14/02/2018
سؤال يتكرر كثيرا كثيرا كثيرا.
س/ لو سمحتي نبي نسألك علي حاجه، ولدي/ بنتي اتحط في يدها ع المنطقه الخاصة.
شن الحل مانفعش معاه لا ضرب لا مسايسه؟.
س/ من فضلك نبي حل ولدي/ بنتي اتمارس في العاده السريه.
_كم عمره؟
_3 سنوات.
_!!!!!!!!!!!!!!!!!!!!!!!!!؟.
انصدمت في تفسير الأم للحركه، لأن الطفل تحت سن البلوغ من 12 ل 14 سنه مافيييييش حاجه اسمها هكي.
باهي شن معناه التصرف هدا!!..
الطفل هدا نمطه حركي محب الالتصاق.
النوع هدا يتحرك ويجري واجد، شبه مايركحش، عنيد واجد، وعصبي بقوه، خاصة لو رباه مربي عصبي، لو انضرب ماعنداش مشكله تكون لغته مع اللي يضرب فيه هي الضرب ايرد الضربه ومايعرف صغير لا كبير.
عنده حاجه ملحه للحضن والتلصيق في أمه أو أي حد ممكن ايوفره الشي هدا.(احذروا).
الطفل من النمط هدا لو ما حصلش كفايته من الأحضان والالتصاق، يلجأ للمس عضوه الحساس، أول مره ممكن تكون بالصدفه بس لما يلقى فيها شعور راحه وتعويض عن احتياجه والفقد اللي حاس بيه، يقعد ايكرر فيها عشان ايلبي احتياجاته، ولا يعرف ناس لا أم لا أب ممكن ايدريها قدام أي حد.
_ الحل هو كثرة إحتضان الطفل والالتصاق والاحتكاك بيه بشكل مستمر، والأفضل يحتك بجسمك بشكل مباشر، مثلا لو حضنتيه حكي خدك بخده، وقت تحضنيه ارفعي كمك وخلي خده يمسح علي زنودك ورقديه بالطريقه هدي. مع تخصيص وقت للضحك واللعب الممتع ، والتوقف عن العصبيه والضرب والصراخ نهائيا.
كل ما ايدير الحركه معناها هو في أوج احتياجه للاحتضان, تجاهلي حركته ديري روحك ماشفتي شي وتعالي احضنيه وبوسيه ولاعبيه.
في خلال شهور وأقل ايبطل العاده هدي نهائيا بإذن الله.
_النمط هدا لو ما أشبعنا حاجته وحصل كفايته من الالتصاق يعتبر قنبله موقوته، وكارثه تمشي على الأرض في مرحلة المراهقه بذات، وأحيانا تبدأ الكوارث حتى من عشر سنين.(خاصة مع الانفتاح اللي صاير توا).
_الطفل اللي من النمط هدا، لو عاملناه بآدمية واحترام واشبعنا احتياجاته، يعتبر أحن طفل علي وجه الكرة الأرضية لو لفيتي الدنيا كلها، مش حتلقي زيه ايحن وايدور وايخاف عليك من نسمة الهوا. رغم عنادهم القوي ومشاغبتهم اللي ماتنتهي. لكن قلبهم زي النسمه سبحان الله لو سمع منك (آه) بس تلقيه جاي يجري عليك ويحضن وايبوس وايسكت فيك.
_ يتعلم بالقدوة ثم القدوة ثم القدوة، أي حركه اديريها في الغالب ايتبعها من دون وعي، وصعب ايدير حاجه غلط، ويفهم كلامك لما تقنعيه بالحوار والهدوء، لو كنتي انتي اديري فيها، هدرزي لغدوا الصبح مش حيسمع الكلام.
_بالنسبه للدراسه لازم يقرا وهو يتحرك، حطيه علي كرسي هزاز أو كورة المطاط الكبيره، في أمريكا بعض المدارس مخصصين كراسي للنمط هدا، فيهن شريط مطاط جهة الرجلين عشان يقرو ويتحركو، كل ماتحرك أكتر كل مازاد تركيزه.
