (وهذا سبب كتابتي للبوست): هل فعلا كانت مستاهلة؟

الإجابة بدون أدنى شك: إني ممنون جدا لكل لحظة تعب وكل دقيقة زدتها في القراية وكل لحظة حرمت فيها روحي من طلعة أو زردة أو عزومة أو لحظة ترفيه في سبيل أني نوصل للي وصلتله اليوم "بفضل الله طبعا وتوفيقه وحده".

كل ما أنا عليه الآن وما سأصبح عليه بإذن الله بدايته كانت توفيق الله ليا في تلك الأيام وكان ثمرة أني قدرت نكمل 52 يوم بالزبط زي ما خططت لها.

هذه رسالة بسيطة من شخص بسيط، لكل طالب شهادة ثانوية حاس روحه أنه فاقد الشغف والأمل وأنه حاس أن محاولاته باءت بالفشل... لازم تستمر وتحر.ق روحك في سبيل أي هدف تبي توصله. وكما قيل: من عَلتْ همّته، طال همّه.

والحمدلله أولا وآخرا على كل شيء، ومازلنا في طريق الحلم إلى أن يشاء الله!

هذا كلام واحد جايكم من المستقبل 😅 والسلام عليكم ✨️

ليس كل ما يلمع ذهب❗️

دار حوار بيني وبين شخص أكبرني سنا وأعلم مني (شخصية معروفة) وهذا الشخص بطبيعة شغله متلاقي مع ناس مؤثرة من إعلاميين وكتّاب وغيره ومنهم "مشاهير السوشال ميديا" سواء الصالح منهم أو الطالح.

ف من كثر مخالطته ولقاءاته بيهم قالي: تعرف لو لاقيتك بأحد هؤلاء وفتحتلك صفحاته على المنصات قالي أكاد أجزم أنك مش حتصدق أنك لاقيت نفس الشخص❗️

غر كيف؟
قالي في الحقيقة حتشوف انسان شبهنا وزينا تماما بسيط وعادي جدا وحديثه عادي جدا (رغم يتابعه الملايين) ولكن إذا شفت كلامه وصوره وفيديواته وحياته على المنصات وكأنه عايش في عالم اخر منفصل عن هذا العالم "عايش في الجنة" هكي وصفه.

ومن هني بدت الإثارة🔥 في الحديث:

قال: مش حنقول أنه كذاب ولا أنه عايش الوهم ولا أنه عنده فصام ولا أنه مريض❗️

هاه امالا شن؟

قالي الإنسان بطبيعته ما يحبش يورّي الجانب السلبي في حياته ويحب يظهر كل شيء حلو لدوافع غريزية منها حب الإنسان أن يراه الآخرين ناجح أو عنده فلوس أو أو...

وطبعا الشعور هذا يزيد مع زيادة المتابعين، يعني كل ما يزيد عدد المتابعين "كل ما يزيد اختلاقه لظروف مثالية في حياته باش يصورها وينزلها ولو على حساب فلوسه أو صحته" وأنا نقتبس هني في الكلام ونترجم 😆

فالمهم اللي نبي نوصله ليكم أنكم عمركم ما تصدقوا حد مشهور أو عنده هلبة متابعين أن حياته واو وأنه شخص ناجح على كل الأصعدة (مثالي)❗️

حتى أنا ردوا بالكم تحسابوني حاجة واو ولا تاخدوا عليا صورة أني من كوكب آخر لأني ما نوريش فيكم إلا الحاجات الباهية 😆 طبعا الكلام هني موجّه بالتحديد للناس اللي تتابع في حساباتي الشخصية راكم ما تعرفوش حتى 5% 🤏🏻 على حياتي الخاصة حرفيا ولا تعرفوا التحديات اللي نخوض فيها كل يوم.

وهي موفقين جميعا

شكله احنى متقدمين أكثر من الأجانب❗️

مقعمزين في الكانتين كل واحد لاهي، فجأة فيه زوز علا صوتهم وكانوا يتناقشوا في مسألة.. المهم فجأة سألوني قالولي بالك تقدر تساعدنا..

من هني ومن هني تعرفت عليهم وطلع واحد منهم عمره 19 سنة (ركز على العمر) قلتله ابعتلي صور المسائل باش نشوفهم براحتي في الحوش.

قالي تمام!
قلتله هذا الانستاغرام متعي، قالي ما عنديش.
قلتله هذا الفيس متعي، قالي ما عنديش.
قلتله هذا التلي متعي، قالي ما عنديش.
قلتله هذا رقمي الواتس، قالي ما عنديش.

قلتله امالا بتكلمني على الأرضي ولا شن؟؟
قالي ماعنديش إلا ايميل❗️

وانا وقتها نحسابه يبصر.. بعدها حسيت انه ملامحه جدية (تي شنوووو❗️ تي هذا كيف عايش❗️)

قالي كلمة لتوا ترن في ودني، قالي "ماعنديش وقت للسوشال ميديا"

يا ودي لا إله إلا الله، شن يقول هذا؟ قلتله يا سيدي كيف تغير في جوك شن تدير لما تكسد؟ قالي نطلع نغير في جوي مع اصحابي.. باهي كيف تتابع في الاخبار؟ قالي التلفزيون او من صحابي اللي عندهم حسابات على السوشال ميديا!

من هني ضربت في راسي حاجة، إني نجرّب الحياة بدون السوشال ميديا وقررت ندير الشيء هذا في رمضان (وكان في بالي اني مش حنصمد اكثر من يومين والحياة حتكون بائسة)

فعلا درته التحدي هذا والحمدلله الدنيا بخير وطلعت العملية سهلة والسوشال ميديا مش إكسير الحياة زي ما يقولوا وبالعكس درت هلبة انجازات نحكيلكم عليها في وقت تاني والأهم أن ذهني وفكري بدي صافي بشكل كبير وتركيزي زاد.

وكل عام وأنتم بخير، وعقبال داير، ومن #العايدين الفايزين✨️🎉🤝🏻💐

قبل ما نهنيكم بالشهر المبارك… خليني ناخد دقيقة من وقتكم، ومش حتندموا في النهاية:

"قدّم لنفسك في هذا الشهر على قد ما تقدر‼️"

ايه بالزبط زي ما قلت.. قدّم لنفسك.

✅️ قدّم لنفسك بأنك تضبطها وتقوّمها وتسيطر عليها وتوجهها للإتجاه الصح.

✅️ ما فيش أفضل من هالشهر باش تعيد ترتيب حياتك تراجع روحك وتلملم نفسك اللي ضايعة وتبدأ بداية صح.

✅️ لو ربي مُبتليك بعادة سيئة (إدمان سوشيال ميديا، تسهر هلبة، مسلسلات.. الخ) هذا أفضل شهر تتحدى نفسك فيه وتقطعها وربي بدعائك مش حيضيعك.

✅️ حاب تكوّن عادةكويسة؟ رمضان هو الفرصة الذهبية والله ✨️ (شهر من أفضل الشهور "ولو عرفنا قدره لما كانت لنا عبادة في هذا الشهر غير #حمد الله عليه")

✅️ حدد ولو هدف واحد تطلع بيه من رمضان وكمل عليه بعده.. مثلا: 👇🏻

1️⃣ نختم القرءان ولكن مش ختم عادي، بنطلع بأكبر قدر ممكن من الاستفادة والفهم لمعاني القرءان العظيم "تدرّب على التركيز والبحث❗️".

2️⃣ عندي وزن زائد ونبي ننقص 5 - 7 كيلو.. يلا بينا نشترك في GYM وقول يارب وبمناسبة الوزن:
حتى لو ما عنديش وزن زايد تحكم في نفسك وبدل ما تعبّي بطنك للآخر وأنت على سفرة الفطور نقص مقدار أكلك بحيث تدرّب نفسك أن مش كل شيء خاطرك فيه تنوله "تحكم في النفس❗️".

3️⃣ الشباب اللي تدخن يلا بينا قعدت من غير دخان 12-16 ساعة، يعني ممكن نقعد بقية اليوم من غيره "تحدّي كسر العادة❗️" التغيير ممكن بس القرار منك.

والأمثلة تطول وما تتمش..

ولو وصلت لهني، شاركنا فكرة إيجابية غير اللي ذكرتهم.
يمكن حد يقرأ تعليقك ويتبنّاها... ويكون الأجر في ميزانك 😉

جملة لما سمعتها صدمتني فعلا❗️

"دوّر على أقرب خمسة أشخاص ليك وحتعرف أنت وين‼️"

كنت مقعمز في أمان الله نقرا وفجأة سمعت معلومة عابرة من شخص "طبعا مش قاصد نكسر ودني لكن اللي قاله خلاني نكسر ودني ونلفت حتى رقبتي وقعدت نسمعله بانتباه😆"

قال هذا الشخص حرفيا: " متوسط نجاحك، سعادتك، صحتك، فلوسك، تفكيرك..الخ الخ هي متوسط اللي قلتهم كلهم في أقرب خمسة أشخاص ليك"

وبعدها بدي يفسر: " انك لو مصاحب ناس مهتمة بصحتها فلازم يعدوك وتبدا زيهم وحيجروك تاكل زي ماكلتهم وتدرب زيهم"

" لو مصاحب ناس مثقفة ومتع قراية حيخلوك تقرا وتجتهد غصبا عنك"

" لو مصاحب ناس تفكر كيف تكون مستقلة ماديا وتحب تبزنس وتدور في فرص استثمار فأكيد حتولي زيهم"

وحتى طريقة كلامك... حتكون نسخة من كلامهم ومصطلحاتهم!

ومش محتاج نقولك لو كانوا أقرب خمسة أشخاص ليك سلبيين وفاشلين.. الخ الخ كيف حتكون حياتك.

وهني فهمت قصده بأنه يحاول يوضح نقطة مهمة جدا وهي #تأثير الصحاب في الشخص وهو عامل مهم في تحديد هويته وشخصيته.

طبعا الكلام أطول من أني نسرده في بوست لأنكم حتملّوا..😪
خلاصة الكلام هو يا عزيزي القارئ اختيارك لأصحابك لا يقل أهمية عن اختيارك لشريك حياتك أو تخصص دراستك لأن كلهم حيحددوا مستقبلك وكيف حتكون حياتك...

فلذلك أنا بنخليك تسأل نفسك (وخلي العاطفة على جنب):
وبدون ذكر أسماء، هل أقرب خمسة أشخاص ليك قاعدين يرفعوا منك ولا قاعدين ينزلوا فيك من غير ما تحس🤔؟

كم عندكم خبير ف هدا المجال؟🤔

Fact:
بعيدا عن محتوى الصفحة لكن والله لما تغسل المواعين لمجرد أنك تبي تاكل فيهم مؤلم أكثر من لما تكون غاسلهم من مدة وتجي تستعملهم 😮‍💨

أنا حاليا عرفت شعور أمي لما تكون كيف غاسلة المواعين ونجي ناخذ طاسة ولا حاجة نبي نلبزها 😶

يا شباب يا داير يا لاقي لما تلقوا حد من العيلة كيف غاسل حاجة في المطبخ حاول انك تغسل اللي تبي تستعمله أو تستناهم لين يطلعوا على الأقل ما تديرهاش قدامهم عيني عينك 😆

قداش ما استاحشت الميكانيكا 😁
وصلتوا في باب البكرات ولا مازال؟

ليس أخطر ما نعيشه اليوم هو البُعد عن الله، بل الاعتياد على هذا البُعد دون أن نشعر أو ندرك ذلك. أن نستيقظ فأول ما يلفت انتباهنا هو البحث عن الهاتف، أن نمرّ على عشرات المقاطع التي تتحدث عن الإيمان، فنخرج منها مطمئنين، كأننا أنجزنا شيئًا، بينما الحقيقة أن شيئًا لم يتحرّك. نحن لا نفتقد المعرفة، ولا تنقصنا المواعظ، لكننا نعيش حالة امتلاء خادعة، امتلاء لا يقود إلى قرب ولا يثمر تغييرًا.

من هذه المنطقة الحساسة يبدأ بودكاست كيف نجد الله في ضجيج العالم الرقمي؟ مع د. خالد حمدي | بودكاست حان الآن؛ لا بوصفه حديثًا عن الهاتف أو السوشيال ميديا، بل بوصفه محاولة لفهم ما الذي حدث لعلاقتنا بالله في زمن أصبح فيه الضجيج هو الخلفية الدائمة لكل شيء.

السؤال المطروح ليس: ماذا نفعل بهذه الأجهزة؟ بل: ماذا فعلت هذه الأجهزة بقلوبنا في زمن التلقي المستمر، حيث نظن أن الأمر لا يتجاوز المشاهدة، بينما الأثر يتسلل إلى الداخل بصمت.

الفكرة التي تتسلل بهدوء طوال الحديث أن الإنسان ابن بيئته، وحين تصبح البيئة الغالبة صامتة، باردة، “حديدية”، ينتقل شيء من برودتها إلى القلب. تبهت المشاعر، تجف العبادة، وتتحول العلاقة بالله من وصل حيّ إلى أداء ثقيل، لا لأن القلوب فاسدة، بل لأنها مُرهَقة أكثر مما تحتمل.


رابط البودكاست في التعليقات👇🏻

أمس كنت نسقد فيهم لامتحان الميكانيكا واليوم نهني فيهم بالتخرج🤝🏻

دفعة 2003🔥💪🏻